1 Korɛnt 4 - Kálar Nzyɛ̌m : Ejwán é Sáá

Bʉr o mílʉ́mlʉ́ mé Krîst

¹ Bɨ̌n bé ɨ́ jala le eláa bɨ́h bɨɛ mpʉ ósyɛ̂l o mésâ mé Krîst, bʉr o dí egʉ́a ébaʼlě lwǐb ódîm mé Nzyɛ̌m bá.

² Tó kœb ó, sá bé dí edî e mʉr dí ebaʼlě mbɛ̌r nyá yɨ́, yé ó, nye díʼee mʉr ebúʼlɔɔ.

³ Ɨ́ páʼ wâm, mé asyɛ̌l bá ó, bɨ̌n lwíbɨɨ lɔ̌b wâm, nkʉ̂ ó, nyʉ́ʉ́ mpáh milɔ̌b swîh lwíbɨɨ wê. Mɛm ntémé, mé atíʼě lɔ̌b wâm mɛm mʉr tɨ̂.

⁴ Mipahlá mí lémé wâm, myé anwâhle mê. Nó yé alɛ̂ʼle ó, mé abe e mebě. Tî Yésʉs ó dí etíʼě lɔ̌b wâm.

⁵ Ɨ́ tɨ̂ʼ ɨ́, alɨ̌ tíʼe gá lɔ̌b mé nyʉ́ʉ́ mʉ̂r ɨ́ jɔʼ yé dí apǎ pyâl jɔʼ élab yɨ́. Bónáá gá ó, Tî Yésʉs, nye ntâʼ. Nyé opyêl sá dí lɨ́ edúrʉ́ʉ́ yɨ́, tyen yé ɨ́ myɛ́n. Nyé ogwîh mípahlá mi dí misolá ɨ́ milémé mí bʉ̂r mí. Jɔʼ yaá ó Nzyɛ̌m ódwe mʉ̂r nyɨnyɛ̂h kûm jálá e né nyɨ́ yɨ́.

⁶ Bɨ́ɔɔ́ bâm! Okɛ́l bâm! Mekaná mé dí ecɛma bɨ́n mâ, mé e nyɔm lɨ́ esú lɨ́n. Bɨ̌h le Ápolos, bé ó dí bimveʼle bi dí elɛ̂ʼle bɨ́n bí. Bɨ̌h lɛ́ʼlé bɨ́n tɨ̂ʼ ó, mʉr, nyé ajala le enkɛ́ɛ nyʉ̂l, nkʉ̂ sêʼle nyâʼ mʉ̂r, nkʉ̂ waá nyʉ́ʉ́. Mě dwé bɨ́n mveʼle yaá ó, bɨ̌n jɨ́ʼɨɨ sá kɨkɛna yɨ̂ʼ dí elɛ́ɛ ó: «Mʉr antaa gá sá dí cɛmá» yɨ́.

⁷ Nzé nyɨɛ á bɨ̂r gua kʉ́, laa bʉ̂r bɨ́bɛ̂h ɛ̌? Yé gó dí e yé, gó á be abǐ biʼée yɨ́? Yé bé sá yɨ́yɛ̂h gó dí e yé yɨ́, go á bi yé ó, biʼée nó, gǒ nkʉ́ná mpʉ̌ sá lɛ́ɛ́, yé abě ndwéá ɨ́ yé?

⁸ Bɨ̌n mû ó e sá yɨ́yɛ̂h bɨ́n á gwɨgwɨ̂m yɨ́. Bɨ̌n mû ó ɨ́ diá mépwaʼ. Bɨ̌n mû ó sí tyélɔɔ ɨ́ dǐ mínjwɨ́ɨbʉr, bɨ̌h bɨɛ l'apǎ be myê. Á dǐ bee ó, bɨ̌n mû ó sí dwira mínjwɨ́ɨbʉr mimpâ, mɨná gá óbɛ̂h nkʉ̂ di gá myé ɛ̌!

⁹ Ebě, mbeá wâm, wé ó, Nzyɛ̌m á si tyêl bɨ̌h, bʉr o mílʉ́mlʉ́ bé, ɨ́ tyé bʉ̂r o jálá le ebuú pyaŋɔɔ, baá bé ókpɛl éjʉ̂ téme bʉr bá. Bɨ̌h mû ó, sí tyélɔɔ ɨ́ míh mé bʉ̂r mpʉ bʉ̂r o jálá le esiŋlɔɔ bá, táare e bʉr ó sí yɨ̂, kumo e beéngeles.

