1 Yʉanes 2 - Kálar Nzyɛ̌m : Ejwán é Sáá

¹ Bwán bâm, mě cɛmá bɨ́n bisá bîʼ ó, bɨ̌n nkʉ̂ gwâʼ ékǎ sâ mísyóm. Sâ gwár, yé ká pyâl yɨ́ɛ ó, mʉr, nyɨ́ sâ syóm nó, gʉ́ŋáá gá ó, mɨná gá bé e mʉr nkɔ̌m kwá mé Nzyɛ̌m: Yésʉs-Krîst, mʉr dí tîtyěl nyá.

² Ebě, Yésʉs-Krîst, nye ó mʉr á búra e misyóm gá míná lɨ́ esú lé éleʼě Nzyɛ̌m ɨ́ nkpaa nyé nyá. Abě njɨ myaá gá míná, myé omér. Nye á dwe twiʼ ó, lɨ́ esú é bʉ̂r ó sí yɨ́yɛ̂h.

³ Mɨ́ná báʼlé gá metié mé Nzyɛ̌m nó, syɛ́ɛla yaá, yé óbe ó dweʼle dí eboʼlo ó, mɨná bɨ́ gʉ́a gá nye yɨ́.

⁴ Mʉr dí elɛ́ɛ ó: «Me lɨ́ egʉ́ǎ Nzyɛ̌m,» nyɨɛ yɨ́ɛ abaʼle métié mé nyá, nye ó mʉr bibɛr. Otyeetye, wé abe ɨ́ nye tʉ́ŋlʉ̌.

⁵ Nó ó, mʉr dí ebaʼle métwɨ́ɨ́ mé nyá, kpɛ̌l mé Nzyɛ̌m, yé ó, ɨ́ nye ntinɨ̂ e ntinɨ̂. Ɨ́ mbi waá ó mɨ́ná dí egʉ́a gá ó, mɨná bé ɨ́ nye yɨ́.

⁶ Mʉr dí elɛ́ɛ ó, nye ɨ́ mpúhlá e Nzyɛ̌m nyá, jala ó, le edû kʉ̌ tyen mé Yésʉs.

Edwán lé étié

⁷ Bʉr ó kpɛ̌l bâm, ntʉ édwán lé étié mé dí ecɛma bɨ́n lɨ̂. Yé ó etié e myâ bɨ́n á boo bi, duho ɨ́ menyɛ̌l lɨ́. Etié e myâ laá, lé ó lwǐb bɨ́n á boo jóʼo yɨ́.

⁸ Dǎm jóʼo nó, lé yɨ́ɛ ó edwán lé étié mé dí ecɛma bɨ́n lɨ́. Yé lɨ́ enyɨ̂n ó, lê tyeetye ó, ɨ́ Yésʉs-Krîst tʉ́ŋlʉ̌, le kwá nyɨ́n ntémé. Edúrʉ́ʉ́, lé mû ó lɨ́ esɔ́a. Njʉl, wé mû ó lɨ́ epǎn myɛ́n mpâ.

⁹ Mʉr dí elɛ́ɛ ó, nye ɨ́ myɛ́n tʉ́ŋlʉ̌, nyɨɛ yɨ́ɛ lɨ́ enwim mɨ́ɔɔ́ wé nyá, nye dína ó lɨ́ edúrʉ́ʉ́, pyâl ɨ́ jɔʼ yɨ̂.

¹⁰ Nó ó, mʉr waá dí ekpɛl mɨ́ɔɔ́ wé nyá ó dí ɨ́ myɛ́n tʉ́ŋlʉ̌. Nye ágbâ ébɔ̌ʼ lé óbɨma mɨ́ɔɔ́ wé ɨ́ léme ó, nye sâʼ ebébe lɨ́.

¹¹ Sâ gwár, mʉr waá dí enwim mɨ́ɔɔ́ wé nyá, nye dína ó, lɨ́ edúrʉ́ʉ́. Nye ntémé dína ó lɨ́ entíma. Nyé abá gʉ́ǎ nko nyé dí etô le entíma yɨ́, ebě, edúrʉ́ʉ́, lɨ́ liŋ nyé ántím.

