2 Korɛnt 5 - Kálar Nzyɛ̌m : Ejwán é Sáá

¹ Mɨná bé lɨ́ egʉ́a gá ó, mbɛ̌r kán mɨ́ná dí gá tɨ̂ʼ ɨ́ sí yɨ̂ʼ wɨ́, wé sí gbɔ́a nó, yé e gúú ódiá ɨ́ jʉ́o kʉ́, waá Nzyɛ̌m á komo gá mɨná wɨ́. Wɨ́haá mbɛ̌r, wé á bé asumɔɔ e mebó mé bʉ̂r. Nzyɛ̌m mʉr tɨ̂ʼ ó b'á sumo wê. Wé ó ngá dǐ njʉ̌m dǐ e njʉ̌m dǐ.

² Ebě, lɨ́ odiá wɨ̂, mɨná jónó gá ó ɨ́ jɔʼ yɨ́yɛ̂h. Sá mɨ́ná dí ebuú gwɨ̂m gá yɨ́, yé ó, mɨná káa céne gá odiá gá wɨ́ná, lɨ́ etó di ɨ́ waá mû mɨná gá ɨ́ jʉ́o kʉ́ wɨ́.

³ Ebě, ɨ́ jɔ̌ʼ mbɛ̌r mpâ waá, wé óbúblo mɨ́ná gá yɨ́, mɨná bé ákǎ báʼǎ beɔɔ ósuswáh ɨ́ nkɛŋlɛ̂m.

⁴ Ebě, mɨná gá bɨɛ, bʉr o dína lɨ́ eswab ɨ́ bisaʼ bîʼ tʉ́ŋlʉ̌ bá, mɨná bé lɨ́ ekʉ́ jóno gâ. Yé aduho yɨ́ɛ e gwɨ́má épɛʼ nyʉ̂l bipúno nyɨ̂. Yê njɨ ó, mɨná bé lɨ́ ekpɛl éswam gá nyʉ̂l dwân. Nó ó, sá dí e nkul edwe yɨ́, twiʼ, yé ókʉ́ mine yé ɨ́ wʉlʉm.

⁵ Nó ó, mʉr á sâ ó, mɨná díʼee gá nó nyá, nye ó Nzyɛ̌m. Nye ó b'á ntɨh mɨná gá Sísǐm mpʉ̌ jwɨʼ.

⁶ Sá tɨ̂ʼ ó mpûʼla dí elóno bɨ́h ɨ́ miléme ɨ́ jɔʼ yɨ́yɛ̂h yɨ́. Bɨ̌h bé lɨ́ egʉ́a gá ntémé ó, jɔʼ yɨ́yɛ̂h bɨ́h dína tʉ́ŋlʉ̌ mimbór ményʉ̂l bipúno yɨ́, yé ó jɔʼ bɨ́h e Tî Yésʉs dína e ncɛrá yɨ́.

⁷ Mɨná tyé gá ó, ɨ́ búʼó, abe lɨ́ ebee e mîh.

⁸ Mě lɛ́ɛ́ ó, bɨ̌h bé e mpûʼla ɨ́ buo buo ɨ́ miléme. Mɨná bé lɨ́ ebee gá embɨa ó, yé mbɨa ɨ́ jɔʼ mɨ́ná dí etwâʼ gá ɨ́ nyʉ̂l bipúno nyɨ̂, lɨ́ esú ó, mɨná tôʼ sul gá ɨ́ mpóʼo mé Tî Yésʉs.

⁹ Mɨná damá di gá ɨ́ nyʉ̂l bipúno, nkʉ̂ ó, mɨná damá twâʼ gá tɨ̂, yé jala ó, mɨná nyɛ́ɛ sáa gá ó, Tî Yésʉs béyɨɨ syɛ́ɛla yɨ́yɛ̂h mɨ́ná dí esâ gá yɨ́ mbɨ̂mbɨá.

¹⁰ Ebě, yê mɨná gá bɨ́bɛ̂h bi ó, mɨná pyálaa gá ɨ́ mpǒm mé Krîst lɨ́ esú é tíʼá mílɔ̌b gá wɨ́ná. Mʉr nyɨnyɛ̂h óbi myɛ́na ó, dû mpʉ bísyɛ́ɛla byé, byé á be ɨ́ jɔʼ nyé á be ɨ́ twiʼ yɨ́: nkʉ̂ byé á be ó, ɨ́ mbɨa, nkʉ̂ ó, byé á be ó, ɨ́ bébe.

Mɨná gá e Nzyɛ̌m, bɨ́ saa ɨ́ nzɨ̌ mé Yésʉs

¹¹ Bɨ̌h bɨ́ gʉ́ǎ sá dí esâ ó, mʉr jóʼaa Nzyɛ̌m bʉ́á yɨ́. Sá tɨ̂ʼ ó bɨ́h dí etô le edulo bʉ̂r yɨ́. Nzyɛ̌m, nyɨ́ kʉ́ gʉ́ǎ mpʉ bɨ́h dí yɨ́. Mpûʼla, nye me ɨ́ léme ó, mipahlá mílémé mín, mí gʉ́a bɨ́h ntémé nó.

