2 Korɛnt 3 - Kálar Nzyɛ̌m : Ejwán é Sáá

¹ Nzê bɨ̌h mû ó lɨ́ ebáʼǎ nyɛl ésêʼle bɨ́h bʉr o tɨ̂ʼ ɛ̌? Nzê bɨ̌h bɨɛ ó jálá le elɛ̂ʼle bɨ́n mekaná me dí elɛ́ɛ bɨ́n mbi bʉ̂r bɨ́h dí wɨ́ má ɛ́? Nzê bɨ̌n ó jálá le elɛ̂ʼle bɨ́h mekaná me dí elɛ́ɛ bɨ́h mbi bɨ́n dí wɨ́ má ɛ́? Yé abe mɨ́ná gá e nyɔm ó, mɨná sâʼ gá nó.

² Bɨ̌n bʉr o tɨ̂ʼ ó dí mekaná mɨ́h mé á cɛmɔɔ ɨ́ milémé míh tʉ́ŋlʉ̌ má. Mʉr nyɨnyɛ̂h óbɛ̌m láa le egʉ́a mékaná maá.

³ Bɨ̌n lɛ́ʼlé ɨ́ kpɛŋlɛm ó, bɨ̌n bé ó mekaná Krîst á cɛma má. Mekaná maá, mé lɛ́ʼlé ntémé ó, syɛ́ɛ́ bɨ́h á sâ ɨ́ sɔ́má yɨ́n yɨ́. Bɨ̌n bé abe mékaná mé á cɛmɔɔ e medíbé mé lwâb má. Mbi mékaná bɨ́n dí wɨ́nɨ̌, wé ó mekaná mé á cɛmɔɔ e Sísǐm mé Nzyɛ̌m dí kublakúbla wɨ́ má. Mé á bé acɛmɔɔ lɨ́ otéble o mékóʼ tʉ́ŋlʉ̌. Mé á cɛmɔɔ ó, ɨ́ milémé mí bʉ̂r tʉ́ŋlʉ̌.

⁴ Krîst á si gbâ bɨ̌h pîm ɨ́ búʼó. Nó ó bɨ́h dí ecɛma bɨ́n ɨ́ mpǒm mé Nzyɛ̌m yɨ́.

⁵ Yé abá kúnwo e bɨ̌h ó, bɨ̌h lɛ́yɨɨ ó, bɨ̌h bé ó bʉr o jálá le eséǎ syɛ́ɛ́ yaá bá. Nkul dí ó, bɨ̌h séaa yé nyɨ́, nyé aduho ɨ́ bɨ̌h. Nyě duhó ó, njɨ kwá mé Nzyɛ̌m.

⁶ Nye ó b'á dwe bɨ̌h nkul ó, bɨ̌h díʼee bʉr o jálá le eséa nyé syɛ́ɛ́ bá. Bɨ̌h mû ó osyɛ̂l o mésá bé, lɨ́ eníŋle bʉ̂r lɨ́ edwán é sáá. Nye á sâ saá nyaá ó e nzɨ̌ Sísǐm wé, abe e metié me dí micɛmá má. Ebě, metié mɨ́ɛ, mé jaá jʉ̂jʉ ó jʉ́ʼóo; Sísǐm mé Nzyɛ̌m wɨ́ɛ dwe bʉ̂r twǐʼ njʉ̌m dǐ e njʉ̌m dǐ.

⁷ Ɨ́ jɔ̌ʼ Moyɨ̂z á tyêl bʉr metié mé á be mikpɛʼá ɨ́ mekóʼ má yɨ́, bé á jaa gbah mé ó, gbaháa, bé ntɔ̂ʼ dwe. Ɨ́ jɔʼ nyé á séa bé syɛ́ɛ́ yaá yɨ́, yé á be ó e kûm Bʉr o b'Ɨ́zraɛ̂l, bé á bé abe e nkul egwá dwɛ̂ʼ mpóm mé Moyɨ̂z ɨ́ tooobó, ɨ́ lɔ̌b méntyɛnwa mé á be ɨ́ mpǒm nyé má, damá jóʼǒ mpʉ méntyɛnwa maá, mé á to le edíme mé omér yɨ́.

⁸ Syɛ́ɛ́ yé á ntɛŋ eswie ɨ́ bʉr yɨ́, yé pǎ nyɛɛ́ ntyɛnwa, á dwɛʼra e yaá Sísǐm mé Nzyɛ̌m mû lɨ́ eséa yɨ́! Syɛ́ɛ́ yé yaá, yé óbuú ntyɛnwa, laa yɨ́haá.