¹² Bwán bâm, mě cɛmá bɨ́n ó, ebě, Nzyɛ̌m, nyɨ́ pɛʼ bíbaa bí ébébe nyé á niʼe bín ɨ́ lɔ̌b mísyóm mín bí. Nye á sâ nó ó, ɨ́ nzɨ̌ mé Yésʉs-Krîst.

¹³ Osɔ́ŋ, mě cɛmá bɨ́n ó, ebě, bɨ̌n bé lɨ́ egʉ́a mʉ̂r á boo be, duho ɨ́ menyɛ̌l nyá. Mě cɛmá bɨ́n, biloʼo ó, ebě, bɨ̌n bɨ́ ntaǎ Sátan ɨ́ nkul. Ontwǒm, mě cɛmá bɨ́n ó, ebě, bɨ̌n bɨ́ gʉ́ǎ Nzyɛ̌m Sɔ́ŋ.

¹⁴ Osɔ́ŋ, mě cɛmá bɨ́n ó, ebě, bɨ̌n bɨ́ gʉ́a mʉ̂r á boo be, kʉ́ e sí apǎ bě kuhá nyá. Biloʼo, mě cɛmá bɨ́n ó, ebě, bɨ̌n bé e nkul. Lwǐb mé Nzyɛ̌m, yé lɨ́ edi ɨ́ milémé mín. Bɨ̌n ntémé, bɨ̌n bɨ́ ntaǎ Sátan.

Ayɨ́ kpɛl gá sí yɨ̂

¹⁵ Ayɨ́ kpɛl gá sí yɨ̂, nkʉ̂ bisâ bi dí tɨ̂ʼ bí. Mʉ̂r kpɛ́l sí yɨ̂ʼ nó, lɛ́ɛ́, kpɛ̌l mé Nzyɛ̌m Sɔ́ŋ, yé abá be ɨ́ nye.

¹⁶ Bisá bíbyɛ̂h bi dí egúmo e sí yɨ̂ʼ bí, bisá bíbɨ́bla bi bʉ̂r dí egwɨ̂m bí, byaá míh mɔ́ɔ́ dí egwɨ̂m bí, bisá bé dí esâ jáálé ɨ́ lɔ̌b wɔ́ɔ́ bí, bisâ byaá bíbyɛ̂h, byé aduho kwá mé Nzyɛ̌m Sɔ́ŋ. Byé duho ó, ɨ́ sí yɨ̂.

¹⁷ Sí yɨ̂, le bisá bíbyɛ̂h bʉ̂r dí egwɨ̂m tɨ̂ʼ bí, byé lɨlaa ó laŋáa. Nó ó, mʉr dí esâ sá Nzyɛ̌m á tɨ́e yɨ́ nyá, nyě tíʼé ó, njʉ̌m dǐ e njʉ̌m dǐ.

Ntɨ̂m e mbɨn mé Krîst

¹⁸ Bwán bâm, esúʼlá é sí yɨ̂ʼ mû ó ɨ́ nérénére. Bɨ̌n bé á si boo jóʼo ó, Ntɨ̂m e mbɨn mé Krîst, nye ɨ́ jala le enze. Ɨ́ báánâ, ontɨ̂m le obɨn mé Krîst, bé mû ó, sí buo. Nó ó mɨ́ná dí egʉ́a gá ó, yɨ́ kumo lɨ́ esúʼlá é sí yɨ̂ʼ yɨ́.

¹⁹ Bʉr baá, bé á si duho ɨ́ sɔ́má gá yɨ́ná. Bé á bé abe yɨ́ɛ bɨ́ɔɔ́ gá bɨ́ná. Yé bé bé á be ó bʉr ó sɔ́má gá yɨ́ná nó, mpa mɨná gá le onɔ́ɔ́, bé dína ó tɨ̂, kumo mûh. Tó kœb ó, yé á jala ó, bé tôʼ, yé nkʉ̂ nyɨ̂n ɨ́ kpɛŋlɛm ó, abe e mʉr sɔ́má yɔ́ɔ́ á be ɨ́ nkɔ̌m gá nyɨ́ná.

²⁰ Ɨ́ wɨ́n pâʼ, Mʉr mé Nzyɛ̌m dí tí nyá á si lœm bɨ̌n, lɨ́ entɨh bɨ́n Sísǐm mé Nzyɛ̌m. Bɨ̌n bɨ́bɛ̂h, bɨ̌n bé lɨ́ egʉ́a ótyeetye.

