2 Tesalonika 3 - Kálar Nzyɛ̌m : Ejwán é Sáá

Jɨʼlaa gá ɨ́ lɔ̌b wɨ́h

¹ Bɨ́ɔɔ́ bɨ́h! Okɛ́l bɨ́h! Bɨ̌h kǎ cɛmá bɨ́n ó, bɨ̌n jɨ̂ʼlaa e Nzyɛ̌m ɨ́ lɔ̌b wɨ́h, ó lɔ́ɔ́ dí edumo e Tî Yésʉs wɨ́, wé tôʼ dóló le emyaŋlǎ kám e kám, ó bʉr dwêʼ lɔ́ɔ waá dúu, dû mpʉ bɨ́n bɨɛ dí egúmlo wé yɨ́.

² Jɨʼlaa gá ntémé ó, Nzyɛ̌m pɛ́ʼɛɛ bɨ̌h ɨ́ mpêl bʉ̂r o dí ɨ́ bébe bá, ebě, ntʉ bʉ̂r bɨ́bɛ̂h dí obûʼla.

³ Sâ gwár, Tî Yésʉs, nye ó mʉr jálá le ebúʼlɔɔ nyá. Nye ódwe bɨ́n nkul, le ekamle e bɨ̌n ɨ́ páʼ mé Sátan.

⁴ Mɨ́ dyɛ̂ʼwo e Tî Yésʉs ɨ́ lɔ̌b wɨ́n, ebě, sá mé á tɨ́e bɨ̌n yɨ́, yé ó sá bɨ́n dí esɨsâ yɨ́. Yé ntémé, yé ó sá bɨ́n ngá tô le esɨsâ dóló yɨ́.

⁵ Tî Yésʉs-Krîst tyɛ́bɨɨ bɨ̌n ɨ́ miléme, ó bɨ̌n kpɛ́lɨɨ Nzyɛ̌m. Nye sâʼ ntémé ó, bɨ̌n dûhwaa mebébe mpʉ nyé á sâ yɨ́.

Epɨ̂h

⁶ Bɨ́ɔɔ́ bɨ́h! Okɛ́l bɨ́h! Bɨ̌h bé lɨ́ etɨ́e bɨ́n ɨ́ díé mé Tî Yésʉs-Krîst ó: bɨ̌n syɛ̂hlaa mɨ́ɔɔ́ wɨ́n nyɨnyɛ̂h dí esâ épɨ̂h nyá. Cɛraa gá e né, ebě, nyé anʉa métum bɨ́h á líʼe bɨ̌n e mé má, gbâ ɨ́ nkɔb.

⁷ Ebě, bɨ̌n bʉr o tɨ̂, bé lɨ́ ekʉ́ gʉ́ǎ mpʉ bɨ́n jálá le enwɨɨla e bɨ̌h yɨ́. Bɨ̌h bé á bé asâ épɨ̂h ɨ́ jɔʼ bɨ́h á be páʼ nyɨ́n yɨ́.

⁸ Bɨ̌h bé á bé ade méde mé nyʉ́ʉ́ mʉ̂r dwêh, ajána. Bɨ̌h bé á be lɨ́ entɨntɨ̂ʼ ntémé menyʉ́l mɨ́h, le eséǎ syɛ́ɛ́ móhó e pum. Bɨ̌h bé á sâ nó ó, bɨ̌h sá agbâ nyʉ́ʉ́ mʉ̂r ɨ́ bɨ̌n túú ɨ́ nyʉ̂l lɨ́ enkɛ́ɛ̌ mbeʼ wɨ́h.

⁹ Bɨ̌h bé e nkul jwɨ́ɨ dí ó, bɨ̌h díraa nyɔm lɨ́ enʉnʉa bísá bín. Bɨ̌h bé á be ó, bɛ̌m sâ nó. Sâ gwár, bɨ̌h bé á si kpɛl elɛ̂ʼle bɨ̌n mveʼle, lɨ́ esú ó, bɨ̌n báŋaa bɨ̌h.

¹⁰ Damá jóʼo ɨ́ jɔʼ mɨ́ná bé á be gá yɨ́, bɨ̌h bé á tɨ́e bɨ̌n ó: «Yé bé nyʉ́ʉ́ mʉ̂r, nyé akpɛl éséa nó, nye díʼee ntémé ade.»

¹¹ Bɨ̌h bê sí lwib nó ó, ebě, bɨ̌h jʉ́ʼrá ó, bʉ́ʉ́ bʉ̂r ó sɔ́má yɨ́n, bé lɨ́ esâ épɨ̂h. Bé jaá sɨsâ ó, njɨ mpǔʼ.

¹² Nó ó, ɨ́ nkǒ páʼ bʉ̂r baá, bɨ̌h tɨ́tɨ́é bé ɨ́ díé mé Tî Yésʉs-Krîst ó, bé séaa bisyɛ́ɛ́ byɔ́ɔ́ ɨ́ puuu. Bé obi méde mɔ́ɔ́, duho ɨ́ bisyɛ́ɛ́ mébó mɔ́ɔ́.

¹³ Ɨ́ páʼ wɨ́n, bɨ́ɔɔ́ bâm, menyʉ́l sá atyɛʼ bɨ́n píe bisyɛ́ɛla bimpâ bɨ́n dí esâ bí.

¹⁴ Mʉ̂r bé asâ bɨ́h mejóʼo ɨ́ jɔʼ bé jóʼó métwɨ́ɨ́ bɨ́h dí etɨ́e bɨ́n ɨ́ mekaná mâʼ má nó, nʉaa gá nye díe. Bɨ̌n bé ayɨ́ be e ndwáala e né. Ɨ́ mbi waá ó nyé ójóʼo sôn yɨ́.

¹⁵ Sâ gwár, abee gá nye mpʉ̌ sá lɛ́ɛ ó, nye bɨ̌n ó, ntɨ̂m e mbɨn wɨ́n. Cɨ́lɨ́ɨ́ gá nye, ebě, nye ó mɨ́ɔɔ́ wɨ́n.

Swɨ́á métyɛʼ me mpóm ndu e meswɨhlɨ

¹⁶ Nó ó, Tî gá wɨ́ná, mʉr dí egbâ mɨ́ná gá mepyɛbla ɨ́ miléme nyá, nye gbâʼ bɨ̌n mepyɛbla ɨ́ miléme ɨ́ bijɔʼ bíbyɛ̂h, le menzɨ̌ mɨ́mɛ̂h. Tî gá wɨ́ná díʼee e bɨ̌n óbɛ̂h.

¹⁷ Mě cɛmá bɨ́n mekǎn mâʼ ó e mbó wâm. Meswɨhlɨ mâʼ, mé ó, ɨ́ micɛmá mé Pɔ̂l. Mbǐ nɨ̌ ó mé dí esân mékaná mɨ́mɛ̂h mé dí ecɛma má. Mpʉ mê cɨcɛma yaá ó yɨ̂.

¹⁸ Tî gá wɨ́ná Yésʉs-Krîst, nye sʉ́ʼoo bɨ̌n óbɛ̂h metyɛʼ me mpóm.