2 Korɛnt 12 - Kálar Nzyɛ̌m : Ejwán é SááMbeá ésimá Pɔ̂l á bee wɨ́ 1 Nzê yê tyeetye ó, me ó lɨ́ bi ó, me nkʉ́naa ɛ̌? Syɛ́ɛla yaá, yé abe mɛ̂m e bá nyɔm! Damá jóʼo nó, me páa lɛ́ɛ bɨ́n yɨ́ɛ mpʉ mɛ̂m á bi mbeá ésimá yɨ́, le egʉ́a mísolá bísá Nzyɛ̌m á lɛ̂ʼle me bí. 2 Me lɨ́ egʉ́a nyʉ́ʉ́ mʉ̂r ɨ́ Krîst, mûh, mimbû kám e minâ. Mʉr waá á si nʉŋɔɔ, bɨ́nɔɔ kʉ́, laǎ jʉ́o le ejwoo, tó pyâl tʉ́ŋlʉ̌ baántɛ́n dí jʉ́o lɛ̂l yɨ́. (Yé bé nye á tô ó, ti e nyʉ̂l bipúno nó, mé agʉ́a. Yé bé nye á bé atô e nyʉ̂l bipúno ɨ́ jɔʼ yaá nó, me ntémé agʉ́a. Nzyɛ̌m nye omér ó dí ejaá gʉ́a.) 3 Nó ó, me lɨ́ egʉ́ǎ mbi mʉ̂r waá. (Yé bé nye á be ó, ɨ́ nyʉ̂l tʉ́ŋlʉ̌ nó, mé agʉ́a. Yé bé nye á bé abe e nyʉ̂l ɨ́ jɔʼ yaá nó, mɛm, mé agʉ́a. Nzyɛ̌m ó dí egʉ́a.) 4 Ɨ́ mpʉ nyé á bɨ́nɔɔ, tó pyâl Paradîs yɨ́, nó ó nyé á jóʼo mekǎn me dí abe e nkul etwóolɔɔ má. Yê mpéné ó, mʉr acɨ mékǎn maá. 5 Me ójaá nkʉ́na ó, njɨ ɨ́ lɔ̌b mʉ̂r waá. Sâ gwár, ɨ́ nkǒ páʼ wâm, me ákóʼó nkʉ́na ɨ́ mɛm mʉr tɨ̂. Alaa ó, mě nkʉ́ná ó, lɨ́ etyɛʼ mé dí e lé lɨ́. 6 Mé nyɛ́l énkʉ́na ɨ́ mɛm mʉr tɨ̂ʼ nɛ́ɛ: ntʉ̌ syɛ́ɛla yaá ngá liŋ mé gʉʼlʉgʉ́, ebě, me ólɛ́ɛ yɨ́ɛ otyeetye. Sâ gwár, mɨ́ kamle mé mʉr tɨ̂ʼ lɨ́ esâ nó, lɨ́ ebene ó, nyʉ́ʉ́ mʉ̂r ámû kǎ dwáawo mé ɨ́ buo buo, laǎ bím bísyɛ́ɛla nyé dí ebee mé lɨ́ esâ bí. Nye ámû dwáawo mé ɨ́ buo buo, laǎ bím mílɛ́ʼlá nyé á pa jóʼo me lɨ́ edwe bʉ̂r mí. 7 Nzyɛ̌m á bee ó, mpuo mesimá mé á bee má, mé ámû jaá sâ ó, me nkɛ́yɨɨ nyʉ̂l. Nye nzě gbâ mé ekpaa mpʉ édwǎʼ ɨ́ nyʉ̂l bipúno tʉ́ŋlʉ̌. Lé á be ó mpʉ éngeles mé Sátan á be ó, nyě bí ó me nyá. Me ámû jaá nkɛ́ɛ nyʉ̂l, ntaǎ njɨ. 8 Me á si jɨʼla e Tî Yésʉs nzɔʼ lɛ̂l ɨ́ lɔ̌b ékpaa