1 Pyɛr 1 - Kálar Nzyɛ̌m : Ejwán é Sáá

Meswɨhlɨ

¹ Yé ó mɛm Pétrus, mʉr milʉ́mlʉ́ mé Yésʉs-Krîst ó dí ecɛma bɨ́n mekaná mâ. Mě cɛmá ó, bʉr ó Nzyɛ̌m á twâr, dí etíʼě mpʉ ójwóo ɨ́ sí yɨ́yɛ̂h, mingbɛhá míngbɛhá ɨ́ mesí mé Pɔ́ŋtos, Galásia, Kapadosía, Azía le Bitinî bá.

² Nzyɛ̌m Sɔ́ŋ ó b'á twâr bɨ̌n, bʉr o nyé á boo gʉ́a, kʉ́ e sí dína apǎ bě kuhá bá. Píe jɔʼ nyé á twâr bɨ̌n yɨ́, Sísǐm wé nzě pubo bɨ́n. Nye á pubo bɨ̌n ó, lɨ́ emyɛʼ bɨ́n e metié mé Yésʉs-Krîst, lɨ́ esú ó, bɨ̌n sâʼ nye mejóʼo. Metyɛʼ me mpóm mé Nzyɛ̌m le mepyɛbla mé, mé díʼee e bɨ̌n ɨ́ ntʉʉʉ́.

³ Mɨná gúmlaa gá waá dí Nzyɛ̌m mé Tî gá wɨ́ná Yésʉs-Krîst, waá dí Sɔ́ŋ wé nyá. Nyɨ́ buú jɨ̂ʼ mɨ́ná gá nkoó, ntɔ̂ʼ dwe mɨ́ná gá nkul ebyɛ̂l jɔʼ mbá, lɨ́ esú ó, mɨná díʼee gá lwɨ́ŋlá e mpûʼla ɨ́ miléme. Mpûʼla nyaá, nyě duhó ó, ɨ́ nkul pɛhá nyé á pɛh Yésʉs-Krîst ɨ́ soo wɨ́.

⁴ Nye á byâ mɨná gá jɔʼ mbá ntémé ó, lɨ́ esú lé édwe mɨ́ná gá mepwaʼ me dí komá ɨ́ jʉ́o kʉ́ má, jala e nkɔb líʼe gá nyɨ́ná. Sá dí komá lɨ́ esú gá lɨ́ná yɨ́, yé ábo, atô mébomo, abe e nkul edwɛ̂hla.

⁵ Nzyɛ̌m mû baʼle bícwiʼ bín ó e nkul nyé, ebe bɨ́n dí edyɛ̂ʼwo e né yɨ́. Nyě baʼlé mɨ́ná gá ó, lɨ́ esú lé édwe mɨ́ná gá twǐʼ njʉ̌m dǐ. Twiʼ yaá ó dí ebóno mɨ́ná gá yɨ́. Nye ólɛ̂ʼle bʉ̂r bɨ́bɛ̂h yǎ ó, lɨ́ elú lé ósûʼla lɨ́.

⁶ Bɨ̌n mû ó lɨ́ ekʉ́ buú sohǒ sâ yaá ɨ́ báánâ, damá jóʼo bɨ́n dína lɨ́ elɛŋ bá mâ jɔʼ lɨ́ esia e mitúú e mindɛ̌l, duho ɨ́ mebʉ́blá bé dí ebóblo bɨ́n mimbi mimbi má.

⁷ Ndyɛ́ʼwá bɨ́n dí edyɛ̂ʼwo e Nzyɛ̌m wɨ́, wê bɨ̌n ó, ɨ́ buo ódimé, laǎ gʉ̂l. Gʉ̂l pǎ nyɛɛ́ gbáŋɔɔ ɨ́ duró lé ólûl, ó yé gwâ nyɨ̂n tyeetye ó, yé ó yaá mpâ, yɨ́ɛ yé ó sá dí ó, yé ódîm yɨ́, á dwɛʼra e búʼó gá yɨ́ná! Yé ógbáŋɔɔ ɨ́ duró, bʉr nkʉ̂ gʉ́a bee ó, yé ó búʼó mpâ. Nó bʉ̂r, bé ógúmlǒ Nzyɛ̌m, le edwe nyé kûm ɨ́ jɔ̌ʼ Yésʉs-Krîst óbáʼǎ nze yɨ́.

