1 Pyɛr 2 - Kálar Nzyɛ̌m : Ejwán é Sáá

Kublakúbla ékóʼ ti e mpóʼo bʉr o dí tí bá

¹ Myahaa gá bé bisyɛ́ɛla bîʼ bíbyɛ̂h: ebébe é léme, mimbi mímyɛ̂h, bilwǐb míkóo, mimbi mímyɛ̂h, bilwǐb bíbá bíbá, nzwíí ti e mesyɛ́ɛla mimbi mímyɛ̂h.

² Gwɨ́mɨ́ɨ́ gá mbɨambɨa lɛ́ʼlá dí abe mpúhlá e mebomo, waá dí ejala e misísǐm mín wɨ́. Wé ó ngá sâ ó, bɨ̌n gwɨ́aa, ntɔ̂ʼ tó kumo ɨ́ twǐʼ njʉ̌m dǐ. Gwɨ́mɨ́ɨ́ gá yé mpʉ bítyéé dí egwɨ̂m ébêl, ó byé nkʉ̂ dwaʼ le egwɨ́e yɨ́.

³ Ebě, bɨ̌n bɨ́ gʉ́ǎ Dâ Nzyɛ̌m, gʉ́a ntémé ó, nye ɨ́ mbɨa.

⁴ Síhláá gá bé bǎʼ e Tî Yésʉs. Nye ó ekóʼ e dí kublakúbla, laá bʉ̂r, bé á bene lɨ́. Nzyɛ̌m nyɨɛ á si pɛ̂h lé, bee lé le odimé.

⁵ Kamaa gá ó, Nzyɛ̌m súmaa mbɛ̌r Sísǐm wé ngá di tɨ̂ʼ wɨ́. Diʼee gá mekóʼ me dí kublakúbla má, maá ngá kɛlɔɔ tɨ̂ʼ ɨ́ nzumó nyaá má. Bɨ̌n bé ósûʼla bʉ̂r o dí tí, baá o dí ɨ́ sɔ́má ópara bé bá. Mindwéá bɨ́n ngá dwidwě Nzyɛ̌m e nzɨ̌ Sísǐm wé mí, Nzyɛ̌m óbee myé mbɨ̂mbɨá ó, lɨ́ esú mé Yésʉs-Krîst.

⁶ Ebě, yê cɛmá ɨ́ Mekaná mé Nzyɛ̌m ó: «Me á si pɛ̂h ekóʼ e dí ɨ́ buo ódimé lɨ́. Lé ó mê komó báánâ mpʉ ékóʼ e dí esúʼo nkân mbɛ̌r lɨ́. Waá nyɨnyɛ̂h ódyɛ̂ʼwo e lé nyá, ákóʼó kǎ soŋɔɔ.»

⁷ Ekóʼ laá, lé ɨ́ buo ódimé ɨ́ mbeá wɨ́n, bɨ̌n bʉr o b'á dyɛ̂ʼwo e lé bá. Sâ gwár, bʉr o dí ebene édyɛ̂ʼwo e lé bá, bɨ́ɛ bee lé ó mpʉ «Ékóʼ óswim ó mbɛ̌r bé á bene lɨ́. Lé ó b'á ka sûʼla ekóʼ e dí esúʼo nkân mbɛ̌r lɨ́.»

⁸ Mekaná mé Nzyɛ̌m, mé lɨ́ elɛ́ɛ, dumo e Krîst ó: «Ekóʼ lé écwehle bʉ̂r, lé ó ebɔ̌ʼ ngá bɨma bʉ̂r ó, bé twêʼ ɨ́ nkɨ́ŋlɨ́m lɨ́.» Bé jaá twitwe ó, njɨ nko bé dí abûʼlǎ lɔ́ɔ́ mé Nzyɛ̌m yɨ́. Nkɔ̌b Nzyɛ̌m á boo dwe bé nyɨ́ ó tɨ̂ʼ nyɨ́.