laá, ó nye pɛ́ʼɛɛ me lǎ. 9 Nó nyé á ka yala e me ó: «Ncwɨ́ncwɨ́a mé dí elɛ̂ʼle gó nyɨ́, nyɨ́ jala e go, ebě, nkul nyǎm kʉ́ nyɨnyɨ̂n ntinɨ̂ e ntinɨ̂ ó, ɨ́ jɔʼ nyé gbáŋɔ́ɔ́ ɨ́ mʉr dí ɨ́ tyɛʼ nyá yɨ́.» Nó mé ókpɛl énkʉ́na ɨ́ lɔ̌b étyɛʼ lâm ɨ́ mbi ngá sahle wɨ́ yɨ́. Nó ntémé ó nkûl mé Krîst ódi ɨ́ me yɨ́. 10 Sá tɨ̂ʼ ó mé dí e bisʉhʉʉ ɨ́ léme yɨ́, ó me díʼee tyɛʼbol, me lwɨ́ɔɔ, me síaa e mitúú e mindɛ̌l, le ntémé, me tíblɔɔ le esáŋɔɔ míngamla lɨ́ esú mé Krîst. Ebě, ɨ́ jɔʼ mé dí lɨ́ etyɛʼ yɨ́, ɨ́ jɔʼ gwár e gwár yaá ó mé dí e nkul ntémé. Lémé mé Pɔ̂l, wé lɨ́ esyɛ̌l bá ɨ́ lɔ̌b óbûʼla ó Kórɨnt 11 Me mû ó gʉʼlʉgʉ́, lɨ́ esí bánǎ lwǐb mbi bílwǐb bínɨ̌. Bɨ̌n ó b'á sâ ó, me díʼee yê, ebě, bɨ̌n ó b'á tíne me lɨ́ esâ nó. Yé bé sá jála nó, lɛ́ɛ́, bɨ̌n ó b'á dwe me dúu, ebě, mé abe píhe bʉr o mílʉ́mlʉ́ o dí enkʉ́na ó, bé ó me dóló bá, damá be ó, mé abě sɔ̂ʼ. 12 Bijwɨʼ bi dí elɛ̂ʼle ó, me ó mʉr milʉ́mlʉ́ mé Yésʉs bí, me á si kʉ lɛ̂ʼle bɨ̌n byǎ ɨ́ ponó. Me á si séa e bíhwó, e nzɨ̌ mesimá, e bisá bí ékâm ti e bisyɛ́ɛla bi nkûl nɨ́nɨ́ɨ́. 13 Yé mé á to sâ kwá bʉ́ʉ́ bʉ̂r ó Mbɛ̌r-Nzyɛ̌m, mé á be asâ bɨ̌n bɨɛ yɨ́ ɛ́? Sâ gwár bɨ́n á be abee yɨ́, yé á jaa be ó, njɨ ɨ́ páʼ mbaʼlá wâm. Yê kwahaá tyeetye ó, me á bé agbâ bɨ́n túú ɨ́ nyʉ̂l lɨ́ enkɛ́ɛ̌ mbeʼ wɨ́h. Juʼoo gá me lɨ́ esí bánǎ sâ bɨ́n ebébe laá! 14 Paá bee gâ: jɔʼ lɛ̂l mé múo nze gʉ̂ʼ kwá nyɨ́n ó yɨ̂. Nó ó, me ákóʼó gbâ bɨ́n túú ɨ́ nyʉ̂l, ebě, mé agwɨ̂m sɔ̂ʼ e bɨ̌n. Mě jaá gwɨ̂m ó, njɨ bɨ̌n bʉr o tɨ̂, ebě, ntʉ bwân jálá le esyɛŋ bísɔ̂ʼ lɨ́ esú lé ósɔ́ŋ bɔ́ɔ́. Osɔ́ŋ bɨ́ɛ ó jálá le esisyɛŋ bísɔ̂ʼ lɨ́ esú é bwán bɔ́ɔ́. 