2 Korɛnt 8 - Kálar Nzyɛ̌m : Ejwán é Sáá

Mingúlá mí bʉ̂r ó Masedónia

¹ Bɨ́ɔɔ́ bɨ́h le okɛ́l bɨ́h, bɨ̌h bé lɨ́ ekpɛl ó, bɨ̌n gʉ́ŋaa lɔ̌b wɨ̂: Nzyɛ̌m á si kʉ sʉ metyɛʼ me mpóm mé ɨ́ bʉr ó Mbɛ̌r-Nzyɛ̌m dí ɨ́ sí Masedónia bá.

² Bé á si kʉ bóblɔɔ e nzɨ̌ mitúú bé á sia e myé mí. Damá be ɨ́ nyɨna le entéʼe lɔ́ɔ́, bisʉhʉʉ byɔ́ɔ́, byé á si kʉ nyɨ̂n ɨ́ ponó e nzɨ̌ mingúlá myɔ́ɔ́.

³ Me ó dí mboʼlo wɔ́ɔ́. Mě lɛ́ɛ́ bɨ́n ó: bé á si bu gbâ, dû mpʉ nkûl mebi nyɔ́ɔ́ á be yɨ́. Bé á si kʉ gbâ, laǎ bím nkûl mebi nyɔ́ɔ́ á be yɨ́. Bé bʉr o tɨ̂, bé á tíʼe ɨ́ milémé myɔ́ɔ́ ó,

⁴ bé jɨ̂ʼlaa e bɨ̌h e nkul ó, bɨ̌h nʉ́aa mingúlá myɔ́ɔ́, lɨ́ esúʼo bʉ̂r o mé Nzyɛ̌m o dí ɨ́ sí Yʉ́da bá. Nó ntémé ó bé á kpɛl esyɛŋa e mɨná gá ɨ́ mpúhlá miléme yɨ́.

⁵ Bé á sâ syɛ́ɛlǎ nɨ̌ ó, laǎ mpʉ bɨ́h á gwa bûʼla ó, bé e nkul esâ yɨ́. Sá ésôʼ bé á sâ yɨ́, yé á be ó, etímle bé bʉr o tɨ̂ʼ ɨ́ mebó mé Tî Yésʉs. Píe tɨ̂ʼ ó bé á ka tímle bé bʉr o tɨ̂ʼ bɨ̌h, lɨ́ esú lé édû mítíʼá mé Nzyɛ̌m yɨ́.

Mingúlá mí óbûʼla ó Kórɨnt

⁶ Sá tɨ̂ʼ ó bɨ́h á jɨʼla e Títos ó, nye tôʼ gʉ̂ʼ kwá nyɨ́n, le elóŋlǒ syɛ́ɛ́ nyé á pa nyɛɛ séa yɨ́. Syɛ́ɛ́ yaá, yé ó syɛ́ɛ́ ésîl ésyɛŋ míngúlá mín.

⁷ Bɨ̌n bé ó okúmá ó bʉ̂r ɨ́ míh mé Nzyɛ̌m, laa bʉ́ʉ́ bʉ̂r. Bɨ̌n buú laa bʉ́ʉ́ bʉ̂r ó: ɨ́ mpwaʼ búʼó yɨ́n, ɨ́ lɛ́á bɨ́n bé lɨ́ elɛ́ɛ̌ lɔ́ɔ́ mé Nzyɛ̌m wɨ́, ɨ́ ngwɨ́á ótyeetye wɨ́n, ɨ́ bím bɨ́n dí egbâ ményʉ́l mɨ́n ɨ́ syɛ́ɛ́ mé Nzyɛ̌m yɨ́, le ɨ́ bím bɨ́n dí ekpɛl bɨ́h yɨ́. Mpʉ yé dí nó yɨ́, sɨ́sáʼ gá mbɨambɨa syɛ́ɛ́ yaá e milémé mín mímyɛ̂h, ntémé ntaa bʉ́ʉ́ bʉ̂r.