⁹ Syɛ́ɛ́ Moyɨ̂z á séa ó, bʉr nkʉ̂ dweŋɔɔ mébě píe tɨ̂ʼ yɨ́, yé pǎ nyɛɛ́ ntyɛnwa, á dwɛʼra e yaá Nzyɛ̌m á séa ó, bʉr bíʼee nkam e tɨ̂ʼ yɨ́! Yé óbe ó, ɨ́ ntyɛ̌n ntî ntyɛ̌n, laa yɨ́haá.

¹⁰ Mɨná bé óbɛ̌m lɛ́ɛ gá ó, mentyɛnwa mé á nyɛɛ be ɨ́ ntyɛ̌n ntî ntyɛ̌n ɨ́ jɔʼ mé Moyɨ̂z má, mé akǎ bě sɔ̂ʼ. Mentyɛnwa mû lɨ́ ekǎ nyɨ̂n ɨ́ syɛ́ɛ́ gá yɨ́ná ɨ́ báánâʼ má, mé lɨ́ entyɛnwa, laa yɨ́haá.

¹¹ Sá yé á be e mentyɛnwa, mé á to le edíme mé omér má yɨ́, yé pǎ nyɛɛ́ dweŋɔɔ kûm, á dwɛʼra e yaá ngá dǐ njʉ̌m dǐ e njʉ̌m dǐ yɨ́! Yé ɨ́ jala le ebuú dweŋɔɔ kûm, laa yɨ́haá.

¹² Sâ yaá ó mílémé míh mû sí lóno ɨ́ mpûʼla yɨ́. Mpûʼla nyaá ó dí edwe bɨ́h nkul elwib ɨ́ hwɨ́m, adwáawǒ sɔ̂ʼ.

¹³ Bɨ̌h bɨɛ, bé abě mpʉ mé Moyɨ̂z. Nye á si búblo kán mpʉ́ʉ ɨ́ mpǒm, lɨ́ ekamle bʉ̂r o b'Ɨ́zraɛ̂l ó, bé béyɨɨ mentyɛnwa me mpóm nyé, mé á to le edíme mé omér má.

¹⁴ Tó kœb ó, ecwólwo lɔ́ɔ́, lé á be ó sí dwira édúrʉ́ʉ́. Pyâl ɨ́ dʉ́ó lɨ̂ʼ mûh, pɨʼ nyɔ́ɔ́, nye dína ó mbúblá e kán waá ɨ́ jɔʼ bé láá mékaná mé njʉ̌m sáá yɨ́. Kán mpʉ́ʉ waá, wé jaá pʉʼa mʉ̂r ɨ́ mpǒm ó, njɨ ɨ́ jɔʼ mʉ̂r waá púhlá e Krîst yɨ́.

¹⁵ Jɔʼ yɨ́yɛ̂h bé láá ókálǎr Moyɨ̂z á cɛma bá yɨ́, kán waá dína ó, lɨ́ ebúblo pɨ̂ʼ nyɔ́ɔ́, nzě kumo ɨ́ dʉ́ó lɨ̂ʼ mûh.

¹⁶ Tó kœb ó, jɔʼ mʉ̂r dwírá léme, dyɛ̂ʼwo e Dâ yɨ́, kán waá, wé lɨ́ epʉʼa.

¹⁷ Nó ó, Dâ Nzyɛ̌m, nye ó sísǐm. Yé lɛ́ʼlé ó, gúmó Sísǐm mé Dâ dí yɨ́, okómó ntʉ́ʼ tɨ̂.

¹⁸ Nó ó, kán mpʉ́ʉ waá, wɨ́ pʉʼa ɨ́ mpǒm gá nyɨ́ná. Sá tɨ̂ʼ ó mɨ́ná mû lɨ́ ekʉ́ bee gá kûm mé Tî Yésʉs ɨ́ sɔ́ɔ́ɔ́ yɨ́, mentyɛnwa me tɨ̂ʼ lɨ́ ekʉ́ pân ntémé, duho ɨ́ mɨná gâ. Mɨná mû ó lɨ́ edwirɔɔ gá lɨ́ esú ó, mɨná nkʉ̂ gʉ́a lɛ̂ʼle bʉ̂r kûm nyé. Dâ ó dí edwir mɨ́ná gá nó, nyɨɛ mʉr pǎ dí Sísǐm nyá.