2 Korɛnt 9 - Kálar Nzyɛ̌m : Ejwán é Sáá

Nzyɛ̌m kpɛl míngúlá ó, myaá mi dí esáŋɔɔ e bisʉhʉʉ mí

¹ Yé apʉgʉ́ be bɨ́n e mâ nyɔm ó, me báʼa cɛma ɨ́ lɔ̌b míngúlá mɨ́ná jálá le etô bʉ̂r o mé Nzyɛ̌m o dí ɨ́ sí Yʉ́da bá e myé mí.

² Ebě, me lɨ́ eboó gʉ́a ó, miléme, myê bɨ̌n ɨ́ báná báná ó, bɨ̌n súʼaa bê. Me lɨ́ enkʉ́na ɨ́ lɔ̌b wɨ́n ɨ́ míh mé bʉ̂r ó Masedónia. Mě lɨ́lɛ́ɛ́ bé ó: «Bʉr ó Mbɛ̌r-Nzyɛ̌m dí ɨ́ sí Akayɨ̂ bá, bé á boo táare mɔ́ɔ́ ménzyɛ̌ŋ ó ɨ́ mbú píhe.» Jɔʼ mé dí elwib e bé nó yɨ́, bʉr ɨ́ buo buo, bé lɨ́ esâ sɨ́n lɨ́ esúʼo bé ntémé.

³ Nó mɨ́ lómo bʉ́ʉ́ bɨ́ɔɔ́ gá bɨ́ná kwá nyɨ́n. Mě sá nó ó, bilwǐb mé á lwilwib ɨ́ jɔʼ mé á nkʉ́na ɨ́ lɔ̌b wɨ́n bí, byé ayɨ́ kǎ nyɨ̂n ó, byé abe ótyeetye. Mě kpɛl ó, bɨ̌n díʼee minkʉmsá mpʉ mé á lɛ́ɛ bʉr ó, bɨ̌n mû ó minkʉmsá yɨ́.

⁴ Yé ajala le ebe ó, jɔʼ bɨ́h e bʉr ó Masedónia bé ópyâl kwá nyɨ́n yɨ́, bɨ̌h kœ́bɨɨ bɨ̌n lɨ́ elûhwa. Bɨ̌h bé ámû jaá sɔ́ma ɨ́ míh mɔ́ɔ́. (Mé agúm lɛ́ɛ bɨ́n bɨɛ.) Bɨ̌h bé ámû nkɛ́ɛ sôn, ebě, bɨ̌h bé á si bûʼla bɨ̌n ɨ́ nkǒ páʼ jwɨʼ yɨ́n yaá.

⁵ Nó, me á be ó lɨ́ bi ó, me lɛ́yɨɨ bʉ́ʉ́ bɨ́ɔɔ́ gá bɨ́ná ó, bé sámlaa, tô gʉ̂ʼ kwá nyɨ́n. Mě kpɛl ó, bɨ̌n bâʼlaa nkɛ̌ʼ bɨ́n á nyɛɛ dwe nyɨ́, ó bɨ̌n bé ósâ míndwéá mí mɔnɨ́. Bimɔnɨ́ byaá, byé díʼee komá lɨ́ ekʉ̌m. Sâ yaá, yé ólɛ̂ʼle ɨ́ jɔʼ yaá ó, bɨ̌n gbá míndwéá myaá ó, ɨ́ mpyaʼá, abe ɨ́ tíná bʉ̂r o bígwɨ́má.

⁶ Gwá símsa gá sɨ̂: mʉr dí ebe mémpeʼ abuo nyá, nye ntémé ókpɛm ó, bwá méde abuo. Mʉr dí ebe mémpeʼ ɨ́ buo buo nyá, nyɨɛ ó ngá kpɛm méde ɨ́ buo buo.