⁸ Sá mé múo nzě lɛ́ɛ bɨ́n nɨ̌, yé abe bɨ́n bi ó, bɨ̌n sâʼ yê. Mě jaá kpɛl ó, njɨ elɛ̂ʼlě mpʉ̌ kpɛ̌l yɨ́n dí yaá mpâ yɨ́. Mě jwɨʼ yé ó e yaá bʉ́ʉ́ bʉ̂r, bé á be ɨ́ báná báná ó, bé lɛ̂ʼlaa Nzyɛ̌m yɨ́.

⁹ Ebě, bɨ̌n bé lɨ́ egʉ́ǎ mpʉ Tî gá wɨ́ná, Yésʉs-Krîst á cwɨ́a e mɨná gá yɨ́. Nye á boo be ó kúmá. Nye nzě líʼe ókúm le ogbaa wé, nzě dwir nyé mʉr tɨ̂ʼ ántéʼenteʼe mʉr, ó bɨ̌n káa lîʼ le okúm le ogbaa waá e nzɨ̌ entéʼe lé.

¹⁰ Mě lɛ́ɛ́ bɨ́n ɨ́ báánâʼ ó, sá mé dí ebee ó, yé óbuú be bɨ́n e nyɔm yɨ́. Ɨ́ mbú píhe, bɨ̌n ó b'á be bʉr o bé ésôʼ bé á tíʼe ɨ́ miléme ó, bé ósyɛ̌ŋ mɔnɨ́ yaá bá. Bɨ̌n ó b'á be bʉr o bé ésôʼ ntémé bé á táare nzyɛ̌ŋ bá.

¹¹ Nó ó, ɨ́ báánâ, yé mbɨa ó, bɨ̌n swâhlaa syɛ́ɛ́ yaá. Menzyɛ̌ŋ, mé síaa mpʉ bɨ́n á nyɛɛ gwɨ̂m ó, bɨ̌n syɛŋ ó, syɛŋɨ́ɨ yɨ́. Syɛŋɨɨ gá bimɔnɨ́, dû mébi mɨ́n.

¹² Ebě, bɨ́n dwé mʉ̂r yʉ́ʉ́ sɔ̂ʼ e bisʉhʉʉ nó, Nzyɛ̌m ókǎm ndwéá waá, jwɨʼ e mebi bɨ́n dí e tɨ̂ʼ má. Nye ájwɨʼ wé e sá bɨ́n dí abe e yé yɨ́.

¹³ Yé abe lɨ́ esú ó, bɨ̌n díʼee ɨ́ sɔ́ɔlʉ, bʉ́ʉ́ bʉ̂r bɨ́ɛ di ɨ́ twíha, duho ɨ́ syɛ́ɛ́ yɨ́n. Heʼé! Yé abe nó. Mě kpɛl ó, bʉr bíʼee bisâ mebím.

¹⁴ Jɔʼ yɨ̂ʼ ó bɨ́n mû ɨ́ twíha. Yé mbɨa ó, bɨ̌n súʼaa bʉr o dí abe e tɨ̂ʼ bá. Bɨ́n bɨɛ óbe, akǎ be e tɨ̂, bɨ́ɛ e tɨ̂ʼ ɨ́ buo buo nó, bɨ́ɛ ntémé, bé ósúʼo bɨ́n. Jɔʼ yaá ó bɨ́n le onɔ́ɔ́, bé óbe ó e bisâ mebím yɨ́.

¹⁵ Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Ɨ́ sɔ́má bʉ̂r o b'á to tœ̂ʼ mân bá, baá bé á bu tœ̂ʼ bá, bé á bé abe e mân ɨ́ buo buo ɨ́ jɔʼ bé á de yɨ́. Bʉr o b'á tœ̂ʼ bá tîtííǎ bá, bé á bé abe e mân, abuo.

Mpʉ míngúlá jálá le etímlɔɔ̌ Títos, bé e bʉr ó njoo yé yɨ́

¹⁶ Nzyǒo e Nzyɛ̌m ɨ́ lɔ̌b syɛ́ɛla yé! Nye á si tyɛ̂b Títos ɨ́ léme ó, léme díʼee nye ɨ́ báná báná ó, nyě kɛ̌m ó bɨ̌n. Bɨ̌h e né, bé ó jwɨʼ gwár ɨ́ pâʼ waá.

