Bìoball air-loidhne

1 Korɛnt 7 - Kálar Nzyɛ̌m : Ejwán é Sáá

Ebâ

¹ Ɨ́ lɔ̌b bɨ́n á cɛma me tɨ̂ʼ wɨ́, mʉ̌r mbɨa ó, di nzîhle.

² Nó ó, ɨ́ lɔ̌b bʉ̂r o dí ekpɛl ésâ bímolá bá, yé ɨ́ buú jala ó, mʉrʉ̂m nyɨnyɛ̂h díʼee e wé mʉ́má; mʉmá nyɨnyɛ̂h di e wé njʉ̂m.

³ Njʉ̂m, nye ɨ́ jala le elóŋlǒ syɛ́ɛla mʉ́rʉ̂m yé kwá myɛ̌l. Mʉmá ntémé lóŋlǒ syɛ́ɛla mʉ́má kwá njʉ̂m.

⁴ Ntʉ mʉ́má dí e nkul ó, nye sâʼ nyʉ̂l nyé mpʉ nyé kpɛ̂l yɨ́. Njʉ̂m wé ó dí e nkul nyaá. Jwɨʼ gwár yaá, ntʉ mʉ́rʉ̂m dí e nkul ó, nye sâʼ nyʉ̂l nyé mpʉ nyé kpɛ̂l yɨ́. Myɛ̌l ó dí e nkul nyaá.

⁵ Nyʉ́ʉ́ sá abene nyʉ́ʉ́, alaa ó, bɨ̌n bé á si boo ntaa minkâl ó, bɨ̌n bé ákǎ syɛŋa ɨ́ jɔʼ bɨ́n dí ejɨʼla e Nzyɛ̌m yɨ́. Píe tɨ̂, bɨ̌n e tó e twiʼ ébá yɨ́n dóló. Bɨ́n bé asâ nó wá, bɨ̌n bé ámû jaá duma ɨ́ mebʉ́blá mé Sátan, mpʉ bɨ́n dí agʉ́a émâr míléme yɨ́.

⁶ Sá mé dí elɛ́ɛ bɨ́n nɨ̌, yé abe bɨ́n bi ó, bɨ̌n sâʼ yê. Yé ó, bɨ́n sí kpɛl nó, sáʼ gá nó.

⁷ Mɛm mʉr tɨ̂ʼ buú gwɨ̂m ó, mpa bʉr bɨ́bɛ̂h, bé ó mpʉ mê. Sâ gwár, mʉr nyɨnyɛ̂h, nye ó e wé mbǐ ndwéá Nzyɛ̌m á dwe nye wɨ́. Nyâʼ mʉ̂r e wé mbi; nyʉ́ʉ́, e wé.

⁸ Nó ó mé dí elɛ́ɛ ónzihle ti e mikúho ó, yé mbɨa ó, bɨ̌n díʼee mpʉ mê: abě mbɛ́á.

⁹ Bɨ́n bé abe e nkul edil ményʉ́l mɨ́n ɨ́ biti nó, bɨ̌n e bâ. Ebâ, lé ɨ́ mbɨa, laa édi e bigwɨ́má.

¹⁰ Me lɨ́ egbâ bɨ́n, mimbɛ́á mí bʉ̂r, mpéné nyɨ̂: (Lɨ́ otyeetye, ntʉ mɛ̂m mʉr tɨ̂ʼ dí egbâ bɨ́n nyǎ. Tî Yésʉs mʉr tɨ̂ʼ ó b'á gbâ bɨ̌n nyǎ.) Mbɛ́á mʉ́má, wé ayɨ́ bɔ́ʼa e njʉ̂m.

¹¹ Nyé bɔ́ʼá e né nɛ́ɛ: nye ayɨ́ kǎ báʼǎ tô ɨ́ lʉ́ʉ́ ébâ. Nyé kpɛ̂l nɛ́ɛ: bé e njʉ̂m wé, bé sâʼ saá. Bé kómlaa. Nó ntémé, mʉrʉ̂m, nyé ajala le ebwóolo myɛ́l.

¹² Ɨ́ lɔ̌b bʉ́ʉ́ bʉ̂r, mɛm mʉr tɨ̂, abe Tî Yésʉs, mě lɛ́ɛ́ ó: mʉ́rʉ̂m sí be mbûʼla, myɛ̌l nyɨɛ, hááden nó, myɛ́l sí kam ó, nyě dǐ ó lɨ́ ebâ nó, njʉ̂m sá abwóolo nyê.

