1 Tesalonika 3 - Kálar Nzyɛ̌m : Ejwán é Sáá

¹ Mpʉ bɨ́h á be akǎ dûhwo édǐ njɨ nó yɨ́, bɨ̌h bé á ka bee ó, damá jóʼo ó, bɨ̌h bé ólîʼ wâʼ ɨ́ ntɛ̂ʼ ɨ́ Atɛ̂n,

² bɨ̌h bé ɨ́ jala yɨ́ɛ le elómǒ Timotɛ̂ kwá nyɨ́n. Nye ó mɨ́ɔɔ́ gá wɨ́ná ndu e syɛ̂l mesâ mé Nzyɛ̌m, dí etúnǒ Mbɨambɨa Lɔ́ɔ́ mé Krîst nyá. Bɨ̌h bé á lómo nye ó, nye lɨ́lɨɨ bɨ̌n ɨ́ búʼó, le esâ ó, bɨ̌n tôʼ dóló le edyɛ̂ʼwo e Krîst.

³ Mpʉ bʉ̂r bóbló bɨ́n ɨ́ báánâʼ yɨ́, bɨ̌h bé á lómo nye ó, bɨ̌n sá adímlě búʼó ɨ́ lɔ̌b mébʉ́blá maá. Bɨ̌n bʉr o tɨ̂, bɨ̌n bé lɨ́ egʉ́a ó, bintɨ́ʼá bínɨ̌, byé ó sá Nzyɛ̌m á boo kab mɨná gá yɨ́.

⁴ Jɔʼ bɨ́h á be páʼ nyɨ́n yɨ́, bɨ̌h bé á si baʼa lɛ́ɛ e bɨ̌n ó, bɨ̌h bé ósia e bintɨ́ʼá. Yé ntémé, yé á si pyâl nó mpʉ bɨ́n dí egʉ́a yɨ́.

⁵ Nó ó mpʉ mé á be akǎ be e nkul edûhwo yɨ́, yé ó mé á lómo Timotɛ̂ ó, me gʉ́ŋaa tyé búʼó yɨ́n mû yɨ́. Léme, wé á si koro me ɨ́ lɔ̌b wɨ́n, ó yʉ́ʉ́ jɔʼ, mpʉ̌ Sátan á bóblo bɨ̌n yɨ́, bɨ̌n bé á si to dîm ɨ́ nyʉ́ʉ́ nzɨ́ swîh. Me á syɛl bá ntémé ó, yʉ́ʉ́ jɔʼ, syɛ́ɛ́ bɨ́h á séa páʼ nyɨ́n yɨ́, yɨ́ dwě ntuʼ.

⁶ Nó ó, Timotɛ̂ alúno duho gʉ̂, le elɛ́ɛ bɨ́h mbɨambɨa milɔ́ɔ ɨ́ lɔ̌b wɨ́n. Nyɨ́ lɛ́ɛ̌ mpʉ bɨ́n dí edyɛ̂ʼwo e Yésʉs, le ekpɛla yɨ́. Nye lɨ́ elɛ́ɛ ntémé mpʉ bɨ́n dí etoŋlo bɨ́h bitɔŋlá bimpâ yɨ́, le elɛ́ɛ ntémé mpʉ bɨ́n dí e dwéh ébee bɨ́h jwɨʼ gwár mpʉ bɨ́h dí egwɨ̂m ébee bɨ́n yɨ́.

⁷ Bɨ́ɔɔ́ bâm! Okɛ́l bâm! Damá jóʼo ó, bɨ̌h bé ɨ́ mitúú le bintɨ́ʼá tʉ́ŋlʉ̌, bɨ̌n bɨ́ sâ ó, bɨ̌h sóhaa, miléme sula sí, ebě, bɨ̌n bé lɨ́ edyɛ̂ʼwo e Yésʉs.

⁸ Jɔʼ yɨ̂, bɨ̌h mû ó sí tíʼe, ebe bɨ́n dína lɨ́ etyɛ̂b mekʉ̌ sí ɨ́ sɨ́ŋ ɨ́ mpúhlá nyɨ́n e Tî Yésʉs.

⁹ Bɨ̌h gʉ́ŋaa ó, bɨ̌h dwêʼ Nzyɛ̌m nzyǒo ɨ́ lɔ̌b wɨ́n nyá? Bɨ̌h bé lɨ́ esoho ɨ́ míh mé Nzyɛ̌m ɨ́ buo buo ɨ́ lɔ̌b wɨ́n.

¹⁰ Móhó e pum, bɨ̌h kʉ́ buú jɨʼla e Nzyɛ̌m ó, mɨná béelaa gá mempǒm. Bɨ̌h bé lɨ́ egwɨ̂m ó, bɨ̌h swâhlaa lɔ́ɔ bɨ́h á nyɛl elɛ́ɛ bɨ́n ó, bɨ̌n bé ɨ́ jala le ebúʼla wɨ́.

¹¹ Bɨ̌h bé lɨ́ ejɨʼla e Nzyɛ̌m gá wɨ́ná, waá dí ntémé Sɔ́ŋ gá wɨ́ná nyá, nye mʉr tɨ̂, ndu e Tî gá wɨ́ná Yésʉs ó, bé dwêʼ bɨ̌h nzɨ̌ ó, bɨ̌h kúmaa ɨ́ sɔ́má yɨ́n.

¹² Tî Yésʉs tyɛ́bɨɨ bɨ̌n ɨ́ miléme, ó kpɛ̌l bɨ́n dí ekpɛla páʼ nyɨ́n yɨ́, yé bwáʼaa. Nye sâʼ ntémé ó, bɨ̌n kpɛ́lɨɨ ntémé bʉr oswîh ɨ́ buo buo, kpɛ̌l yaá, yé nkʉ̂ bwaʼ. Yé syɛ́yɨɨ nó, bɨ̌n kpɛ́lɨɨ bé mpʉ bɨ́h dí ekpɛl bɨ́n yɨ́!

¹³ Nye gbâʼ bɨ̌n nkul ɨ́ miléme ó, myé díʼee bɨ̌n ɨ́ sɔ́ɔ́ɔ́, abe e mebě ɨ́ mpǒm mé mʉr dí Nzyɛ̌m gá wɨ́ná, waá dí ntémé Sɔ́ŋ gá wɨ́ná nyá. Diʼee gá nó, tó kumo ɨ́ jɔʼ Tî gá wɨ́ná Yésʉs óbáʼǎ nze yɨ́. Nye ónze ó, bé e bʉr bɨ́bɛ̂h dí egúmo e né bá.