1 Korɛnt 5 - Kálar Nzyɛ̌m : Ejwán é Sáá

Bisyɛ́ɛla bi dí elœʼ ményʉ́l gá mɨ́ná ɨ́ nzɨ̌ bijoó bí

¹ Bʉr bé lɨ́ ejóʼo bé lɨ́ elɛ́ɛ ɨ́ gúmó yɨ́yɛ̂h ó, yé e bimolá ɨ́ sɔ́má yɨ́n, bimolá sâ bínwérédé, byaá óhááden dí abe lɨ́ esâ bí. Nyʉ́ʉ́ mʉ̂r ɨ́ sɔ́má yɨ́n, nye lɨ́ ebánǎ tiʼe e myaá sɔ́ŋ.

² Bɨ̌n ntémé bé ɨ́ buo élɛ́ɛ e nyʉ̂l! Yé á gwa mbɨa ɨ́ páʼ wɨ́n ó, mpa milémé mín, myé á si lóno lɨ́ ebúʼ. Waá á sâ syɛ́ɛla yaá nyá, soʼ gá nye ɨ́ sɔ́má yɨ́n.

^3-4 Ɨ́ wâm pâʼ, mě damá di e ncɛrá e bɨ̌n ɨ́ nkǒ páʼ nyʉ̂l, me yɨ́ɛ ó, gúmo gwár e bɨ̌n ɨ́ nkǒ páʼ sísǐm. Nó ó, mɨ́ boó tíʼě lɔ̌b mʉ̂r waá ɨ́ díé mé Tî gá wɨ́ná Yésʉs. Yé ó mpʉ̌ sá lɛ́ɛ́, me ó ɨ́ sɔ́má yɨ́n. Ɨ́ jɔʼ bɨ́n ngá báʼǎ syɛŋa, mɛm ntémé tɨ̂ʼ ɨ́ nkǒ páʼ sísǐm, nkul me Tî gá wɨ́ná Yésʉs tɨ̂ʼ ɨ́ mɨná gá yɨ́,

⁵ bɨ̌n e tyén mʉ̂r waá kwá mé Sátan, ó Sátan ndámaa nye ɨ́ páʼ njwɨr myâ gá wɨ́ná. Ɨ́ páʼ sísǐm wé, nyé otiʼe ɨ́ móhó Tî gá wɨ́ná óbáʼǎ nze wɨ́.

⁶ Yé ambɨa ɨ́ jɔʼ bɨ́n dí enkʉ́na ɨ́ lɔ̌b wɨ́n, bɨ̌n bʉr o tɨ̂ʼ yɨ́, ebě, kɨkɛna lɛ́ɛ́ ó: «Levwîr damá twâʼwo, yé óbánǎ sâ ó, blêr yɨ́yɛ̂h, yé nkáŋlaa.»

⁷ Pɛʼɛɛ gá njʉ̌m levure waá, ó bɨ̌n líʼɨɨ miléme ɨ́ púpúpú. Nó ó bɨ́n ngá be e blêr dí edwán, abe e levure yɨ́. Me lɨ́ egʉ́a ó, bɨ̌n mû ó boó be nó, ebě, Krîst á be ó sí tíʼɔɔ tâŋ mâ nteme, le esâ ó, mɨná bwálaa gá nzɔɔ mâ nteme nyé.

⁸ Mɨná bé ayɨ́ bwal gá nzɔɔ gá nyɨ́ná nyaá lɨ́ edě blêr dí e njʉ̌m levure yɨ́. Blêr yaá, yé mveʼle ó, ebébe é léme le jélé. Mɨná bwálaa gá nzɔɔ gá nyɨ́ná lɨ́ edě blêr dí abe e levure yɨ́. Yɨ́haá blêr, yé ó lwǐb ótyeetye dí apûhla e mikóo yɨ́.

⁹ Ɨ́ mekaná mé á cɛma bɨ̌n má, me á lɛ́ɛ e bɨ̌n ó, bɨ̌n ayɨ́ be e ndwáala le osyɛ̂l o bímolá.

¹⁰ Me á bé alɛ́ɛ ó, «osyɛ̂l o bímolá bɨ́bɛ̂h», nkʉ̂ «bʉr o bígwɨ́má bɨ́bɛ̂h», nkʉ̂ «bʉr bɨ́bɛ̂h o dí edɛn bímɔnɨ́ byé onkán bá», nkʉ̂ «baá dí edwe bíkpɛʼkpɛ̂ʼ bí ónzyɛ̌m kûm bá bɨ́bɛ̂h». Lɨ́ esyɛ̂hle bé bɨ́bɛ̂h, yé á gwa jɨ ó, mɨná pʉ́ʼaa gá ɨ́ sí yɨ̂!

¹¹ Me bé ó, me tílaa bɨ̌n ó, bɨ̌n ayɨ́ be e ndwáala e mʉr dí elɛ́ɛ ó, nye ó mbûʼla, nyɨɛ yɨ́ɛ lɨ́ esâ bímolá, nkʉ̂ waá dí e mpuo bigwɨ́má nyá, nkʉ̂ mʉr dí edwe bíkpɛʼkpɛ̂ʼ bí ónzyɛ̌m kûm nyá. Bɨ̌n bé ayɨ́ be e ndwáala e mʉr melwɨ́ɨ, nkʉ̂ nyʉnyóʼ, nkʉ̂ ndíblʉ̌. Bɨ̌n bé ayɨ́ pûhla mébô lɨ́ ede e mimbi mi bʉ̂r myaá.

¹² Yé adwɛ̂ʼ mɛ̂m ó, me tíʼaa ohááden milɔ̌b. Bɨ̌n bé ɨ́ jala le etíʼe mílɔ̌b ó, myaá mi bʉ̂r ó Mbɛ̌r-Nzyɛ̌m. Nzê yé abe nó ɛ̌?

¹³ Nzyɛ̌m ó ngá tíʼe mílɔ̌b mí óhááden. Yê cɛmá ɨ́ Mekaná mé Nzyɛ̌m ó: «Soʼ gá bébebébe mʉr ɨ́ sɔ́má yɨ́n tʉ́ŋlʉ̌.»