1 Pyɛr 3 - Kálar Nzyɛ̌m : Ejwán é Sáá

Twiʼ ébâ

¹ Ɨ́ jwɨʼ gwár yaá, bɨ̌n bʉbá, sáʼ gá ojʉ́m bɨ́n mejóʼo. Nyʉ́ʉ́ mʉ̂r ngwár ɨ́ sɔ́má ójʉ́m bɨ́n béné ébûʼla mílɔ̌b mé Nzyɛ̌m nó, nye óbɛ̌m kǎ bûʼla yɨ́ɛ ó, ɨ́ lɔ̌b kʉ̌ tyen mʉ́má wé dí edû wɨ́. Yé ajɨ ɨ́ páʼ mʉ́má ó, nye lɛ́yɨɨ njʉ̂m lʉ́ʉ́ ékǎn eswîh.

² Ebě, ojʉ́m bɨ́n, bé óbeě mpʉ bɨ́n dí ejóʼǒ Nzyɛ̌m bʉ́á, le edû kʉ̌ tyen dí e medile wɨ́ yɨ́.

³ Ojaá wɨ́n, wé ayɨ́ duho ɨ́ mimbi bísâ bi dí egbáŋɔɔ ɨ́ nyʉ̂l kʉ̌l bí. Ojaá wɨ́n, wé ajala le ebě njɨ ɨ́ pená bɨ́n dí epɨpene mísíné wɨ́, nkʉ̂ ɨ́ mbwárá bɨ́n dí ebwâr mékɔ́m mé gʉ̂l wɨ́, nkʉ̂ ɨ́ mbi bɨ́n dí ebwâr mímbôr mi dí le onɔ̂m mí wɨ́.

⁴ Ojaá wɨ́n, wé ɨ́ jala le ebe ó, waá o tʉ́ŋlʉ̌, mbi ójaa dí abe e nkul ekúrwo wɨ́. Lémé wɨ́n díʼee ɨ́ tala tala, ɨ́ pyɛɛɛ. Mbi ójaá waá ó dí ɨ́ buo ódimé ɨ́ míh mé Nzyɛ̌m.

⁵ Ɨ́ mimbú mí píhe, bʉbá bé á be tí ɨ́ míh mé Nzyɛ̌m bá, bé á si bi mpûʼla ɨ́ miléme ɨ́ páʼ mé Nzyɛ̌m, bé ntɔ̂ʼ sáa égbâ ójaá ompâ waá ɨ́ menyʉ́l mɔ́ɔ́ tʉ́ŋlʉ̌. Bé á sɨsâ ojʉ́m bɔ́ɔ́ ó, mejóʼo.

⁶ Diʼee gá mpʉ̌ Sara. Nye á si sâ Abraham mejóʼo, le ejɨjébe nyé ó: «Dâ ɛ̌!» Nó ó, diʼee gá mpʉ mísile mé Sara, lɨ́ esâ émbɨa, le epɛʼ bʉ́á ɨ́ milémé mín.

⁷ Ɨ́ jwɨʼ gwár yaá, bɨ̌n bɨɛ ojʉ̂m, diʼee gá mbɨ̂mbɨá, bɨ̌n e bʉbá bɨ́n. Bɨ̌n e gʉ́á ó, le mʉmá, le mʉrʉ̂m, mʉmá ó dí ɨ́ tyɛʼ, laa mʉ́rʉ̂m. Dwéʼ gá bé dúu, ebě, bɨ́ɛ ntémé óbi émbɨǎ Nzyɛ̌m á kɛʼ baá nyé á tíʼ bá lɨ́. Lé ó dí nkɔb líʼe nyɔ́ɔ́. Bɨ́n óbe, atíʼe nó wá, yé óbɛ̌m kɔbla bɨ́n ɨ́ jɔʼ bɨ́n dí ejɨʼla e Nzyɛ̌m yɨ́.

Esia e mítúú ɨ́ lɔ̌b syɛ́ɛla dí tîtyěl yɨ́

⁸ Lʉ́ ékǎn ɨ́ mekaná mâʼ lɨ́ esú é bɨ́n óbɛ̂h, wé ó: diʼee gá e mbǐ pahlá ngwár. Jóʼáá gá mebúʼ mémpwár. Kpɛlaa gá páʼ nyɨ́n kpɛ̌l dí páʼ bɨ́ɔɔ́ e bɨ́ɔɔ́ yɨ́. Lɛ́ʼláá gá kpɛ̌l dí eduho ɨ́ lémé tʉ́ŋlʉ̌ yɨ́. Jɔrɨɨ gá menyʉ́l mɨ́n páʼ nyɨ́n.

⁹ Mʉ̌r sá abɔlǎ syɛ́ɛla ébébe le ebébe. Mʉ̌r sá abɔla mélwɨ́ɨ́ e melwɨ́ɨ. Yé jala yɨ́ɛ ó, bɨ̌n yálaa baányâ-melwɨ́ɨ ó, lɨ́ esyɛɛ bé metyéelé, ebě, Nzyɛ̌m á jébe bɨ̌n ó, bɨ̌n sâʼ nó. Bɨ̌n bé onʉa métyɛʼ me mpóm mé Nzyɛ̌m mpʉ nkɔ̂b líʼe nyɨ́n.

¹⁰ Ebě, yê cɛmá ó: «Mʉr nyɨnyɛ̂h dí egwɨ̂m étíʼě mbɨ̂mbɨá le egwɨ̂m ébee mélú mé émbɨa nyá, nyě sá alɛ́ɛ̌ sá dí ɨ́ bébe yɨ́. Nye gwáʼaa elɛ́ɛ bísá míkóo.

