1 Tesalonika 2 - Kálar Nzyɛ̌m : Ejwán é Sáá

Syɛ́ɛ́ mé Pɔ̂l ɨ́ Tesaloníka

¹ Bɨ́ɔɔ́ bâm! Okɛ́l bâm! Bɨ̌n bʉr o tɨ̂, bɨ̌n bé lɨ́ egʉ́a ó, nzéá mé á nze bee bɨ̌n wɨ́, wé á bé abě dwêh.

² Bɨ̌n bé lɨ́ egʉ́a ntémé mpʉ bɨ́h á bɔma e túú le cére ɨ́ Fílipi, bɨ̌h dína apǎ pyâl kwá nyɨ́n yɨ́. Jɔʼ bɨ́h á pyâl ɨ́ sɔ́má yɨ́n yɨ́, Nzyɛ̌m wɨ́h á si gbâ bɨ̌h menyan ɨ́ miléme ó, bɨ̌h lɛ́yɨɨ bɨ̌n Mbɨambɨa Lɔ́ɔ́ mé Krîst témé bʉr o dí elwímla e bɨ̌h bá.

³ Mpʉ bɨ́h dí edwe bɨ́n nkul ɨ́ nzɨ̌ Mbɨambɨa Lɔ́ɔ́ wé yɨ́, yé á bé abě gwǐh ɨ́ wɨ́h pâʼ. Yé á bé aduho ɨ́ lémé mpîr, nkʉ̂ ɨ́ mikóo mé nyʉ́ʉ́ mʉ̂r.

⁴ Yé á be ó mpʉ̌ Nzyɛ̌m dí ekpɛl yɨ́. Nye ó b'á nyɛɛ bóblo bɨ̌h, ntɔ̂ʼ kǎ gʉ́a ɨ́ pébébé ó, bɨ̌h bé ó bʉr o jálá le egwá baʼlě Mbɨambɨa Lɔ́ɔ́ wé bá. Sá tɨ̂ʼ ó bɨ́h dí etúno wé mpʉ nyɨ́ɛ ógwá kpɛl yɨ́. Bɨ̌h bé asáa élwib ɨ́ mbi bʉ̂r dí ekpɛl mí. Bɨ̌h túnó wé ó, lɨ́ edû gwɨ́má mé Nzyɛ̌m, nyɨɛ mʉr dí epahle bíjwɨʼ mílémé gá míná nyá.

⁵ Gʉ́ŋáá gá ntémé ó, bɨ̌h bé á bé abe lɨ́ esêʼle bɨ́n. Bɨ̌h bé á bé asâ míkóo ɨ́ nyɔm énʉa bísá bín. Nzyɛ̌m, nye me ó mboʼlo!

⁶ Bɨ̌h bé á bé asáa ó, bɨ̌n gúmlaa bɨ̌h. Bɨ̌h bé á bé asáa kûm, duho e bʉ́ʉ́ bʉ̂r. Tó kœb ó, bɨ̌h bé á be ó, bɛ̌m lɛ̂ʼle bɨ́n jwɨ́ɨ́ yɨ́h, ɨ́ mpʉ bɨ́h dí bʉr o mílʉ́mlʉ́ mé Krîst yɨ́.

⁷ Sâ gwár, bɨ̌h bé á be kwá nyɨ́n ó e minjwɨr ɨ́ tala tala, nwɨɨla e ábyɛɛ́ dí etirwo e bwân nyá.

⁸ Bɨ̌h bé á be ɨ́ buú kpɛl bɨ́n. Sá tɨ̂ʼ ó bɨ́h á be alɛ́ɛ bɨ̌n sɔ̂ʼ njɨ Mbɨambɨa Lɔ́ɔ́ mé Nzyɛ̌m wé omér yɨ́. Bɨ̌h bé á gwɨ̂m ó, bɨ̌n díraa minyɔm ɨ́ bicwiʼ bíh ntémé. Bɨ̌n á be ɨ́ buú nyan bɨ́h ɨ́ miléme.

⁹ Bɨ́ɔɔ́ bâm! Okɛ́l bâm! Bɨ̌h bé á si kʉ séa bisyɛ́ɛ́ bí nkûl. Bɨ̌n bʉr o tɨ̂, bɨ̌n bé lɨ́ egʉ́a nó. Jɔʼ yɨ́yɛ̂h bɨ́h á lɨlɛ́ɛ bɨ̌n Mbɨambɨa Lɔ́ɔ́ mé Nzyɛ̌m yɨ́, bɨ̌h ntémé á be lɨ́ eséa bísyɛ́ɛ́ mébô, móhó e pum. Bɨ̌h bé á sâ nó ó, bɨ̌h sá agbâ bɨ́n túú ɨ́ nyʉ̂l lɨ́ enkɛ́ɛ̌ mbeʼ wɨ́h.

¹⁰ Bɨ̌n bé e nkul eboʼlo, ti e Nzyɛ̌m mʉr tɨ̂ʼ ó: bɨ̌h bé á be ó miléme ɨ́ sɔ́ɔ́ɔ́ ɨ́ mîh mé Nzyɛ̌m. Bɨ̌h bé á be páʼ nyɨ́n, obûʼla ó, otîtyěl o bʉ̂r le bʉr o dí abe e mebě bá.

