2 Korɛnt 10 - Kálar Nzyɛ̌m : Ejwán é Sáá

Nkul jwɨ́ɨ mé Pɔ̂l

¹ Nó ó, mɛm mʉr tɨ̂, Pɔ̂l, me lɨ́ ejɨʼla e bɨ̌n ɨ́ metala le mpam mé Krîst,... Mɛm, mʉr bɨ́n dí epǎ lɛ́ɛ ó: «Nye ɨ́ jɔr nyʉ̂l ɨ́ jɔʼ mɨ́ná gá le onɔ́ɔ́ dí gúmo gwár yɨ́», waá bɨ́n dí epǎ lɛ́ɛ ntémé ó: «Nyě e lémé ébɨ̌h e mɨná gá ɨ́ jɔʼ mɨ́ná gá le onɔ́ɔ́ dí e ncɛrá yɨ́» nyá.

² Mě jɨʼlá e bɨ̌n ó, mé ónze gʉ̂ʼ nó, bɨ̌n sá asâ ó, me lɛ̂ʼlaa bɨ̌n lémé ébɨ̌h wâm. Me ólɛ̂ʼle ébɨ̌h laá ó, bʉr o dí elɛ́ɛ ó, mě dúdú ó, kʉ̌ tyen bʉ̂r ó sí yɨ̂ʼ bá. Me ólɛ̂ʼle bɨ́ɛ mpʉ mé dí e nkul elwib ɨ́ kpɛŋlɛm, abáawo mʉ̂r yɨ́.

³ Yê tyeetye ó, mɨná tiʼe gá ó, ɨ́ nyʉ̂l bipúno. Sâ gwár, dɔm mɨ́ná dí elwímla gá lɨ́, mɨná bé abe lɨ́ elwímla gá lé e nkul bipúno nyaá.

⁴ Ebě, bisá bí dɔ̂m gá bíná, byé abe míkwɨmlá e nkul dí eduho ɨ́ bipúno nyɨ́. Nkul dí ɨ́ bisá bí dɔ̂m gá bíná nyɨ́, nyě duhó ó kwá mé Nzyɛ̌m. Nkul nyaá ó dí esâ ó, mɨná búʼaa gá mikóʼ mí dɔ̂m.

⁵ Sá yɨ́yɛ̂h dí ebɨ̂r lʉ̂, kamle bʉ̂r lɨ́ egʉ́ǎ Nzyɛ̌m yɨ́, mɨná bé lɨ́ enkɛŋ gá yé sí. Mɨná lwímlá gá ó, mɨná dwírɨɨ gá sá yɨ́yɛ̂h bʉ̂r dí ejwɨʼ ɨ́ milémé myɔ́ɔ́ yɨ́, yé díʼee yaá dí esâ Krîst mejóʼo yɨ́.

⁶ Ɨ́ jɔʼ bɨ́n óbe, bɨ̌n mû sí sâ Nzyɛ̌m mejóʼo e menzɨ̌ mɨ́mɛ̂h yɨ́, bɨ́h ókœb bʉ́ʉ́ bʉ̂r dína lɨ́ egbɔba e Nzyɛ̌m nó, bɨ̌h bé obe ó ɨ́ cǎr lɨ́ edwe bé bintɨ́ʼá.

⁷ Gwá dwɛ̂ʼ gá bisâ bi dí enyɨ̂n ɨ́ mîh ɨ́ ponó bí. Mʉ̂r kʉ́ gwá gʉ́a ó, nye ó mʉr mé Krîst nó, nye gʉ́ŋaa ntémé ó, mɨná gá le onɔ́ɔ́ bɨ́bɛ̂h ó dí egúmo e Krîst ngwár waá.

⁸ Tî Yésʉs á si dwe me nkul jwɨ́ɨ. Nye á dwe me nyǎ ó, me gbâʼ bɨ̌n nkul ɨ́ miléme, abe lɨ́ esú lé éndáma bɨ́n. Me óbɛ̌m nkʉ́na ɨ́ lɔ̌b nkûl jwɨ́ɨ nyǎm nyaá, me l'abi sôn.

⁹ Mé akpɛl ó, bɨ̌n béyɨɨ ó, me lɨ́ ebɛ̂ŋ bɨ́n e nzɨ̌ mekaná mé dí ecɛma bɨ́n má.