¹⁰ Bɨ̌h mû ó bigʉ̌ lɨ́ esú mé Krîst; bɨ̌n bɨɛ, bé ó mipɨpɨ́ʼ ɨ́ nye. Bɨ̌h bé ó bityɛʼbol; bɨ̌n bɨɛ, minjɨ́h mí bʉ̂r. Bɨ̌h bé lɨ́ epyéhɔɔ; bɨ̌n bɨɛ, bé lɨ́ edweŋɔɔ̌ dúu.

¹¹ Kumǒ kumáa ɨ́ jɔʼ yɨ̂, bɨ̌h bé lɨ́ edwe nzâ, ti e dwéh médíbé. Yé lɨ́ esáa bɨ́h mimbôr. Bé lɨ́ ebî bɨ́h. Bé lɨ́ edwih bɨ́h ɨ́ yɨ̂ʼ gúmo, tyen ɨ́ yʉ́ʉ́.

¹² Bɨ̌h bé lɨ́ eséǎ syɛ́ɛ́ dí ɨ́ lele lele yɨ́, lɨ́ esáǎ twiʼ yɨ́h, bɨ̌h bʉr o tɨ̂. Jɔʼ bé dí elwɨ́ɨ bɨ́h yɨ́, bɨ̌h bɨɛ̌ sʉ bé ó, metyɛʼ me mpóm. Jɔʼ bé dí etíble bɨ́h yɨ́, bɨ̌h bé lɨ́ edûhwo bê.

¹³ Jɔʼ bé dí elwib e bɨ̌h ebébe yɨ́, bɨ̌h bɨɛ̌ yɨyalá e bé ó e léme ɨ́ piiia. Bé láá bɨ́h ó mpʉ ékunuu é sí yɨ̂, nkʉ̂ sá mébomo, nzě kumo ɨ́ báánâ.

¹⁴ Mé acɛma bɨ́n mpʉ́nʉ̌ lɨ́ ejwɨʼ ó, mě gbá ó bɨ̌n sôn ɨ́ nyʉ̂l. Mě cɨ́l bɨ́n ó, cɨ́lɨ́ɨ, jwɨʼ gwár e gwár e mpʉ mé jálá le esâ bwán bâm mé dí ekpɛl bá yɨ́.

¹⁵ Bɨ̌n damá be le otɨ́a otɔ́ɔ́sin kám ɨ́ twiʼ yɨ́n e Krîst, bɨ̌n bé ó njɨ e sɔ́ŋ ngwár. Mɛm, me ó dí sɔ́ŋ wɨ́n á byâ bɨ̌n nyá. Ɨ́ páʼ twiʼ yɨ́n e Yésʉs-Krîst, me ó b'á byâ bɨ̌n lɨ́ enze le elɛ́ɛ bɨ́n Mbɨambɨa Lɔ́ɔ.

¹⁶ Nó ó, me lɨ́ ejɨʼla e bɨ̌n ó, bɨ̌n báŋaa me.

¹⁷ Sɨ́ǎ yaá ó mé á lómlo bɨ̌n Timotɛ̂, mwâ kpɛ̌l wǎm yɨ́. Nye ntémé ó dí mʉr ebúʼlɔɔ ɨ́ Tî Yésʉs. Nye ó ngá jɨm bín bitɔŋlá ɨ́ kʉ̌ tyen mé dí edû ɨ́ mpúhlá nyɨ́h e Krîst wɨ́. Mě lɛ́ʼlé Mbɛ̌r-Nzyɛ̌m ɨ́ gúmó yɨ́yɛ̂h ó, bé dúʼoo kʉ̌ tyen ngwár waá.

¹⁸ Bʉ́ʉ́ bʉ̂r ó sɔ́má yɨ́n, bé mû ó lɨ́ enkɛ́ɛ ményʉ̂l, bɨ́ɛ lɨ́ ejwɨʼ ó, me ákǎ nzě bee bɨ́n.

¹⁹ Sâ gwár, Tî Yésʉs sí kpɛl nɛ́ɛ: me ónze kwá nyɨ́n kám e kám. Jɔʼ yaá ó mé ngá nzě gʉ́a, abě njɨ melab mɨ́n, bʉr o dí ebuú nkɛ́ɛ ményʉ̂l bá. Me ónzě gʉ́a ntémé bím nkûl bɨ́n dí e nye nyɨ́.

²⁰ Ebě, bisyɛ́ɛla bí Mpóʼo mé Nzyɛ̌m, byé adwɛ̂ʼ mélab. Byé buú dwɛ̂ʼ ó, mbi nkûl mʉ̂r dí e nye nyɨ́.

²¹ Bɨ̌n kpɛl yɨ́ɛ yé? Nzê me ntâʼ kwá nyɨ́n e ngáhá ɛ̌? Nzê e lémé kpɛ̌l ti e metala ɛ̌?