2 Pyɛr 2 - Kálar Nzyɛ̌m : Ejwán é Sáá

Bibɨ́bla bí ólɛ̂ʼla

¹ Bibɨ́bla bí ógwíha o mílɔ̌b, byé á si pyâl ɨ́ mimbú mí píhe kwá bʉr o mé Nzyɛ̌m. Jwɨʼ gwár e gwár yaá ó, bíbɨ́bla bí ólɛ̂ʼla ngá báʼǎ nî ɨ́ sɔ́má yɨ́n yɨ́. Milɛ́ʼlá bé ódwe mí, myé ódulo mpɔ́ʼá menkɔ̌m ɨ́ bɨ̌n, le edímle bʉ́ʉ́ bʉ̂r. Byé óbánǎ kɛ́la Tyɛ̂b esôʼ gá wɨ́ná á táa mebyaʼ mɔ́ɔ́ nyá. Byé ódulo ébébe ɨ́ menyʉ́l mɔ́ɔ́. Lé ópyâl bé ó, metwɨrâ, ntɔ̂ʼ dímle byê.

² Kʉ̌ tyen wɔ́ɔ́ ntémé, wé ódímle bʉ̂r ɨ́ buo buo, ebě, bʉr oswîh, bé ósâ bímolá nzam le ekomo lɨ́ ebaŋa byê. Sá tɨ̂ʼ ó ngá tíne bʉ̂r ó, bé swéʼee díé é búʼó gá yɨ́ná, dí le otyeetye yɨ́.

³ Bibɨ́bla bí ólɛ̂ʼla byaá, byé ókûhlo bíkɨkɛna lɨ́ edû gwɨ́má ébi bísâ. Byé onze le egwâm bɨ́n bisâ. Sâ gwár, boó táarě kɔ́m, Nzyɛ̌m, mʉr pá dí Tîʼ milɔ̌b wɔ́ɔ́ nyá, nye mû ó ɨ́ cǎr lɨ́ edwe byé bintɨ́ʼá ɨ́ milɔ̌b myɔ́ɔ́ nyé á boo tíʼe mí. Mʉr ngá dwe byé bébebébe bintɨ́ʼá waá, jʉ̂ byé nyá, nye ɨ́ doho ɨ́ mpʉ̂n nyɔ́ɔ́.

⁴ Ebě, Nzyɛ̌m á bé abîr bééngeles bé á sâ syóm bá. Nye á jaa guho bé ó, njɨ ɨ́ bɨ́ siʼe. Nye ntɔ̂ʼ gbâ bé ɨ́ mpǐl, lɨ́ ebónǒ móhó étíʼ é mílɔ̌b.

⁵ Nzyɛ̌m ntémé á bé abîr bʉ̂r o myâ. Nye á si ntɨh mpɨɨ ɨ́ sí yɨ̂ʼ lɨ́ ejʉ̂ mínjéʼe-Nzyɛ̌m. Nye á jaa tíʼ ó, njɨ Nóe, á lɨlɛ́ɛ bʉr sá dí tîtyěl yɨ́ nyá, bé e bʉ́ʉ́ bʉ̂r nzaangbá.

⁶ Nzyɛ̌m á si dwe binkana bí Sodôm e Gómɔr bintɨ́ʼá, nye nzě dîʼ byé, dwir byé meswií. Nó, nye á sâ mpʉ́nʉ̌ ó, lɨ́ edwe mɨ́ná gá mveʼle édû. Minjéʼe-Nzyɛ̌m, myé ósûʼla ntémé ó njɨ jwɨʼ gwár yaá.

⁷ Nye ntémé á si tíʼ Lôt, tîtyěl mʉr. Ekɛ̂n, lé á be ɨ́ swɨɨ̌ Lôt ɨ́ nyʉ̂l lɨ́ ebee bʉ̂r o b'á be, agbâ mémpéné ɨ́ nkɔb bá. Bɨ́ɛ, bé á jaa sâ ó, njɨ bimolá nzam le ekomo.

