Bìoball air-loidhne

1 Tesalonika 5 - Kálar Nzyɛ̌m : Ejwán é Sáá

Eswéhlɨ́ é sí yɨ̂

¹ Bɨ́ɔɔ́ bâm! Okɛ́l bâm! Ɨ́ nkǒ páʼ bíjɔʼ e mimbû, yé abe e sá mʉ̂r káa cɛma bɨ́n.

² Ebě, bɨ̌n bʉr o tɨ̂, bé lɨ́ ekʉ́ gʉ́a ɨ́ pébébé ó, ɨ́ jɔʼ Tî Yésʉs óbáʼǎ nze yɨ́, nye ópyâl bʉ̂r metwɨrâ mpʉ míndíblʉ̌ dí eboó pipyâl ɨ́ mipum yɨ́.

³ Bʉr, bé ólɨlɛ́ɛla páʼ nyɔ́ɔ́ ó: «Sá yɨ́yɛ̂h, yé mû ó mbɨ̂mbɨá; sá ébébe, yé abe e nkul esâ gá mɨná.» Ɨ́ jɔʼ yaá, ebébe, lé ópyâl bé metwɨrâ, ntɔ̂ʼ dímle bɨ́bɛ̂h. Sí, yé ólîʼ tʉ̂toʼó. Bé ábe e nkul ekɨ̂ŋ mébébe maá. Bé óbe ó mpʉ ábubúm. Jɔʼ mín dí emɛ̂r nyé yɨ́, nyé abe e nkul ekɨ̂ŋ mékpaa me mín.

⁴ Bɨ́ɔɔ́ bâm! Okɛ́l bâm! Bɨ̌n bé ajéʼě lɔ̌b waá. Bɨ̌n bé átwɨrǎ móhó waá. Wé ápyâl bɨ́n mpʉ̌ ndíblʉ̌.

⁵ Bɨ̌n bé ó baá o dí etye ɨ́ myɛ́n, ɨ́ jɔʼ yé dí móhó yɨ́. Mɨná bé abe gá mpʉ bʉ̂r o dí entíma lɨ́ edúrʉ́ʉ́ bá.

⁶ Ɨ́ mpʉ yé dí nó yɨ́, bɨ̌n bé ajala le ejâ bíjô mpʉ bʉ́ʉ́ bʉ̂r dí esâ yɨ́. Nó ó, diʼee gá ɨ́ mpʉ̂n. Máráá gá miléme.

⁷ Ebě, baá o dí ejâ bíjô bá, bé já ó, ɨ́ pum. Minyʉnyóʼ, myé puro ményoʼ ó, ɨ́ pum.

⁸ Sâ gwár, mɨná gá bé ó bʉr ó móhó. Mɨná bé ɨ́ jala le emâr gá miléme. Mɨná dyɛ̂ʼwaa gá e Nzyɛ̌m, le ekpɛl bʉ̂r. Búʼó ndu e kpɛ̌l, byé bâʼlaa mɨná gá mpʉ mímbór bínkóho mi dí ebaʼle nyʉ̂l nkɔ́ɔ́ mí. Mpûʼla, nye lónaa bɨ̌n ɨ́ miléme lɨ́ ebónǒ twǐʼ njʉ̌m dǐ. Mpûʼla nyaá, nye óbánǎ baʼle mɨ́ná gá mpʉ̌ búró bínkóho dí ebaʼlě lʉ́ nkɔ́ɔ́ yɨ́.

⁹ Ebě, Nzyɛ̌m á bé atwâr mɨ́ná gá ó, mɨná jâʼraa gá e nkpaa nyé. Nye á twâr mɨná gá ó, mɨná bíʼee gá twiʼ ɨ́ nzɨ̌ Tî gá wɨ́ná Yésʉs-Krîst.

¹⁰ Nye ó b'á búra e mɨná gâ. Nye á sâ nó ó, mɨná bíʼee gá twǐʼ njʉ̌m dǐ, mɨná gá le onɔ́ɔ́. Mɨná damá di gá ɨ́ twiʼ, nkʉ̂ ntémé dwe, ɨ́ jɔʼ nyé ónze yɨ́, mɨná bé ótíʼe gâ, mɨná gá le onɔ́ɔ́.

¹¹ Nó ó, gbáʼ gá bʉr nkul ɨ́ miléme e metwɨ́ɨ́ ménɨ̌. Sáʼ gá páʼ nyɨ́n ó, misísǐm mín, myé tɔ́maa mpʉ bɨ́n dína le esâ yɨ́.

