2 Korɛnt 6 - Kálar Nzyɛ̌m : Ejwán é Sáá

^1-2 Ebě, Nzyɛ̌m lɛ́ɛ́ ó nɛ́ɛ: «Ɨ́ jɔʼ yé á jala yɨ́, me á si jóʼo go. Ɨ́ móhó mé á tiʼ bʉ́ʉ́ bʉ̂r wɨ́, me á si kɛm go ntémé.» Nó mpʉ bɨ́h dí esɨséǎ Nzyɛ̌m syɛ́ɛ́ gwár yaá yɨ́, bɨ̌h bé lɨ́ ejɨʼla e bɨ̌n ó, bɨ̌n ayɨ́ bi mpâm mé Nzyɛ̌m dwêh. Jɔ̌ʼ Nzyɛ̌m á kam ó, nye óyala mɨ́ná gá yɨ́ ó yɨ̂. Móhó nyé á tyêl lɨ́ esú lé étiʼ mɨ́ná gá wɨ́ ó wɨ̂.

³ Bɨ̌h bé agbâ mébɔ̌ʼ ɨ́ nzɨ̌, lɨ́ ebene ó, mʉr ámû jaá twe. Nó ntémé ó bɨ́h ngá séǎ syɛ́ɛ́, mʉr adwe bɨ́h mebě tɨ̂ʼ yɨ́.

⁴ Bɨ̌h lɛ́ʼlé e nzɨ̌ bisyɛ́ɛla bíh ó, bɨ̌h kʉ́ bě tyeetye ó osyɛ̂l o mésâ mé Nzyɛ̌m. Bɨ̌h sá nó ó e menzɨ̌ mâ: esâ sɨ́n damá jóʼo ɨ́ mitúú e mindɛ̌l tʉ́ŋlʉ̌, edûhwo édi ɨ́ bi bísyɛ́ɛ́,

⁵ edûhwo ébíʼé, edûhwo mímbʉʼ, edûhwo bíntʉ̌, edûhwo mítútúú, edûhwo móho, edûhwo nzâ,

⁶ edile e nyʉ̂l lɨ́h, ngwɨ́á wɨ́h, bíhwó nyɨ́h, mpam nyɨ́h, bisyɛ́ɛla bɨ́h dí esâ e nzɨ̌ Sísǐm mé Nzyɛ̌m bí, kpɛ̌l yɨ́h dí abě mbáʼrá e mikóo yɨ́,

⁷ túnó bɨ́h dí etúno ótyeetye wɨ́, nkǔl nɨ́nɨ́ɨ́ mé Nzyɛ̌m, bisá bí mɔ̂m bɨ́h dí elwímla dɔ̂m lɨ́ esú lé ótîtyěl mé Nzyɛ̌m e tɨ̂ʼ bí, bîʼ le ejʉ̂m, byúú le emyɛ̌l,

⁸ ɨ́ jɔʼ bé dí edwe bɨ́h kûm nkʉ̂ sâ bɨ́h pyêh yɨ́, ɨ́ jɔʼ bé dí eswêʼ míé mɨ́h nkʉ̂ gúmlo bɨ́h yɨ́, ɨ́ jɔʼ bé dí eláa ó, bɨ̌h bé ó bʉr o dí edímle bʉ̂r e nzɨ̌ mikóo, bɨ̌h bɨɛ yɨ́ɛ olɛ́a bé ótyeetye bá yɨ́,

⁹ ɨ́ jɔʼ bé dí eláa bɨ́h ɨ́ sɔ́má bʉ̂r o dí agʉ́ŋɔɔ, bɨ̌h bɨɛ yɨ́ɛ bʉr o dí egʉ́ŋɔɔ bá yɨ́, ɨ́ jɔʼ bé dí eláa ó, bɨ̌h bé ó mimúu, bɨ̌h bɨɛ yɨ́ɛ bʉr o dí ɨ́ twiʼ bá yɨ́, ɨ́ jɔʼ bɨ́h dí edweŋɔɔ bíntɨ́ʼá, bɨ̌h bɨɛ yɨ́ɛ ajʉ́ŋɔɔ yɨ́,

