1 Yʉanes 3 - Kálar Nzyɛ̌m : Ejwán é Sáá

Bwán mé Nzyɛ̌m

¹ Beyɨɨ gá bím Nzyɛ̌m Sɔ́ŋ á kpɛl mɨná gá, ntaa sʉ́ŋa yɨ́! Nyɨ́ gbân mɨ́ná gâ, le elɛ́ɛ ó, mɨná gá bé ó «bwán mé Nzyɛ̌m». Mɨná gá kʉ́ bě tyeetye ó bwán bé. Bʉr ó sí yɨ̂, bɨ́ɛ, bé agʉ́a Sɔ́ŋ gá wɨ́ná Nzyɛ̌m. Sá tɨ̂ʼ ó bé dí agʉ́a mɨ́ná gá yɨ́.

² Bʉr ó kpɛ̌l bâm, ɨ́ báánâ, mɨná gá mû ó bwán mé Nzyɛ̌m. Yé damá be nó, mbi bʉ̂r mɨ́ná ódi gá wɨ́, wé dína ó, apǎ gʉ́ŋɔɔ. Sá mɨ́ná dí egʉ́a gá yɨ́, yê njɨ ó, jɔ̌ʼ Krîst óbáʼǎ nyɨ̂n yɨ́, mɨná bé ónwɨɨla gá e né, ebě, mɨná bé óbee gá nye ó, kwahaá mpʉ nyé dí yɨ́.

³ Nyé ógbâ nyʉ́ʉ́ mʉ̂r mpûʼla nyaá ɨ́ léme nó, mʉr waá ópubo nyé mʉr tɨ̂, ó nye díʼee mʉr dí tí nyá. Sá tɨ̂ʼ ó nyé óbě mpʉ mé Yésʉs, mʉr dí tí nyá yɨ́.

⁴ Mʉr nyɨnyɛ̂h dí esâ syóm nyá, nye lɨ́ egbah étié mé Nzyɛ̌m. Syóm wɨ́ɛ, wé ó egbah métié.

⁵ Bɨ̌n bé lɨ́ egʉ́a ó: Tî Yésʉs á nze nyɨ̂n ɨ́ sí yɨ̂ʼ ó, nye nkʉ̂ nzě pɛʼ mísyóm gá mɨ́ná. Bɨ̌n bé lɨ́ egʉ́a ntémé ó, abe le syóm dí ɨ́ nye tʉ́ŋlʉ̌.

⁶ Mʉr nyɨnyɛ̂h mû sí pûhla e né nyá, nyé atô dóló le esâ syóm. Waá nyɨnyɛ̂h dí etô dóló le esâ syóm nyá nyɨɛ, nyé apǎ bee nyê, nkʉ̂ gʉ́a nyê.

⁷ Bwán bâm, ayɨ́ bîr gá ó, mʉr dímlaa bɨ̌n. Mʉr dí esâ bísyɛ́ɛla bí ótîtyěl nyá ó dí tîtyěl mpʉ̌ Yésʉs dí tîtyěl yɨ́.

⁸ Mʉr dí etô dóló le esâ syóm nyá, nye ó mʉr mé sɔ́ŋ meleme, ebě, sɔ́ŋ meleme ó dí etín é mísyóm, boó duho ó duháa ɨ́ menyɛ̌l, kumo mûh ɨ́ dʉ́ó lɨ̂. Tó kœb ó, Mwân mé Nzyɛ̌m á nze nyɨ̂n ɨ́ sí yɨ̂ʼ ó, nye nkʉ̂ gbɛ́ɛ bísyɛ́ɛla mé sɔ́ŋ meleme.

⁹ Mʉr nyɨnyɛ̂h mû sí byɛ̂l ɨ́ nkul mé Nzyɛ̌m nyá, nyé atô dóló le esâ syóm, ebě, twiʼ dí eduho kwá mé Nzyɛ̌m yɨ́, yé ó ɨ́ nye tʉ́ŋlʉ̌. Nyé abe e nkul etô dóló le esâ syóm, ebě, nye á byɛ̂l ó ɨ́ nzɨ̌ twiʼ mé Nzyɛ̌m.

¹⁰ Ebě, bé gʉ́gʉ́á mbɔ́ʼ páʼ bwán mé Nzyɛ̌m, bé e baá mé sɔ́ŋ meleme ó, mbi wɨ̂: mʉr nyɨnyɛ̂h dí asâ syɛ́ɛla dí tîtyěl yɨ́ nyá, nkʉ̂ waá dí akpɛl mɨ́ɔɔ́ wé nyá, nyé abe mwân mé Nzyɛ̌m.

Kpɛ̌l ɨ́ Mbɛ̌r-Nzyɛ̌m

¹¹ Nó ó, lwǐb bɨ́n á boo jóʼo, duho píhe yɨ́, yé ó, mɨná kpɛ́laa gá páʼ gá nyɨ́ná.

