2 Korɛnt 11 - Kálar Nzyɛ̌m : Ejwán é Sáá

¹ Á dǐ bee bɨ́n lɨ́ edûhwo ógʉ̌ wâm bá tîtííǎ ɛ̌! Sâ gwár, dúhwáá gá me lɨ́ ogʉ̌ waá.

² Ebě, me lɨ́ ebaʼ bɨ́n, mbɔʼ waá lɨ́ esyɛŋa e waá mé Nzyɛ̌m. Mbɔʼ waá, wé ó, ebě, sɔ́má yɨ́n, yé ó mpʉ̌ bíŋ éséhe mé á lîʼle kwá mé njʉ̂m wé yɨ́. Njʉ̂m waá, nye ó Krîst.

³ Me lɨ́ ejóʼo bʉ́á. Mě kpɛ́ɛ́ ó, bɨ̌n ámû jaá kʉ́ŋɔɔ, ntɔ̂ʼ dwira e Krîst jɔʼ gwár ɨ́ dwirɨ̂, jwɨʼ gwár e gwár e mpʉ nyʉ́a á kʉ́a Éfa, nye ntɔ̂ʼ bil ɨ́ mikóo yɨ́. Bɨ̌n ámû jaá gwâʼ le edwě Krîst dúu ntinɨ̂ e ntinɨ̂.

⁴ Bɨ̌n sá ó, kʉ́ bánǎ dûhwo ó, nyʉ́ʉ́ mʉ̂r ntáa nzě lɛ́ɛ bɨ́n lɔ́ɔ́ mé Yésʉs swîh, abě Yésʉs waá bɨ́h nyɨɛ dí etúno nyá. Bɨ̌n bé ɨ́ cǎr lɨ́ eníŋle gúú mbǐ sísǐm swîh ɨ́ menyʉ̂l mɨ́n, abě Sísǐm mé Nzyɛ̌m. Bɨ̌n ntémé bé ɨ́ cǎr lɨ́ ekam gúú lɔ́ɔ́ swîh, abě Mbɨambɨa Lɔ́ɔ bɨ́h nyɨɛ dí etúno wɨ́.

⁵ Mbeá wâm, wé yɨ́ɛ ó wɨ̂: bʉr o dí epǎ nkʉ́na le elɛ́ɛ ó, bé ó dí bʉr o mílʉ́mlʉ́ ómpâ bá, sá bé dí e yé yɨ́, me ntémé, mě e yê.

⁶ Yé bé mé abe mpáŋ lɔb nó, me yɨ́ɛ ó e ngwɨ́á bísɔ̂ʼ. Ɨ́ menzɨ̌ ménɨ̌ mɨ́mɛ̂h ó bɨ́h á lɛ̂ʼle bɨ̌n mbi bʉ̂r bɨ́h dí wɨ́, ɨ́ míh mɨ́n ɨ́ ponó.

⁷ Me á si lɛ́ɛ bɨ̌n Mbɨambɨa Lɔ́ɔ́ mé Nzyɛ̌m, anʉa myɛ́na. Ɨ́ mpʉ mé á sâ nó yɨ́, me á si jɔr nyʉ̂l nyǎm, le ebɨ̂n bɨ́n kʉ́. Nzê syɛ́ɛla yaá, yé á be syóm mé á sâ wɨ́ ɛ́?

⁸ Bʉr ó Mbɛ̌r-Nzyɛ̌m dí ɨ́ bigúmo biswîh bá, bé ó b'á jɨjána me. Me á si gbâ bé lɨ́ edyêb, lɨ́ eséǎ syɛ́ɛ́ lɨ́ esú lɨ́n.

⁹ Ɨ́ jɔʼ mé á be kwá nyɨ́n ɨ́ sɔ́ɔlʉ̌ mɔnɨ́ yɨ́, me á bé agbâ nyʉ́ʉ́ mʉ̂r túú waá ɨ́ nyʉ̂l, ebě, bɨ́ɔɔ́ bâm bé á duhǒ sí Masedónia bá, bé á si nze me e mingúlá, lɨ́ edwe mé sá yɨ́yɛ̂h yé á sâ me sɔ́ɔlʉ yɨ́. Nó ó e menzɨ̌ mɨ́mɛ̂h, me á si baʼle me mʉr tɨ̂, agbâ bɨ́n túú ɨ́ nyʉ̂l. Me ótô dóló le ebaʼle mé mʉr tɨ̂ʼ nó.