⁸ Bɨ̌n bé lɨ́ ekpɛl nyé, bɨ̌n l'apǎ bee yɨ́ɛ nye. Bɨ̌n bé lɨ́ edyɛ̂ʼwo e né, damá be ó bɨ̌n dína ó, apǎ bee nyê, nzě pyâl ɨ́ báánâ. Ɨ́ tɨ̂, diʼee gá lwɨ́ŋlá e bisʉhʉʉ. Sohaa gá ɨ́ mbi mʉ̂r dí abe e nkul ejwɨʼ, nkʉ̂ lɛ́ɛ byé wɨ́. Kûm, nyě e bɨ̌n tɨ̂.

⁹ Milémé mín, mí bǐ twǐʼ njʉ̌m dǐ. Twiʼ yaá, yé duho ó, ɨ́ búʼó bɨ́n dí ebúʼlǎ Krîst yɨ́.

¹⁰ Ogwíha o mílɔ̌b mé Nzyɛ̌m, bé á si boo gwîh, lɛ́ɔɔ ó, Nzyɛ̌m ósâ bɨ́n mpam ɨ́ buo buo. Bé á be yɨ́ɛ ó, agʉ́a ménzɨ̌ Nzyɛ̌m á be ó, nye ótíʼ mɨ́ná gá e tɨ̂ʼ má.

¹¹ Bé á be ó lɨ́ egwɨ̂m égʉ́a mʉ̂r Sísǐm mé Krîst á lwilwib, dumo e né nyá, le jɔʼ nyé ótíʼe yɨ́. Tó kœb ó, Sísǐm mé Nzyɛ̌m, wé á boʼlo ó, dumo e mitúú Krîst á jala le esia e myé mí, ti e kûm nyé ókǎ báʼǎ bi píe tɨ̂ʼ nyɨ́. Nye á boʼlo nó ó, bisyɛ́ɛla bi tɨ̂ʼ dína apǎ syɛ́ɛ.

¹² Nzyɛ̌m á lɛ́ɛ le ogwíha o mílɔ̌b baá ó, túnó bé á to le etúno wɨ́, wé á bé abe lɨ́ esú lɔ́ɔ́ bé bʉr o tɨ̂, ó bé gʉ́ŋaa wé ɨ́ pébébé. Bé á tyɛ̂b le túnó ɨ́ jɔʼ yaá ó, lɨ́ esú lɨ́n. Bɨ̌n ó dí edirǎ nyɔm e túnó waá ɨ́ báánâ. Bʉr o b'á to le etúno Mbɨambɨa Lɔ́ɔ waá bá, bé á tutúno wé ó e nkul Sísǐm á duho ɨ́ jʉ́o kʉ́ nyɨ́. Lɔ́ɔ́ bé á lɨlɛ́ɛ bɨ̌n wɨ́, wé ó waá bééngeles dí ɨ́ buú gwɨ̂m ésʉ médwôʼlʉ tɨ̂ʼ wɨ́.

Njɨ́blɨ́ ɨ́ lɔ̌b twiʼ

¹³ Nó, diʼee gá ɨ́ cǎr ó, bɨ̌n sâʼ bisyɛ́ɛla bimpâ. Gwá mâr gá miléme. Mpûʼla, nye díʼee bɨ̌n ɨ́ miléme ó, bɨ̌n bé ódweŋɔɔ̌ mpǎŋ ndwéá ɨ́ jɔ̌ʼ Yésʉs-Krîst óbáʼǎ nyɨ̂n yɨ́.

¹⁴ Mpʉ bɨ́n dí eboó sɨsâ Nzyɛ̌m mejóʼo yɨ́, akǎ dû gá bigwɨ́má bɨ́n á nyɛɛ bɨbe e byé, bɨ̌n dína bigʉʼlʉgʉ́ bí.

¹⁵ Nzyɛ̌m, mʉr á jébe bɨ̌n nyá, nye ó tí. Sá tɨ̂ʼ ó bɨ́n jálá le edi bʉ̂r o dí tí bá, ɨ́ páʼ kʉ̌ tyen wɨ́n yɨ́.

¹⁶ Ebě, yê cɛmá ó: Diʼee gá bʉr bâm dí tí bá, mpʉ mé mʉr tɨ̂ʼ dí tí yɨ́.

