2 Korɛnt 7 - Kálar Nzyɛ̌m : Ejwán é Sáá

¹ Nó, bɨ́ɔɔ́ o kpɛ̌l bâm ɛ̌! Mpʉ mɨ́ná gá dí e menkɛ̌ʼ ménɨ̌ yɨ́, mɨná púbaa gá mɨná bʉr o tɨ̂. Mɨná pɛ́ʼɛɛ gá bilœ̌ʼ bi dí ɨ́ mɨná gá ɨ́ menyʉ̂l ti e miléme bí. Mɨná kómlaa gá kʉ̌ tyen gá wɨ́ná, ó wé díʼee sá dí ti yɨ́, ɨ́ ndwááwá mɨ́ná dí edwáawo gá Nzyɛ̌m wɨ́.

Bisʉhʉʉ mé Pɔ̂l

² Sáŋáá gá nzɨ̌ ó, bɨ̌n kpɛ́lɨɨ bɨ̌h. Bɨ̌h bé á bé abyaʼ nyʉ́ʉ́ mʉ̂r. Bɨ̌h bé á bé alɛ̂ʼle nyʉ́ʉ́ mʉ̂r njwɨr ɨ́ bébe bébe. Bɨ̌h bé á bé adíbe mʉ̂r sɔ̂ʼ.

³ Mé alɛ́ɛ nó, ó bɨ̌n bíʼee mebě, ebě, me sí boó lɛ́ɛ ó, bɨ̌h bé lɨ́ ekpɛl bɨ́n kpɛ̌l ápurapúra; damá be lɨ́ eswie, damá be ɨ́ twiʼ.

⁴ Mpûʼla, nye ó me ɨ́ léme ɨ́ lɔ̌b wɨ́n. Bɨ̌h bé e nkul enkʉ́na ɨ́ buo buo ɨ́ lɔ̌b wɨ́n. Me mû ó lwɨ́ŋlá e nkul ɨ́ léme. Damá jóʼǒ mpʉ bɨ́h dídí ɨ́ bintɨ́ʼá tʉ́ŋlʉ̌ yɨ́, bisʉhʉʉ byâm, byé lɨ́ entaa sʉ́ŋa.

⁵ Ebě, ɨ́ jɔʼ bɨ́h á pyâl ɨ́ sí Masedónia yɨ́, bɨ̌h á bé abi égbalá ɨ́ nkǒ páʼ bípúnó bíh. Bɨ̌h bé á si dûhwo mitúú ɨ́ mipáʼ mímyɛ̂h. Ɨ́ nkǒ páʼ ményʉ́l mɨ́h, bɨ̌h bé á bɔma ó e bitɔm; á dwií ɨ́ milémé míh tʉ́ŋlʉ̌ nɛ́ɛ: bɨ̌h bé á jóʼo ó bʉ́á.

⁶ Tó kœb ó, Nzyɛ̌m, nye lɨ́ ekɛm bʉ̂r o dí ɨ́ twíaaa e metyɛʼ me nyʉ̂l bá. Nye á si gbâ bɨ̌h nkul ɨ́ miléme ɨ́ jɔ̌ʼ Títos á pyâl yɨ́.

⁷ Abě njɨ lɨ́ epyál lé, lé omér. Nye á gbâ me nkul ɨ́ léme ntémé ó, lɨ́ elɛ́ɛ mé mpʉ nyé á nyɛɛ súʼɔɔ kwá nyɨ́n yɨ́. Me á ka bi nkul ɨ́ léme píe tɨ̂ʼ ntémé ó, ɨ́ jɔʼ nyé á lɛ́ɛ bɨ̌h bigwɨ́má mílémé mín yɨ́, le elɛ́ɛ̌ mpʉ bɨ́n á jɨ medwê ɨ́ lɔ̌b wâm, le mpʉ bɨ́n dí ekpɛl mé ɨ́ buo buo yɨ́. Lɔ́ɔ waá ó b'á bu gbâ me bisʉhʉʉ ɨ́ léme wɨ́.

⁸ Damá be ó, mekaná mé á cɛma bɨ̌n má, mé á si to kwɨ́ɨ mebúʼ mɨ́n, mé ajʉbǎ sɔ̂ʼ tɨ̂. Yé bé, me á si nyɛɛ jʉba, dumo e mekaná maá nó, yé á be ó, ɨ́ jɔʼ mé á bee mpʉ mé á to kwɨ́ɨ mebúʼ mɨ́n ɨ́ mâ jɔʼ yɨ́.

⁹ Nó ó, me lɨ́ esoho mékaná maá ɨ́ báánâ. Mé asoho mé ebe mé á sâ ó, bɨ̌n jóʼaa mebúʼ, bɨ̌n ntɔ̂ʼ jʉba ɨ́ lɔ̌b bísyɛ́ɛla bín. Mě soho ó, ebě, ɨ́ jɔʼ bɨ́n á jóʼo mebúʼ maá, ntɔ̂ʼ jʉba yɨ́, mé á si dib bɨ̌n nzɨ̌ edwira míléme. Tó kœb ó, syɛ́ɛla yaá, yé á duho bɨ̌n ó kwá mé Nzyɛ̌m. Nó yaá ó bɨ́n á be adímle sɔ̂ʼ ɨ́ lɔ̌b syɛ́ɛla yɨ́h e yʉ́ʉ́ yɨ́.

