Bìoball air-loidhne

1 Korɛnt 9 - Kálar Nzyɛ̌m : Ejwán é Sáá

Nkul jwɨ́ɨ mʉr milʉ́mlʉ́ mé Nzyɛ̌m

¹ Nzê mé abě nzyɛh ɛ̌? Ntʉ mé dí mʉr milʉ́mlʉ́ mé Krîst ɨ́? Nzê me á bé así bee Tî gá wɨ́ná Yésʉs ɛ̌? Ntʉ bɨ́n dí mpumó á gúmo, duho ɨ́ syɛ́ɛ́ mé á séa ɨ́ nzɨ̌ Tî gá wɨ́ná yɨ́ ɛ́?

² Bʉ̂r oswîh sí kɛ́la ó, me ó mʉr milʉ́mlʉ́ mé Krîst nó, bɨ̌n bɨɛ, bé ɨ́ jala le egʉ́a ó, me ó kʉ́ be nyé tyeetye ɨ́ páʼ wɨ́n. Mpʉ bɨ́n mû sí pûhla e Tî Yésʉs yɨ́, bɨ̌n mû ó ndem dí elɛ̂ʼle ó, me ó mʉr milʉ́mlʉ́ wé nyá.

³ Mě kǎr lɔ̌b wâm ɨ́ mempǒm me bʉ̂r o dí enwâhle mé bá ó nɛ́ɛ:

⁴ Nzê bɨ̌h bé abe e nkul ó, bɨ̌h dêʼ mede e menyoʼ mé ójala e bɨ̌h má ɛ́?

⁵ Yé bé lɨ́ otyeetye bɨ̌h bé abe e bʉbá nó, nzê bɨ̌h bé abe e nkul ebâ bʉ́bá o dí okrǐsten bá, ó bé díʼee e bɨ̌h, lɨ́ etô e bɨ̌h ɨ́ bityen bíh ɛ́? Ntʉ̌ syɛ́ɛla gwár e gwár yaá bʉ̂r o mílʉ́mlʉ́ óswîh, bé e bɨ́ɔɔ́ mé Tî Yésʉs, ti e Kefâs mʉr tɨ̂ʼ dí eboó sɨsâ yɨ́ ɛ́? Nzê me ayɨ́ sâ ntémé syɛ́ɛla yaá ɛ̌?

⁶ Bʉ́ʉ́ bʉ̂r o mílʉ́mlʉ́, bɨ́ dweŋɔɔ nkûl ó, bé gbálaa ɨ́ nkǒ páʼ bísyɛ́ɛ́ mébô. Nzê bɨ̌h e Banabâs bé omér ó b'á be adweŋɔɔ nyɨ́haá nkûl ɛ̌?

⁷ Wáa mʉ̂r bisója dí eséǎ syɛ́ɛ́ bísója yé lɨ́ ejána nyé mʉr tɨ̂ʼ mɔnɨ́ ngɔ̂n nyá ɛ́? Wáa mbêl bilɨ́ dí ebe bílɨ́, ntɔ̂ʼ tine mpúmó dí egúmo tɨ̂ʼ nyɨ́ nyá ɛ́? Wáa pála bitab dí epála dáa e bítab lé, ntɔ̂ʼ kǎ bene éde médíbé mébêl mɔ́ɔ́ nyá ɛ́? Yé abe e mʉr!

⁸ Ajwɨʼ gá ó, minkar myâm jaá bɔma ó, njɨ e myaá mi bʉ̂r, ebě, minkar myaá, myé lɨ́ ebɔma e sá dí cɛmá ɨ́ metié mé Moyɨ̂z yɨ́.

⁹ Yê cɛmá ɨ́ metié maá ó: «Jɔ̌ʼ ntœœ mû lɨ́ eséǎ syɛ́ɛ́ épɛʼ mílɔ́lá ɨ́ mpʉ̌n yɨ́, agbâ yé kɔ́ɔ́ ɨ́ num, lɨ́ ekamle yé lɨ́ ede.» Nzê Nzyɛ̌m buú toŋlo ó, bintœœ e bintœœ, abá toŋlo mʉ̂r ɛ̌?