²¹ Mé acɛma bɨ́n ebě bɨ̌n bé lɨ́ ejéʼe ótyeetye. Mě cɛmá bɨ́n ó, ebě, bɨ̌n bɨ́ gʉ́a wê. Bɨ̌n ntémé bé lɨ́ egʉ́a ó, sâ bíbɛr, yé abe e nkul eduho lɨ́ otyeetye.

²² Nzé dí ányâ-bibɛr? Nye ó mʉr dí elɛ́ɛ ó, Yésʉs, nyé abe Mʉ̂r Nzyɛ̌m á lœm múló mé jwɨ́ɨ nyá. Mʉr Dɔm mé Yésʉs, nye ó mʉr nyɨnyɛ̂h dí ekɛ́lǎ Nzyɛ̌m Sɔ́ŋ le Nzyɛ̌m Mwân nyá.

²³ Mʉr dí ekɛ́la ó, Yésʉs, nyé abe Mwân mé Nzyɛ̌m nyá, nyé agúmo e Nzyɛ̌m Sɔ́ŋ. Tó kœb ó, waá dí elɛ́ɛ ó, Yésʉs, nye ó Mwân mé Nzyɛ̌m nyá, Nzyɛ̌m Sɔ́ŋ le Nzyɛ̌m Mwân, bé ó ɨ́ nkɔ̌m nyé.

²⁴ Gwá símsa gá mpáŋla bɨ́n á jóʼo, duho ɨ́ menyɛ̌l nyɨ́. Mpáŋla bɨ́n á jóʼo, duho ɨ́ menyɛ̌l nyɨ́, ódi bɨ́n ɨ́ miléme nó, bɨ̌n bé ódi ntémé ó, ɨ́ mpúhlá nyɨ́n e Nzyɛ̌m Mwân, bé e Nzyɛ̌m Sɔ́ŋ bɨ́bɛ̂h.

²⁵ Nó ó, nkɛ̌ʼ Nzyɛ̌m Sɔ́ŋ mʉr tɨ̂ʼ á dwe mɨná gá nyɨ́, nye ó nyɨ̂: twǐʼ njʉ̌m dǐ.

²⁶ Mě cɛmá bɨ́n bisá bîʼ ó, dumo e bʉr o dí esáa édímle bɨ́n bá.

²⁷ Ɨ́ wɨ́n pâʼ, bɨ̌n bé á si bi Sísǐm, waá Nzyɛ̌m á lœm bɨ̌n wǎ wɨ́. Bɨ̌n e Sísǐm mé Nzyɛ̌m waá ó mû. Sɨ́ǎ yaá ó bɨ́n dí, abe lɨ́ ekǎ jɨ lɛ̂ʼla yɨ́. Nzyɛ̌m á ntɨh bɨ̌n Sísǐm wé ó, nye díʼee lɛ̂ʼla wɨ́n ɨ́ milɔ̌b mímyɛ̂h. Sísǐm mé Nzyɛ̌m, nye ntémé, nye ó sísǐm mé Nzyɛ̌m mpâ. Nyě lɛ́ɛ́ ó, otyeetye; nyé alɛ́ɛ bíbɛr. Mpʉ nyé dí elɛ̂ʼle bɨ́n yɨ́, diʼee gá ɨ́ mpúhlá e nye.

²⁸ Nó ó, bwán bâm, diʼee gá ɨ́ mpúhlá e Krîst, mbi dí ó, jɔʼ nyé óbáʼǎ nyɨ̂n yɨ́, mɨná nkʉ̂ nʉa gá pîm ɨ́ búʼó. Mɨná nkʉ̂ be gá asɔ́ma ɨ́ míh mé, ɨ́ jɔʼ nyé óbáʼǎ nze yɨ́.

²⁹ Bɨ̌n bé lɨ́ egʉ́a ó, Krîst, nye ó tîtyěl mʉr. Bɨ̌n bé ɨ́ jala le egʉ́a ntémé ó, mʉr nyɨnyɛ̂h dí esɨsâ bísyɛ́ɛla bimpâ nyá, nyɨ́ byɛ̂l e nzɨ̌ nkul mé Nzyɛ̌m.