2 Yʉanes 1 - Kálar Nzyɛ̌m : Ejwán é Sáá

Meswɨhlɨ

¹ Yé ó mɛm, tyɛ̂b esôʼ ɨ́ Mbɛ̌r-Nzyɛ̌m. Me lɨ́ ecɛmǎ dimé mʉ́má Nzyɛ̌m á twâr nyá, bé e bwán bé. Me lɨ́ ekpɛl bɨ́n lɨ́ otyeetye. Ntʉ mé omér dí ekpɛl bɨ́n. Yé ntémé, yé ó bɨ̌h e baá bɨ́bɛ̂h dí egʉ́a ótyeetye bá.

² Mě cɛma bɨ́n mekaná mâʼ ó, lɨ́ esú ó, me pâʼlaa otyeetye o dí ɨ́ mɨná gá tʉ́ŋlʉ̌ wɨ́. Wé ódi ɨ́ mɨná gá ó, melú mé mpóʼo mɨ́mɛ̂h.

³ Metyɛʼ me mpóm, le njɨ́ʼá nkóó le mepyɛbla, byé díʼee e mɨná gâ, duho e Nzyɛ̌m Sɔ́ŋ, bé e Yésʉs-Krîst, Mwân mé Nzyɛ̌m Sɔ́ŋ ɨ́ nzɨ̌ otyeetye wɔ́ɔ́ ti e kpɛ̌l yɔ́ɔ́.

Otyeetye ndu e mpam

⁴ Me á si bu jóʼo membɨa ɨ́ jɔʼ mé á jóʼo ó, bwán bô, bé lɨ́ edû kʉ̌ tyen lɨ́ otyeetye tʉ́ŋlʉ̌, lɨ́ edû mpʉ̌ Nzyɛ̌m Sɔ́ŋ á tyêl mɨná gá etié yɨ́.

⁵ Nó, ɨ́ báánâ, ntʉ édwán lé étié mé dí ecɛma bɨ́n lɨ̂. Yé ó etié e myâ bɨ́n á boo bi, duho ɨ́ menyɛ̌l lɨ́. Dimé mʉ́má nyâ, mě jɨʼlá e bɨ̌n ó, mɨná kpɛ́laa gá páʼ gá nyɨ́ná!

⁶ Mpʉ mʉ̂r jálá le elɛ̂ʼlě kpɛ̌l yɨ́ ó yɨ̂: mɨná bâʼlaa metié mé. Nó ó, etié laá, lé ó laá bɨ́n á jóʼo, duho ɨ́ menyɛ̌l lɨ́. Nzyɛ̌m á tyêl bɨ̌n lǎ ó, lɨ́ esú ó, bɨ̌n dúʼoo kʉ̌ tyen waá.

⁷ Ebě, bibɨ́bla bí ólɛ̂ʼla, byé mû ó sí buo ɨ́ sí yɨ́yɛ̂h, lɨ́ etô le edímle bʉ̂r. Byé akpɛl ékam ó, Yésʉs-Krîst á nze ɨ́ sí yɨ̂ʼ ó e nyʉ̂l mʉr mpâ. Mʉr kɛ́lá búʼó gá yɨ́ná nyá, nye ó ndímla bʉr le ntɨ̂m e mbɨn mé Yésʉs-Krîst.

⁸ Bɨ̌n e báʼ gá bɨ̌n bʉr o tɨ̂. Abîr gá ó, bɨ̌n dímlaa sá mɨ́ná bé á boo séa gá lɨ́ esú lé yɨ́. Sáŋáá gá ó, bɨ̌n bíʼee myɛ́na maá ɨ́ ntʉʉʉ́.

⁹ Nyʉ́ʉ́ mʉ̂r nyɛɛ́ jɨ̂ʼ lɛ́ʼlá mé Krîst, ɨ́ jɨ̂ʼ jɨ̂ʼ, kǎ líʼě lɛ́ʼlá waá, ntaa, tó púma dóló e gúú swîh nó, nyé atíʼe ɨ́ mpúhlá e Nzyɛ̌m. Waá dí ejɨ̂ʼ lɛ́ʼlá waá, alíʼe wé nyá, nyɨ́haá ó dí ɨ́ mpúhlá e Sɔ́ŋ, ti e Mwân bɨ́bɛ̂h.

¹⁰ Ebe nó, mʉ̂r swáhwá nze, adwe bʉ̂r lɛ́ʼlá ngwár waá nó, mʉ̌r sá anʉa nyé ɨ́ mimbɛ̌r mín tʉ́ŋlʉ̌. Abára gá e né ntémé.

¹¹ Ebě, mʉ̌r bárá e né nyá, nye lɨ́ enʉa ntœ́b ɨ́ bisyɛ́ɛla bí ébébe mʉ̂r waá dí esâ bí.

Lwǐb épíhe

¹² Me ɨ́ buo bísá bí élɛ́ɛ bɨ́n. Nó ó, mɨ́ tíʼe ɨ́ lémé wâm ó, me ácɛma bɨ́n byǎ lɨ́ epéb ndu e medíbé mé lwâb. Mě bûʼlá ó, me ónze kwá nyɨ́n, mé olwib e bɨ̌n, mɨná nkʉ̂ beela gá mempǒm, mbi dí ó, sʉhʉʉ gá yɨ́ná, yé díʼee ntinɨ̂ e ntinɨ̂ wɨ́.

¹³ Bwán mé mɨ́ɔɔ́ gǒ, bʉr ó Nzyɛ̌m á twâr bá, bé ntémé bé lɨ́ esoho gô.