¹⁰ Nzê nye á bé alwib nó lɨ́ esú lɨ́h ɛ̌? Lɨ́ otyeetye, lwǐb yaá, yé á kʉ cɛmɔɔ ó lɨ́ esú lɨ́h. Yé jala ó, mbel mempeʼ, bé e kpɛma mede, bɨ́bɛ̂h, bé séaa e mpûʼla ɨ́ miléme ó, bé óbi nkɔ̂b mpumó nyaá.

¹¹ Bɨ̌h ó b'á séa ɨ́ sɔ́má yɨ́n, misísǐm mín ntɔ̂ʼ dirǎ nyɔm e syɛ́ɛ́ yɨ́h yaá. Nzê ɨ́ jɔʼ bɨ́h dí enʉa nyɨ́h nkɔ̂b ɨ́ mebi mɨ́n yɨ́, nzê bɨ̌h bé nʉa ó, kǎ sahle ɛ̌?

¹² Bʉ́ʉ́ bʉ̂r bɨ́ɛ pǎ nyɛɛ́ be e nkul esâ syɛ́ɛla yaá ɨ́ sɔ́má yɨ́n, á dwɛʼra e bɨ̌h bɨɛ! Bɨ̌h ó dí e nye, ntaa sʉ́ŋa. Tó kœb ó, bɨ̌h bé á bé abá dirǎ nyɔm e nkul nyaá. Bɨ̌h dúhwó sá yɨ́yɛ̂h ó, lɨ́ ekpɛ́ɛ ó, bɨ̌h ámû ntɨ̂ʼ bʉ́ʉ́ bʉ̂r lɨ́ ejôʼlǒ Mbɨambɨa Lɔ́ɔ́ mé Krîst.

¹³ Nzê bɨ̌n bé agʉ́a ó, bʉr o dí eséa ɨ́ mpáh Nzyɛ̌m bá, bé lɨ́ ebi méde mɔ́ɔ́ tɨ̂ʼ ɛ̌? Ó baá o dí etíʼe míndwéá, dwě Nzyɛ̌m myǎ bá, bé lɨ́ ede yʉ́ʉ́ péh míndwéá myaá, jala e nkɔb líʼe nyɔ́ɔ́ ɛ́?

¹⁴ Nó ntémé ó Tî Yésʉs á boo tyêl etié yɨ́. Nye á tyêl ó, bʉr o dí etúnǒ Mbɨambɨa Lɔ́ɔ bá, bé ɨ́ jala le etiʼe ó e wê.

¹⁵ Sâ gwár, mɛm, mé apǎ dirǎ nyɔm e sâ gwár mé á gwa bi yɨ́. Me ntémé, mé acɛma bɨ́n milɔ̌b mîʼ ó, me díraa nyɔm waá. Yé á gwa mbɨa me ó, me dwêʼ, laa ó, bɨ̌n jánaa me syɛ́ɛ́ yaá. Mʉ̌r sá apɛʼ mé menkʉ́na mâm mâʼ ɨ́ míh mé Nzyɛ̌m!

¹⁶ Mpʉ mé dí etúnǒ Mbɨambɨa Lɔ́ɔ yɨ́, yé abe mé sá énkʉ́na, ebě, yê me bi ó, me túnaa wê. Nkoó, nye ó e me, mé bé atúnǒ lɔ́ɔ waá nó!

¹⁷ Yé bé mɛm mʉr tɨ̂ʼ ó b'á gbáa ó, mě séá ó mbǐ syɛ́ɛ́ wɨ̂ʼ nó, lɛ́ɛ́, yé ó syɛ́ɛ́ mé á gwa bóno myɛ́na, duho tɨ̂ʼ yɨ́. Mpʉ yé ká be ó, me á lómɔɔ ó lómáa, agbân gbánáa syɛ́ɛ́ yaá yɨ́, mě kʉ́ séa yé ó, lɨ́ esú lé élóŋlǒ lʉ́mlʉ́ waá.

¹⁸ Nó ó, myɛ́na mâm, mê yé? Mé ó, me túnaa Mbɨambɨa Lɔ́ɔ edwɛ́na. Mě damá be lɨ́ etúnǒ Mbɨambɨa Lɔ́ɔ, mé anʉǎ sɔ̂ʼ tɨ̂ʼ. Mé adirǎ nyɔm e nkul jwɨ́ɨ nyǎm mé dí e né nyɨ́.

