1 Korɛnt 8 - Kálar Nzyɛ̌m : Ejwán é Sáá

Tír bé dí ebɛ́ma, á pa baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá

¹ Ɨ́ nkǒ páʼ ótír o dí ebaŋɔɔ ɨ́ nzaá bikpɛʼkpɛ̂ʼ bí ónzyɛ̌m bá, mɨná gá óbɛ̂h, bé ɨ́ buú gʉ́ǎ mpʉ bɨ́n dí elɛ́ɛ yɨ́. Tó kœb ó, ngwɨ́á dwídwé mʉ̂r ó, enkɛ́ɛ e nyʉ̂l. Bʉr, bé buú dirǎ nyɔm ó e kpɛ̌l.

² Mʉr dí ejwɨʼ ó, nyɨ́ gʉ́ǎ sɔ̂ʼ nyá, nyé apǎ gʉ́ǎ bím dí ejala yɨ́.

³ Mʉr kpɛ́l Nzyɛ̌m nyá nyɨɛ ó dí waá Nzyɛ̌m dí egʉ́a nyá.

⁴ Nó ó, ɨ́ nkǒ páʼ ndéá tír á pa baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá, mɨná bé lɨ́ egʉ́a gá ó, sɔ̂ʼ, yé abe ɨ́ bikpɛʼkpɛ̂ʼ bí ónzyɛ̌m. Nzyɛ̌m, nye ó njɨ ngwár.

⁵ Yé yɨ́ɛ ó e bisɔ̂ʼ mebéʼé bi dí ejébɔɔ «ónzyɛ̌m», nkʉ̂ «ojwɨ́ɨ» bí. Yé damá be e byúú bísâ bi dí ejébɔɔ «ónzyɛ̌m» ɨ́ jʉ́o kʉ́, nkʉ̂ ɨ́ sí yɨ̂ʼ bí,

⁶ ɨ́ páʼ gá wɨ́ná, mɨná gá bé ó, njɨ e Nzyɛ̌m ngwár, waá dí Sɔ́ŋ gá wɨ́ná nyá. Nye ó b'á komlo sá yɨ́yɛ̂h. Bicwiʼ gá bíná, byé dwɛ́ʼ ó nye. Yé ntémé, yé ó njɨ Njwɨ́ɨ ngwár: Yésʉs-Krîst. Sá yɨ́yɛ̂h, yé á kwɨmlɨ ó, ɨ́ nzɨ̌ nyé. Mɨná titiʼe gá ó, ɨ́ nzɨ̌ nyé nyaá.

⁷ Sâ gwár, ntʉ bʉ̂r bɨ́bɛ̂h dí egʉ́a ótyeetye waá. Bʉ́ʉ́ bʉ̂r bɨ́ɛ, bɨ́ boó dyɛ̂m ɨ́ páʼ bíkpɛʼkpɛ̂ʼ bí ónzyɛ̌m. Kumǒ kumáa ɨ́ báánâ, jɔʼ bɨ́haá bʉ̂r dí ede tír waá yɨ́, bɨ́ɛ, bé sîsimsa ɨ́ jɔʼ yɨ́yɛ̂h ó, tír waá á si baŋɔɔ ɨ́ nzaá bikpɛʼkpɛ̂ʼ bí ónzyɛ̌m. Mipahlá mílémé myɔ́ɔ́, myé lɨ́ edwe bé mebě. Bé lɨ́ egʉ́a ó, bé óde tír waá nó, edɨ́ɨ́ é tír waá, lé ójaá lœʼ bé ó lœʼœ́œ ɨ́ míh mé Nzyɛ̌m.

⁸ Mɨná bɨɛ, bé lɨ́ ekʉ́ gʉ́a gá ó, ntʉ̌ dœʼ ngá tyen mʉ̂r bǎʼ e Nzyɛ̌m. Mɨ́ná dí gá, akǎ de tír nó, mɨná bé adímle gá sɔ̂ʼ. Mɨ́ná bé óde gá nye nó, sɔ̂ʼ, yé ákɛlɔɔ tɨ̂ʼ kʉ́.

⁹ Syɛ́ɛla bɨ́n dí e nkul esâ, agbah étié yɨ́, yé óbɛ̌m be ntémé ebɔ̌ʼ dí ejâ ɨ́ nzɨ̌ mé nyʉ́ʉ́ mʉ̂r lɨ́. Mʉr waá óbɛ̌m bɨm lé, ntɔ̂ʼ twe, ebě, nyé abe e mpǎŋ búʼó. Nó ó, kánwáá gá lɨ́ esâ syɛ́ɛla yaá.

¹⁰ Go e bâʼ, gua mʉr dí ɨ́ buú gʉ́a nyá! Gó tó dě dína ɨ́ nzaá bikpɛʼkpɛ̂ʼ bí ónzyɛ̌m nó, go ámû jaá sâ syɛ́ɛla yaá, nyʉ́ʉ́ mʉ̂r ntɔ̂ʼ bánǎ baŋa yê, damá jóʼo ó, lémé wé, wé lɨ́ edwe nyé mebě tɨ̂.

¹¹ Mʉr dí e mipahlá ɨ́ léme ɨ́ tɨ́ŋ nyá, nye ó mɨ́ɔɔ́ gá wɨ́ná Krîst á dwe lɨ́ esú lé nyá. Nyé ajala le edwe ɨ́ lɔ̌b sá gó dí ejébě «mpǎŋ ngwɨ́á» yɨ́.

¹² Ɨ́ jɔʼ bɨ́n sá syóm ɨ́ nkǒ páʼ bɨ́ɔɔ́ bɨ́n, le ebáʼǎ tyeʼ mílémé myɔ́ɔ́ dí ɨ́ tyɛʼ mí yɨ́, bɨ̌n bé lɨ́ esâ syóm ɨ́ nkǒ páʼ mé Krîst.

¹³ Yé bé mede mâm, mé ó ebɔ̌ʼ e dí e nkul ebɨma mɨ́ɔɔ́ wǎm ɨ́ léme lɨ́ nó, me ónzoó kam ó, me díʼee akǎ de tír. Me ámû jaá sâ ó, mɨ́ɔɔ́ wǎm bɨ́mɨɨ ebɔ̌ʼ ɨ́ léme, twe.