⁷ Yé jala ó, mʉr nyɨnyɛ̂h dwêʼ Nzyɛ̌m mindwéá, dû mpʉ nyé á pa tíʼe ɨ́ lémé wé yɨ́. Ayɨ́ dwe gá nye myǎ e miléme mi dí ejʉba mí, nkʉ̂ ɨ́ lɔ̌b tíná. Dwéʼ gá ɨ́ mpyaʼá, ebě, Nzyɛ̌m bee mbɨ̂mbɨá ó, mʉr dí edwe ɨ́ mpyaʼá nyá.

⁸ Nzyɛ̌m, nyě e nkul esʉ bɨ́n metyɛʼ me mpóm mimbi mímyɛ̂h ó, bɨ̌n bíʼee ɨ́ jɔʼ yɨ́yɛ̂h sá yɨ́yɛ̂h dí bɨ̌n ɨ́ sɔ́ɔlʉ yɨ́. Nó ó bɨ́n ngá be ɨ́ tɨʼlɨ lɨ́ esú ó, bɨ̌n nʉ́aa nkɔb ɨ́ bisyɛ́ɛ́ bí émbɨa mimbi mímyɛ̂h yɨ́.

⁹ Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Nye á si dwe baántéʼenteʼe o bʉ̂r bisɔ̂ʼ ɨ́ mpyaʼá. Otîtyěl nyé dí e wé wɨ́, wé ódi ó njʉ̌m dǐ e njʉ̌m dǐ. p

¹⁰ Nzyɛ̌m ó dí edwe bʉ̂r mempeʼ me dí ebeŋɔɔ má. Nye ntémé ó dí ekab bʉ̂r mede bé ódɨde má. Nye ódwe bɨ́n mempeʼ ɨ́ mpyaʼá, sâ ntémé ó, mé búaa. Nye ósâ ó, bʉr ɨ́ buo buo, bé díraa nyɔm e bisyɛ́ɛ́ bɨ́n dí eséa lɨ́ otîtyěl bí.

¹¹ Jɔʼ yaá ó bɨ́n ódi ókúmá ɨ́ menzɨ̌ mɨ́mɛ̂h, lɨ́ esú ó, bɨ̌n díʼee odwɛ́na lɨ́ esú é bʉ́ʉ́ bʉ̂r yɨ́, ɨ́ mbi dí ó, bʉr ɨ́ buo buo, bé dwêʼ Nzyɛ̌m nzyǒo, duho ɨ́ mindwéá mín, bɨ́h ngá tó kala bé mí.

¹² Ebě, ɨ́ jɔʼ bɨ́n séá bé syɛ́ɛ́ yaá yɨ́, yé abě njɨ lɨ́ esú ó, bɨ̌n súʼaa baántéʼenteʼe o bʉ̂r o mé Nzyɛ̌m. Heʼé, yé ósâ ntémé ó, bʉr ɨ́ buo buo dwêʼ Nzyɛ̌m nzyǒo.

¹³ Syɛ́ɛ́ bɨ́n ngá séa yɨ́, yé ólɛ̂ʼle bʉ̂r ó, bɨ̌n bɨ́ sul bɨ́n bʉr o tɨ̂ʼ sí, sâ méjóʼo, táare ɨ́ jɔʼ bɨ́n á kam Mbɨambɨa Lɔ́ɔ́ mé Krîst yɨ́, kumo mûh. Bʉr, bé ódwě Nzyɛ̌m kûm tɨ̂. Bé ódwe nyé kûm ntémé ó, ɨ́ jɔʼ bé óbeě mpʉ bɨ́n ngá súʼo bé e mingúlá mín, kala e bʉr bɨ́bɛ̂h yɨ́.

¹⁴ Bé óbee bɨ́n lɨ́ esâ nó wá, bé óbuú kpɛl bɨ́n, le ejɨʼla e Nzyɛ̌m lɨ́ esú lɨ́n ɨ́ buo buo. Bé ósâ nó ó, ɨ́ lɔ̌b mpâm nyé á bu sâ bɨ̌n nyɨ́.

¹⁵ Mɨná dwêʼ gá Nzyɛ̌m nzyǒo ɨ́ lɔ̌b étʉ́m nyé á lómlo mɨná gá lɨ́. Membɨa me dí tɨ̂ʼ má, mé abe e tólɔ́ɔ.