¹¹ Nye túmaa koo le ebébe. Nye sɨ̂saʼ njɨ embɨa. Nye tôʼ le egbâ mépyɛbla páʼ bʉ̂r e bʉr. Nye dúʼoo nzɨ̌ dí e mepyɛbla nyɨ́.

¹² Ebě, míh mé Dâ Nzyɛ̌m, mé dwɛ́ʼ ó, otîtyěl o bʉ̂r. Nyě jóʼló ó, minjɨʼla myɔ́ɔ́. Nyě pěm ó, bʉr bɨ́bɛ̂h o dí esâ ébébe bá.»

¹³ Nzé ósâ bɨ́n ebébe ɨ́ jɔʼ mílémé mín mû ɨ́ báná báná ó, bɨ̌n sâʼ embɨa yɨ́ ɛ́?

¹⁴ Bɨ́n ósia yɨ́ɛ e mitúú ebe bɨ́n dí edû bísyɛ́ɛla bí ótîtyěl nó, go ó, Nzyɛ̌m ósʉ bɨ́n metyɛʼ me mpóm tɨ̂. Ajóʼo gá bʉ́á páʼ bʉ̂r. Milémé mín sá akoro bɨ́n tɨ̂.

¹⁵ Díʼéé gá e tiŋé ɨ́ miléme ó, bɨ̌n bé ódwě Krîst kûm, ebe nyé dí Tî wɨ́n yɨ́. Diʼee gá ntémé ɨ́ cǎr ó, bɨ̌n gwâ yala mʉ̂r nyɨnyɛ̂h ngá dî bɨ́n tíá, dumo e sá dí egbâ bɨ́n mpûʼla ɨ́ léme yɨ́.

¹⁶ Sáʼ gá nó e njwɨr ɨ́ tala tala, ndu e bʉ́á. Mipahlá mílémé mín, myé díʼee njɨ myaá mi dí ɨ́ pyɛɛɛ mí. Bɨ́n dú mbɨambɨa kʉ̌ tyen ɨ́ Krîst, bʉ̂r kǎ swêʼ bɨ́n míe náǎ tɨ̂ʼ nɛ́ɛ: bé ósûʼlǎ kǎ jóʼo sôn, ebe bé dí bʉr o mélwɨ́ɨ.

¹⁷ Nzyɛ̌m óbě sí tíʼe ɨ́ lémé wé ó, nyě dwé ó go túú nó, yé mbɨa ɨ́ páʼ gô ó, go síaa e túú waá, duho ɨ́ bisyɛ́ɛla bimpâ byô, laa ó, go síaa e túú duho ɨ́ syóm gô pa sá wɨ́.

¹⁸ Ebě, Krîst mʉr tɨ̂ʼ á si dwe jɔʼ gwár lɨ́ esú é bíjɔʼ bíbyɛ̂h ɨ́ lɔ̌b bísyɛ́ɛla bí ébébe bín. Nyɨɛ tîtyěl mʉr á búra ó, le onzyɛ́h ó bʉ̂r, lɨ́ esâ ó, nye tôʼ e bɨ̌n nkǒ Nzyɛ̌m dí yɨ́. Bʉr bé á si jʉ̂ nye ɨ́ nkǒ páʼ bípúno. Nzyɛ̌m nyɨɛ nzě sâ ó, nye bíʼee nkul ɨ́ nkǒ páʼ Sísǐm wé.

¹⁹ Ɨ́ Sísǐm waá ó nyé á nze to túno Mbɨambɨa Lɔ́ɔ kwá misísǐm myé á be mikómó mí.

²⁰ Bé á nyɛɛ be ó, asâ Nzyɛ̌m mejóʼo ɨ́ melú mé épíhe. Ɨ́ jɔʼ yaá, Nzyɛ̌m á bʉbóno ó e bíhwó, tó pyâl ɨ́ jɔ̌ʼ Nóe á sil ekpaʼ byɛ̂l yɨ́. Ɨ́ jɔʼ yaá, yé á jaa be ó njɨ mâ dœ́h é bʉ̂r, apʉgʉ́ buo, njɨ bʉr mwom, ó b'á tíʼe ɨ́ byɛ̂l waá tʉ́ŋlʉ̌. Bé á tíʼɔɔ ó, ɨ́ medíbé.

²¹ Medíbé maá, mé mveʼle ó, ndubó dí etíʼ bɨ́n ɨ́ báánâʼ wɨ́. Ndubó gá wɨ́ná, wé atíʼ mɨ́ná gâ ɨ́ lɔ̌b wé dí epɛʼ mɨ́ná gá mebomo. Wé tíʼ mɨ́ná gá ó, ebe wé dí gwɨ́má yɨ́ná ó, Nzyɛ̌m púbaa mɨná gâ, tó kumo ɨ́ milémé gá míná tʉ́ŋlʉ̌, ó mipahlá mi tɨ̂ʼ nkʉ̂ di ɨ́ pyɛɛɛ. Wé pubo mɨ́ná gá miléme myaá ó, ɨ́ nzɨ̌ pahá sóo mé Yésʉs-Krîst.

²² Yésʉs waá á si bɨ́nɔɔ ɨ́ jʉ́o kʉ́. Nye mû ó lɨ́ mbó éjʉ́m mé Nzyɛ̌m Sɔ́ŋ, gúmó nyé dí ejwɨ́ɨ bééngeles, le misísǐm mi dí e jwɨ́ɨ le myaá mi dí e nkul mí yɨ́. Byé á si gbáŋɔɔ ɨ́ jwɨ́ɨ́ yé.