2 Timotɛ 1 - Kálar Nzyɛ̌m : Ejwán é Sáá

Meswɨhlɨ

¹ Yé ó mɛm, Pɔ̂l, mʉr milʉ́mlʉ́ mé Yésʉs-Krîst ɨ́ lɔ̌b gwɨ́má mé Nzyɛ̌m ó dí ecɛma gó mekaná mâ. Lʉ́mlʉ́ wâm, wé ó, me lɛ̂ʼlaa twiʼ nyé á kɛʼ mɨná gá yɨ́. Mɨná bé óbi gá twiʼ yaá ó, ɨ́ mpúhlá gá nyɨ́ná e Yésʉs-Krîst.

² Mě cɛmá ó, gua mwâ kpɛ̌l wǎm Timotɛ̂. Metyɛʼ me mpóm, le njɨ́ʼá nkóó, le mepyɛbla, byé díʼee e go, duho e Nzyɛ̌m Sɔ́ŋ wɨ́ná, bé e Tî gá wɨ́ná Yésʉs-Krîst.

Ndwéá nzyóo

³ Me lɨ́ edwě Nzyɛ̌m nzyǒo ɨ́ jɔʼ yɨ́yɛ̂h. Me lɨ́ esâ sɨ́n lɨ́ esâ mínjɨʼla ɨ́ lɔ̌b gô, móhó e pum. Mě séá nyé syɛ́ɛ́ yaá ó e mipahlá mí léme mi dí ɨ́ pyɛɛɛ mí, jwɨʼ gwár mpʉ bímpám byâm, byé á sɨsâ nye yǎ yɨ́.

⁴ Jɔʼ mé dí esímsǎ mpʉ gó á jɨ yɨ́, lémé wâm, wé lɨ́ ejóʼo ntɔ̂ʼ dwéh ébee gô. Ɨ́ jɔʼ mé óbáʼǎ bee gó yɨ́, bisʉhʉʉ, byé óbe mé ɨ́ léme lwɨ́ŋlá.

⁵ Mě sá ntémé ó, sîsimsǎ búʼó yô dí abě mbáʼrá e mikóo yɨ́. Yé ó mbǐ búʼó ngwár e ngwár nyɔ́ŋ mpám gǒ Lɔyîs, bé e nyʉ̌ŋ Eníke, bé á be e yé yɨ́. Me lɨ́ ekʉ́ gʉ́a ɨ́ lémé wâm ó, mbǐ búʼó waá ó dí go ntémé ɨ́ léme wɨ́.

⁶ Sá tɨ̂ʼ ó gó dí ɨ́ jala le esímsǎ ndwéá Nzyɛ̌m á lómlo go, waá gó á bi ɨ́ kɛlá mé á kɛl go mebó mâm wɨ́. Nó ó, sáʼ ó, go súʼaa bʉr e ndwéá gô waá.

⁷ Ebě, Sísǐm Nzyɛ̌m á ntɨh mɨná gá wɨ́, wé adwe mɨ́ná gá bʉ́á. Wé ó sísǐm nkûl, sísǐm kpɛ̌l ti e waá bíhwó.

⁸ Nó, ajóʼo bá sôn ɨ́ lɔ̌b mboʼlá mɨ́ná dí eboʼlo, dumo e Tî gá wɨ́ná wɨ́. Ajéʼe mɛ̂m. Ajóʼo sôn ɨ́ lɔ̌b ménkara mé mû kɛ́ʼá e mé má. Go e dúhwó mítúú mi dí edweŋɔɔ mɨ́ná ɨ́ lɔ̌b Mbɨambɨa Lɔ́ɔ mí. Go e dúhwó e nkǔl Nzyɛ̌m dí edwe nyɨ́.