¹⁰ Mpʉ ótyeetye mé Krîst dí ɨ́ me yɨ́, mě lɛ́ɛ́ ó, me ótô le enkʉ́na ɨ́ sí Akayɨ̂ ɨ́ lɔ̌b kʉ̌ tyen waá. Abe e mʉr dí e nkul ekamle mé lɨ́ enkʉ́na ɨ́ lɔ̌b waá.

¹¹ Me lɨ́ ebene énʉa bímɔnɨ́ bín ɨ́ yé? Nzê ebe mé dí akpɛl bɨ́n ɛ́? Nzyɛ̌m, nye lɨ́ egʉ́a ó, me lɨ́ ekpɛl bɨ́n!

¹² Syɛ́ɛla mé dí esâ bɨ́n yɨ̂, me ótô dóló le esâ yê, lɨ́ esú lé ékamle bʉ̂r o kpɛ́l épyâl kwá nyɨ́n e meswɨ̂ʼlʉ mɔ́ɔ́ bá. Bé gwɨ́m ó, bɨ̌h le onɔ́ɔ́, bé díʼee jwɨʼ gwár ɨ́ nkǒ páʼ sá bé dí enkʉ́na tɨ̂ʼ yɨ́.

¹³ Ebě, mbi bʉ̂r waá, wé ɨ́ bébe. Bé ó bʉr o mílʉ́mlʉ́ o bíbɛr, osyɛ̂l o mésâ o míkóo. Bé lɨ́ edwir bé bʉr o tɨ̂ʼ bʉr o mílʉ́mlʉ́ mé Krîst.

¹⁴ Nó ó, sâ yaá, yé abě sá ékâm, ebě, Sátan mʉr tɨ̂, nye lɨ́ eboó liliŋa éngeles mentyɛnwa.

¹⁵ Nó, yé abě mpǎŋ sá ékâm ó, osyɛ̂l o mésá bé, bé nyɨ́nɨɨ ó, bé ó osyɛ̂l o mésâ o dí otîtyěl o bʉ̂r bá. Ndumló wɔ́ɔ́, wé ódû ó mpʉ bísyɛ́ɛla byɔ́ɔ́, byé á be yɨ́.

¹⁶ Me lɨ́ ebáʼǎ lɛ́ɛ ó, mʉ̌r sá ajwɨʼ ó, me ó gʉʼlʉgʉ́! Bɨ́n páhlé mé ɨ́ mbi waá nó, nʉaa gá me bé mpʉ bɨ́n nʉ́nʉ́á bígʉʼlʉgʉ́ yɨ́. Nó yaá ó bɨ́n ódwe mé jɔʼ dí ó, me nkʉ́naa ɨ́ mɛm mʉr tɨ̂ʼ yɨ́!

¹⁷ (Sá mé dí elɛ́ɛ yɨ̂, yé ó sá Tî Yésʉs dí akpɛl yɨ́. Ɨ́ jɔʼ mé dí enkʉ́na yɨ̂, mě lwǐb ó, mpʉ̌ gʉʼlʉgʉ́.

¹⁸ Mě sá nó ó, ebě, bʉr ɨ́ buo buo, bé lɨ́ enkʉ́na ɨ́ bisyɛ́ɛla bípúnó byɔ́ɔ́. Me ntémé óbɛ̌m nkʉ́na ɨ́ me mʉr tɨ̂ʼ ntémé nó.)

¹⁹ Ebě, bɨ̌n, mipɨpɨ́ʼ, bɨ̌n bé lɨ́ ekam édûhwo bígʉʼlʉgʉ́.

²⁰ Bɨ̌n bé lɨ́ ebánǎ dûhwo mʉ̂r dí emɛ̂r bɨ́n lɨ́ okómó nyá. Bɨ̌n bé lɨ́ edûhwo ntémé mʉr dí ede bípúnó bín nyá, le waá dí esa bɨ́n nyá. Bɨ̌n bé lɨ́ edûhwo mélɛ́ɛ́-nyʉ̂l, le mʉr dí eŋmɛ̂h bɨ́n mempɛ̂h nyá.

²¹ Yé lɨ́ esâ mé sôn lɨ́ ekam ó, etyɛʼ bé lwɨ́lwɨ́ɨ́ mé e lǎ lɨ́, lé ó b'á sâ ó, me ayɨ́ tû bɨ́n nó. Yé bé yé e nyʉ́ʉ́ mʉ̂r dí e nkul enkʉ́na ɨ́ lɔ̌b syɛ́ɛla yé e yʉ́ʉ́ nó, mɛm ntémé, me óbɛ̌m nkʉ́na ɨ́ mbi ngwár e ngwár waá. (Mě lwib náǎ ó, mpʉ̌ gʉʼlʉgʉ́.)

