Bìoball air-loidhne

2 Korɛnt 4 - Kálar Nzyɛ̌m : Ejwán é Sáá

Solá sɔ̂ʼ

¹ Bɨ̌h bé adímle nkûl ɨ́ miléme, ebě, Nzyɛ̌m á si jɨ̂ʼ bɨ̌h nkoó lɨ́ edwe bɨ́h syɛ́ɛ́ yɨ̂.

² Bɨ̌h bé asâ bísyɛ́ɛla mésǒ bi dí edulo sôn bí. Bɨ̌h bé acéně sɔ̂ʼ ɨ́ milɔ̌b mé Nzyɛ̌m bɨ́h dí elɛ̂ʼle mí. Bɨ̌h jaá dwe ó, njɨ mpǎŋ lɛ́ʼlá dí tyeetye wɨ́. Ɨ́ mbi waá ó bɨ́h dí esâ ó, mʉr nyɨnyɛ̂h béyɨɨ bɨ̌h mbɨ̂mbɨá yɨ́. Bɨ̌h sá nó ó, ɨ́ míh mé Nzyɛ̌m.

³ Yé ká be ɨ́ báánâʼ ó, Mbɨambɨa Lɔ́ɔ bɨ́h dí etúno wɨ́, wé ɨ́ dímlɨ́ di dímlɨ́ nó, bʉr o mû sí dîm bá bé omér ó dí ebee wé nó.

⁴ Bʉr o dí abûʼla bá, bé lɨ́ elúʼo pɨ̂ʼ dí ó, bé jóʼaa lɔ́ɔ́ wɨ́h, bûʼla wê, ebě, nzyɛ̌m sí yɨ̂ʼ á si dímle bé pɨʼ nyaá. Nyě sá nó ó, nye kámlaa bé lɨ́ ebee mímbah mi dí epan, duho ɨ́ mentyɛnwa mé Krîst mí. Nyě sá nó ó, bé ámû jaá bee méntyɛnwa maá ɨ́ Mbɨambɨa Lɔ́ɔ́ mé Yésʉs, bé ntɔ̂ʼ gʉ́a ó, Yésʉs ó dí gulo mé Nzyɛ̌m.

⁵ Ebě, bɨ̌h bé atúnǒ lɔ́ɔ́ wɨ́h, bɨ̌h bʉr o tɨ̂. Lɔ́ɔ́ bɨ́h dí etúno wɨ́, wé dumo ó e Yésʉs-Krîst, dí Tî gá wɨ́ná nyá. Nó, bɨ̌h bɨɛ ó dí osyɛ̂l o mésá bɨ́n lɨ́ esú mé Yésʉs.

⁶ Ebě, Nzyɛ̌m á lɛ́ɛ ó: «Njʉl, wé pánaa myɛ́n, duho lɨ́ edúrʉ́ʉ́ tʉ́ŋlʉ̌.» Mʉr ngwár e ngwár á pa lwib nó nyá, á sâ ntémé ó, njʉl pánaa myɛ́n ɨ́ miléme gá míná. Njʉl waá ó dí esâ ó, mɨná béyɨɨ gá mpǒm mé Krîst, le egʉ́ǎ mpʉ nyé dí yɨ́, bee méntyɛnwa mé Nzyɛ̌m mʉr tɨ̂.

⁷ Tó kœb ó, bɨ̌h bʉr o dí ebee kûm mé Nzyɛ̌m bá, bɨ̌h baʼle ókúm waá ó, ɨ́ mikáʼ mí déʼé. Mikáʼ mí déʼé myaá, myé ó menyʉ́l gá mɨ́ná. Yê bɨ̌h nó ó, yé nkʉ̂ gʉ́a nyɨ̂n ɨ́ sʉ́lʉ́lʉ́ ó, nkǔl nɨ́nɨ́ɨ́ mɨ́ná dí gá e nye nyɨ́, nyě duhó ó, kwá mé Nzyɛ̌m, abe ɨ́ bɨ̌h bʉr o tɨ̂.

⁸ Mimbi mítúú e mindɛ̌l mímyɛ̂h, myê bɨ̌h ó, njɨ twíí; sâ gwár, bé asie bɨ́h ɨ́ twíilɨ̌. Damá be ó, bá, yé ó bɨ̌h ɨ́ miléme; sâ gwár, mpûʼla, nyé adíme bɨ́h ɨ́ miléme.