Metwɨ́ɨ́ mé éswéhlɨ́

¹² Bɨ́ɔɔ́ bâm! Okɛ́l bâm! Bɨ̌h jɨʼlá e bɨ̌n ó, bɨ̌n dwáawaa baá o dí eséǎ lelelelě syɛ́ɛ́ ɨ́ sɔ́má yɨ́n bá. Bé ó baá Tî Yésʉs á tyêl bá. Nye á kpɛl ó, bé tîtyɛbɨɨ ɨ́ mpǒm nyɨ́n, lɨ́ ecɨ̂l bɨ́n.

¹³ Bɨ̌n bé ɨ́ jala le edwe bé dúu, le ekpɛl bé ɨ́ lɔ̌b syɛ́ɛ́ yɔ́ɔ́ bé dí eséa yɨ́. Tiʼaa gá ɨ́ mepyɛbla páʼ nyɨ́n tʉ́ŋlʉ̌.

¹⁴ Bɨ́ɔɔ́ bâm! Okɛ́l bâm! Bɨ̌h jɨʼlá e bɨ̌n ó, bɨ̌n cɨ́lɨɨ bʉr o dí esâ épɨ̂h bá. Póbláá gá baá o dí e bʉ́á ɨ́ miléme bá. Kɛmɨɨ gá baá o dí ɨ́ tyɛʼ bá. Júhwáá gá bʉr bɨ́bɛ̂h.

¹⁵ Mʉr abwóolo ébébe le ebébe. Sáʼ gá bisyɛ́ɛla bimpâ páʼ nyɨ́n e bʉr bɨ́bɛ̂h.

¹⁶ Sohaa gá ɨ́ jɔʼ yɨ́yɛ̂h.

¹⁷ Jɨʼlaa gá e Nzyɛ̌m ɨ́ bijɔʼ bíbyɛ̂h.

¹⁸ Jɔʼ yɨ́yɛ̂h le ɨ́ bisá bíbyɛ̂h, dwéʼ gá Nzyɛ̌m nzyǒo, ebě, Nzyɛ̌m á tíʼe ɨ́ lémé wé ó, bʉr o dí ɨ́ Yésʉs-Krîst bá, bé ósɨ̂sa nó.

¹⁹ Akamle gá Sísǐm mé Nzyɛ̌m ó, wé sâʼ bisyɛ́ɛla wé jálá le esâ ɨ́ sɔ́má yɨ́n bí.

²⁰ Apyêh gá milɛ́á mí ógwíha o mílɔ̌b.

²¹ Timlaa gá bisá bíbyɛ̂h. Sá dí ɨ́ mbɨa yɨ́, mɛ́rɨ́ɨ́ gá yé ɨ́ kpɨ́ɨ́ɨ́.

²² Syɛ́hláá gá mimbi mébébé mɨ́mɛ̂h.

²³ Nzyɛ̌m waá dí esâ ó, bʉr tíʼaa ɨ́ mepyɛbla nyá, nye mʉr tɨ̂, nye púbaa bɨ̌n ɨ́ mipáʼ mímyɛ̂h. Nye bâʼlaa misísǐm mín, milémé mín, ti e menyʉ́l mɨ́n. Nye bâʼlaa bɨ̌n mbɨ̂mbɨá nó, mɨná díʼee gá abe e mebě, tó pyâl ɨ́ jɔʼ Tî gá wɨ́ná Yésʉs-Krîst óbáʼǎ nze yɨ́.

²⁴ Mʉr dí ejébe bɨ́n nyá, nye ó mʉr jálá le ebúʼlɔɔ nyá. Nye ó ngá séǎ syɛ́ɛ́ yaá.

²⁵ Bɨ́ɔɔ́ bâm! Okɛ́l bâm! Jɨʼlaa gá e Nzyɛ̌m ɨ́ lɔ̌b wɨ́h.

²⁶ Sohaa gá obûʼla bɨ́bɛ̂h. Beŋlaa gá páʼ nyɨ́n ɨ́ kpɛ̌l tʉ́ŋlʉ̌.

²⁷ Me lɨ́ ejɨʼla e bɨ̌n ɨ́ díé mé Tî Yésʉs ó, bɨ̌n láŋaa mekaná mâʼ lɨ́ obûʼla bɨ́bɛ̂h.

²⁸ Tî gá wɨ́ná Yésʉs-Krîst, nye sʉ́ʼoo bɨ̌n óbɛ̂h metyɛʼ me mpóm.

« Roimhe

Air adhart »

Lean sinn:

Ceanglaichean taic

Sanasan