¹⁷ Títos á si kam mpʉ bɨ́h á jɨʼla e né ó, nye tôʼ bee bɨ́n yɨ́. Sâ gwár, nye á bé atô ɨ́ lɔ̌b lʉ́mlʉ́ wɨ́h wé omér. Nye á boo bě e léme ɨ́ báná báná ó, nyě tó ó gʉ̂ʼ kwá nyɨ́n, duho ɨ́ mitíʼá mí lémé wé.

¹⁸ Bɨ̌h lómló bɨ́n nyǎ ó, bé e nyʉ́ʉ́ mʉ̂r. Bʉr ó Mbɛ̌r-Nzyɛ̌m bɨ́bɛ̂h, bé lɨ́ esêʼle nyê, ebě, nye lɨ́ elɛ́ɛ bʉ̂r Mbɨambɨa Lɔ́ɔ.

¹⁹ Yé abě njɨ nó. Bé á pɛ̂h nye ntémé ó, nye níʼee ɨ́ sɔ́má tyen yɨ́h, ó bɨ̌h e boo nɔ́ɔ́ séaa syɛ́ɛ́ ɨ́ nzyɛ̌ŋ bimɔnɨ́ nyaá. Syɛ́ɛ́ yaá, yé ódwe Tî gá wɨ́ná kûm, le elɛ̂ʼlě gwɨ́má ésúʼo bʉ́ʉ́ bʉ̂r.

²⁰ Mɔnɨ́ yaá, yé ɨ́ buo. Nó ó, bɨ̌h bi yé ó le ocwóó, ebě, nyʉ́ʉ́ mʉ̂r ámû jaá ntuhlo bɨ́h, lɨ́ elɛ́ɛ ó, bɨ̌h bé lɨ́ ejéʼe ébi bímɔnɨ́ byaá.

²¹ Bɨ̌h bé lɨ́ egwɨ̂m ésâ sá dí ɨ́ mbɨa yɨ́. Abě njɨ ɨ́ míh mé Tî Yésʉs mé omér, ɨ́ maá me bʉ̂r ntémé.

²² Mʉr lɛ̂l bɨ́h ngá lómlo bɨ́n nyá, nye ó waá bɨ́h dí ebee ó, nye ó mʉr dí e nyɔm nyá, ebě, nyɨ́ ntaa mébʉ́blá mbɨ̂mbɨá, le egbâ nyʉ̂l ɨ́ dwííí bijɔʼ bíbyɛ̂h ɨ́ milɔ̌b mé Nzyɛ̌m. Nó ó, nyɨ́ kǎ buú gbâ nkûl ɨ́ yɨ̂ʼ jɔʼ, ebě, nyě e búʼó ɨ́ mipáʼ mímyɛ̂h ɨ́ milɔ̌b mi dí edwɛ̂ʼ bɨ́n mí.

²³ Ɨ́ páʼ mé Títos, nye ó mʉr njoo yâm bɨ́h e nɔ́ɔ́ dí eboó séǎ syɛ́ɛ́ nyá. Ɨ́ páʼ bʉ́ʉ́ bʉ̂r obá o bé e boo nɔ́ɔ́ dí enze gʉ̂ʼ bá, bʉr ó Mbɛ̌r-Nzyɛ̌m ó dí elómlo bɨ́n bǎ. Jɔʼ bʉ̂r dí ebeě syɛ́ɛ́ yɔ́ɔ́ yɨ́, bé lɨ́ egúmlǒ Yésʉs-Krîst tɨ̂.

²⁴ Nó ɨ́ jɔʼ bé ópyâl kwá nyɨ́n yɨ́, lɛ́ʼláá gá bʉr baá bijwɨʼ ngá lɛ̂ʼle bé ó, bɨ̌n bé lɨ́ ekpɛl bé bí. Bʉr ó Mbɛ̌r-Nzyɛ̌m, bé ójʉ̂ʼra ntémé kpɛ̌l yɨ́n yaá. Bʉr o ngá lómlɔɔ bɨ́n bá, bé okam ó, bilwǐb bɨ́h á lwib lɨ́ enkʉ́na e bɨ̌n bí, byé á be ó otyeetye.