¹⁹ Damá jóʼǒ mpʉ mé dí nzyɛh, agúmo e nyʉ́ʉ́ mʉ̂r yɨ́, me á si bana dwir me mʉr tɨ̂ʼ túʼǎ, lɨ́ esú lé éséa mʉ̂r nyɨnyɛ̂h syɛ́ɛ́, ɨ́ nyɔm édulo bʉ̂r ɨ́ buo buo.

²⁰ Mé séá le oYúden nó, me lɨ́ etiʼě twiʼ Yúden, ó me dúlaa bê. Damá be ó mé abe ɨ́ mpila métié tʉ́ŋlʉ̌, ɨ́ jɔʼ mé dí eséa e bʉr o dí ɨ́ mpila métié yaá bá yɨ́, me lɨ́ etiʼě mpʉ̌ sá lɛ́ɛ́, me dína ó, ɨ́ mpila métié yaá tʉ́ŋlʉ̌. Mě sá nó ó, me dúlaa baá dína mimɛ́rá ɨ́ mpila yaá bá.

²¹ Yé ó jwɨʼ gwár ɨ́ jɔʼ mé dí e bʉr o b'á be apǎ tyélɔɔ métié bá yɨ́. Mě tiʼé e bé ó mpʉ mʉ̂r á be apǎ tyélɔɔ metié nyá. Mě sá nó ó, me nkʉ̂ dulo baá o dí abe e metié bá. (Lɨ́ otyeetye, mé adwih nyʉ̂l nyǎm ɨ́ mpila métié mé Nzyɛ̌m, ebě, me lɨ́ ebaʼle métié Krîst á tyêl mɨná gá má.)

²² Ɨ́ jɔʼ mé dí e bʉr o dí apǎ bi pîm ɨ́ búʼó bá yɨ́, mě dǐ ntémé ó mpʉ mʉ̂r dína apǎ bi pîm ɨ́ búʼó nyá. Mě sá nó ó, me dúlaa bê. Me lɨ́ esáa énwɨɨla e mimbi mi bʉ̂r mímyɛ̂h lɨ́ esú lé étiʼ bʉ́ʉ́ bʉ̂r.

²³ Mě sá bísyɛ́ɛla byaá bíbyɛ̂h ó, lɨ́ esú lé étúnǒ Mbɨambɨa Lɔ́ɔ. Mě sá nó ntémé ó, me nkʉ̂ bi mémbɨa me tɨ̂, jala e nkɔb líʼe nyǎm.

²⁴ Nzê bɨ̌n bé agʉ́a ó, yé ɨ́ buo óswima ɨ́ duo bíjʉ́ʉ́ ɛ̌? Ntʉ bʉ̂r bɨ́bɛ̂h dí enʉa myɛ́na. Myɛ́na bíjʉ́ʉ́, mé jaá dweŋɔɔ ó, njɨ waá dí entaa bʉ́ʉ́ óswima bɨ́bɛ̂h nyá. Nó ó, swimɨɨ gâ. Bɨ̌n ntáŋaa, bi myɛ́na.

²⁵ Bʉr o dí etó sâ bísá bí nkûl bá, bé nyɛɛ́ dil ményʉ́l mɔ́ɔ́ ó, ɨ́ byúú bíti. Bé lɨ́ esâ nó lɨ́ esú ó, bé ntáŋaa, bǐ káráá dí elaǎ mpʉ̌ ngúl mpáá yɨ́. Nó ó, mɨná bɨɛ̌ sáá gá ó, mɨná bíʼee gá káráá ngá dǐ njʉ̌m dǐ e njʉ̌m dǐ yɨ́.

²⁶ Nó ó mé dí eswim yɨ́. Míh mâm, mé kʉ́ jaá dwɛ̂ʼ ó, njɨ gúmó mé dí etô yɨ́, lɨ́ esú é sá mé dí esœ̂ŋ yɨ́. Nó ó mé dí mpʉ ŋmɛ́ha bikúra mpâ yɨ́. Me áŋmɛ́h bíŋmɛ́hŋmɛh.

²⁷ Mɨ́ gbâ nyʉ̂l nyǎm ɨ́ jwɨ́ɨ́ yâm, le esâ nyé bwaʼbwaʼ mpêl. Me ámû jaá myahɔɔ̌ kʉ̌l, mɛm, mʉr dí eboó tutúnǒ Mbɨambɨa Lɔ́ɔ nyá.

« Roimhe

Air adhart »

Lean sinn:

Ceanglaichean taic

Sanasan