1 Yʉanes 1 - Kálar Nzyɛ̌m : Ejwán é Sáá

Lwǐb twiʼ

¹ Lɔ́ɔ́ bɨ́h mû lɨ́ elɛ́ɛ bɨ́n wɨ́, wé ó, ɨ́ lɔ̌b Lwǐb Twiʼ. Nye á boo be ó tɨ̂, kʉ́ e sí apǎ bě kuhá. Bɨ̌h bé á si jóʼo twíí nyé, bee ntémé nye e míh mɨ́h. Nye ó mʉr bɨ́h á siŋle, waá mebó mɨ́h, mé á kúna nyá.

² Etín é Twiʼ laá, lé á si nyɨ̂n ɨ́ sí yɨ̂. Bɨ̌h bé á si bee nye, bɨ̌h nzě táare éboʼlo, dumo e mʉr waá. Nó yaá ó bɨ́h dí etyɛ̂b kwá nyɨ́n le túnó dí edumo le Etín é Twiʼ wɨ́. Etín é Twiʼ, lé di ó njʉ̌m dǐ e njʉ̌m dǐ. Bé e Nzyɛ̌m Sɔ́ŋ ó b'á be. Nye nzě nyɨ̂n ɨ́ sí yɨ̂.

³ Sá bɨ́h á bee e míh mɨ́h, jóʼo e megwǎl mɨ́h yɨ́, yé ó bɨ́h dí etúno bɨ́n ntémé yɨ́, mbi dí ó, mɨná nkʉ̂ di gá ɨ́ mpúhlá, mɨná gá óbɛ̂h. Mpúhlá mɨ́ná ngá pûhla gá nyɨ́, óbe ó e Nzyɛ̌m Sɔ́ŋ, bé e Mwân wé, Yésʉs-Krîst.

⁴ Bɨ̌h cɛma bɨ́n mekaná mâʼ ó, sʉhʉʉ gá yɨ́ná, yé díʼee lwɨ́ŋlá.

Nzyɛ̌m ó dí njʉl dí epǎn myɛ́n wɨ́

⁵ Mpáŋla bɨ́h á bi ɨ́ nzɨ̌ mé Yésʉs-Krîst nyɨ́, nye ó nyɨ̂. Nye ó bɨ́h dí eboʼlo bɨ́n ɨ́ báánâʼ nyɨ̂. Nye ó: Nzyɛ̌m ó dí njʉl. Edúrúú, lé abá be ɨ́ nye, damá jóʼo ó, mâ bím twáʼwó.

⁶ Mɨ́ná bé lɛ́ɛ́ gá ó, mɨná bɨ́ pûhla gá e né, mɨná yɨ́ɛ lɨ́ entíma gâ, le edû kʉ̌ tyen ébébe nó, lɛ́ɛ́, mɨná bé lɨ́ elɛ́ɛ gá bibɛr. Mɨná bé asâ gá bisyɛ́ɛla bi dí edû ótyeetye bí.

⁷ Mɨ́ná tyé gá ɨ́ myɛ́n tʉ́ŋlʉ̌, mpʉ̌ Nzyɛ̌m mʉr tɨ̂ʼ dí ɨ́ myɛ́n yɨ́ nó, ɨ́ jɔʼ yaá ó mɨ́ná óbe gá e mpǎŋ mpúhlá páʼ gá nyɨ́ná yɨ́. Metié me Mwân wé, Yésʉs, mé ópubo gá mɨná misyóm mímyɛ̂h ɨ́ jɔʼ yaá.

⁸ Mɨ́ná lɛ́ɛ́ gá ó, mɨná bé asâ gá misyóm nó, lɛ́ɛ́, mɨná dímlé gá ó, mɨná bʉr o tɨ̂. Otyeetye, wé abe ɨ́ mɨná gâ.

⁹ Sâ gwár, mɨ́ná gwíh gá misyóm gá mɨ́ná nó, Nzyɛ̌m ópɛʼ bíbaa bí ébébe nyé á niʼe mɨná gá bí, le epubo mɨ́ná gâ, le epɛʼ mɨ́ná gá mebyaʼ gá mɨ́ná mɨ́mɛ̂h. Nye ósâ nó ó, ebě, nye ó tîtyěl mʉr jálá le ebúʼlɔɔ nyá.

¹⁰ Mɨ́ná lɛ́ɛ́ gá ó, mɨná bé apǎ sâ gá syóm nó, nó ó, mɨná lɛ́ɛ́ gá ó, nye ó mʉr bibɛr. Lwǐb yé, yé abe kwá gá nyɨ́ná.