1 Timotɛ 2 - Kálar Nzyɛ̌m : Ejwán é Sáá

Minjɨʼla lɨ́ esú é bʉ̂r bɨ́bɛ̂h

¹ Sá ésôʼ mé nyɛ́ɛ́ lɛ́ɛ gó yɨ́, yé ó, go jɨ̂ʼlaa e Nzyɛ̌m lɨ́ esú é bʉ̂r bɨ́bɛ̂h. Go e jáʼ nyé sá yɨ́yɛ̂h lɨ́ esú é bʉ̂r oswîh. Go e dwé nyé ntémé nzyǒo.

² Jɨʼlaa ntémé lɨ́ esú lé ójwɨ́ɨ, ndu e baá bɨ́bɛ̂h dí e nkul jwɨ́ɨ bá. Sá tɨ̂ʼ ó mɨ́ná ódû gá kʉ̌ tyen dí abe e ntɨ́ʼá wɨ́, le edi ntémé ɨ́ puuu yɨ́. Ɨ́ bicwiʼ gá bíná, mɨná bé ódwáawǒ Nzyɛ̌m le edwe ményʉ́l mɨ́ná medile.

³ Nzyɛ̌m, Tiʼbʉr gá wɨ́ná, nye lɨ́ ebeě syɛ́ɛla yaá mbɨ̂mbɨá; nye lɨ́ ekpɛl yê.

⁴ Nyě kpɛ̌l ó, bʉr bɨ́bɛ̂h níʼee ɨ́ twǐʼ njʉ̌m dǐ, le egʉ́a mílɔ̌b mi dí tyeetye mí.

⁵ Ebě, Nzyɛ̌m, nye ó njɨ ngwár. Nó ntémé, bʉr, bé ó njɨ e mesaádɔm ngwár dí páʼ bé e boo Nzyɛ̌m nyá. Nye mʉr tɨ̂, nye ó mʉr: Yésʉs-Krîst,

⁶ mʉr á pa dwe twiʼ yé lɨ́ etáǎ góo, le edwih bʉ̂r bɨ́bɛ̂h ɨ́ mpila ébébe nyá. Nó ó, lɔ́ɔ waá, wé á ka lɛ́ɔɔ ó, ɨ́ jɔʼ wé á jala le elɛ́ɔɔ yɨ́.

⁷ Nzyɛ̌m nzě tyêl mé ɨ́ bidǐ bibá: yaá lɛ́a lɔ́ɔ wé, ti e yaá mʉ̂r milʉ́mlʉ́ wé. (Mě lɛ́ɛ́ ó, otyeetye; mé alɛ́ɛ bíbɛr.) Me ó lɛ̂ʼla lɨ́ esú é bʉ̂r o dí abe óYúden bá, lɨ́ edwe bé metwɨ́ɨ́ ɨ́ nzɨ̌ búʼó yɨ́ná, le otyeetye mé Nzyɛ̌m.

⁸ Sá tɨ̂ʼ ó mé dí ekpɛl ó, ɨ́ gúmó yɨ́yɛ̂h, bʉrʉ̂m díʼee tí yɨ́. Bé jɨ̂ʼlaa e Nzyɛ̌m, lɨ́ ebɨ̂r mébó mé tí kʉ́, abe e nkpaa nkʉ̂ mesónó ɨ́ miléme.

⁹ Mě kpɛl ntémé ó, bʉbá bwáraa mimbór mímpâ mî: bé dwêʼ menyʉ́l mɔ́ɔ́ medile, le edi e dúu. Abe e misíné mí jáálé, nkʉ̂ binkohó bí gʉ̂l, nkʉ̂ mindwé métwaʼlé ndu e mikán mi dí ɨ́ bwaʼ tâŋ mí.

¹⁰ Bé ɨ́ jala le elɛ̂ʼle bʉ̂r kʉ̌l ó, bisyɛ́ɛla bimpâ bi dí ejala e bʉbá dí ekam ó, bé lɨ́ edwě Nzyɛ̌m kûm bá bí.

¹¹ Yé jala ó, mʉmá díʼee ɨ́ puuu ɨ́ jɔʼ nyé dí ejɨ̂ʼ mílɛ́ʼlá yɨ́. Nye sâʼ lɛ̂ʼla wé mejóʼo e menzɨ̌ mɨ́mɛ̂h.

¹² Mé adwe nkûl ó, mʉmá dwêʼ bʉrʉ̂m milɛ́ʼlá, nkʉ̂ nʉa nkûl jwɨ́ɨ ɨ́ bʉrʉ̂m. Nye díʼee yɨ́ɛ ɨ́ puuu.

¹³ Ebě, Ádam ó b'á nyɛɛ komlɔɔ; píe tɨ̂, kǎ bɔma Éfa.

¹⁴ Nó ó Ádam nyɨɛ á bé abûʼla míkóo. Mʉmá ó b'á kʉ́ŋɔɔ. Nó nyé á duma, ntɔ̂ʼ dwir nyé mʉr tɨ̂ʼ syɛ̂l misyóm.

¹⁵ Mʉ́má ódyɛ̂ʼwo e Nzyɛ̌m, le ekpɛl bʉ̂r, dǐ tí ɨ́ páʼ mé Nzyɛ̌m, le edwe nyʉ̂l nyé medile nó, nye óbǐ twiʼ lɨ́ ebyá nyé dí ebyâ lɨ́.