Bìoball air-loidhne

2 Korɛnt 13 - Kálar Nzyɛ̌m : Ejwán é Sáá

Metwɨ́ɨ́ ɨ́ páʼ ósyɛ̂l o mísyóm

¹ Yé mû ó jɔʼ lɛ̂l mé múo nze gʉ̂ʼ kwá nyɨ́n yɨ́. Yê cɛmá ɨ́ Mekaná mé Nzyɛ̌m ó: Lɔ̌b wɨ́wɛ̂h, wé ójaá tíʼɔɔ ó, njɨ ɨ́ jɔʼ óboʼlo obá, nkʉ̂ olɛ̂l, bé óbe sí lwib ɨ́ mbi ngwár yɨ́.

² Me á si nyɛɛ cɨ̂l bɨ̌n ɨ́ tyen mbá ɨ́ jɔʼ mɨ́ná bé á be gá yɨ́. Me lɨ́ ebáʼǎ cɨ̂l bɨ́n ɨ́ jɔʼ yɨ̂, ɨ́ jɔʼ mɨ́ná gá dína e ncɛrá yɨ́ ó: mé ókǎ báʼǎ nze gʉ̂ʼ kwá nyɨ́n nó, me ákǎ kamle e mʉr ngwár ɨ́ sɔ́má bʉ̂r o b'á nyɛɛ sâ syóm mélú mé épíhe bá, ti e baá dína le esâ syóm bá, bɨ́bɛ̂h.

³ Ebě, bɨ̌n bé lɨ́ esáa ébee bíjwɨʼ bi dí elɛ̂ʼle ó, Krîst ó dí elwib e nzɨ̌ nyǎm bí. Krîst waá, nyé atyɛʼ ɨ́ páʼ wɨ́n. Nye lɨ́ ekʉ́ buú lɛ̂ʼle bʉ̂r ó sɔ́má yɨ́n nkul nyé.

⁴ Yê tyeetye ó, nye á si kam ó, bé bómlaa nye e binzâŋ le ebɨ́nɔɔ nyé ɨ́ kolôs kʉ́. Nye á jʉ́ŋɔɔ ó, ɨ́ lɔ̌b métyɛʼ mé á be ɨ́ nyʉ̂l nyé má. Tó kœb ó, nye mû ó lɨ́ etiʼe ɨ́ nkul mé Nzyɛ̌m. Bɨ̌h bé ɨ́ tyɛʼ ɨ́ mpúhlá nyɨ́h e Krîst ɨ́ báánâ. Sâ gwár, mɨná bé ótiʼe gá ɨ́ nkul mpwár nyé dí egbâ bɨ́n ɨ́ menyʉ̂l nyɨ́.

⁵ Bɨ̌n bʉr o tɨ̂, sáʼ gá pyal ményʉ́l mɨ́n. Bɨ̌n a dwɛ́ʼ nkʉ̂ bɨ̌n dína lɨ́ edyɛ̂ʼwo e Nzyɛ̌m. Bɨ̌n bʉr o tɨ̂, sáŋáá égʉ́a gá nkʉ̂ bɨ̌n bé lɨ́ entaa mébʉ́blá. Bɨ̌n bé apǎ gwá gʉ́a ɨ́ páʼ wɨ́n ó, Yésʉs-Krîst ó dí ɨ́ bɨ̌n ɛ̌? Yé bé abe nó wá, lɛ́ɛ́, bɨ̌n bé ó obûʼla o míkóo ó tɨ̂ʼ yɨ́.

⁶ Nó ó, mpûʼla, nye me ɨ́ léme ó, bɨ̌n bé ógʉ́a ó, bɨ̌h bɨɛ, bé abe óbûʼla o míkóo.

⁷ Nó ó, bɨ̌h jɨjɨʼlá e Nzyɛ̌m ó, bɨ̌n sá asâ tɔʼ e syɛ́ɛla ébébe egwár. Mé abuú gwɨ̂m ó, bʉr béyɨɨ ó, bɨ̌h bɨɛ, bé ó obûʼla ompâ. Mě jaá gwɨ̂m ó, njɨ bɨ̌n sâʼ bisyɛ́ɛla bimpâ, damá jóʼo ó, bé lɨ́ ebee bɨ́h nyɨɛ ó, bɨ̌h bé ó bʉr o míkóo.

⁸ Ebě, bɨ̌h bé abe e nkul elwímla le otyeetye. Nkul nyɨ́h, nye ó njɨ ɨ́ páʼ élɨl ótyeetye.

⁹ Bɨ̌h bé lɨ́ esoho ɨ́ jɔʼ bɨ́h dí enyɨ̂n bítyɛʼbol, bɨ̌n bɨɛ baánkunkúl yɨ́. Lʉ́ ékǎn ɨ́ minjɨʼla míh wé ó, bɨ̌n gwâ kwɨmlɨ mbɨ̂mbɨá nó.

¹⁰ Sá tɨ̂ʼ ó mé dí ecɛma bísá bîʼ jɔʼ mé dína apǎ pyâl gʉ̂ʼ yɨ́. Ɨ́ jɔʼ mé ópyâl gʉ̂ʼ yɨ́, me l'anyamlě kœ̌b sá yé ósâ ó, me lɛ̂ʼlaa bɨ̌n lémé ébɨ̌h e nkul jwɨ́ɨ nyǎm yɨ́. Tî Yésʉs á dwe me nkul nyaá ó, me gbâʼ bʉr nkul ɨ́ miléme, abe lɨ́ esú lé éndáma bê.

¹¹ Nó ó, bɨ́ɔɔ́ bâm le okɛ́l bâm ɛ̌! Mě lɛ́ɛ́ ó, diʼee gá mbɨ̂mbɨá. Tiʼaa gá lɨ́ otîtyěl. Jóʼáá gá melɨ́ mâm. Tʉtoŋlaa gá sâ gwár. Tiʼaa gá ɨ́ mepyɛbla. Nó ó Nzyɛ̌m dí egbâ mɨ́ná gá mpam ti e mepyɛbla byé nyá, ódi e bɨ̌n yɨ́.

¹² Bɨ́báráá gá páʼ nyɨ́n, nyʉ́ʉ́ bára e nyʉ́ʉ́, le edúula mémúʼ ndwíá dí ti wɨ́.

¹³ Bʉr o mé Nzyɛ̌m bɨ́bɛ̂h, bé lɨ́ esoho bɨ́n.

¹⁴ Ncwɨ́ncwɨ́a mé Tî Yésʉs-Krîst, le kpɛ̌l mé Nzyɛ̌m Sɔ́ŋ ti e mpúhlá mé Sísǐm mé Nzyɛ̌m, byé díʼee e bɨ̌n óbɛ̂h.

« Roimhe

Air adhart »

Lean sinn:

Ceanglaichean taic

Sanasan