¹³ Jwɨʼ gwár e gwár yaá ɨ́ páʼ mʉ́má dí mbûʼla, njʉ̂m hááden nyá. Njʉ̂m sí kam ó, bé e nɔ́ɔ́ díʼee le ebâ nó, mʉmá sá aduho lɨ́ ebâ laá.

¹⁴ Nó ó dí ó, mʉrʉ̂m dí hááden nyá, nye ó bǎʼ e Nzyɛ̌m ɨ́ lɔ̌b mpúhlá bé e myɛ̌l. Jwɨʼ gwár e gwár yaá ntémé e mʉmá dí hááden nyá. Nye ó bǎʼ e Nzyɛ̌m ɨ́ mpúhlá nyɔ́ɔ́, bé e njʉ̂m dí mbûʼla nyɨ́. Yé bé abe nó wá, lɛ́ɛ́, bwán bɨ́n, bé ó mpʉ̌ sá mpîr ɨ́ míh mé Nzyɛ̌m. Tó kœb ó, bwán bɨ́n, bé ó ti.

¹⁵ Hááden sí gwɨ̂m éjʉ̂ ébâ e mbûʼla nó, bé bírɨɨ ó, ebâ dwêʼ. Ɨ́ mbi waá, mbûʼla, nkʉ̂ mʉmá, nkʉ̂ mʉrʉ̂m, nyɨ́ duho ɨ́ mpila ébâ yaá, ebě, Nzyɛ̌m á jébe bɨ̌n ó, bɨ̌n tíʼaa ɨ́ mepyɛbla.

¹⁶ Mbûʼla mʉmá, gǒ gʉ́á nyá? Jáŋá go óbe ó e nkul etiʼ njʉ́mǒ. Yé abe nó? Mbûʼla mʉrʉ̂m, gua ntémé, gǒ gʉ́á nyá? Jáŋá go óbe ó e nkul etiʼ myɛ́lô.

Bityé Nzyɛ̌m á tyêl bʉr tɨ̂ʼ bí

¹⁷ Gwá baʼle gá yɨ́ɛ sɨ̂: yé jala ó, mʉr nyɨnyɛ̂h díʼee ɨ́ tyé Tî Yésʉs á boo tyêl nye tɨ̂ʼ yɨ́. Mʉ̌r mbɨa ó, dû kʉ̌ tyěn Nzyɛ̌m á tɨ́e ó, nye dúʼoo wɨ́. Etié laá, lé ó mé dí ekala ɨ́ Mbɛ̌r-Nzyɛ̌m gúmó yɨ́yɛ̂h lɨ́.

¹⁸ Yé bé mʉrʉ̂m á si jóʼo njɨ́blɨ́ mé Nzyɛ̌m ɨ́ jɔʼ nyé á be, nye mû tíʼá mpʉ́n yɨ́ nó, nyé ajala le ecéne mpʉ́n bé á pa sâ nye nyɨ́. Yé bé mʉrʉ̂m á si jóʼo njɨ́blɨ́ mé Nzyɛ̌m ɨ́ jɔʼ nyé á be apǎ tíʼɔɔ mpʉ́n yɨ́ nó, nyé ajala le etíʼɔɔ mpʉ́n.

¹⁹ Etíʼɔɔ mpʉ́n nkʉ̂ di, l'atíʼɔɔ mpʉ́n, yé alɛ́ɛ̌ sɔ̂ʼ. Sá dí e nyɔm yɨ́, yé ó, go bâʼlaa metié mé Nzyɛ̌m.

²⁰ Nó ó, yé jala ó, mʉr nyɨnyɛ̂h Nzyɛ̌m á jébe nyá díʼee ɨ́ tyé nyé á boo tyélɔɔ tɨ̂, nye dína l'apǎ bǐ njɨ́blɨ́ wé waá.

²¹ Nzê go á be ó túʼǎ ɨ́ jɔ̌ʼ Nzyɛ̌m á jébe go yɨ́ ɛ́? Léme, wé ayɨ́ koro gô. Sâ gwár, gó ókœb nzɨ́ dí e nkul epɛʼ gó lɨ́ otúʼǎ nyɨ́ nó, dyɛ̂l tɨ̂!