⁹ Nye á si tíʼ mɨná, ntɔ̂ʼ jébe mɨ́ná ó, mɨná díʼee bʉr o dí egúmo e né bá. Nye á bé ajébe mɨ́ná ɨ́ lɔ̌b bísyɛ́ɛla bimpâ bíná. Nye á jébe mɨná gá ó, ɨ́ lɔ̌b bíjwɨʼ byé nye mʉr tɨ̂, le mpam nyé á be e né, nyaá nyé á be ó, nye ólɛ̂ʼle mɨ́ná nyɨ́. Nye á boo cwɨ́a e mɨná ó, kʉ́ e sí apǎ bě kuhá. Jɔʼ yaá ó nyé á nyɛɛ cwɨ́a e mɨná ɨ́ nzɨ̌ mé Yésʉs-Krîst yɨ́.

¹⁰ Mpam nyaá á ka nyɨ̂n ɨ́ kpɛŋlɛm ó, lɨ́ epyál mé Yésʉs-Krîst, Tiʼbʉr gá wɨ́ná. Nyɨ́ teʼle nkûl eswie. Nye á lɛ̂ʼle mɨná ɨ́ nzɨ̌ Mbɨambɨa Lɔ́ɔ ntémé ó, mɨná bi gá twiʼ mpâ, yaá dí njʉ̌m dǐ e njʉ̌m dǐ yɨ́ ó, ɨ́ Krîst.

¹¹ Mbɨambɨa Lɔ́ɔ waá ó mé dí etúno wɨ̂, ebě, Nzyɛ̌m á si tyêl me ɨ́ dǐ lɛ́a lɔ́ɔ wé, le yaá mʉ̂r milʉ́mlʉ́ wé, le yaá lɛ̂ʼla.

¹² Sɨ́ǎ yaá ó mé dí esia e mitúú yɨ́. Damá jóʼǒ mpʉ mé dí ebi mítúú mí tɨ̂ʼ yɨ́, mé ajóʼo bá sôn, ebe mé dí egʉ́a mʉ̂r mé á dyɛ̂ʼwo e né nyá. Mɨ́ bûʼla ntémé ó, nyě e nkul esâ ó, me bâʼlaa lɛ́ʼlá nyé á dwe me wɨ́. Nye óbaʼlě lɛ́ʼlá waá ó, tó pyâl ɨ́ móhó Yésʉs ngá báʼǎ nze wɨ́.

¹³ Gwá baʼle mílɛ́ʼlá mímpâ gó á jóʼo me lɨ́ edwe mí. Myé díʼee go mveʼle, sá gó ótô le ekala bʉ́ʉ́ bʉ̂r yɨ́. Lɨlɛ́ʼláá ɨ́ mbi waá, e búʼó, ti e kpɛ̌l mpʉ mɨ́ná dí ebi byé ɨ́ mpúhlá nyɨ́ná e Yésʉs-Krîst yɨ́.

¹⁴ Baʼlaǎ lɛ́ʼlá gó á dweŋɔɔ wɨ́ e nzɨ̌ Sísǐm mé Nzyɛ̌m dí edi ɨ́ mɨná nyá.

¹⁵ Go mû ó lɨ́ egʉ́a ó, bʉr ó sí Azía bɨ́bɛ̂h, bɨ́ pɨʼ mê. Fígɛlus, ndu e Ermogɛ̂n, bé ó ɨ́ sɔ́má bʉ̂r yaá tʉ́ŋlʉ̌.

¹⁶ Tî Yésʉs lɛ̂ʼlaa mbɛ̌r bʉ̂r mé Onesíforos membɨa mɨ́mɛ̂h, ebě, nye á si bu cwɨ́a e me, nzɔʼ nzɔʼ. Nyé abá jóʼo sôn ebe mé dí ɨ́ mbʉʼ e menkara,

¹⁷ ebě, ɨ́ jɔʼ nyé á pyâl Rôm yɨ́, léme, wé á be nye ɨ́ báná báná ó, nyě sáá ó me. Nye á si bana nze bee me.

¹⁸ Go lɨ́ egʉ́a ntémé mimbi bísyɛ́ɛla nyé á sâ bʉr Éfɛsɔs mí. Tî Yésʉs sâʼ ó, nye bíʼee njɨ́ʼá nkóó ɨ́ mebó mé ɨ́ móhó nyé óbáʼǎ nze wɨ́.