2 Pyɛr 3 - Kálar Nzyɛ̌m : Ejwán é Sáá

Nzéá épíhe mé Tî Yésʉs

¹ Bʉr o mé dí ekpɛl bá, mekaná membá mé mû sí cɛma bɨ́n má ó mâ. Mě cɛmá bɨ́n ó, me jɨ́mɨɨ bɨ̌n bitɔŋlá, bɨ̌n nkʉ̂ pahle byé e miléme mi dí abe e mikóo mí.

² Mě gwɨ́m ó, bɨ̌n símsaa lɔ́ɔ́ ógwíha o mílɔ̌b mé Nzyɛ̌m bé á lɛ́ɛ ɨ́ melú mé épíhe wɨ́, ti e metié mé Tî Yésʉs, dí ntémé Tiʼbʉr gá wɨ́ná nyá. Metié maá ó bɨ́n á jóʼo ɨ́ nzɨ̌ bʉr o mílʉ́mlʉ́ bé má.

³ Sá ésôʼ, gwá gʉ́a gá sɨ̂: ɨ́ melú mé ósûʼla má, yé óbe ó e bʉr o ngá kpɛl étíʼě mpʉ bígwɨ́má byɔ́ɔ́ dí etíne bé yɨ́ bá. Bé óbe ó bʉr ó pyêh,

⁴ ebě, bʉr baá bé ólɨlɛ́ɛ ó: «Lɔ́ɔ́ nyé á lɨlɛ́ɛ ó, nye ónze wɨ́, wé ó kwahaá dwêh. Odâ, bɨ́ boó dwe, nye l'apyâlpyal. Sá yɨ́yɛ̂h, yé ó jwɨʼ gwár e gwár e mpʉ yé á boo be, duho ɨ́ metááré mé kʉ́ e sí yɨ́.»

⁵ Sá bé á boo gʉ́a yɨ́, bé sɨ́sáá ó, bé jɨ́haa yê. Sâ yaá, yé ó: lwǐb mé Nzyɛ̌m ó b'á kuho jʉ́o le ejwoo le baántɛ́n ɨ́ jɔʼ myâ. Lwǐb yé ntémé ó b'á sâ ó, kʉ́ e sí, byé díʼee, duho ɨ́ medíbé. Lwǐb ntémé, yé á komlo byé ó e medíbé.

⁶ Medíbé mémpwár maá, mé ntɔ̂ʼ bíla bʉ̂r ó sí bɨ́bɛ̂h, jʉ̂ bê.

⁷ Lwǐb mé Nzyɛ̌m gwár e gwár yaá ó dí ebaʼlě jʉ́o, le ejwoo le sí. Yé óbaʼle byé ó, tó pyâl ɨ́ móhó étíʼ é mílɔ̌b. Byé odíʼɔɔ. Minjéʼe-Nzyɛ̌m, myé ódwe ɨ́ móhó waá.

⁸ Bʉr ó kpɛ̌l bâm, ajɨha gá sɨ̂: ɨ́ páʼ mé Dâ Nzyɛ̌m, dʉ́o egwár, lé ó mpʉ tɔ́ɔ́sin mimbû; tɔ́ɔ́sin mimbû nyɨɛ, nye ó mpʉ dʉ́o egwár.

⁹ Dâ Nzyɛ̌m, nye ábea le elóŋlo nkɛ́ʼ nyé mpʉ bʉ́ʉ́ bʉ̂r dí ejwɨʼ ó, nye álɨ̌ dira nkɛ́ʼ nyaá yɨ́. Nye ɨ́ buo bíhwó ɨ́ bɨ̌n, ebě, nyé agwɨ̂m ó, nyʉ́ʉ́ mʉ̂r dímɨɨ ɨ́ nkɔb bʉr. Gwɨ́má lémé wé, yé ó, bʉr bɨ́bɛ̂h túmaa mikoo e mebébe mɔ́ɔ́, le edwira míléme.

¹⁰ Ɨ́ jɔʼ Tî Yésʉs óbáʼǎ nze yɨ́, nye ópyâl bʉ̂r ó, metwɨrâ, mpʉ̌ ndíblʉ̌. Jʉ́o le ejwoo le baántɛ́n, byé ótɨ̂l e duú ɨ́ buo buo. Bisá Nzyɛ̌m á komlo byé e tɨ̂ʼ bí, nye ódîʼ bíbyɛ̂h. Sí yɨ̂ʼ ti e bisá bíbyɛ̂h bi dí esumɔɔ tɨ̂ʼ bí, byé ódíʼɔɔ.

¹¹ Yé bé bisá bîʼ bíbyɛ̂h, byé ógbahɔɔ nó, wáǎ mbǐ kʉ̌ tyen bɨ́n jálá le edû wɨ́? Yé ó kʉ̌ tyen dí ejala e bʉr o dí tí, baá o dí egúmo e Nzyɛ̌m bá wɨ́.