¹⁷ Bɨ̌n kɨkɛn díé mé Dâ, mʉr dí etíʼe bʉ̂r milɔ̌b lɨ́ otîtyěl, adwáawo bʉ̂r mempǒm nyá. Nyě títíʼé bé milɔ̌b myɔ́ɔ́ myaá ó, dû mpʉ bísyɛ́ɛla byɔ́ɔ́, byé á be yɨ́. Mpʉ bɨ́n dí ekɛ̌n Dâ Nzyɛ̌m yɨ́, jwɨʼ gwár e gwár yaá ntémé ó bɨ́n jala le elɛ̌ŋ twiʼ yɨ́n yɨ́, lɨ́ edû kʉ̌ tyen dí elɛ̂ʼle ó, bɨ̌n bé lɨ́ edwáawo nyé wɨ́.

¹⁸ Bɨ̌n bé á bé adwihɔɔ ɨ́ mpila ébébe ɨ́ lɔ̌b nzyɛ́ɛ́lá bisâ bi dí edímle ódimé wɔ́ɔ́ bí. Nzyɛ̌m á bé asyɛ́ɛlǎ nkóhó mɔnɨ́, nkʉ̂ gʉ̂l lɨ́ esú lé étáǎ góo ɨ́ lɔ̌b mébyaʼ mɨ́n. Bɨ̌n bé á dwihɔɔ ɨ́ mpila ébébe ó, jɔʼ myɛ́na ménɨ́nɨ́ɨ́, mé á jánɔɔ yɨ́. Bɨ̌n bé á duho ɨ́ mpila métum bímpám bín ó,

¹⁹ ɨ́ metié mé Yésʉs-Krîst. Mé ó dí ndwéá dí ɨ́ buo ódimé wɨ́. Yésʉs-Krîst á be ó mpʉ mâ nteme dí abe e dyɛ̂m, abe ntémé e metyɛ́l nyá.

²⁰ Nzyɛ̌m Sɔ́ŋ á si boo gʉ́a, kʉ́ e sí, byé l'apǎ bě kuhá ó, Krîst ólóŋlǒ syɛ́ɛ́ yaá. Nye nzě kǎ lɛ̂ʼle mɨ́ná gá nyǎ ɨ́ melú mé épíhe mâʼ lɨ́ esú lɨ́n.

²¹ Krîst ó b'á sâ ó, bɨ̌n dyɛ̂ʼwaa e Nzyɛ̌m, mʉr á pɛh nye, dwih nyé lɨ́ odwe, dwe nyé kûm ntémé nyá. Sá tɨ̂ʼ ó búʼó yɨ́n le mpûʼla nyɨ́n dí njɨ ɨ́ Nzyɛ̌m yɨ́.

²² Njóʼá bɨ́n á jóʼo otyeetye wɨ́, wê nzě pubo bɨ́n ɨ́ páʼ ébébe. Mejóʼo bɨ́n á dwe Nzyɛ̌m má, mɨ́ lɛ̂ʼle bɨ́n mpʉ bɨ́n jálá le ekpɛla, kpɛ̌l dí ápurapúra yɨ́. Yé ó yaá mpâ dí eduho bɨ́n ɨ́ miléme, yaá dí abě mbáʼrá e mikóo yɨ́.

²³ Nó, bɨ̌n mû ó sí báʼǎ byɛ̂l. Mpeʼ yé á beŋɔɔ ɨ́ milémé mín yɨ́, yé abě sá dí e nkul ebo yɨ́; yé ó lwǐb mé Nzyɛ̌m dí edǐ njʉ̌m dǐ e njʉ̌m dǐ yɨ́. Mpeʼ yé á beŋɔɔ ɨ́ bɨ̌n yɨ́, yé jaá di ó diʼée, acénecene.

²⁴ Yê cɛmá ɨ́ Mekaná mé Nzyɛ̌m ó: «Bʉr bɨ́bɛ̂h, bé ó mpʉ bíká. Okúm le ogbaa wɔ́ɔ́ wɨ́wɛ̂h jaá nwɨnwɨɨla ó njɨ e nzɔ̌m. Ebě, biká, byé lɨ́ edwɛ̂hla; nzɔ̌m swaʼre.

²⁵ Lwǐb mé Dâ yɨ́ɛ̌ di ó, njʉ̌m dǐ e njʉ̌m dǐ.» Tó kœb ó, lwǐb yaá, yé ó Mbɨambɨa Lɔ́ɔ bé á túno bɨ̌n wɨ́.