1 Pyɛr 5 - Kálar Nzyɛ̌m : Ejwán é Sáá

Baʼlaa gá daa e bínteme mé Nzyɛ̌m

¹ Me ó lɨ́ sɔ́má ótyɛ̂b bé ésôʼ ɨ́ Mbɛ̌r-Nzyɛ̌m. Me ntémé, me ó mboʼlo á bee mitúú mé Krîst nyá. Me ntémé, me ó mʉr ngá bi nkɔ̂b líʼe ɨ́ mentyɛnwa múo nzě nyɨ̂n ɨ́ kpɛŋlɛm má nyá. Mě cɛmá ɨ́ báánâʼ ó, bʉ́ʉ́ ótyɛ̂b bé ésôʼ ɨ́ Mbɛ̌r-Nzyɛ̌m bɨ́bɛ̂h, lɨ́ epihle bɨ́n egwǎl ó:

² Baʼlaa gá daa e bínteme mé Nzyɛ̌m nyé á tímle bɨ̌n lɨ́. Kʉ́ gwá pála gá Mbɛ̌r-Nzyɛ̌m, abe yɨ́ɛ mpʉ̌ sá lɛ́ɛ́, bɨ̌n bé ó lɨ́ bi ó, bɨ̌n séaa syɛ́ɛ́ yaá. Kamaa gá syɛ́ɛ́ mpɔ̂ʼlʉ yɨ́n ɨ́ lɔ̌b gwɨ́má mílémé mín. Séáá gá nó e jwɨʼ ó, bɨ̌n séá ó Nzyɛ̌m syɛ́ɛ́. Mʉ̌r sá abaʼlě Mbɛ̌r-Nzyɛ̌m lɨ́ esú lé élóŋlo bígwɨ́má bímɔnɨ́ ɨ́ menzɨ̌ me dí onzyɛ́h ónzyɛ́h má. Nye sâʼ nó ɨ́ gwɨ́má lémé wé.

³ Ayɨ́ jwɨ́ɨ gá e bʉr o b'á tímlɔɔ bɨ̌n bá e cére. Tɨ́áá gá bé kʉ̌ tyen bé jálá le edû wɨ́.

⁴ Ɨ́ jɔʼ «Mbɔ̂ʼlʉ bintemě nɨ́nɨ́ɨ́» ngá báʼǎ nze yɨ́, nye ótoŋlo bɨ́n ɨ́ syɛ́ɛ́ yɨ́n yaá, lɨ́ ebôr bɨ́n bikáráá bi dí ɨ́ buo kûm bí. Byé ódidi ɨ́ ntyɛ̌n ntɨ̂ ntyɛ̌n ó, mentyɛnwa me tɨ̂ʼ adímedime, tó kumo ɨ́ twǐʼ njʉ̌m dǐ.

Dyɛ́ʼwáá gá e Nzyɛ̌m

⁵ Bɨ̌n biloʼo, yé jala ó, bɨ̌n díʼee ɨ́ jwɨ́ɨ́ ótɔ́má ó bʉ̂r. Bɨ̌n bɨ́bɛ̂h, jɔrɨɨ gá menyʉ́l mɨ́n páʼ nyɨ́n. Diʼee gá bʉr o dí ɨ́ talǎ njwɨr bá, ebě, yê cɛmá ó: «Nzyɛ̌m, nye lɨ́ elwímla e bʉr o dí enkɛ́ɛ ményʉ́l mɔ́ɔ́ bá. Baá dí ɨ́ talǎ njwɨr bá bɨɛ, nye lɨ́ esʉ bé metyɛʼ me mpóm.»

⁶ Jɔrɨɨ gá menyʉ̂l e Nzyɛ̌m. Nyě jwɨ́ɨ́ bʉ̂r ó sí yɨ̂ʼ ó e nkul ɨ́ buo buo. Bɨ́n jɔ́r ményʉ̂l e né nó, nyé ogbɛl bɨ́n sí ɨ́ jɔʼ nyé á pa boo tíʼe ó, nye ótíʼ bɨ́n yɨ́.

⁷ Kɛlɨɨ gá mimbeʼ bísá bíbyɛ̂h dí epálwo bɨ́n ɨ́ miléme bí ɨ́ koo mé Yésʉs, ebě, nye lɨ́ ekʉ́ buú jʉ̂ʼra mílɔ̌b mín, le enʉa myé, gbâ ɨ́ nkɔb.

⁸ Máráá gá miléme. Diʼee gá ɨ́ doho. Ntɨ̂m e mbɨn wɨ́n, sɔ́ŋ meleme, nye lɨ́ elie bɨ́n ɨ́ mipáʼ mímyɛ̂h mpʉ̌ ngbampɨɨ dí emwóolo wɨ́. Nyě sáá ó, ede mʉ̂r.

⁹ Dyɛ́ʼwáá gá e Nzyɛ̌m. Lwímláá gá e Sátan. Bɨ̌n e gʉ́á ó, bɨ́ɔɔ́ gá bɨ́ná dí ɨ́ sí yɨ̂ʼ yɨ́yɛ̂h bá, bé lɨ́ edûhwǒ mbǐ túú ngwár waá.

¹⁰ Nzyɛ̌m ó dí mʉr dí elɛ̂ʼle mɨ́ná gá mpam ɨ́ bijɔʼ bíbyɛ̂h nyá. Nye ntémé ó b'á jébe mɨná gá ó, mɨná tô di gá ɨ́ mentyɛnwa mé ɨ́ nzɨ̌ mé Yésʉs-Krîst. Mentyɛnwa maá, mé ódi ó, njʉ̌m dǐ e njʉ̌m dǐ. Bɨ́n óbe, sí sia e mitúú, tâŋ bá mâ jɔʼ nó, Nzyɛ̌m, nyé obáʼǎ komlo bɨ́n, pɨr bɨ́n mekʉ̌ sí ɨ́ sɨ́ŋ. Nyé obáʼǎ gbâ bɨ́n nkul ɨ́ menyʉ̂l, sumo bɨ́n sí ɨ́ píʼi.

¹¹ Nkul ti e jwɨ́ɨ, byé dwéŋɔɔ nye njʉ̌m dǐ e njʉ̌m dǐ. Amɛn.

¹² Bɨ̌h e Silâs ó dí ecɛma bɨ́n bwá mékaná mâ. Mɛ̌m bee ó, nye me ó mʉr ebúʼlɔɔ. Mě cɛmá bɨ́n ó e gwɨ́má égbâ bɨ́n nkul ɨ́ miléme. Mě boʼlo ntémé ó, mpam bɨ́n mû lɨ́ ebi ɨ́ nzɨ̌ mé Yésʉs nyɨ́, nye ó mpam mpâ mé Nzyɛ̌m.

¹³ Mbɛ̌r-Nzyɛ̌m dí ɨ́ Babilɔ̂n, waá Nzyɛ̌m á twâr mpʉ nyé á pa twâr bɨ̌n yɨ́ wɨ́, wé lɨ́ esoho bɨ́n bɨ́bɛ̂h. Mwân wǎm, Marc, nye lɨ́ esoho bɨ́n.

¹⁴ Bɨ́báráá gá páʼ nyɨ́n le edwíila mémúʼ, ɨ́ kpɛ̌l bɨ́ɔɔ́ e bɨ́ɔɔ́ tʉ́ŋlʉ̌. Mepyɛbla, mé díʼee e bɨ̌n óbɛ̂h ɨ́ miléme, bɨ̌n, bʉr o dí ɨ́ mpúhlá e Yésʉs-Krîst bá.