2 Timotɛ 2 - Kálar Nzyɛ̌m : Ejwán é Sáá

Diʼeě nkɔ́ɔ́ dɔ̂m

¹ Mwân wǎm, go náǎ ó e nkul dí eduho ɨ́ metyɛʼ me mpóm Nzyɛ̌m á sʉ go, ɨ́ nzɨ̌ mé Yésʉs-Krîst má nyɨ́.

² Lɛ́ʼlá wɨ́wɛ̂h gó á jóʼo me lɨ́ edwě buobuo oboʼlo wɨ́, pɛ́hɛ́ɛ́ bʉ̂r o jálá le ebúʼlɔɔ bá, go e lɛ́ɛ́ bé wǎ. Bé bʉr o tɨ̂ʼ ósûʼla ó, bʉr o ngá tô le elɛ́ɛ bʉ́ʉ́ bʉ̂r wǎ bá.

³ Gua ntémé, siaǎ e mitúú mpʉ mê. Diʼeě mpǎŋ nkɔ́ɔ́ dɔ̂m mé Yésʉs-Krîst.

⁴ Mʉr á tyélɔɔ ɨ́ dǐ nkɔ́ɔ́ dɔ̂m nyá, nyé abe lɨ́ esyɛŋa ɨ́ milɔ̌b mí sí yɨ̂. Nyě yéʼwó sɔ̂ʼ ó, njɨ syɛ́ɛ́ yé, lɨ́ esáa ó, mʉr á tyêl nye tɨ̂ʼ nyá, nkʉ̂ sêʼle nyê.

⁵ Bʉ̂r obá sá nzwámlá nó, mʉr ngá bórɔɔ̌ káráá mpʉ myɛ́na nyá, óbe ó njɨ waá ngá sila nyʉ́ʉ́, dû mpʉ bé á pa tyêl metié mé éjwɨʼla ménkul maá yɨ́ nyá.

⁶ Lóbila dí egwá séa yɨ́ ó jálá le enyɛɛ́ bi méde me dí epâh ɨ́ pemé má. Mé ó dí ejala e nkɔb nyé.

⁷ Kʉ́ gwá baʼle ékǎn mê lɛ́ɛ́ gó lɨ̂, ebě, Nzyɛ̌m ódwe gó ocwóó ɨ́ mipáʼ mímyɛ̂h.

⁸ Sísímsáá Yésʉs-Krîst, nta mé David, á pah nyá, mpʉ̌ Mbɨambɨa Lɔ́ɔ́ wâm dí elɛ́ɛ yɨ́.

⁹ Bʉr, bé á si kâʼ me menkara mpʉ̌ sá lɛ́ɛ́, me ó syɛ̂l ebébe. Mě jaá sia e mitúú ó, njɨ ɨ́ lɔ̌b Mbɨambɨa Lɔ́ɔ mé dí etúno wɨ́. Damá jóʼo nó, ntʉ̌ Mbɨambɨa Lɔ́ɔ́ mé Nzyɛ̌m wɨ́ɛ á káʼɔɔ.

¹⁰ Mě dúhwó mítúú mímyɛ̂h ó, lɨ́ esú é bʉ̂r Nzyɛ̌m á twâr bá. Nye á twâr bé ó, bé bíʼee twiʼ, ti e kûm dí edǐ njʉ̌m dǐ e njʉ̌m dǐ nyɨ́, ɨ́ nzɨ̌ mé Yésʉs-Krîst.

¹¹ Ekǎn lɨ̂, lé ó sá ébûʼlɔɔ: «Mɨ́ná púhlá gá e Krîst lɨ́ eswie lé nó, mɨná tíʼe gá ntémé e né jwɨʼ gwár e gwár yaá.

¹² Mɨ́ná dúhwó gá mitúú nó, mɨná gá le onɔ́ɔ́ di ntémé ojwɨ́ɨ. Mɨ́ná kɛ́lá gá nye nó, nye ntémé kɛ́la mɨ́ná gâ.

¹³ Mɨ́ná damá be gá baabûʼlɔɔ, nyɨɛ ɨ́ wé pâʼ, nye ó mʉr jálá le ebúʼlɔɔ nyá. Nye ákóʼó sóŋlo nyé mʉr tɨ̂.»

Syɛ̂l mesâ Nzyɛ̌m dí ekam nyá

¹⁴ Símsáá bʉ̂r milɔ̌b mî: go e gbá bé mpéné ɨ́ míh mé Nzyɛ̌m ó, bé ayɨ́ kǎ gœ́a njɨ ɨ́ lɔ̌b mékǎn. Megô maá, mé abe e nyɔm. Mé ámû ndáma bʉ̂r o dí ejóʼo mégô maá bá miléme.

¹⁵ Léme díʼee go ɨ́ báná báná ó, go ódǐ mbi mʉ̂r Nzyɛ̌m óbóblo, ntɔ̂ʼ bee ó, wé e nyɔm wɨ́. Sáŋáá ó, go díʼee syɛ̂l mesâ dí abi ésɔ́m ɨ́ syɛ́ɛ́ yé nyá. Jɔʼ gó ólwilwib e bʉr ɨ́ sá dí edumo le otyeetye mé Nzyɛ̌m yɨ́, dúʼóó ntɨ̂n. Go e syɛ́hlé mímbóó.