⁹ Sâ gwár, bɨ̌n bɨɛ bé ó mpóʼǒ Nzyɛ̌m á boo twâr nyɨ́. Nye á twâr bɨ̌n ó, bɨ̌n séaa nye syɛ́ɛ ópara, le edǐ kúl bʉ̂r dí tí ɨ́ míh mé yɨ́. Bɨ̌n bé ó sá mé Nzyɛ̌m, ánta nye, lɨ́ esú ó, bɨ̌n gúmlaa mʉr á jébe bɨ̌n nyá. Njɨ́blɨ́ wé waá, wé ó b'á pɛʼ bɨ̌n lɨ́ edúrʉ́ʉ́, tyen bɨ́n ɨ́ myɛ́n dí ɨ́ ntyɛ̌n ntɨ̂ ntyɛ̌n yɨ́.

¹⁰ Ɨ́ mimbú mí píhe, bɨ̌n bé á bé abě kúl bʉ̂r mé Nzyɛ̌m. Nó ó, ɨ́ báánâ, bɨ̌n mû ó kúl bʉ̂r dí egúmo e nye yɨ́. Ɨ́ mimbú mí píhe, abe e mʉr á jɨ̂ʼ bɨ̌n nkoó. Nó ó, ɨ́ báánâ, Nzyɛ̌m, nyɨ́ kʉ́ jɨ̂ʼ bɨ́n nkoó.

Dúʼóó gá kʉ̌ tyěn jálá le osyɛ̂l o mésâ mé Nzyɛ̌m wɨ́

¹¹ Mě jɨʼlá e bɨ̌n, osó bâm ó, bɨ̌n díʼee mpʉ̌ sá lɛ́ɛ́, bɨ̌n bé ó milaa-nkpǎʼ, nkʉ̂ mpʉ ójwóo dí ɨ́ mesí mé sí yɨ̂ʼ bá. Ɨ́ nzɨ̌ nyaá ó bɨ́n ngá tí bísá bʉ̂r ó sí yɨ̂ʼ dí egwɨ̂m bí yɨ́. Bisâ byaá ó dí elwímla e misísǐm mín.

¹² Diʼee gá e kʉ̌ tyen mpâ témé ohááden. Bé damá swêʼ bɨ́n, nkʉ̂ lɛ́ɛ ó, bɨ̌n bé ɨ́ bébe, bé óbánǎ bee bísyɛ́ɛla bimpâ bɨ́n dí esâ bí, ntɔ̂ʼ dwě Nzyɛ̌m kûm tɨ̂ʼ ɨ́ móhó nyé ónze mɨ́ná gá ɨ́ menɔɔlʉ wɨ́.

¹³ Sáʼ gá otyɛ̂b bé ésôʼ o dí etyélɔɔ bá mejóʼo, ɨ́ lɔ̌b mé Tî Yésʉs. Sáʼ gá njwɨ́ɨ sí yɨ́n mejóʼo, ebě, nye ó dí lʉ́ ótyɛ̂b bé ésôʼ bɨ́bɛ̂h.

¹⁴ Sáʼ gá ntémé mingóvina nyé ólómlo bɨ́n mí mejóʼo. Myé ó dí bʉr o jálá le edwe bíbɨ́bla bi bʉ̂r bíbyɛ̂h bintɨ́ʼá mí. Myé ntémé ó ngá sêʼle bʉ̂r o dí esâ émbɨa bá.

¹⁵ Sá Nzyɛ̌m dí egwɨ̂m ɨ́ wɨ́n pâʼ yɨ́, yé ó: bɨ̌n sâʼ bisyɛ́ɛla bimpâ, bɨ̌n díblaa bigʉʼlʉgʉ́ minum, byé l'akǎ lwǐb sá dí asiŋa ɨ́ lɔ̌b wɨ́n yɨ́.

¹⁶ Dúʼóó gá kʉ̌ tyen mpâ ónzyɛh o bʉ̂r jálá le edû wɨ́. Bɨ̌n damá be ónzyɛh o bʉ̂r, sâ gwár, asâ gá ebébe ɨ́ lɔ̌b dǐ bɨ́n dí tɨ̂ʼ yɨ́. Dǐ yaá, yé ajala le esûʼlǎ sá bɨ́n búbló ébébe é léme lɨ́n e tɨ̂ʼ yɨ́. Tiʼaa gá mpʉ bítúʼǎ bi dí egúmo e Nzyɛ̌m bí.