¹⁰ Ebě, bé lɨ́lɛ́ɛ́ ó: «Jɔ̌ʼ Pɔ̂l dí ecɛma bɨ́h mekaná yɨ́, nyě cɨcɛma ó, milɔ̌b mi dí ɨ́ kɔbla lɨ́ ejóʼo mí. Nyě cɛmá mɨ́ná gá ó e lémé ébɨ̌h. Tó kœb ó, ɨ́ jɔʼ nyé dí ɨ́ sɔ́má gá yɨ́ná yɨ́, nye ó mpʉ̌ tyɛʼbol; lwǐb yé ntémé, lwǐb épyéhɔɔ.»

¹¹ Mě lɛ́ɛ́ e waá dí elwib nó nyá ó: «Ɨ́ jɔʼ bɨ́h dí lɨ́ ejaa, cɛma bɨ́n mekaná, dumo e sâ swîh, nkʉ̂ sâ kɛl yɨ́, jɔʼ bɨ́h ópyâl kwá nyɨ́n yɨ́, sâ gwár yaá ó bɨ́h ónyɛl ésâ ntémé yɨ́.»

¹² Yé díʼee abá kúnwo ɨ́ páʼ wâm ó, me lɛ́yɨɨ ó, bɨ̌h e bʉr o dí esêʼle bé bʉr o tɨ̂ʼ bá, bé ó mityé. Damá jóʼo nó, bʉr o dí esêʼle bé bʉr o tɨ̂ʼ ónɨ̌, bé abá be e pɨʼ, ebě, bé nʉǎ jwɨʼ ó e bé bʉr o tɨ̂ʼ lɨ́ esú lé égʉ́ǎ bím bé mû lɨ́ ejaa kʉ́ yɨ́.

¹³ Ɨ́ wɨ́h pâʼ, bɨ̌h bé ánkʉ́na ɨ́ bɨ̌h bʉr o tɨ̂ʼ, ntaa sʉ́ŋa. Bɨ̌h bé ójaá nkʉ́na ó, njɨ ɨ́ lɔ̌b syɛ́ɛ́ Nzyɛ̌m á kab bɨ̌h yɨ́, abe ɨ́ bisâ biswîh. Juo bísyɛ́ɛ́ Nzyɛ̌m á lyáŋle bɨ̌h yɨ́, yé á bɨbe ó, táare wâ, tó kumo gʉ̂ʼ kwá nyɨ́n.

¹⁴ Bɨ̌h bé antaa mínjɨ̌ Nzyɛ̌m á lyáŋle mí. Ntʉ bɨ́h á nyɛɛ to lɛ́ɛ lɔ́ɔ́ mé Krîst waá kwá nyɨ́n ɛ̌? Bɨ̌h ó bé á kʉ tô le etúnǒ Mbɨambɨa Lɔ́ɔ́ mé Krîst waá, kumo kwá nyɨ́n!

¹⁵ Nó ó, bɨ̌h bé antaa mínjɨ̌ Nzyɛ̌m á lyáŋle mí. Bɨ̌h bé ankʉ́na ɨ́ syɛ́ɛ́ yé onkán. Sá dí tɨ̂ʼ yɨ́, yé ó: búʼó yɨ́n, yé ótô le egwɨ́e nó, bɨ̌h bé obi nkûl ebǔl syɛ́ɛ́ dí ɨ́ buǒ nyɔm yɨ́. Syɛ́ɛ́ yaá, yé óswîʼ njɨ ɨ́ minjɨ̌ Nzyɛ̌m á boo lyáŋle mí.

¹⁶ Yé odib bɨ́h nzɨ̌ etô dóló le etutúnǒ Mbɨambɨa Lɔ́ɔ ɨ́ mesí me dí ɨ́ buú cɛra má. Bɨ̌h bé akpɛl énkʉ́na ɨ́ bɨ̌h bʉr o tɨ̂ʼ ɨ́ lɔ̌b syɛ́ɛ́ yé onkán.

¹⁷ Ebě, yê cɛmá ó: Mʉr dí ekpɛ̌l lɔ̌b énkʉ́na nyá, nye ɨ́ jala le enkʉ́na ó, ɨ́ sá Dâ Nzyɛ̌m á sâ yɨ́!

¹⁸ Ebě, ntʉ waá dí esêʼle nyé mʉr tɨ̂ʼ nyá, Dâ Nzyɛ̌m dí ekam. Nyě kǎm ó, waá nyé mʉr tɨ̂ dí epǎ sêʼle nyá.