²² Ebě, Tî Yésʉs sí jébě túʼǎ nó, go ó, yé mû ó nzyɛh ɨ́ Yésʉs tʉ́ŋlʉ̌. Mʉr á nyɛɛ bɨbe nzyɛh, waá Krîst á jébe nyá, mû ó túʼǎ mé Krîst píe njɨ́blɨ́ waá.

²³ Nzyɛ̌m á si jána myɛ́na ɨ́ bwaʼ bwaʼ ɨ́ jɔʼ nyé á sâ ó, bɨ̌n gúmaa e né yɨ́. Nó ó, akam gá ó, bɨ̌n dwírɨɨ bɨ̌n bʉr o tɨ̂ʼ bitúʼǎ bi bʉ̂r!

²⁴ Bɨ́ɔɔ́ bâm! Okɛ́l bâm! Yé jala ó, mʉr nyɨnyɛ̂h Nzyɛ̌m á jébe nyá tyɛ́bɨɨ ɨ́ píʼi njɨ ɨ́ tyé yé, gúmó Nzyɛ̌m á boo tyêl nye yɨ́. Nye díʼee tɨ̂, bé e Nzyɛ̌m!

Metíá me dí edumo e bibíŋ méséhe má

²⁵ Ɨ́ páʼ bíbíŋ méséhe, mé abe e lɛ́á mé Tî Yésʉs. Mě lɛ́ɛ́ yɨ́ɛ ó, yâm jwɨʼ ɨ́ tyé mʉ̂r Tî Yésʉs á jɨ̂ʼ nkoó, waá mû mʉr ebúʼlɔɔ nyá.

²⁶ Ɨ́ lɔ̌b mítúú mɨ́ná dí esia gá e myé ɨ́ báánâʼ mí, mě beé ó, mʉ̌r mbɨa ó, tityɛ̂b njɨ ɨ́ tyé gwár Nzyɛ̌m á pa tyêl nye tɨ̂ʼ yɨ́.

²⁷ Nzê go á si bâ mʉmá ɛ́? Sá abono mépɨʼ mé ébwóolo nyê. Nzê go ó nzihle ɛ̌? Sá asáa mʉ́má ebâ.

²⁸ Sâ gwár, gó sí bâ mʉ́má nó, gó asâ syóm. Éséhe sí tô lɨ́ ebâ nó, lé asâ syóm. Tó kœb ó, bʉr o dí mimbɛ́á bá, bé ósia e mitúú ɨ́ bicwiʼ byɔ́ɔ́. Nó ó, me lɨ́ egwɨ̂m ékamle e bɨ̌n ɨ́ páʼ mítúú myaá.

²⁹ Bɨ́ɔɔ́ bâm! Okɛ́l bâm! Mě gwɨ́m élɛ́ɛ tɨ̂ʼ ó, yɨ́ lîʼ bá mâ jɔʼ. Táare ɨ́ jɔʼ yɨ̂ʼ tótôʼ, yé jaá kǎ lîʼ mímbɛ́á mí bʉ̂r ó, njɨ myé tíʼaa mpʉ̌ sá lɛ́ɛ́, myé ó onzihle.

³⁰ Bʉr o dí ejɨ médwê bá, dǐ mpʉ̌ sá lɛ́ɛ́, bé ajóʼǒ túú ɨ́ léme. Baá dí ejo bá, dǐ mpʉ̌ sá lɛ́ɛ́, bé abe ɨ́ bisʉhʉʉ. Bʉr o dí ebwâm bísâ bá, baʼle byé mpʉ̌ sá lɛ́ɛ́, bisá bé á bwâm bí, byé agúmo e bê.

³¹ Bʉr o dí edira mínyɔm lɨ́ ebi bísá bí sí yɨ̂ʼ bá, dǐ mpʉ̌ sá lɛ́ɛ́, bé abá dirǎ nyɔm e bisâ byaá, ebě, sí yɨ̂ʼ mpʉ yé dí yɨ́, yé mû ó kúno elaa.

³² Mě gwɨ́m ó, bɨ̌n ayɨ́ syɛ̌l bá ɨ́ miléme. Mʉr dí abe e mʉmá nyá, syɛ́ɛ́ mé Tî gá wɨ́ná, yé omér ó dí epálwo nyé ɨ́ léme. Nyě jaá sisyɛ̌l bá ó, njɨ esáa ménzɨ̌ mé ésâ syɛ́ɛla Tî gá wɨ́ná dí ekpɛl yɨ́.