¹⁰ ɨ́ jɔʼ bé dí egbâ bɨ́h ebúʼ ɨ́ miléme, bɨ̌h bɨɛ yɨ́ɛ bʉr o dí esoho ɨ́ jɔʼ yɨ́yɛ̂h bá yɨ́, ɨ́ jɔʼ bɨ́h dí lɨ́ edyêb, bɨ̌h bɨɛ lɨ́ edwe bʉ̂r ɨ́ buo buo okúm le ogbaa yɨ́, ɨ́ jɔʼ bɨ́h dí abe e sɔ̂ʼ, bɨ̌h bɨɛ yɨ́ɛ e sá yɨ́yɛ̂h yɨ́.

¹¹ Bɨ́ɔɔ́ bɨ́h! Okɛ́l bɨ́h! Bʉr ó Kórɨnt ɛ̌! Bɨ̌h bé á si lwib e bɨ̌n ɨ́ hwɨ́m, asǒl sɔ̂ʼ. Bɨ̌h bé lɨ́ ekpɛl bɨ́n ɨ́ buo buo.

¹² Bɨ̌h bé atɛ́ɛ bɨ́n. Bɨ̌n ó dí etɛ́ɛ bɨ́h ɨ́ milémé mín.

¹³ Nó mě lwǐb e bɨ̌n ó mpʉ bwán bâm. Sáʼ gá me syɛ́ɛla dí ejala e kpɛ̌l yaá yɨ́. Kpɛlɨɨ gá me ntémé ɨ́ buo buo.

Abâʼra gá le osyɛ̂l o mísyóm

¹⁴ Akǎ báʼǎ bâʼra gá e bʉr o dí adyɛ̂ʼwo e Nzyɛ̌m bá, ebě, wáǎ mbi mpúhlá tîtyěl mʉr, bé e bɨ́bla mʉ̂r dí tɨ̂ʼ nyɨ́? Ngɨ́ngéŋ le edúrʉ́ʉ́, byé e nkul epûhla nyá?

¹⁵ Krîst, bé e Béelzébul, bé e nkul edi twíí wáǎ mbi? Nkʉ̂ ntɔ̂ʼ ó, wáǎ mbi nkɔ̂b mbûʼla dí e nkul ebi, bé e hááden jwɨʼ gwár nyɨ́?

¹⁶ Nzê bʉr o dí eséa ɨ́ mpáh Nzyɛ̌m bá, bé e baá o dí etʉ̂to ɨ́ menzaá bíkpɛʼkpɛ̂ʼ bí ónzyɛ̌m bá, bé e nkul esʉ nkâm mpwár ɛ́? Ebě, menyʉ́l gá mɨ́ná, mé ó mpáh Nzyɛ̌m dí kublakúbla nyɨ́. Yé ó kwahaá mpʉ̌ Nzyɛ̌m mʉr tɨ̂ʼ á lɛ́ɛ yɨ́, ó: Me ódi ɨ́ sɔ́má yɔ́ɔ́, le etiʼe ɨ́ sɔ́má yɔ́ɔ́ tʉ́ŋlʉ̌. Me óbe ó Nzyɛ̌m wɔ́ɔ́. Bɨ́ɛ, bé óbe ó bʉr bâm.

¹⁷ Dâ Nzyɛ̌m, nye lɨ́ elɛ́ɛ ntémé ó: «Duhaa gá ɨ́ sɔ́má yɔ́ɔ́. Bɔ́ʼáá gá e bê. Anyamlě kúna gá e sá dí e tilá yɨ́. Nó ó mé ónʉa bɨ́n e bisʉhʉʉ yɨ́.»

¹⁸ Dâ, dí Nzyɛ̌m nkul nyɨnyɛ̂h nyá, nye lɨ́ ebáʼǎ lɛ́ɛ ó: Me óbe ó sɔ́ŋ wɨ́n; bɨ̌n bé óbe mé ó, bwân, bwá ó bʉbá le bwá ó bʉrʉ̂m.