2 Korɛnt 1 - Kálar Nzyɛ̌m : Ejwán é Sáá

Meswɨhlɨ

¹ Yé ó mɛm Pɔ̂l, mʉr milʉ́mlʉ́ mé Yésʉs-Krîst ɨ́ lɔ̌b gwɨ́má mé Nzyɛ̌m ó dí ecɛma bɨ́n mekaná mâ, bɨ̌h e Timotɛ̂, mɨ́ɔɔ́ gá wɨ́ná. Bɨ̌h cɛmá ó, Mbɛ̌r-Nzyɛ̌m dí Kórɨnt wɨ́, ti e bʉr o mé Nzyɛ̌m bɨ́bɛ̂h o dí ɨ́ sí Akayɨ̂ bá.

² Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná, bé e Tî Yésʉs-Krîst.

Ndwéá nzyóo mé Pɔ̂l

³ Mɨná gúmlaa gá waá dí Nzyɛ̌m mé Tî gá wɨ́ná, Yésʉs-Krîst, waá dí Sɔ́ŋ wé nyá. Nye ó Sɔ́ŋ gá wɨ́ná dí elɛ̂ʼle mɨ́ná gá mpam, waá dí egbâ bʉ̂r nkul ɨ́ miléme nyá.

⁴ Nyě gbá bɨ́h nkul ɨ́ miléme ó, ɨ́ jɔʼ bɨ́h dí esia e mitúú yɨ́. Nye ó mʉr dí etyɛ̂b bɨ́h ɨ́ miléme, ó bɨ̌h gbâʼ bʉ́ʉ́ bʉ̂r nkul ɨ́ myɔ́ɔ́ míléme mbi ngwár waá nyá. Ɨ́ jɔʼ bé dí esia e myɔ́ɔ́ mítúú yɨ́, bɨ̌h ó dí ekɛm bé e nzɨ̌ menkɔ̌m bɨ́h bɨɛ bé á nyɛɛ sáŋɔɔ, mé á duho kwá mé Nzyɛ̌m má.

⁵ Ebě, mpʉ bɨ́h dí ekabla mítúú mé Krîst yɨ́, jwɨʼ gwár yaá ntémé ó bɨ́h dí ebi ménkɔb ɨ́ nkul nyé dí egbâ bɨ́h ɨ́ miléme nyɨ́.

⁶ Bɨ́h síá e mitúú nó, syɛ́ɛla yaá, yé e nyɔm ɨ́ páʼ wɨ́n, ebě, yé ógbâ bɨ́n nkul ɨ́ miléme, le esâ ó, bɨ̌n tíʼaa. Bɨ́h bí nkûl ɨ́ miléme nó, yé óbe ó lɨ́ esú ó, bɨ̌n díraa nyɔm e bɨ̌h ɨ́ yʉ́ʉ́ jɔʼ. Milémé mín, myé ódirǎ nyɔm e menkɔ̌m mɨ́h ó, ɨ́ jɔʼ bɨ́n bɨɛ ngá sia e mbi mítúú mímpwár myaá yɨ́. Myé ó bɨ́n ntémé á nyɛɛ bee bɨ̌h lɨ́ esia e myé mí.

⁷ Bɨ̌h bé e mpûʼla ɨ́ miléme ɨ́ lɔ̌b wɨ́n; bɨ̌h bé apɨ́ŋla, ebě, bɨ̌h bé lɨ́ egʉ́a ó, jwɨʼ gwár e gwár e mpʉ bɨ́n dí ebi nkɔ̂b mitúú yɨ́, nó ntémé ó bɨ́n ngá bi étʉ́m mé Nzyɛ̌m yɨ́. Etʉ́m lé laá, lé ó nkul nyé ógbâ mɨ́ná gá ɨ́ miléme nyɨ́.

⁸ Nó, bɨ́ɔɔ́ bɨ́h ɛ́, bɨ̌h kpɛl ó, bɨ̌n gʉ́ŋaa mitúú bɨ́h á sia e myé ɨ́ sí Azía mí. Bɨ̌h bé á si kʉ bu sia e mitúú. Myé á si gwa ntaa bɨ̌h ɨ́ nkul, tó pyâl ɨ́ jɔʼ mpûʼla nyɨ́h á gwa pʉʼa bɨ̌h ɨ́ miléme yɨ́. Mpûʼla nyaá á be ó, bɨ̌h bé óbáʼǎ tô dóló le etiʼe.

