1 Tesalonika 1 - Kálar Nzyɛ̌m : Ejwán é Sáá

Meswɨhlɨ

¹ Yé ó mɛm Pɔ̂l ó dí ecɛma bɨ́n mekaná mâ, bɨ̌h e Silâs ndu e Timotɛ̂. Bɨ̌h cɛmá ó, bʉr ó Mbɛ̌r-Nzyɛ̌m o dí Tesaloníka, baá o dí egúmo e Nzyɛ̌m Sɔ́ŋ ndu e Tî Yésʉs-Krîst bá. Metyɛʼ me mpóm le mepyɛbla, mé díʼee e bɨ̌n.

Búʼó yɨ́n, kpɛ̌l yɨ́n, ndu e bicwiʼ bín

² Bɨ̌h bé lɨ́ edwě Nzyɛ̌m nzyǒo ɨ́ bijɔʼ bíbyɛ̂h ɨ́ lɔ̌b wɨ́n, jɔʼ bɨ́h dí ejɨʼla e né yɨ́.

³ Ɨ́ minjɨʼla bɨ́h dí ejɨʼla e waá dí Nzyɛ̌m gá wɨ́ná, waá dí ntémé Sɔ́ŋ gá wɨ́ná nyá mí, bɨ̌h bé lɨ́ esímsǎ syɛ́ɛ́ bɨ́n á séa ɨ́ lɔ̌b búʼó yɨ́n yɨ́. Yé á be ó, ɨ́ kpɛ̌l bɨ́n dí ekpɛ̌l Nzyɛ̌m yɨ́. Bɨ̌h símsá ntémé ó, mitúú bɨ́n á sia e myé ɨ́ nzɨ̌ mpûʼla Tî Yésʉs-Krîst á gbâ bɨ̌n ɨ́ miléme nyɨ́ mí. Bɨ̌h sá nó ó, ɨ́ mpǒm mé Nzyɛ̌m gá wɨ́ná, dí Sɔ́ŋ gá wɨ́ná nyá.

⁴ Bɨ́ɔɔ́ bâm! Okɛ́l bâm! Bʉr ó Nzyɛ̌m dí ekpɛl bá! Bɨ̌h bé lɨ́ egʉ́a ó, nyɨ́ twâr bɨ́n, ó bɨ̌n díʼee bʉr bé.

⁵ Ebě, ɨ́ jɔʼ bɨ́h á lɛ́ɛ bɨ̌n Mbɨambɨa Lɔ́ɔ́ mé Krîst yɨ́, bɨ̌n bé á bé anʉǎ lɔ́ɔ waá le epɨ̂h. Yé ó, ebě, ɨ́ jɔʼ yaá, Nzyɛ̌m á si lɛ̂ʼle bɨ̌n nkǔl nɨ́nɨ́ɨ́ nyé tɨ̂. Sísǐm wé, wé á si sulo ntémé ɨ́ bɨ̌n. Bɨ̌n bé á nze ka gʉ́a ɨ́ jɔʼ yaá ó, lɔ́ɔ waá, wé á kʉ be ó, tyeetye. Bɨ̌n bé lɨ́ egʉ́a ntémé mpʉ mɨ́ná bé á bɨbe gá yɨ́. Bɨ̌h bé á títíʼe nó ó, lɨ́ esú lé édi bɨ́n e nyɔm.

⁶ Bɨ̌n ntɔ̂ʼ dû kʉ̌ tyen wɨ́h e boo Tî Yésʉs. Bɨ̌h bé á si bee bɨ̌n lɨ́ ebúʼlǎ Mbɨambɨa Lɔ́ɔ, damá jóʼo ɨ́ mitúú bɨ́n á sia e myé mí. Ɨ́ mitúú tʉ́ŋlʉ̌, bɨ̌n bé á si lóno ɨ́ bisʉhʉʉ̌ Sísǐm mé Nzyɛ̌m wé á ntɨh bɨ̌n bí.

⁷ Nó ó mpʉ bɨ́n á tíʼe nó yɨ́, obûʼla bɨ́bɛ̂h dí ɨ́ sí Masedónia ndu e yaá Akayɨ̂ bá, bé mû ó lɨ́ egwɨ̂m ó, bicwiʼ byɔ́ɔ́, byé nwɨ́ɨlaa e byaá bín.

⁸ Lɔ́ɔ́ dí edumo e Tî Yésʉs wɨ́, wé á myaŋla ó e bɨ̌n, bʉr o dí ebúʼlǎ Nzyɛ̌m bá. Ɨ́ bigúmó bíbyɛ̂h, bʉr, bé mû ó lɨ́ ejóʼo nó. Lɔ́ɔ́ dí edumo e búʼó yɨ́n wɨ́, wé á bé aswîʼ ɨ́ sí Masedónia, nkʉ̂ ɨ́ yaá Akayɨ̂. Bɨ̌h bé akǎ báʼǎ nʉǎ túú lɨ́ elɛ́ɛ bʉ̂r yʉ́ʉ́ sɔ̂ʼ dí edumo e syɛ́ɛla yɨ́n yɨ́.

⁹ Bé bʉr o tɨ̂ʼ ó dí elɛ́ɛ bɨ́h mpʉ bɨ́n á soho bɨ̌h yɨ́, le mpʉ bɨ́n á túmo koo e bikpɛʼkpɛ̂ʼ bí ónzyɛ̌m, kǎ jaá dû njɨ̌ Nzyɛ̌m yɨ́. Bɨ̌n mû ó lɨ́ eséa e mpǎŋ Nzyɛ̌m dí kublakúbla nyá.

¹⁰ Bé lɨ́lɛ́ɛ́ ntémé ó, bɨ̌n mû ó lɨ́ ebóno Mwân mé Nzyɛ̌m ngá duho ɨ́ jʉ́o kʉ́ nyá. Nye ó waá Nzyɛ̌m á pɛh, dwih lɨ́ odwe nyá. Yésʉs waá ó b'á tíʼ mɨná gâ, lɨ́ esâ ó Nzyɛ̌m sá alɛ̂ʼle mɨ́ná gá nkpaa nyé ɨ́ móhó nyé ótíʼe mílɔ̌b wɨ́. Móhó waá, wé mû ó kúno epyâl.