¹⁰ Ebě, mebúʼ Nzyɛ̌m dí egbâ mɨ́ná gá ɨ́ miléme má, mé sɨ́sá ó, mʉr túmaa koo le mebébe mé, ndu e l'edwirǎ léme. Ndwirá míléme waá sɨ́sá ó, mɨná bíʼee gá twǐʼ njʉ̌m dǐ. Mʉr á gbáŋɔɔ ebúʼ laá ɨ́ léme nyá, nyé abe lɨ́ ejʉba ébúʼ nyé á pa jóʼo lɨ́, píe tɨ̂. Tó kœb ó, jɔʼ bʉ̂r ó sí yɨ̂ʼ gbɨ́gbá mʉ̂r ebúʼ ɨ́ léme yɨ́, lé jaá jʉ̂ nyɨ́haá ó, jʉ̂ jʉ́ʼóo.

¹¹ Jwɛ́ʼɛ́ɛ́ gá sɔ̂ʼ njɨ sá Nzyɛ̌m á gbâ bɨ̌n ɨ́ miléme yɨ́. Ebúʼ e dí esâ ó, mʉr jʉ́baa, duho ɨ́ bisyɛ́ɛla byé lɨ́, lé á be ɨ́ sâ ó: bɨ̌n díʼee e léme ngwár ɨ́ báná báná ó, bɨ̌n sâʼ embɨa, bɨ̌n sáŋaa nzɨ̌ dí ó, me tɨ́ʼee bibaa bí ébébe mé á niʼe bɨ̌n bí, bɨ̌n bíʼee túú le bʉ́á ɨ́ miléme, bɨ̌n bíʼee mimpaŋ bígwɨ́má, bɨ̌n díʼee e sɨ́n ɨ́ miléme, bɨ̌n dwêʼ nye bintɨ́ʼá ɨ́ lɔ̌b wé. Ɨ́ menzɨ̌ maá mɨ́mɛ̂h, bɨ̌n bé á lɛ̂ʼle ó, bɨ̌n bé á be ó otîtyěl, abe e mebě ɨ́ lɔ̌b waá.

¹² Mekaná maá, mé á bé acɛmɔɔ, ɨ́ lɔ̌b mʉ̂r á byaʼ nyá, nkʉ̂ ɨ́ lɔ̌b waá á byaʼɔɔ ɨ́ lɔ̌b waá nyá. Me á cɛma bɨ̌n mekaná maá ó, yé nkʉ̂ gʉ́a nyɨ̂n mpʉ bɨ́n dí ekpɛl bɨ́h ɨ́ buo buo yɨ́. Bɨ̌n bʉr o tɨ̂, dwɛ́ʼɛ́ɛ́ gá mpʉ bɨ́n dí yɨ́, ɨ́ míh mé Nzyɛ̌m.

¹³ Sá tɨ̂ʼ ó mílémé míh mû sí sula sí yɨ́. Bɨ̌h damá soho ɨ́ lɔ̌b nkûl bɨ́h dí e né ɨ́ miléme nyɨ́, sá dí ebuú gbâ bɨ́h bisʉhʉʉ ɨ́ miléme yɨ́, yé ó bisʉhʉʉ mé Títos, ebě, lémé wé, wé á be ó, wé mû sí lóno ɨ́ bisʉhʉʉ ɨ́ lɔ̌b wɨ́n, bɨ̌n bɨ́bɛ̂h.

¹⁴ Yê tyeetye ó, me á si nkʉ́na ɨ́ lɔ̌b wɨ́n. Sâ gwár, me á bé asɔ́ma, ɨ́ lɔ̌b bísyɛ́ɛla bín. Mpʉ bɨ́h á lwib lɨ́ otyeetye ɨ́ jɔʼ yɨ́yɛ̂h yɨ́, Títos á ka bee píe tɨ̂ʼ ó, mbi bɨ́h á be lɨ́ enkʉ́na ɨ́ lɔ̌b wɨ́n wɨ́, wé á be ntémé ó tyeetye.

¹⁵ Nye lɨ́ ebuú kpɛl bɨ́n ɨ́ jɔʼ nyé dí esímsa méjóʼo mɨ́n, bɨ̌n óbɛ̂h yɨ́, le ɨ́ jɔʼ nyé símsá mpʉ bɨ́n á nʉa nye e bʉ́á le osâʼsâʼ yɨ́.

¹⁶ Me mû kǎ buú soho ó, bɨ̌n bɨɛ, ebě, bɨ̌n bɨ́ sâ ó, me bûʼlaa bɨ̌n ɨ́ milɔ̌b mímyɛ̂h.