¹¹ Bɨ̌n bé lɨ́ ekʉ́ gʉ́a ntémé ó, bɨ̌h bé á si cwɨ́a e mʉr nyɨnyɛ̂h ɨ́ sɔ́má yɨ́n mpʉ sɔ́ŋ dí ecwɨ́a e bwán bé yɨ́.

¹² Bɨ̌h bé á si cɨ̂l bɨ̌n, le epóblo bɨ́n, le eboʼlo ó, bɨ̌n bé ɨ́ jala le edû kʉ̌ tyěn Nzyɛ̌m dí ekpɛl wɨ́. Tiʼaa gá nó, ebě, nye á jébe bɨ̌n ó, bɨ̌n níʼee ɨ́ Mpóʼo nyé, gúmó kûm nyé dí yɨ́.

¹³ Sá tɨ̂ʼ ó bɨ́h dí edwě Nzyɛ̌m nzyǒo ɨ́ bijɔʼ bíbyɛ̂h yɨ́, ebě, ɨ́ jɔʼ bɨ́h á lɛ́ɛ bɨ̌n lɔ́ɔ́ wé yɨ́, bɨ̌n bé á si bûʼla wê. Bɨ̌n bé á bé anʉa wé mpʉ̌ lɔ́ɔ́ dí eduho ɨ́ num mʉ̂r bipúno wɨ́. Bɨ̌n bé á kʉ nʉa wé ó, mpʉ̌ lɔ́ɔ́ mé Nzyɛ̌m lɨ́ otyeetye. Lɔ́ɔ́ mé Nzyɛ̌m waá, wé lɨ́ eséa ɨ́ bɨ̌n obûʼla.

¹⁴ Bɨ́ɔɔ́ bâm! Okɛ́l bâm! Bʉr ó Mbɛ̌r-Nzyɛ̌m dí ɨ́ sí Yʉ́da bá, bé á si bee mitúú. Bɨ̌n ntémé mû ó lɨ́ esia e mitúú mímpwár myaá. Bɨ̌n le onɔ́ɔ́ mû ó lɨ́ ekʉ́ nwɨɨla ɨ́ pâʼ waá, ebě, bʉr ó kúl bʉ̂r yɨ́n, bɨ́ tíble bɨ́n mpʉ óYúden dí eboó titíble bɨ́ɔɔ́ bɔ́ɔ́ bé á bûʼla Yésʉs bá.

¹⁵ OYúden baá, bé á si jʉ̂ Tî Yésʉs. Bé ó b'á nyɛɛ jʉjʉ̂ ogwíha o mílɔ̌b mé Nzyɛ̌m. Bé ntémé ó b'á so bɨ̌h ɨ́ sí yɔ́ɔ́. Bé ó bʉr ó Nzyɛ̌m dí ekpaa ébúʼ e bé bá. Bé lwímlá ó e bʉr bɨ́bɛ̂h.

¹⁶ Mpʉ bɨ́h dí ekpɛl étô le elɛ́ɛ bíkúl bíswîh mpʉ̌ Nzyɛ̌m dí e nkul etíʼ bé yɨ́, oYúden bɨ́ɛ, bé lɨ́ ebene, ndu e l'ekamle bɨ́h lɨ́ esâ nó. Ɨ́ syɛ́ɛla yaá, bé mû ó sí lóŋlo bísyɛ́ɛla bí ébébe byɔ́ɔ́. Sá tɨ̂ʼ ó Nzyɛ̌m á ka lɛ̂ʼle nkpaa nyé ɨ́ páʼ wɔ́ɔ́ yɨ́.

Syɛ́ɛ́ mé Timotɛ̂ ɨ́ Tesaloníka

¹⁷ Bɨ́ɔɔ́ bâm! Okɛ́l bâm! Jɔʼ mɨ́ná bé á bɔ́ʼa gá, akǎ beela mémpǒm yɨ́, gʉ́ŋáá gá ó, yé á bé abe e mpɔ́ʼá miléme. Bɨ̌h bé á si bu gwɨ̂m ebee bɨ́n. Miléme, myé á be bɨ̌h ɨ́ báná báná ó, bɨ̌h báʼa pyâl kwá nyɨ́n.

¹⁸ Bɨ̌h bé á si bu gwɨ̂m nó. Mɛm Pɔ̂l á si sâ nó, bijɔʼ bijɔʼ, abánabana, ebě, Sátan á be lɨ́ ekamle bɨ́h lɨ́ etô gʉ̂.

¹⁹ Onzé dí egbâ bɨ́h mpûʼla ɨ́ miléme? Bisʉhʉʉ bɨ́h dí esoho bî, byé duhó le onzé? Ɨ́ jɔʼ Tî gá wɨ́ná Yésʉs ónze yɨ́, yáǎ syɛ́ɛ́ bɨ́h ngá lɛ̂ʼle nyé, lɨ́ esú ó, nye bórɨɨ bɨ̌h káráá dúu ɛ̌? Bɨ̌n ó ngá sâ ó, bɨ̌h nʉ́aa kûm ɨ́ jɔʼ yaá.

²⁰ Bɨ̌h kʉ́ nkʉ́na le emɛɛla ó ɨ́ lɔ̌b wɨ́n.