¹² Sá dí etíne bɨ́h ó, bɨ̌h tílaa nó yɨ́, yé abe lɨ́ esú ó, bɨ̌h sêʼlaa bɨ̌h bʉr o tɨ̂ʼ ɨ́ míh mɨ́n. Bɨ̌h jaá cɛmá yé ó, njɨ bɨ̌n bíʼee ekǎn lé élɛ́ɛ ɨ́ jɔʼ bɨ́n dí ebɛ̂ʼ e bʉr o dí enkʉ́na ɨ́ bisâ bi dí enyɨ̂n kʉ̌l bí bá. Mbi bé dí enkʉ́na wɨ́, wé ó mpʉ̌ sá lɛ́ɛ́, bisâ byaá ó dí ɨ́ mbɨa. Bé ankʉ́na yɨ́ɛ ɨ́ lɔ̌b bísá bi dí bé ɨ́ miléme bí.

¹³ Yé bé bɨ̌h bé lɨ́ ekáa ógʉ̌ nó, bɨ̌h káá ó, lɨ́ esú mé Nzyɛ̌m. Bɨ́h páhlé mílɔ̌b mpʉ mípɨpɨ́ʼ nɛ́ɛ: bɨ̌h sá nó ó, lɨ́ esú lɨ́n.

¹⁴ Sá dí etíne bɨ́h, ó bɨ̌h túnaa Mbɨambɨa Lɔ́ɔ́ mé Nzyɛ̌m yɨ́, yé ó kpɛ̌l Krîst á gbâ bɨ̌h ɨ́ miléme yɨ́. Mbeá wɨ́h, wé ó, mpʉ mʉ̂r ngwár á dwe lɨ́ ebúra e bʉr bɨ́bɛ̂h yɨ́, yé lɛ́ʼlé mɨ́ná gá ó, bʉr bɨ́bɛ̂h, bé á si dwe.

¹⁵ Nye á si búra e bʉr bɨ́bɛ̂h lɨ́ esú ó, bɨ́bɛ̂h tíʼaa. Tyé yɨ́yɛ̂h bé dína ɨ́ twiʼ yɨ́, bicwiʼ byɔ́ɔ́, byé ɨ́ jala le ebe e nyɔm ó, lɨ́ esú é mʉ̂r á pa búra e bé, ntɔ̂ʼ pah nyá. Bé akǎ jala le esáa myɔ́ɔ́ mínyɔm.

¹⁶ Ebe nó, táare ɨ́ báánâ, bɨ̌h bé akǎ gʉ́a mʉ̂r e nzɨ̌ ngwɨ́á wɨ́h. Damá jóʼǒ mpʉ bɨ́h á nyɛɛ gʉgʉ́a Krîst e nzɨ̌ ngwɨ́á nyaá yɨ́, nó ɨ́ báánâ, bɨ̌h bé akǎ gʉ́a nyé nó.

¹⁷ Mbeá wɨ́h, wé mû ó wɨ̂: yé bé nyʉ́ʉ́ mʉ̂r, nyɨ́ pûhla e Krîst nó, nye mû ó edwán é mʉ̂r ó tɨ̂ʼ yɨ́. Minjʉ̌m bísɔ̂ʼ mímyɛ̂h, mí laa. Yê jaa ka líʼ ó, njɨ medwán e medwán.

¹⁸ Nó ó, syɛ́ɛla yaá yɨ́yɛ̂h, yé duho ó e Nzyɛ̌m. Nye ó b'á sâ saá dí edira mɨ́ná gá le onɔ́ɔ́ nyɨ́. Nye á saa lɔ̌b gá wɨ́ná ó, ɨ́ nzɨ̌ mé Krîst. Nye ntémé ó b'á tyêl bɨ̌h ɨ́ syɛ́ɛ́ ó, bɨ̌h níŋlaa bʉ́ʉ́ bʉ̂r ɨ́ sɔ́má bʉ̂r o bé e boo nɔ́ɔ́ mû ɨ́ saá bá.

¹⁹ Ebě, Nzyɛ̌m á sâ saá mû lɨ́ edira bʉ̂r ó sí bɨ́bɛ̂h e né nyɨ́ ó, ɨ́ nzɨ̌ mé Krîst. Nye á bé aláǎ bím bíbaa bí ébébe nyé á niʼe bé bí. Nye nzě tyêl bɨ́h bɨɛ ɨ́ syɛ́ɛ́ ó, bɨ̌h túnaa bʉr lɔ́ɔ tɨ̂, ó bé nkʉ̂ bâʼra e mʉr bé e boo nɔ́ɔ́ mû ɨ́ saá nyaá nyá.

²⁰ Nó bɨ̌h bé ó bʉr o mílʉ́mlʉ́ ɨ́ syɛ́ɛ́ mé Krîst. Yé ó mpʉ̌ sá lɛ́ɛ́, Nzyɛ̌m mʉr tɨ̂ʼ ó dí ejébe bɨ́n ɨ́ nzɨ̌ njɨ́blɨ́ wɨ́h. Ɨ́ tyé mé Krîst, bɨ̌h mû lɨ́ ejɨʼla e bɨ̌n ó nɛ́ɛ: kamaa gá ó, bɨ̌n bɨɛ díʼee baá Nzyɛ̌m á sâ saá páʼ bé e boo nɔ́ɔ́ bá.

²¹ Mʉr á be abe e mpɨŋ nyá, nye ó waá Nzyɛ̌m á dwir syɛ̂l misyóm lɨ́ esú gá lɨ́ná nyá. Nye á sâ nye nó ó, mɨná nkʉ̂ di gá otîtyěl o bʉ̂r ɨ́ míh mé Nzyɛ̌m e nzɨ̌ mʉr waá.