¹² Mɨná bé ayɨ́ be gá mpʉ mé Kayɨ̂n. Nye á duho ó kwá mé Sátan. Nye nzě jʉ̂ mɨ́ɔɔ́ wé, Ábɛl. Nye á pʉgʉ jʉ̂ nye ɨ́ wáǎ lɔ̌b? Ebě, bisyɛ́ɛla mé Kayɨ̂n, byé á be ó, onzyɛ́h ónzyɛ́h; byaá me mɨ́ɔɔ́ wé, tîtyěl.

¹³ Bɨ́ɔɔ́ bâm! Okɛ́l bâm! Bʉ̂r ó sí yɨ̂, bé nwím bɨ́n nó, ayɨ́ kâm gâ.

¹⁴ Mɨná bé lɨ́ egʉ́a gá ó, mɨná bé á pah, duho lɨ́ eswie, ntaa ɨ́ twǐʼ njʉ̌m dǐ ó, ebě, mɨná bé lɨ́ ekpɛl gá bɨ́ɔɔ́ gá bɨ́ná. Mʉr dí akpɛl bʉ̂r nyá, nye dína ó ndwe.

¹⁵ Mʉr nyɨnyɛ̂h dí enwim mɨ́ɔɔ́ wé nyá, nye ó njʉ̂l bʉr. Bɨ̌n bé lɨ́ egʉ́a ntémé ó, kâr njʉ̂l bʉr ngwár dí e twǐʼ njʉ̌m dǐ ɨ́ nye mʉr tɨ̂ʼ ɨ́ jɔʼ yɨ́yɛ̂h.

¹⁶ Mbi wɨ̂ʼ ó mɨ́ná dí edweʼe gá sá dí kpɛ̌l mpâ yɨ́: Yésʉs-Krîst á si dwe twiʼ yé lɨ́ esú gá lɨ́ná. Nó ntémé ó mɨ́ná dí gá e mempʉ́lá kwá bʉ́ʉ́ óbûʼla yɨ́. Mɨná jáná gá mempʉ́lá maá ó, lɨ́ edwe bícwiʼ gá bíná lɨ́ esú é bɨ́ɔɔ́ gá bɨ́ná.

¹⁷ Mʉr dí e bisâ, dí ebee mɨ́ɔɔ́ wé lɨ́ ebǐ túú nyá, nyé sá nyé cére nó, wáǎ mbi nyé dí e nkul elɛ́ɛ ó, nyɨ́ kpɛ̌l Nzyɛ̌m ɨ́ lémé wé yɨ́ ɛ́?

¹⁸ Bwán bâm, yé ajala ó, kpɛ̌l gá yɨ́ná, yé nyɨ́nɨɨ njɨ ɨ́ mekǎn mɨ́ná dí elɛ́ɛla gá má. Yé ɨ́ jala le enyɨ̂n ó, ɨ́ bisyɛ́ɛla mɨ́ná dí esâ gá lɨ́ otyeetye bí.

Lɨ́ edyêʼ koo e Nzyɛ̌m

¹⁹ Mɨná gʉ́á gá ó, mɨná bé lɨ́ eduho gá kwá mé mʉr dí le otyeetye nyá ó, mbi wɨ̂: mɨná bé lɨ́ ebánǎ sul gá milémé gá míná sí ɨ́ míh mé Nzyɛ̌m

²⁰ ɨ́ bijɔʼ mílémé gá míná dwé mɨ́ná gá mebě bí. Miléme gá míná, myé lɨ́ ebánǎ sula, ebě, Nzyɛ̌m, nye ɨ́ buú bwaʼ, laa mílémé gá míná myaá. Nye lɨ́ egʉ́a ntémé sá yɨ́yɛ̂h.

²¹ Nó ó, bʉr ó kpɛ̌l bâm, mílémé gá míná, myé óbe, adwe mɨ́ná gá bʉr o tɨ̂ʼ mebě nó, lɛ́ɛ́, mɨná bɨ́ nʉa gá pîm ɨ́ búʼó ɨ́ míh mé Nzyɛ̌m.

²² Mɨná bé óbi gá ntémé sá yɨ́yɛ̂h mɨ́ná ógwâm gá nye yɨ́, ebě, mɨná bé lɨ́ ebaʼle métié mé, le esâ bísyɛ́ɛla nyé dí ebee mbɨ̂mbɨá bí.

²³ Etié nyé á tyêl lɨ́ esú gá lɨ́ná lɨ́, lé ó lɨ̂: mɨná dyɛ̂ʼwaa gá e díé é Mwân wé, Yésʉs-Krîst, le ntémé ó, mɨná kpɛ́laa gá páʼ gá nyɨ́ná mpʉ nyé á tɨ́e mɨná gá yɨ́.

²⁴ Mʉr dí ebaʼle métié mé Nzyɛ̌m nyá, nyě dǐ ó ɨ́ mpúhlá e Nzyɛ̌m; Nzyɛ̌m ntémé ɨ́ mpúhlá e né. Mɨná bé lɨ́ egʉ́a gá ó, Nzyɛ̌m, nye ó ɨ́ mpúhlá e mɨná gá ó, ebě, nye á si ntɨh mɨná gá Sísǐm wé.