²² Nzê bɨ́ɛ bé ó bʉr o b'Ébrœ̂ ɛ̌? Me ntémé, me ó nye. Nzê bé ó bʉr o b'Ɨ́zraɛ̂l ɛ̌? Me ntémé, me ó nye. Nzê bé ó mpóʼo mé Abraham ɛ̌? Me ntémé, me ó mʉr tɨ̂.

²³ Nzê bé ó osyɛ̂l o mésâ mé Krîst ɛ̌? (Mě kʉ́ lwib ó, mpʉ̌ gʉʼlʉgʉ́!) Mɛm ó b'á sahle. Ɨ́ páʼ bísyɛ́ɛ́, mɛm ó b'á sahle. Ɨ́ páʼ égbáŋɔɔ ɨ́ mbʉʼ, mɛm ó b'á sahle. Ɨ́ páʼ mébíʼé, yé abe e tólɔ́ɔ. Ɨ́ páʼ méswie, me á si jʉ́ŋɔɔ nzɔʼ nzɔʼ.

²⁴ Nzɔʼ tɛ̂n, oYúden, bé á si ŋmɛ̂h me mingáhá mekám mélɛ̂l le ebǔ.

²⁵ Bé á si kahle me mimbɨ́ŋ nzɔʼ lɛ̂l. Me á si lúmɔɔ mekóʼ jɔʼ gwár. Ɨ́ nzɔʼ lɛ̂l, me á si pam le eswie ɨ́ jɔʼ mɛ̂l, mé á bî ɨ́ medíbé yɨ́. Móhó ntinɨ̂ ndu e pum ntinɨ̂, me á si jáala lɨ́ obóʼó ó mâŋ kʉ́ e kʉ́.

²⁶ Mɨ́ jaʼra e bityen nzɔʼ nzɔʼ. Me á duho ó sí, lɨ́ entaa méntíbé ménɨ́nɨ́ɨ́. Me á si pam le eswie ɨ́ mebó bínzilngǎn, le maá mé kúl yâm, le maá bíkúl bíswîh. Me á si gwa jʉ́ŋɔɔ ɨ́ binkana, le ɨ́ bilʉ̌n. Me á si jɨ́bla, gwá dwe ɨ́ mâŋ. Me á si pam le eswie ɨ́ mebó mé ókrǐsten o bíbɛr.

²⁷ Me á si sia e túú bísyɛ́ɛ́, le mekɔbla. Me á si di doho nzɔʼ nzɔʼ. Me á si di ɨ́ nza ndu e dwéh médíbé. Me á si ti mede nzɔʼ nzɔʼ lɨ́ ejɨʼla e Nzyɛ̌m. Me á si jóʼo ejwóo, le edǐ suswáh.

²⁸ Mé akǎ gúm láa byaá byúú bíɛ. Sá dí ekǎ kalwo tɨ̂ʼ kʉ́, yaá dí edihle mé sí, yé ó: dʉ́ó lɨ́lɛ̂h, me lɨ́ esyɛ̌l bá ɨ́ lɔ̌b bʉ̂r ó Mbɛ̌r-Nzyɛ̌m, ɨ́ bigúmó byɔ́ɔ́ bíbyɛ̂h.

²⁹ Yé bé nyʉ́ʉ́ mʉ̂r, nye ɨ́ tyɛʼ nó, sɨ́ǎ yaá, yé lɨ́ etyeʼ mé nyʉ̂l. Bʉ̂r sí gbâ ébɔ̌ʼ ɨ́ nzɨ̌, nyʉ́ʉ́ mʉ̂r ntɔ̂ʼ bɨm lé nó, sɨ́ǎ yaá, yé lɨ́ ebuú kpaa mé ɨ́ léme.

³⁰ Yé bé me ó lɨ́ bi ó, me nkʉ́naa nó, sá mé ónkʉ́na tɨ̂ʼ yɨ́, yé óbe ó etyɛʼ lâm.

³¹ Waá dí Nzyɛ̌m mé Tî Yésʉs-Krîst, waá dí Sɔ́ŋ wé nyá, nye lɨ́ egʉ́a ó, mé alɛ́ɛ bíbɛr. Nye díʼee e kûm njʉ̌m dǐ e njʉ̌m dǐ.

³² Ɨ́ Damâs, ngóvina mé njwɨ́ɨbʉ̌r Arétas á be ɨ́ dible mébé mé Damâs ó, nyě mɛ́r ó me.

³³ Nó mé á ntaa kóʼ nkana ó, ɨ́ wínɨ, sulɔɔ sí ɨ́ kwám tʉ́ŋlʉ̌, nzě sɔlwa bé ɨ́ mebô.