⁹ Bɨ̌h bé á bee ó, go ó, bɨ̌h á ka dweŋɔɔ ó, mebě me jálá le eswie má. Yé á syɛ́ɛlɨ nó ó, bɨ̌h gwáʼaa ekǎ dyɛ̂ʼwo e bɨ̌h bʉr o tɨ̂ʼ lɨ́ esú ó, bɨ̌h dyɛ̂ʼwaa e Nzyɛ̌m, mʉr dí epɛh ódwe nyá.

¹⁰ Nye ó mʉr á pɛʼ bɨ̌h lɨ́ eswie laá tʉ́ŋlʉ̌ nyá. Nye ntémé ó ngá báʼǎ dwih bɨ́h ɨ́ ka sóo. Yé ó nó: milémé míh, mí lóno ɨ́ mpûʼla ó, nye óbánǎ pɛʼ bɨ́h lɨ́ eswie ɨ́ yʉ́ʉ́ jɔʼ swîh,

¹¹ ebě, bɨ̌n bé ósúʼo bɨ́h ɨ́ nzɨ̌ minjɨʼla mín. Nó Nzyɛ̌m ó ngá buú dweŋɔɔ nzyóo ɨ́ jɔʼ bʉ̂r ɨ́ buo buo, bé óbe, bé mû sí sâ nyé minjɨʼla ɨ́ lɔ̌b wɨ́h yɨ́.

Mbúʼá tyen mé Pɔ̂l

¹² Sá bɨ́h dí enkʉ́na tɨ̂ʼ yɨ́, yé ó yɨ̂: kʉ̌ tyen dí tîtyěl, waá bɨ́h dí edû e milémé míh mímyɛ̂h ɨ́ míh mé Nzyɛ̌m wɨ́. Mipahlá mílémé míh, myé boʼlo ó, bɨ̌h bé e mbɨambɨa kʉ̌ tyen. Ɨ́ kʉ̌ tyen waá, bɨ̌h jaá sâ ó, njɨ bím mpâm mé Nzyɛ̌m dí ekpɛl ó, bɨ̌h sâʼ yɨ́. Kʉ̌ tyen ngwár waá ó bɨ́h á bu dû kwá nyɨ́n, le ɨ́ sí yɨ̂ʼ yɨ́yɛ̂h wɨ́. Wé abɔma e milɛ́ʼlá bʉ̂r ó sí yɨ̂ʼ dí edwe bʉ̂r mí.

¹³ Bɨ̌h jaá cɛmá ó, njɨ bisá bɨ́n ngá láa, ntɔ̂ʼ kʉ́ gwá jóʼo mbɨ̂mbɨá bí. Mě bûʼlá ó, micɛmá myaá, myé ó sá bɨ́n ngá gʉ́a ɨ́ pébébé yɨ́.

¹⁴ Bɨ̌n bɨ́ nyɛɛ́ gʉ́a bɨ́h pêh lɨ́ esú ó, bɨ̌n nkʉ́naa ɨ́ lɔ̌b wɨ́h ɨ́ móhó mé Tî Yésʉs. Bɨ̌h bɨɛ bé ónkʉ́na ɨ́ lɔ̌b wɨ́n ntémé ɨ́ móhó waá.

¹⁵ Nó ó, me á tíʼe ɨ́ lémé wâm ɨ́ lɔ̌b búʼó yâm ó, me ónyɛɛ́ nze gʉ̂ʼ kwá nyɨ́n. Me á kpɛl esâ nó ó, bɨ̌n nkʉ̂ bi nkûl ɨ́ miléme nzɔʼ bá.

¹⁶ Me á jwɨʼ ó, mě nyɛɛ́ pyâl ó, kwá nyɨ́n, nzě laa, tô ɨ́ sí Masedónia. Mpúla mé á gwa ka búlǎ sí Masedónia nyɨ́, nye ó mé á kpɛl ó, me báʼa tyɛ̂b kwá nyɨ́n yɨ́. Jɔʼ yaá ó bɨ́n á gwa súʼo me ɨ́ tyen yâm, ó me tôʼ sí Yʉ́da yɨ́. Sâ gwár, yé á bé abána nó.

