1 Yʉanes 5 - Kálar Nzyɛ̌m : Ejwán é Sáá

Yésʉs ó dí Mwân mé Nzyɛ̌m

¹ Mʉr nyɨnyɛ̂h dí ebúʼla ó, Yésʉs, nye ó Mʉ̌r Nzyɛ̌m á lœm múló mé jwɨ́ɨ nyá, nyɨ́ byɛ̂l e nzɨ̌ nkul mé Nzyɛ̌m. Mʉr nyɨnyɛ̂h dí ekpɛl sɔ́ŋ nyá, nye lɨ́ ekpɛl ntémé mwân wé.

² Mpʉ mɨ́ná dí egʉ́a gá ó, mɨná bé ɨ́ kpɛl gá bwán mé Nzyɛ̌m yɨ́ ó yɨ̂: ɨ́ jɔʼ mɨ́ná dí ekpɛl gá Nzyɛ̌m, le ebaʼle métié mé yɨ́.

³ Mpʉ mʉ̂r jálá le elɛ̂ʼlě Nzyɛ̌m kpɛ̌l yɨ́ ó yɨ̂: ebaʼle métié mé. Metié mé, mé abuú dile yɨ́ɛ lɨ́ ebaʼle,

⁴ ebě, mʉr nyɨnyɛ̂h dí mbyɛ́á ɨ́ nzɨ̌ nkul mé Nzyɛ̌m nyá, nye lɨ́ entaǎ bɨ́blǎ sí yɨ̂. Nkul nyé dí e né, nyaá dí esâ ó, nye búlaa le onkɔ́ɔ́ nyɨ́, nye ó nyɨ̂: búʼó gá yɨ́ná.

⁵ Nzé dí e nkul entaǎ bɨ́blǎ sí yɨ̂? Yé ó njɨ waá dí ebúʼla ó, Yésʉs ó dí Mwân mé Nzyɛ̌m nyá.

Mboʼlá dí edumo e Yésʉs-Krîst wɨ́

⁶ Yésʉs-Krîst, nye ó mʉr á duŋɔɔ e medíbé, báʼǎ duŋɔɔ e metié lɨ́ eswie ɨ́ kolôs nyá. Nye á bé anzě duŋɔɔ̌ njɨ e medíbé mé omér. Ndubó wé, wé á be ó e medíbé ndu e metié. Sísǐm mé Nzyɛ̌m ó dí eboʼlo ɨ́ lɔ̌b ndubó wé. Nyě boʼló nó ó, ebě, nyě le otyeetye.

⁷ Tó kœb ó, bisâ bi dí eboʼlo ɨ́ lɔ̌b Mwân mé Nzyɛ̌m bí, byé ó bilɛ̂l:

⁸ Sísǐm mé Nzyɛ̌m, ndubó médíbé, ndu e ndubó métié. Oboʼlo olɛ̂l ónɨ̌, bé ó twíí.

⁹ Mɨná bé lɨ́ ekam gá ɨ́ jɔʼ bʉ̂r dí eboʼlǒ lɔ̌b yɨ́. Tó kœb ó, mboʼlá mé Nzyɛ̌m, wé ɨ́ jala le edweŋɔɔ̌ dúu, laa waá bʉ̂r dí esâ wɨ́, ebě, wé ó mboʼlá Nzyɛ̌m mʉr tɨ̂ʼ á boʼlo, dumo e Mwân wé wɨ́.

¹⁰ Mʉr dí edyɛ̂ʼwo e Mwân mé Nzyɛ̌m nyá ó dí ejóʼǒ mboʼlá waá ɨ́ lémé wé tʉ́ŋlʉ̌. Mʉr dí abûʼlǎ Nzyɛ̌m nyá, nyɨ́ swêʼ Nzyɛ̌m Sɔ́ŋ ó, nye ó mʉr bibɛr, ebě, nyé akam ébûʼlǎ mboʼlá Nzyɛ̌m á boʼlo, dumo e Mwân wé wɨ́.

¹¹ Mboʼlá mé Nzyɛ̌m waá, wé ó wɨ̂: Nzyɛ̌m á be ɨ́ dwe mɨ́ná gá twǐʼ njʉ̌m dǐ. Twiʼ yaá, yé di ó, ɨ́ Mwân wé.

