Bìoball air-loidhne

2 Timotɛ 3 - Kálar Nzyɛ̌m : Ejwán é Sáá

Melú mé ósûʼla má

¹ Gwá gʉ́ǎ sɨ̂: ɨ́ melú mé ósûʼla má, yé óbe ó e bijɔʼ ɨ́ kɔbla kɔbla.

² Ɨ́ jɔʼ yaá, bʉr bé ójaá kpɨkpɛl ó, njɨ bé bʉr o tɨ̂. Bé ókpɛ̌l mɔnɨ́, ntaa sʉ́ŋa. Bé óbuú sâ jáálé le enkɛ́ɛ e nyʉ̂l. Bé óbuú sâ nkěh, le esâ ntémé obyɛ̂l bɔ́ɔ́ ebɨ̌h. Bé álɛ́ɛ émbɨa bé dí esáŋɔɔ lɨ́. Bé abe e nkul enʉa mílɔ̌b mé Nzyɛ̌m, gbâ myé ɨ́ nkɔb.

³ Bé óbe ó e cére. Bé óbuú sâ nzyéé ɨ́ jɔʼ bé dí e milɔ̌b yɨ́. Bé óswêʼ míé mé bʉ́ʉ́ bʉ̂r. Bé ágʉ́a émâr míléme. Bé óbe ó bʉr o méngʉ́ná. Bé óbene bísâ bi dí ɨ́ mbɨa bí.

⁴ Bé óbɛ́ma bʉ̂r ó njoo yɔ́ɔ́. Bé ósâ bísyɛ́ɛla bíbyɛ̂h ó, apǎ nyɛɛ́ pahle. Bé óbuú nkɛ́ɛ ményʉ́l mɔ́ɔ́. Bé ójaá kpɛl ó, njɨ bisyɛ́ɛla ményʉ́l mɔ́ɔ́ dí ebuú gwɨ̂m bí, akpɛlɔɔ̌ Nzyɛ̌m.

⁵ Bé ójaá dwidwě Nzyɛ̌m kûm ó, njɨ ɨ́ bikonó mínum byɔ́ɔ́. Tó kœb ó, bé ópɨpɨr ó, pɨrɨ́ɨ le ekɛ́la nkûl dí ɨ́ búʼó gá yɨ́ná nyɨ́. Bɨ̌n bé ayɨ́ be e ndwáala e mbi bʉ̂r waá.

⁶ Bʉr ó sɔ́má yɔ́ɔ́, bé ónî ɨ́ mimbɛ̌r mi bʉ̂r mí onkán ɨ́ myaaa, lɨ́ esáa nzɨ́ edulo bʉ́bá dí elúʼo pɨ̂ʼ bá. Bʉbá baá, bé óbe ó mimɛ́rá ɨ́ mpila mísyóm myɔ́ɔ́. Bé óbe ó, baá bigwɨ́má byɔ́ɔ́ dí etyěn gúmó yɨ́yɛ̂h bá.

⁷ Ɨ́ jɔʼ yɨ́yɛ̂h, bʉbá baá, bé ó njɨ lɨ́ ejɨ̂ʼ bísʉkʉ́lʉ. Bé ákóʼó gʉ́a yɨ́ɛ otyeetye ɨ́ pébébé.

⁸ Bibɨ́bla bí ólɛ̂ʼla byaá, byé óbe ó e mbǐ syɛ́ɛla gwár e gwár Yánɛs, bé e Yambrɛ̂s á be e wé wɨ́. Bé á si lwímla e Moyɨ̂z. Tó kœb ó, bʉr ónɨ̌, bé ólwímla le otyeetye. Mepɨʼ mɔ́ɔ́, mé ɨ́ lwaʼwo. Ɨ́ páʼ búʼó yɨ́ná, bé abûʼlǎ mpǎŋ búʼó.

⁹ Bé átô dóló e sá pɨ̂ʼ yɔ́ɔ́, ebě, ogʉ̌ wɔ́ɔ́, wé ónyɨ̂n bʉ̂r ɨ́ mîh ɨ́ kpɛŋlɛm, jwɨʼ gwár e gwár e mpʉ ógʉ̌ mé Yánɛs, bé e Yambrɛ̂s, wé á nyɨ̂n ɨ́ ponó yɨ́.

Metwɨ́ɨ́ mé éswéhlɨ́

¹⁰ Gua mû ó sí kʉ́ gwá beě mpʉ mé dí elɛ̂ʼle yɨ́, bee ntémé kʉ̌ tyen mé dí edû wɨ́. Go á si gʉ́a mitíʼá mí lémé wâm, ti e búʼó yâm. Go lɨ́ egʉ́a ntémé bíhwó nyǎm, kpɛ̌l yâm, ti e mpʉ mé dí esia e mitúú yɨ́.

¹¹ Go lɨ́ egʉ́ǎ mpʉ bé á tíble me, le edwe mé mitúú yɨ́. Bé á tíble me nó ó, Antiôs, Ikóniʉm, ndu e Lístra. Go lɨ́ egʉ́a mímbi bé á tíble me, mɛm njɨ lɨ́ edûhwo mí. Tó kœb ó, Tî Yésʉs á si dwih me ɨ́ tíblá yɨ́yɛ̂h.

¹² Mʉr nyɨnyɛ̂h kpɛ́l étíʼe lɨ́ edwě Nzyɛ̌m kûm, le epûhla e Yésʉs-Krîst nyá, ótíblɔɔ.

¹³ Bibɨ́bla bi bʉ̂r, ti e bʉr o míkóo bɨ́ɛ, bé ótô dóló e mebébe mɔ́ɔ́ ó, tótôʼ. Bé ótô dóló le edímle bʉ̂r. Bé bʉr o tɨ̂, bé ótô le elɔ̂ʼwa ɨ́ mikóo mi bʉ́ʉ́ bʉ̂r.

¹⁴ Nó sá gó á jɨ̂ʼ, gʉ́a ntémé ó, yé ó tɨ̂ʼ yɨ́, yé díʼee go simá ɨ́ lémé gô. Sá ajɨha mímbi mi bʉ̂r gó á nʉa milɛ́ʼlá kwá nyɔ́ɔ́ bá.

¹⁵ Símsáá ntémé mpʉ gó á boo táare egʉ́a Mékaná mé Nzyɛ̌m, duho lɨ́ ontwǒm gô yɨ́. Mekaná maá, mé e nkul ecɨ̂l mɨ́ná. Ocwóó waá, wé lɛ́ʼlé mɨ́ná ó, edyɛ̂ʼwo e Yésʉs-Krîst. Búʼó yaá ó dí etíʼ mɨ́ná.

¹⁶ Mekaná mé Nzyɛ̌m mɨ́mɛ̂h, mê tɨ̂ʼ ó, ebě, Nzyɛ̌m á si dwe bʉr pɨʼ ecɛma mê. Mé e nyɔm lɨ́ esú lé élɛ̂ʼle mɨ́ná, le edwe mɨ́ná mebě ɨ́ jɔʼ mɨ́ná sâ ébébe yɨ́. Mé lɨ́ esɨ̂ʼ mɨ́ná, le etɨ́e mɨ́ná mpʉ mɨ́ná jálá le edi lɨ́ otîtyěl yɨ́.

¹⁷ Mɨ́ɛ ó dí ekomlo mʉ̂r mé Nzyɛ̌m nyɨnyɛ̂h ó, nye díʼee ɨ́ cǎr ó, nye sâʼ mbǐ syɛ́ɛla mpâ wɨ́wɛ̂h.

« Roimhe

Air adhart »

Lean sinn:

Ceanglaichean taic

Sanasan