¹⁷ Ɨ́ jɔʼ mé á tíʼe ɨ́ lémé wâm, ntɔ̂ʼ kɛʼ ó, me ónze gʉ̂ʼ kwá nyɨ́n yɨ́, nzê nkɛ̌ʼ nyaá, nye á be ɨ́ dwɛ̂hwa ɛ̌? Nzê nye á duho ɨ́ pɨʼ bipúno ɛ̌? Nzê me á kɛʼ ó, le mesónó, le nkam ɛ́?

¹⁸ Ɨ́ mekǎn bɨ́h á lɛ́ɛ bɨ̌n má, bɨ̌h á bé alɛ́ɛ bɨ́n «Eee!» ti e «Heʼé!» ɨ́ jɔʼ gwár. Nzyɛ̌m ó dí eboʼlo nó.

¹⁹ Ebě, Yésʉs-Krîst, Mwân mé Nzyɛ̌m, nye ó waá bɨ́h á lɛ́ɛ lɔ́ɔ́ wé páʼ nyɨ́n nyá. (Náǎ, yé á be ó bɨ̌h e Silâs ti e Timotɛ̂.) Nzyɛ̌m á bé acâb ɨ́ jɔʼ nyé á lwib e mɨná gá yɨ́. Nye á bé alɛ́ɛ «Eee!» ti e «Heʼé!» ɨ́ jɔʼ gwár. Nye á jaa lɛ́ɛ ó, njɨ: «Eee!»

²⁰ Ebě, menkɛ̌ʼ mɨ́mɛ̂h Nzyɛ̌m á kɛʼ má, mé jaá dira ó, njɨ ɨ́ nzɨ̌ mé Yésʉs. Sɨ́ǎ yaá ntémé ó mɨ́ná dí elɛ́ɛ gá ó «Amɛn!» yɨ́. (Nó yé lɛ́ʼlé ó: yé díʼee nó.) Mɨná dwé gá Nzyɛ̌m kûm ó tɨ̂, ɨ́ minjɨʼla myaá.

²¹ Nó ó, Nzyɛ̌m mʉr tɨ̂ʼ ó dí etyɛ̂b mɨ́ná gá ɨ́ miléme, ó mɨná díʼee gá mekʉ̌ sí ɨ́ sɨ́ŋ ɨ́ mpúhlá gá nyɨ́ná e Krîst. Nye ó b'á lœm mɨná gá ntémé múlo.

²² Nye ntémé, nyɨ́ gbâ sitâm yé ɨ́ mɨná gâ. Nye á nyɛɛ ntɨh mɨná gá Sísǐm wé, dil wé ɨ́ milémé gá míná ó, mpʉ̌ jwɨʼ dí elɛ̂ʼlě mbɨambɨa metʉ́m nyé dí ekomo mɨ́ná gá má yɨ́.

²³ Nó ó, mé dí ejébě Nzyɛ̌m, dí mboʼlo wǎm nyá ó: yé bé mě lɛ́ɛ́ ó bibɛr nó, nye dímlaa twiʼ yâm, ebě, sá yé á sâ ó, me ayɨ́ kǎ nze gʉ̂ʼ Kórɨnt yɨ́, yé á be ó gwɨ́má ébɛ̂ʼ bɨ́n túú.

²⁴ Yé abe ó, bɨ̌h bé lɨ́ ejwɨ́ɨ bɨ́n ɨ́ lɔ̌b búʼó mɨ́ná dí gá e yé yɨ́. Bɨ̌h jaá kpɛl ó, njɨ ekɛm bɨ́n, ó bɨ̌n bíʼee bisʉhʉʉ ɨ́ miléme e nzɨ̌ nyɨ́h. Ebě, bɨ̌n tyɛ́b mekʉ̌ sí ɨ́ sɨ́ŋ, apɨ́ŋla ó, ɨ́ lɔ̌b búʼó yɨ́n.