¹² Mʉr dí ɨ́ mpúhlá e Nzyɛ̌m Mwân nyá, nyě e twǐʼ njʉ̌m dǐ. Mʉr dí adi ɨ́ mpúhlá e Mwân mé Nzyɛ̌m nyá, nyé abe e twiʼ yaá.

Mekǎn mé ésúʼlá

¹³ Milɔ̌b mê cɛmá mî, me cɛmá myé ó, bɨ̌n bɨɛ, bʉr o dí edyɛ̂ʼwo e Mwân mé Nzyɛ̌m bá. Me cɛmá bɨ́n myǎ ó, bɨ̌n gʉ́ŋaa ó, bɨ̌n mû ó e twǐʼ njʉ̌m dǐ.

¹⁴ Pyálá mɨ́ná ngá pyâl gá ɨ́ mpǒm mé Nzyɛ̌m wɨ́, wé óbe ó, mpûʼla, nyé osí lóŋlo mílémé gá míná. Mɨná bɨ́ gʉ́a gá ó, mɨ́ná jɨ́ʼlá gá e né, le edû mítíʼá mí lémé wé nó, nye ójóʼo mínjɨʼla gá míná myaá mbɨ̂mbɨá.

¹⁵ Mɨ́ná gʉ́á gá ó, nye lɨ́ ejóʼo mɨ́ná gá mbɨ̂mbɨá nó, mɨná bé ógʉ́a gá ntémé ó, nye ódwe mɨ́ná gá sá mɨ́ná ngá gwâm gá nye yɨ́, yé damá be yáǎ sɔ̂ʼ.

¹⁶ Mʉ̂r sí bee mɨ́ɔɔ́ wé lɨ́ esâ syóm, syóm waá, abe waá dí etyen nyé lɨ́ eswie wɨ́ nó, nye jɨ̂ʼlaa e Nzyɛ̌m. Nzyɛ̌m ókʉ́ tíʼ mɨ́ɔɔ́ wé. Yé e nyɔm ó, ɨ́ páʼ mɨ́ɔɔ́ dí sí sâ mbǐ syóm dí abe lɨ́ etyen mʉ̂r lɨ́ eswie wɨ́ nyá. (Sâ gwár, gúú mbǐ syóm, wé yɨ́ɛ ó tɨ̂: waá dí etyen mʉ̂r lɨ́ eswie wɨ́. Mé alɛ́ɛ ó, bɨ̌n jɨ̂ʼlaa e Nzyɛ̌m lɨ́ esú é mbi syɛ̂l misyóm waá.)

¹⁷ Bisyɛ́ɛla bi dí egbah métié bí, bíbyɛ̂h, byé ó misyóm. Yé ntémé, yé e misyóm mi dí atyen mʉ̂r lɨ́ eswie mí.

¹⁸ Mɨná bé lɨ́ egʉ́a gá ó, mʉr nyɨnyɛ̂h mû mbyɛ́lá ɨ́ mpóʼo mé Nzyɛ̌m nyá, nyé akǎ tô dóló le esâ mísyóm. Mwân Nzyɛ̌m á byâ nyá, nye lɨ́ ekamle e mbi mʉ̂r waá. Ebe nó, Sátan, nyé abe e nkul esâ nyé ebébe.

¹⁹ Mɨná bé lɨ́ egʉ́a gá ó, mɨná gá bé ó, bwán mé Nzyɛ̌m. Bʉr ó sí yɨ̂ʼ yɨ́yɛ̂h bɨ́ɛ, bé lɨ́ ejaʼra e mpêl mé Sátan.

²⁰ Mɨná bé lɨ́ egʉ́a gá ntémé ó, Mwân mé Nzyɛ̌m á si nze. Nye nzě gbâ mɨ́ná gá pɨʼ ɨ́ miléme ó, mɨná gʉ́ŋaa gá Nzyɛ̌m, mʉr dí le otyeetye nyá. Mɨná di gá ó, ɨ́ mpúhlá gá nyɨ́ná e mʉr dí le otyeetye waá nyá. Mʉr waá, nye ó Mwân wé, Yésʉs-Krîst. Nye ó dí Nzyɛ̌m mpâ. Nye ntémé ó dí Etín é Twǐʼ njʉ̌m dǐ.

²¹ Bwán bâm, kánwáá gâ, ó bɨ̌n cɛ́raa e bikpɛʼkpɛ̂ʼ bí ónzyɛ̌m.