⁸ Ebě, tîtyěl mʉr waá á títíʼe páʼ nyɔ́ɔ́ ó, lɨ́ ebee le ejóʼo bísyɛ́ɛla bí ébébe byɔ́ɔ́ ɨ́ dʉ́ó lɨ́lɛ̂h. Byé á be lɨ́ entɨ̂ʼ ótîtyěl ó lémé wé.

⁹ Yé bé Dâ Nzyɛ̌m á si nyɛɛ sâ bʉr baá nó wá, nó ntémé, nye ókʉ́ gʉ́ǎ mpʉ nyé ósyɛb bʉ̂r o dí egúmo e né bá ɨ́ mebʉ́blá yɨ́. Nye lɨ́ egʉ́a ntémé mpʉ nyé ókab ónzyɛ́h ó bʉ̂r bintɨ́ʼá, le egbâ bé ɨ́ mpila, lɨ́ ebónǒ móhó étíʼ é mílɔ̌b yɨ́.

¹⁰ Nye ódwe bíntɨ́ʼá, ntaa sʉ́ŋa ó, bʉr o dí elóŋlǒ njwɨr myâ gá wɨ́ná bá, bɨ́ɛ ntémé lɨ́ epyêh bʉ̂r o dí e jwɨ́ɨ bá. Bé jaá mɨmɛɛla ó, njɨ e bé bʉr o tɨ̂, le bijwɨʼ mílémé myɔ́ɔ́. Bibɨ́bla bí ólɛ̂ʼla mê lɛ́ɛ́ bɨ́n bî, byé ajóʼo bʉ́á lɨ́ epya mísísǐm mí édúrʉ́ʉ́ mi dí e jwɨ́ɨ mí.

Bibɨ́bla bí ólɛ̂ʼla, byé e pyǎ

¹¹ Beéngeles mé Nzyɛ̌m bɨ́ɛ damá laa bʉ̂r baá ɨ́ nkul le pîm, bé ákɛ́l mélwɨ́ɨ ɨ́ bipurá ɨ́ jɔʼ bé dí epur mísísǐm mí édúrʉ́ʉ́ ɨ́ mpǒm mé Dâ Nzyɛ̌m yɨ́.

¹² Bibɨ́bla bí ólɛ̂ʼla byaá, byé sɨ́sá sá bé dí agʉ́a yɨ́ nkěh. Byé ó kwahaá mpʉ ótír ó dwǐʼ, lúʼo pɨ̂ʼ. Tó kœb ó, tír jaá byɛ̂l njɨ ó, nye mɛ́rɔɔ. Nyé ojʉ́ŋɔɔ. Jwɨʼ gwár e gwár yaá ó bʉ̂r baá, bé ópɛʼɔɔ médwôʼlʉ yɨ́. Bé ódwe ó, bé dína lɨ́ ekʉ́ sâ bísyɛ́ɛla mélwaʼwo bé á bu kpɛl bí.

¹³ Bé óbi myɛ́na mé ébébe bé á pa sâ bʉr lɨ́. Bé mɨmɛɛla ó, lɨ́ edi ɨ́ twiʼ mépwaʼ témé móhó. Jɔʼ bé dí esyɛŋa e bɨ̌n lɨ́ ede yɨ́, nkʉ̂ bɨ̌n nwɨɨla ó e nyʉ̂l, bé ó dí mebar me nyʉ̂l nyaá. Bé lɨ́ esahle lɨ́ ede, lɨ́ edû bígwɨ́má byɔ́ɔ́. Byé lɨ́ edímle bé ɨ́ nzɨ̌ mikóo myɔ́ɔ́.

¹⁴ Míh mɔ́ɔ́, mé jaá sáa ó, njɨ bʉbá bé sâʼ medyɛ̂n e bé bá. Bé abá gbala lɨ́ esâ syóm. Bé sɨ́sáá ó, bʉr o dí ɨ́ tyɛʼ bá, bé bílɨɨ ɨ́ bilám byɔ́ɔ́. Bé jaá gbâ lémé ɨ́ dwííí ó, njɨ lɨ́ ejɨ̂ʼ édû bígwɨ́má ményʉ́l mɔ́ɔ́. Nzyɛ̌m, nyɨ́ syɛm bê.

