Bìoball air-loidhne

1 Timotɛ 3 - Kálar Nzyɛ̌m : Ejwán é Sáá

Otyɛ̂b bé ésôʼ ó Mbɛ̌r-Nzyɛ̌m

¹ Lɔ́ɔ́ wɨ̂, wé kʉ́ be ó kwahaá tyeetye: mʉ̂r sáá ó, nye díʼee tyɛ̂b esôʼ Mbɛ̌r-Nzyɛ̌m, pála ókrǐsten nó, nyě gwɨ́m ó, esú é syɛ́ɛ́ dí mbɨa lɨ́.

² Nó yé jɨ ó, waá dí epála bʉ́ʉ́ nyá, díʼee mʉr dí, abe e nkul edweŋɔɔ mébě nyá. Nye díʼee njʉ̂m mʉmá ngwár. Nyé ajala le ebe mʉ̂r dí ede ményoʼ, puro nyá. Nye dwêʼ nyʉ̂l nyé medile. Nye díʼee mʉr dí e dúu nyá. Nye díʼee mʉr dí enʉa ójwóo, waá dí egʉ́a édwe bʉ̂r milɛ́ʼlá nyá,

³ abě nyʉnyóʼ, abe mʉ̂r esweha. Nye ɨ́ jala le ebe ó e lémé mpâm, abe ányâ-bitɔm, abe e nzɔ́ɔ́ bísâ.

⁴ Tyɛ̂b esôʼ Mbɛ̌r-Nzyɛ̌m mbɨa ó, di mʉ̂r dí egwá jwɨ́ɨ̌ mbɛ̌r bʉ̂r wé nyá. Bwán bé, bé ɨ́ jala le esâ nyé mejóʼo, lɨ́ elɛ̂ʼlě mpʉ bé jálá le edwe ményʉ̂l medile yɨ́.

⁵ (Ebě, mʉ̂r óbé akoʼo éjwɨ́ɨ̌ mbɛ̌r bʉ̂r wé nó, wáǎ mbi mʉ̂r tɨ̂ʼ dí e nkul epálǎ Mbɛ̌r-Nzyɛ̌m ɛ́?)

⁶ Nyé ajala le ebe mʉ̂r alúno dwirǎ léme, nî ɨ́ búʼó nyá. Yé ámû jaá sâ ó, nye nkɛ́yɨɨ nyʉ̂l. Nyé odumǎ mpʉ̌ sɔ́ŋ meleme á duma yɨ́. Nyé osia e bintɨ́ʼá bimpwár ntémé sɔ́ŋ meleme á sia e byé bí.

⁷ Nó ntémé ó, nyé dí ejala le edweŋɔɔ̌ dúu kwá ohááden yɨ́, ebě, nyé bíl ɨ́ meboʼo mé sɔ́ŋ meleme nó, nye ámû jaá sɔ́ma ɨ́ míh mɔ́ɔ́.

Odiâkɔn

⁸ Jwɨʼ gwár e gwár yaá ntémé ó le odiâkɔn. Bé ɨ́ jala le edwe ményʉ́l mɔ́ɔ́ medile. Bé ayɨ́ di le ocábcab. Bé ajala le elɔ̂ʼwa ɨ́ menyoʼ, nkʉ̂ sáa bímɔnɨ́ byɔ́ɔ́ ɨ́ menzɨ̌ me dí onzyɛ́h ónzyɛ́h má.

⁹ Bé gwâ baʼle ótyeetye ó búʼó gá yɨ́ná, e mipahlá míléme mi dí ɨ́ pyɛɛɛ mí.

¹⁰ Yé jala ó, bɨ̌n páa nyɛɛ́ pahle bê. Bé ópahlɔɔ, ɨ́ pahlɔɔ, pahlɔɔ, adweŋɔɔ mébě nó, bé e nkul eséǎ syɛ́ɛ́ ódiâkɔn ɨ́ jɔʼ yaá.

¹¹ Bʉbá bɔ́ɔ́ ntémé, bé ɨ́ jala le edwe ményʉ́l mɔ́ɔ́ medile, abe lɨ́ eswêʼ míé mé bʉ́ʉ́ bʉ̂r. Bé ajala le ede ményoʼ, sahle. Bé ɨ́ jala le ebe ó, bʉr o bé ébûʼlɔɔ ɨ́ mipáʼ mímyɛ̂h.

¹² Diâkɔn, nye díʼee njɨ e mʉmá ngwár. Nye gwâ jwɨ́ɨ ntémé bwán bé, ti e mbɛ̌r bʉ̂r wé mbɨ̂mbɨá.

¹³ Odiâkɔn dí eséa e bʉr mbɨ̂mbɨá bá, bé súʼlá ó, egbáŋɔɔ ɨ́ nkɔb. Bé ósûʼla ó, osɔ́ŋ ó búʼó gá yɨ́ná, lɨ́ ekʉ́ dyêʼ koo e Yésʉs-Krîst.

Búʼó gá yɨ́ná

¹⁴ Mɨ́ gʉ́a ɨ́ báánâʼ ó, me mû ó kúno enzě bee gó gʉ̂. Damá jóʼo nó, mě cɛmá gó mekaná mâʼ ó,

¹⁵ lɨ́ esú ó, mé bé alɨ̌ nzě kœb gó gʉ̂ʼ nó, go gʉ́ŋaa kʉ̌ tyen dí ejala e mʉr Mbɛ̌r-Nzyɛ̌m wɨ́. Go ógʉ́a wé ó, lɨ́ eláa mékaná mâ. Mbɛ̌r-Nzyɛ̌m waá, wé ó dí sɔ́má bʉ̂r o dí egúmo e Nzyɛ̌m dí kublakúbla nyá. Otyeetye mé Nzyɛ̌m, wé tyɛ́b ɨ́ lyahwó ó, ebě, Mbɛ̌r-Nzyɛ̌m dí mpʉ édwii e sɔ́ŋ ndu e nkan dí ɨ́ lele nyɨ́.

¹⁶ Yê tyeetye ó e bipéh bí búʼó yɨ́ná byé á nyɛɛ be misolá bí. Byé mû ó sí pâʼlɔɔ. Byé ntémé, byé ɨ́ buú bwaʼ, mpʉ bʉ̂r bɨ́bɛ̂h dí ekam yɨ́. Byé ó: «Nye á nze nyɨ̂n ɨ́ sí yɨ̂ʼ ó e nyʉ̂l bipúno. Sísǐm mé Nzyɛ̌m nzě lɛ̂ʼle mɨ́ná gá ó, nyé abe e mebě. Beéngeles, bé á si siŋle nye. Bʉr o bíkúl bíswîh, bé á si jóʼo lɔ́ɔ dí edumo e né wɨ́. Bʉr ó sí yɨ̂, bé á si dyɛ̂ʼwo e né. Nye nzě bɨ́nɔɔ ɨ́ jʉ́o kʉ́, nko nyé á bi kûm yɨ́.»

« Roimhe

Air adhart »

Lean sinn:

Ceanglaichean taic

Sanasan