15 Nó ó, mɛm, me ókʉ́ dímlě mɔnɨ́ yâm, dímle ntémé twiʼ yâm lɨ́ esú é twiʼ yɨ́n. Nzê yé ó tîtyěl ɨ́ páʼ wɨ́n ɨ́ jɔʼ mé tó dóló le ekpɛl bɨ́n pâʼ e pâʼ, bɨ̌n bɨɛ l'akǎ kpɛl mé yɨ́ ɛ́? 16 Bɨ̌n bé lɨ́ ekʉ́ gʉ́a ó, yé abe e mʉr ngwár ɨ́ sɔ́má yɨ́n mé á gbâ túú ɨ́ nyʉ̂l. Damá jóʼo nó, bɨ̌n bɨɛ̌ lɨ́lɛ́ɛ́ ó mpʉ mé dí ányâ-mikóo yɨ́, nó ó mé á mɛ̂r bɨ̌n ɨ́ mpila míkóó yâm yɨ́. 17 Nzê me á si díbe yʉ́ʉ́ sɔ̂ʼ e nzɨ̌ bʉr o mílʉ́mlʉ́ bâm mé á lómlo bɨ̌n bá ɛ́? 18 Me á si jɨʼla e Títos, bé e mɨ́ɔɔ́ wɨ́h ó, bé tôʼ kwá nyɨ́n ɨ́ menɔɔlʉ. Nzê Títos á si nʉa bɨ̌n yʉ́ʉ́ sɔ̂ʼ ɛ̌? Nzê bɨ̌h e nɔ́ɔ́, bé á bé adû kʉ̌ tyen ngwár, e miléme jwɨʼ gwár e gwár ɛ́? Nye á bé adû ébo lâm ɛ̌? 19 Táare mélú mé épíhe, kumo ɨ́ báánâ, bɨ̌n jaá gbɨ̂gba ɨ́ milʉ́ mín ó: «Pɔ̂l mû ó lɨ́ esâ mínkar ɨ́ míh gá mɨ́ná.» Yé akúnwo bá nó. Mě jaá kar nkâr nyǎm ó, njɨ ɨ́ míh mé Nzyɛ̌m, ɨ́ mpʉ̌ Krîst dí ekpɛl yɨ́. Bʉr ó kpɛ̌l bâm ɛ̌! Bɨ̌h sá bísyɛ́ɛla bínɨ̌ bíbyɛ̂h ó, lɨ́ esâ ó, búʼó yɨ́n, yé gwɨ́aa. 20 Ebě, mě kpɛ́ɛ́ ó, me ámû be, abáʼǎ bɔma e bɨ̌n lɨ́ epyál lâm mpʉ mé dí egwɨ̂m yɨ́. Bɨ̌n ámû kœb mé, abě mpʉ bɨ́n bɨɛ dí egwɨ̂m yɨ́. Me ámû kœb bɨ́n lɨ́ esâ bísyɛ́ɛla bî: mentɛ́ɛ́, egú, mebúʼ, gwɨ́má épɨra e bʉr, mesyɛ́ɛla, mpǔʼ, nkɛ́á nyʉ̂l, le bintʉ̌. 21 Sá dí esâ ó, me kpɛ́yɨɨ ebáʼǎ nze gʉ̂ʼ kwá nyɨ́n yɨ́, yé ó, ebě, Nzyɛ̌m wǎm ámû jaá gbâ mé sôn ɨ́ nyʉ̂l ɨ́ míh mɨ́n. Me ámû jaá sɔ́ma ɨ́ lɔ̌b buobuo bʉr o b'á sâ syóm mélú mé épíhe bá. Mé óbee ó, bé apǎ dwira míléme nó, me ámû jɨ, ebě, bé agwâʼ ésâ bísyɛ́ɛla bi dí edulo mpîr ɨ́ nyʉ̂l bí. Bɨ́ɛ ntémé njɨ lɨ́ etô dóló le elœʼ ményʉ̂l ɨ́ nzɨ̌ bijoó, le esâ bímolá nzam le ekomo, jwɨʼ gwár e gwár e mpʉ bé á boo sɨsâ yɨ́. |