1 Timotɛ 1 - Kálar Nzyɛ̌m : Ejwán é Sáá

Meswɨhlɨ

¹ Pɔ̂l ó dí ecɛma gó mekaná mâ. Me ó mʉr milʉ́mlʉ́ mé Yésʉs-Krîst ɨ́ mitíʼá mé Nzyɛ̌m Sɔ́ŋ, Tiʼbʉr gá wɨ́ná, ti e Yésʉs-Krîst, waá dí egbâ mpûʼla ɨ́ miléme gá míná nyá.

² Mě cɛma mékaná mâʼ ó, gua Timotɛ̂, mʉr dí mpaŋ mwân wǎm ɨ́ búʼó nyá. Metyɛʼ me mpóm, le njɨ́ʼá nkóó le mepyɛbla, byé díʼee e go, duho e Nzyɛ̌m Sɔ́ŋ gá wɨ́ná, bé e Tî gá wɨ́ná Yésʉs-Krîst.

Cɨ́áá bíbɨ́bla bí ólɛ̂ʼla

³ Diʼeě Éfɛsɔs mpʉ mé á tɨ́e go, ɨ́ jɔʼ mé á be, me mû kúno etô sí Masedónia yɨ́. Diʼee náǎ, go e tɨ́é bʉ̂r ó, bé sá adweela gúú mbǐ lɛ́ʼlá swîh.

⁴ Go e lɛ́ɛ́ bé ó, bé ayɨ́ dû nzɨ́ bikɨkɛna. Bé sá ajóʼo ólɔ́ɔ o bíntán ó mímbɛ̌r mi bʉ̂r, sá dí abe le odumo yɨ́. Bisâ byaá, byé dulo ó nzyɛ́ɛ́lá mecwíí. Ɨ́ páʼ mé Nzyɛ̌m, byé abe e nyɔm. Mɨná nyɨɛ́ lóŋló syɛ́ɛ́ yé ó, ɨ́ nzɨ̌ búʼó yɨ́ná.

⁵ Ɨ́ metwɨ́ɨ́ ménɨ̌, ndumló tɨ̂, wé ó, mɨná kpɛ́laa gâ. Kpɛ̌l yaá, yé dúhaa ɨ́ miléme mi dí ɨ́ sɔ́ɔ́ɔ́ mí, le ɨ́ mipahlá míléme mi dí ɨ́ pyɛɛɛ mí. Kpɛ̌l yaá dúhaa ntémé ɨ́ mpǎŋ búʼó yɨ́ná dí abě mbáʼrá e mikóo yɨ́.

⁶ Yé e bʉ́ʉ́ bʉ̂r o b'á sâ ebébe ɨ́ páʼ bísâ byaá bá. Bɨ́haá, bé á tyen megwǎl ó, lɨ́ olɛblɛ̂b bíbɨ́bla bí ólɛ̂ʼla, ntɔ̂ʼ dyɛ̂l ɨ́ mʉ́ʉ́ ménzɨ̌ meswîh.

⁷ Bé gwɨ́m ó, bé díʼee olɛ̂ʼla o métié, bɨ́ɛ yɨ́ɛ agʉ́ǎ sá túʼ bé dí elɛ́ɛ yɨ́, nkʉ̂ pʉgʉ́ bá gʉ́a mílɔ̌b bé dí eboʼlo mí.

⁸ Mɨná bé lɨ́ ekʉ́ gʉ́a ó, metié mé Moyɨ̂z, mé e nyɔm ó, njɨ ɨ́ páʼ mʉ̂r dí edwáawo mé, gbâ ɨ́ nkɔb nyá.

⁹ Mɨná bé lɨ́ egʉ́a ntémé ó, metié maá, mé á bé atyélɔɔ lɨ́ esú lé ótîtyěl ó bʉ̂r. Mé á tyélɔɔ ó, lɨ́ esú é bʉ̂r bâ: ogbah o métié, baá o dí egbɔba le otyɛ̂b bé ésôʼ bɔ́ɔ́ bá, minjéʼe-Nzyɛ̌m, osyɛ̂l o mísyóm, bʉr o dí esâ Nzyɛ̌m nkěh bá, baá o dí agúmo e Nzyɛ̌m bá, ojʉ̂l bé ósɔ́ŋ, ojʉ̂l bé ónyɔ̌ŋ, le ojʉ̂l o bʉ̂r,

¹⁰ bʉr o dí elœʼ ményʉ́l mɔ́ɔ́ ɨ́ nzɨ̌ bijoó bá, otɛba o bʉ́rʉ̂m, obɛ́ma o bʉ̂r, baányâ-bibɛr, le oboʼlo o bíbɛr. Nzyɛ̌m á tyêl metié ntémé ó, lɨ́ ekamle bísyɛ́ɛla bíbyɛ̂h bi dí ajala e lɛ́ʼlá mpâ mɨ́ná bé á dweŋɔɔ gá wɨ́ bí.