¹⁵ Bé á si líʼe tîtyěl nzɨ̌, nzě dyɛ̂l ɨ́ nzɨ̌ swîh, ntɔ̂ʼ dîm lɨ́ edû nzɨ́ mé Balâm, mwân mé Bosɔ̂r. Nye ó b'á be lɨ́ ebuú soho ɨ́ jɔʼ nyé á bi myɛ́na píe l'ebébe yɨ́.

¹⁶ Kamntʉl yɨ́ɛ, tír dí abe lɨ́ elwǐb lwǐb mʉ̂r nyá, bánǎ lwib le etyél é mʉ̂r, ntɔ̂ʼ nkáŋla e ngwíha milɔ̌b waá, lɨ́ ekamle nyé lɨ́ esâ bébebébe syɛ́ɛla nyé á gwa sâ lɨ́ ogʉ̌ wé yɨ́.

¹⁷ Bʉr baá nwɨɨla ó e menó. Bé ó menó mû sí jwɨ̂l, akǎ be le etáŋ é médíbé egwár má. Bé ó mpʉ nkûr nkúo dí etíne wɨ́. Nzyɛ̌m, nyɨ́ boó komlo bé diá lɨ́ edúrʉ́ʉ́ e dí ɨ́ nkom nkom lɨ́.

¹⁸ Bé lwilwib ó e mekǎn mé jáálé, maá me dí dwêh má. Ɨ́ nzɨ̌ bigwɨ́má ményʉ́l mébomo mɔ́ɔ́, bé lɨ́ edulo bʉ̂r o bé alúno syɛb ményʉ́l mɔ́ɔ́ ɨ́ sɔ́má bígʉʼlʉgʉ́ bá.

¹⁹ Bé kɛʼ bé ó, bé ópɛʼ bé lɨ́ otúʼǎ, dil bé ɨ́ dǐ ónzyɛh o bʉ̂r. Tó kœb ó, bé bʉr o tɨ̂ʼ, bé ó mpǎŋ bitúʼǎ, lɨ́ edû métum me dí etyen mʉ̂r lɨ́ eswie má, ebě, sá yɨ́yɛ̂h dí ejwɨ́ɨ mʉ̂r yɨ́, mʉr waá, nye ó túʼǎ sâ yaá.

²⁰ Mʉ̂r gʉ́á Tî gá wɨ́ná le Tiʼbʉr gá wɨ́ná Yésʉs-Krîst, le epʉʼa ɨ́ bibol bísyɛ́ɛla bí sí yɨ̂ʼ nó, nyé sí báʼǎ kǎ bîr ó, ebébe laá, lé nʉ́aa nkul ɨ́ twiʼ yé nó, twiʼ yé, yé ókǎ bébe, ntaa sʉ́ŋa, laǎ mpʉ yé á nyɛɛ bébe ɨ́ metááré yɨ́.

²¹ Yé á gwa mbɨa bʉr baá ó, mpa bé á bé apǎ dyɛ̂l ɨ́ nzɨ̌ dí elɛ̂ʼle bʉ̂r kʉ̌ tyen dí tîtyěl wɨ́ nyɨ́, laa ó, bé osí dyɛ̂l tɨ̂ʼ nɛ́ɛ: bé ntɔ̂ʼ kǎ bwóolo ntúʼó, túmǒ koo e metié me dí tí, maá Nzyɛ̌m á tyêl má.

²² Sâ pyál bé yɨ́, yé lɛ́ʼlé ó mpʉ bíkɨkɛna bibá bîʼ dí elɛ́ɛ lɨ́ otyeetye yɨ́ ó: «Mpyê, nyě swíʼ ó, tó de bíjwɨ́ɨlɨ́ byé.» Yʉ́ʉ́ tɨ̂ʼ, yé lɛ́ɛ́ ó: «Le bê jwɨɨ nkʉ́, le ntɔ̂ʼ nyê swîʼ, tó byɛ́ɛla ɨ́ mindě.»