¹⁷ Dwéʼ gá bʉr bɨ́bɛ̂h dúu. Kpɛlɨɨ gá bɨ́ɔɔ́ gá bɨ́ná. Jwááwáá gá Nzyɛ̌m. Dwéʼ gá njwɨ́ɨ sí yɨ́n dúu.

¹⁸ Bitúʼǎ, sáʼ gá ojwɨ́ɨ́ bɨ́n mejóʼo, e dúú yɨ́yɛ̂h. Bɨ̌n bé ɨ́ jala le edwáawo ójwɨ́ɨ bɨ́bɛ̂h, abě njɨ baá o dí ɨ́ talǎ njwɨr bá. Jwááwáá gá ntémé ojwɨ́ɨ dí esâ bɨ́n cére bá.

¹⁹ Bé dwé mʉ̂r mebě me mpéne, ntɔ̂ʼ dwe mʉ̂r waá bintɨ́ʼá tɨ̂ʼ nɛ́ɛ: mʉ̂r waá ódûhwo bíntɨ́ʼá byaá ɨ́ lɔ̌b lémé wé dí edwáawǒ Nzyɛ̌m wɨ́ nó, syɛ́ɛla yaá, yé ɨ́ mbɨa ɨ́ míh mé Nzyɛ̌m.

²⁰ Bɨ́n sá mísyóm, ntɔ̂ʼ dûhwo ébíʼé é tɨ̂ʼ nó, bɨ̌n bé ólîʼ e wáǎ nyɔm tɨ̂ʼ ɨ́ míh mé Nzyɛ̌m? Tó kœb ó, ɨ́ jɔʼ bɨ́n ósâ syɛ́ɛla mpâ, bɨ̌n ntɔ̂ʼ sia e bintɨ́ʼá le bíhwó yɨ́, syɛ́ɛla yaá, yê bɨ̌n ó mpǎŋ syɛ́ɛla ɨ́ míh mé Nzyɛ̌m.

²¹ Nzyɛ̌m á jébe bɨ̌n ó, bɨ̌n sâʼ nye syɛ́ɛla yaá ó, ebě, Krîst mʉr tɨ̂ʼ á si sia e mitúú lɨ́ esú é nyɔm wɨ́n. Ɨ́ tɨ̂ʼ, nye á si lɛ̂ʼle bɨ̌n mveʼle bɨ́n jálá le edû yɨ́. Nye á sâ nó ó, bɨ̌n nkʉ̂ dû mébo mé. Yê cɛmá ɨ́ Mekaná mé Nzyɛ̌m ó:

²² «Nye á bé asâ syóm. Lwǐb míkóo, yé aduho ɨ́ num wé.»

²³ Ɨ́ jɔʼ bé á lwɨlwɨ́ɨ nye yɨ́, nye á bé abɔla mélwɨ́ɨ maá. Ɨ́ jɔʼ nyé á sia e mitúú yɨ́, nye á bé abɛ̂ŋ óntɨ̂m le obɨn bé. Nye á jaa sáa ó, njɨ enʉǎ twiʼ yé, tímlě Nzyɛ̌m, mʉr dí etíʼe mílɔ̌b lɨ́ otîtyěl nyá.

²⁴ Krîst á si bɛb misyóm gá míná, ntɔ̂ʼ dwe e myé ɨ́ kolôs. Nye á sâ nó ó, mɨná nkʉ̂ dwe gá ɨ́ nkǒ páʼ mísyóm, ntɔ̂ʼ tíʼe lɨ́ otîtyěl. Mɨná bé á be gá ó, mimbêl. Mɨná ntɔ̂ʼ kǎ tíʼe gá ɨ́ nkul mepɨ́ɨ́ mé.

²⁵ Ebě, bɨ̌n bé á be ɨ́ melú mé épíhe ó, mpʉ bínteme byé á dîm bí. Nó ɨ́ báánâ, bɨ̌n mû ó sí swîʼ, tó kœb mbɔ̂ʼlʉ wɨ́n. Nye ntémé ó pá di mbɔ̂ʼlʉ misísǐm mín.