³³ Mbɛ́á mʉ́rʉ̂m, wé lɨ́ ebuú syɛ̌l bá ɨ́ bisá bí sí yɨ̂. Wé jaá sáa ó, njɨ menzɨ̌ mé ésâ syɛ́ɛla myɛ́l dí egwɨ̂m yɨ́.

³⁴ Nye mû ó lɨ́ edû bícwia bibá ɨ́ jɔʼ gwár. Nkʉ̂ nzihle mʉmá, nkʉ̂ bíŋ mʉ́má, nyě jaá dudû ó, njɨ milɔ̌b mé Tî Yésʉs, lɨ́ esú ó, nye gúmaa e né, táare ɨ́ nyʉ̂l nyé, kumo ɨ́ sísǐm. Mbɛ́á mʉ́má wɨ́ɛ jaá pɨpálwǒ sɔ̂ʼ ó, njɨ bisá bí sí yɨ̂, ó wé nkʉ̂ sâ bísyɛ́ɛla njʉ̂m dí egwɨ̂m bí.

³⁵ Mě lɛ́ɛ́ nó ó, lɨ́ esú é mémbɨa mɨ́n! Mé akâʼ mʉ̂r. Mě jaá kpɛl ó, njɨ bɨ̌n tírwaa e Tî gá wɨ́ná. Mě kpɛl ntémé ó, bɨ̌n dúʼoo kʉ̌ tyen dí le odimé wɨ́. Bɨ̌n bé ójaá dûdu ó, njɨ wé e wê. Adi gá ɨ́ ké kɨ ké.

³⁶ Mʉ̂r sí pahle, bee ó, sôn, nyɨ́ ntaa nyé ɨ́ nkul ɨ́ lɔ̌b bíŋ sile wé, nyé dí atyen lɨ́ ebâ wɨ́ nó, nyé sí kǎ bee ó, sile waá, wé mû ó lɨ́ ekɔ́a mímbû, bee ntémé ó, nyé abe e nkul ekǎ sâ yʉ́ʉ́ sâ swîh nó, nye ɨ́ jala le esâ mpʉ nyé kpɛ̂l yɨ́. Nyé asâ syóm. Nye tyénɨɨ wé lɨ́ ebâ.

³⁷ Yé ká be ó, sɔ́ŋ waá, nyɨ́ kǎ bee ó, nyé atyěn bíŋ sile waá lɨ́ ebâ, nye óbaʼle wé mbɛ̌r nɛ́ɛ: yé bé nye lɨ́ ekʉ́ dû mítíʼá mí lémé wé nó, lɛ́ɛ́, syɛ́ɛla yé, yé ɨ́ mbɨa. Ebě, yé abe nyé bi ó, nye sâʼ syɛ́ɛla yaá.

³⁸ Nó ó, mʉr dí etyěn bíŋ sile lɨ́ ebâ nyá, nyɨ́ gwá sâ. Tó kœb ó, waá dí atyěn bíŋ sile lɨ́ ebâ nyá ó dí ekʉ́ buú gʉ́a ésâ.

³⁹ Mʉmá nyɨnyɛ̂h mû sí tô lɨ́ ebâ nyá, nye ɨ́ jala le edi e njʉ̂m, ɨ́ di di di, tó pyâl ɨ́ jɔʼ njʉ̂m wé ódwe yɨ́. Njʉ̂m sí dwe nɛ́ɛ: nye mû ó nzyɛh. Nye óbɛ̌m kǎ tó sáa mʉ́rʉ̂m nyé kpɛ̂l nyá, bé e nɔ́ɔ́ ntɔ̂ʼ bɛ́a. Nye e sáá yɨ́ɛ mʉrʉ̂m dí ɨ́ mpúhlá e Tî Yésʉs nyá.

⁴⁰ Nyé sí di yɨ́ɛ nzyɛh, akǎ tô lɨ́ ebâ nó, bisʉhʉʉ nyé óbi bí, byé ólaa byaá nyé á gwa bi, lɨ́ etô lɨ́ ebá émbá bí. Wâm mbeá ó nɨ̌. Me lɨ́ ebúʼla ó, me ntémé ó dí e Sísǐm mé Nzyɛ̌m.

« Roimhe

Air adhart »

Lean sinn:

Ceanglaichean taic

Sanasan