¹⁶ Syɛ́hláá olɛblɛ̂b o mpyóó ó dí abe e nyɔm ɨ́ búʼó wɨ́. Bʉr o dí egbâ ményʉ́l mɔ́ɔ́ ɨ́ nzɨ̌ nyaá bá, bé sóʼló bʉ̂r ó, bé sâʼ Nzyɛ̌m nkěh.

¹⁷ Lwǐb yɔ́ɔ́, yé óbe ó mpʉ pɨ́ɨ́ mû sí bwaʼ, nye mû ɨ́ dɨ dɨ nyɨ́. Ɨ́ sɔ́má bʉ̂r o dí elwib nó bá, yé e Iménaus, bé e Filétos.

¹⁸ Bɨ́ sâ ébébe énɨ́nɨ́ɨ́. Bé amɛ̂r ótyeetye. Bé lɛ́ɛ́ ó, Nzyɛ̌m, nyɨ́ boó pɛh ódwe kɔ́m. Lɔ́ɔ́ wɔ́ɔ́ waá, wɨ́ dímle bʉ́ʉ́ óbûʼla búʼó yɔ́ɔ́.

¹⁹ Damá jóʼo nó, nkǎn Nzyɛ̌m á tyêl nyɨ́, nye dína ó, lɨ́ etyɛ̂b ɨ́ sɨŋ. Mekǎn nyé á cɛma, dumo e nkan nyaá má ó mâ: Nzyɛ̌m, nye lɨ́ egʉ́ǎ baá o dí egúmo e né bá. Mʉ́ʉ́ mé tɨ̂, mé ó: Mʉr dí ekɛn díé mé Tî gá wɨ́ná nyá, nye ɨ́ jala le esyɛ̂hle ébébe!

²⁰ Ɨ́ ntwǎŋ mbɛ̌r, yé e bisʉ́á mimbi mimbi. Ntʉ bíbyɛ̂h dí misɛ́á ɨ́ gʉ̂l, nkʉ̂ ɨ́ nkóhó mɔnɨ́. Bisʉ́á bínɨ̌, byé e nyɔm ɨ́ jɔʼ bísyɛ́ɛ́ bí dúu mû lɨ́ esáŋɔɔ yɨ́. Byúú bísʉ́á bíɛ, byé ó mikpɛʼá ɨ́ bilɨ́. Byúú ntémé, mimeá e deʼé. Bíhaá bísʉ́á, byé biŋɔɔ ó, njɨ ɨ́ bisyɛ́ɛ́ bi dí ɨ́ buú pyéhɔɔ bí.

²¹ Mʉ̂r syɛ́hlé bísyɛ́ɛla bʉ̂r jálá le ebene bí nó, Nzyɛ̌m ópɛ̂h nyé lɨ́ esú é bísyɛ́ɛ́ bí dúu, le etyêl nyé ɨ́ tyé mʉ̂r wé dí tí nyá. Mʉr waá ókʉ́ tíʼě ntinɨ̂ e ntinɨ̂ lɨ́ esú lé émbɨa mé Nzyɛ̌m, lɨ́ edi ɨ́ cǎr ó, nyě séá ó nye syɛ́ɛ́ yɨ́yɛ̂h nyé ótɨ́e nyé yɨ́.

²² Diʼeě e mpaŋ ncɛ́rá e bigwɨ́má bí óntwǒm. Dúʼóó njɨ bisâ bi dí tîtyěl bí. Dyɛ́ʼwáá e Nzyɛ̌m. Sáʼ bʉ̂r mpam. Sáʼ ó, bʉr bíʼee mepyɛbla. Sɨ́sáʼ nó, bɨ̌n e bʉr bɨ́bɛ̂h o dí ejɨʼla e Nzyɛ̌m e miléme ɨ́ sɔ́ɔ́ɔ́ bá.

²³ Diʼeě e mpaŋ ncɛ́rá e bʉr o dí egœ́a mpʉ bígʉʼlʉgʉ́, nkʉ̂ baá o dí abe lɨ́ enʉa mílɛ́ʼlá bá. Go ɨ́ jala le egʉ́a ó, milɔ̌b myaá, myé jaá byâ sɔ̂ʼ ó njɨ bitɔm.

²⁴ Tó kœb ó, yé ajala ó, syɛ̂l mesâ mé Nzyɛ̌m gœ́aa. Nye ɨ́ jala le edi ɨ́ nzahwa nzahwa páʼ bʉr bɨ́bɛ̂h, le egʉ́a édwe bé milɛ́ʼlá, le edûhwo ébébe.

²⁵ Yé jala ó, nye gwâ tɨ́e bʉ̂r o dí edû nyé e megô bá, e njwɨr ɨ́ tala tala. Nyé sá nó wá, Nzyɛ̌m óbɛ̌m dib bé nzɨ̌ ó bé túmaa mikoo e misyóm myɔ́ɔ́, le edwira míléme. Bé ogʉ́a ótyeetye ɨ́ jɔʼ yaá.

²⁶ Bʉr o dí ɨ́ mpila mé sɔ́ŋ meleme bá, bé ó lɨ́ bi ó, bé sâʼ mpʉ nyɨ́ɛ dí egwɨ̂m yɨ́. Sâ gwár, otyeetye mé Nzyɛ̌m, wé óbɛ̌m sâ ó, bé dúhaa ɨ́ mpila yaá.