¹¹ Lɛ́ʼlá mpâ waá, wé ó waá dí eduho ɨ́ Mbɨambɨa Lɔ́ɔ dí e kûm wɨ́. Nzyɛ̌m mɨ́ná dí esêʼle nyá, mʉr tɨ̂ʼ ó b'á tímle me lɔ́ɔ waá ó, me túnaa wê.

Ncwɨ́ncwɨ́ǎ Nzyɛ̌m á sâ Pɔ̂l nyɨ́

¹² Me lɨ́ edwe Tî gá wɨ́ná Yésʉs-Krîst nzyǒo, mʉr á dwe me nkul ɨ́ syɛ́ɛ́ yâm nyá, ebě, nye á láa ó, me ó mʉr ebúʼlɔɔ, nye ntɔ̂ʼ tyêl mé ɨ́ syɛ́ɛ́ yé,

¹³ mɛm yɨ́ɛ mʉr á sɨsâ Nzyɛ̌m nkěh ɨ́ melú mé épíhe nyá. Me á si tíble bʉr bé, le edîʼ mpêl. Damá jóʼǒ mpʉ mé á sâ syɛ́ɛla yaá yɨ́, Nzyɛ̌m á si jɨ̂ʼ me nkoó, nyɨɛ lɨ́ egʉ́a ó, bisyɛ́ɛla mé á sɨsâ bí, byé á jaa tɨtɨ̂ ó, njɨ lɨ́ egʉʼla lâm, le abûʼla wǎm.

¹⁴ Sá tɨ̂ʼ ó Dâ á sʉ me metyɛʼ me mpóm ɨ́ nkalá nkalá yɨ́. Nye á si gbâ me ntémé búʼó ti e kpɛ̌l ɨ́ léme, ɨ́ nzɨ̌ mé Yésʉs-Krîst.

¹⁵ Lɔ́ɔ́ ébûʼlɔɔ, waá bʉ̂r bɨ́bɛ̂h jálá le ekam wɨ́, wé ó wɨ̂: Yésʉs-Krîst á nze ɨ́ sí yɨ̂ʼ ó, nye ntáa nzě tíʼ ósyɛ̂l o mísyóm. Nó ó, ɨ́ sɔ́má bʉ̂r o b'á sâ misyóm bá, mɛm ó b'á sahle.

¹⁶ Me ó b'á jɨ́ʼɔɔ nkoó, ebě, me ó b'á bu sahle. Yésʉs-Krîst á taare elɛ̂ʼle mpuo bíhwó nyé ó, ɨ́ jɔʼ nyé á dûhwo me yɨ́. Yé ó mveʼle nyé dí elɛ̂ʼle bʉ̂r bɨ́bɛ̂h o ngá dyɛ̂ʼwo e né ɨ́ melû me dí enze má bá. Bé ódyɛ̂ʼwo e né, ntɔ̂ʼ bǐ twǐʼ njʉ̌m dǐ.

¹⁷ Nzyɛ̌m dí njwɨ́ɨ melú mé mpóʼo mɨ́mɛ̂h, adwidwe nyá, waá dí anyɨ̂n, waá dí Nzyɛ̌m nye omér nyá, dúu e kûm, byé díʼee e né njʉ̌m dǐ e njʉ̌m dǐ. Amɛn.

¹⁸ Timotɛ̂, mwân wǎm, mě dwé gó metwɨ́ɨ́ mâʼ ó, lɨ́ edû lɛ́á ógwíha o mílɔ̌b dí elɛ́ɛ, dumo e go wɨ́. Gó óbaʼle métwɨ́ɨ́ mâʼ nó, go ólwímlǎ mbɨambɨa dɔm

¹⁹ ɨ́ nzɨ̌ búʼó yô le mipahlá mí lémé myô mi dí ɨ́ pyɛɛɛ mí. Bʉ́ʉ́ bʉ̂r bɨ́ɛ, bé á be ó sí kâr éjwɨ́ɨ mílémé myɔ́ɔ́, búʼó yɔ́ɔ́, yé ntɔ̂ʼ ndáma, nwɨɨla e sitíma dí elʉ́ŋa ɨ́ medíbé, dîm yɨ́.

²⁰ Ɨ́ sɔ́má bʉ̂r yaá, yé ó Iménaus ndu e l'Alɛ́kzaŋdros. Bé ó mé á dwe Sátan ó, nye lɛ̂ʼlaa bé túú, bé nkʉ̂ gwâʼ ésâ Nzyɛ̌m nkěh.