¹² Jɔʼ yɨ́yɛ̂h mɨ́ná dú gá kʉ̌ tyen waá yɨ́, mɨná bónó gá ó, móhó Nzyɛ̌m ngá báʼǎ nze wɨ́. Mɨná séá gá ntémé ó, syɛ́ɛ́ ngá sâ ó, nye kpâhwa nze yɨ́. Ɨ́ móhó waá ó, jʉ́o le ejwoo le baántɛ́n ngá jɔǎ siʼe, ntɔ̂ʼ dinwa. Bisá Nzyɛ̌m á komlo byé e tɨ̂ʼ bí, byé ójǎ siʼe, buma mínjʉl.

¹³ Nzyɛ̌m á kɛʼ mɨná gá ó, edwán é jʉ́o, edwán lé édwoo, ti e sí dwân. Mɨná gá bé ɨ́ mpʉ̂n, lɨ́ ebóno byê. Gúmo yaá ó ótîtyěl mé Nzyɛ̌m ngá kœb ódiá wé yɨ́.

¹⁴ Bʉr ó kpɛ̌l bâm! Mpʉ mɨ́ná dí ebóno gá móhó waá yɨ́, sáʼ gá sɨ́n lɨ́ edi e mepyɛbla páʼ nyɨ́n, tó pyâl ɨ́ jɔʼ nyé óbáʼǎ nze yɨ́. Sáŋáá gá ó, bɨ̌n díʼee mpʉ nyʉ̂l mé Krîst dí abe e mebar nyɨ́. Diʼee gá abe le ebébe bé óboʼlo bɨ́n e tɨ̂ʼ lɨ́.

¹⁵ Jɔʼ yɨ́yɛ̂h bɨ́n béé ó, Tî gá wɨ́ná, nyé apǎ báʼǎ nze yɨ́, lɛ́yɨ́ɨ́ gá ɨ́ bijɔʼ byaá ó: «Nye ɨ́ buo bíhwó ɨ́ páʼ bʉ́ʉ́ ósyɛ̂l bé ébébe, lɨ́ esú ó, nye tíʼɨɨ bê.» Nó ntémé ó, mɨ́ɔɔ́ kpɛ̌l gá wɨ́ná Pɔ̂l á cɛma bɨ̌n yɨ́. Nye á cɛma nó ó, lɨ́ ocwóó Nzyɛ̌m á dwe nye wɨ́.

¹⁶ Nyě cɨcɛmá bɨ́n milɔ̌b mimpwár myaá ó, ɨ́ mekaná mɨ́mɛ̂h nyé dí ecɛma má. Ɨ́ mʉ́ʉ́ mékaná, nye á cɛma ó, bisâ bi dí elára bʉ́ʉ́ bʉ̂r bí. Bʉr o dí anʉa mílɛ́ʼlá, baá o dí le ocábcab bá, ɨ́ jɔʼ bé láá mɨ́haá mékaná yɨ́, bé lɨ́ edwir mílɔ̌b mi tɨ̂ʼ gúú mbi swîh. Yé ó mpʉ bé dí eboó sɨsâ ntémé ɨ́ jɔʼ bé láá byúú bípéh Mékaná mé Nzyɛ̌m yɨ́. Bʉr baá, bé guŋlo ó, mempɨ́ mɔ́ɔ́ bé bʉr o tɨ̂ʼ ngá lʉ́ŋa, ntɔ̂ʼ dwe tɨ̂ʼ má.

¹⁷ Ɨ́ páʼ wɨ́n, bɨ̌n osó bâm ɛ̌! Bɨ̌n bé lɨ́ eboó gʉ́ǎ lɔ̌b waá. Gwá di gá le ocwóó páʼ bʉ̂r o dí agbâ mémpéné ɨ́ nkɔb bá. Bɨ̌n ámû jaá dyɛ̂l ɨ́ nzɨ̌ nyɔ́ɔ́, ntɔ̂ʼ tó dîm. Apʉʼa gá ɨ́ tyé mélele bɨ́n dí tɨ̂ʼ yɨ́.

¹⁸ Tóʼ gá dóló le egwɨ́e ɨ́ mpam mé Tî gá wɨ́ná Yésʉs-Krîst, dí ntémé Tiʼbʉr gá wɨ́ná nyá. Bɨ̌n e gwɨ́é ntémé, ebě, bɨ̌n bɨ́ gʉ́a nyé ɨ́ pébébé. Nye omér ó dí ejala e kûm, táare ɨ́ jɔʼ yɨ̂, tó kumo ɨ́ twǐʼ njʉ̌m dǐ. Amɛn.