⁹ Bé lɨ́ etíble bɨ́h; sâ gwár, Nzyɛ̌m, nyé alíʼe bɨ́h. Bé damá dumo bɨ́h sí; sâ gwár, bé abe e nkul ejʉ̂ bɨ́h.

¹⁰ Bijɔʼ bíbyɛ̂h, bɨ̌h bé lɨ́ ejóno ɨ́ lɔ̌b éswie mé Yésʉs dí ɨ́ menyʉ́l mɨ́h lɨ́. Yê bɨ̌h nó ó, twiʼ mé Yésʉs nkʉ̂ nyɨ̂n ntémé ɨ́ menyʉ́l mɨ́h.

¹¹ Bɨ̌h damá be míkublakúbla, bɨ̌h bê ɨ́ jɔʼ yɨ́yɛ̂h ó, ɨ́ ka sóo, ɨ́ lɔ̌b búʼó dí edumo e Yésʉs yɨ́, lɨ́ esú ó, twiʼ yé, yé nyɨ́nɨɨ ɨ́ menyʉ́l mɨ́h, maá me dí elaǎ mpʉ̌ ngúl mpáá má.

¹² Nó, bɨ̌h bé lɨ́ ejaʼra le eswie, bɨ̌n bɨɛ ɨ́ twiʼ.

¹³ Yê cɛmá ɨ́ Mekaná mé Nzyɛ̌m ó: Me á si bûʼla. Sá tɨ̂ʼ ó mé á lwib yɨ́. Bɨ̌h ntémé bé e búʼó ɨ́ miléme. Sá tɨ̂ʼ ó bɨ́h á lwib yɨ́.

¹⁴ Ebě, bɨ̌h bé lɨ́ ekʉ́ gʉ́a ó, waá á pɛh Tî Yésʉs, dwih nyé lɨ́ odwe nyá, nye ntémé ópɛh mɨ́ná gá le onɔ́ɔ́. Nyé otyêl mɨ́ná gá ɨ́ míh mé, ɨ́ gúmó Yésʉs dí yɨ́.

¹⁵ Ebě, mitúú e mindɛ̌l myaá mímyɛ̂h, myé pípyál bɨ́h ó, lɨ́ esú lɨ́n. Nó ó Nzyɛ̌m ngá cwɨ́a e buobuo bʉr lɨ́ esú lé ébul tâŋ minjɨʼla mi nzyóo yɨ́. Nzyɛ̌m óbuú bi kûm tɨ̂.

Eswie, le pahá sóo

¹⁶ Sá tɨ̂ʼ ó nyʉ̂l dí atyɛʼ bɨ́h yɨ́. Damá jóʼǒ mpʉ bɨ́h mû lɨ́ ekʉ́ bo ɨ́ nkǒ páʼ nyʉ̂l dí enyɨ̂n kʉ̌l nyɨ́ yɨ́, sâ gwár, nyaá tʉ́ŋlʉ̌, nye lɨ́ etô le edwánwǒ móhó wɨ́wɛ̂h.

¹⁷ Ebě, bwá mítúú bɨ́h dí esia e myé ɨ́ báánâʼ mí, myé lɨ́ elaǎ mpʉ̌ ngúl mpáá. Mitúú myaá míɛ, myé ó sá dí esâ ó, bɨ̌h bíʼee kûm ɨ́ buo buo ngá dǐ njʉ̌m dǐ e njʉ̌m dǐ nyɨ́ yɨ́.

¹⁸ Ebě, bɨ̌h bé agbâ míléme ɨ́ bisá bi dí enyɨ̂n bí. Bɨ̌h gbá myé ó, ɨ́ bisá bi dí anyɨ̂n bí, ebě, byaá bi dí enyɨ̂n bí, byé lɨ́ elaǎ mpʉ̌ ngúl mpáá. Tó kœb ó, byaá bi dí anyɨ̂n bí bíɛ ó dí edǐ njʉ̌m dǐ e njʉ̌m dǐ.

« Roimhe

Air adhart »

Lean sinn:

Ceanglaichean taic

Sanasan