1 Korɛnt 3 - Kálar Nzyɛ̌m : Ejwán é Sáá

Osyɛ̂l o mésâ mé Nzyɛ̌m

¹ Bɨ́ɔɔ́ bâm! Okɛ́l bâm! Lɨ́ otyeetye, me á bé alwib e bɨ̌n mpʉ mʉ̂r jálá le elwib e baá o dí e Sísǐm mé Nzyɛ̌m bá yɨ́. Me á nzoo lwilwib e bɨ̌n ó, mpʉ mé jálá le elwib e bʉr o dí tʉ̂toʼó, abe e Sísǐm mé Nzyɛ̌m bá yɨ́. Me á lwib e bɨ̌n ó, mpʉ̌ sá lɛ́ɛ́, bɨ̌n bé á be ó bwá ó ntwǒm bé alúno pûhla e Krîst bá.

² Me á si dwe bɨ̌n medíbé mé ébêl, abe méde mempâ, ebě, bɨ̌n bé á bé abe e nkul ekoʼo mé lɨ́ ede. Nzě kumo ɨ́ báánâ, bɨ̌n bé abe e nkul ekoʼo mê,

³ ebě, bɨ̌n tiʼe ó mpʉ bʉ̂r ó sí yɨ̂. Bɨ̌n bé lɨ́ esâ nzwíí le egœ́a páʼ nyɨ́n. Nzê bɨ̌n bé abee náǎ ó, bɨ̌n dína ó, lɨ́ ekʉ́ tiʼě mpʉ bʉ̂r ó sí yɨ̂ʼ ɛ̌? Bɨ̌n bé lɨ́ ekʉ́ dû kʉ̌ tyen bʉ̂r ó sí yɨ̂!

⁴ Jɔʼ nyâʼ mʉ̂r ɨ́ sɔ́má yɨ́n lɛ́ɛ́ ó: «Me ó mpʉ́n mé Pɔ̂l,» nyʉ́ʉ́, nye ó: «Mɛm, me ó mpʉ́n mé Ápolos» yɨ́, nzê bɨ̌n bé abee náǎ ó, bɨ̌n sá ó mpʉ bʉ̂r ó sí yɨ̂ʼ ɨ̌?

⁵ Lɨ́ otyeetye, nzé dí Ápolos? Nzé dí Pɔ̂l? Bɨ̌h bé ó osúʼa bɨ́n, bʉr o b'á be bɨ̌n e nyɔm ó, bɨ̌n bûʼlaa bá. Mʉr nyɨnyɛ̂h, nye lɨ́ esâ syɛ́ɛla Tî Yésʉs á dwe nye ó, nye sâʼ yɨ́.

⁶ Mɛm, me á si be mpeʼ; Ápolos nyɨɛ nzě sʉ médíbé. Sâ gwár, Nzyɛ̌m ó b'á sâ ó, yé páhaa.

⁷ Nó ó dí elɛ̂ʼle ó, mʉr dí ebe ndu e waá dí esʉ médíbé nyá, bé abě sɔ̂ʼ. Mʉr ngwár dí ejala e dúu nyá ó dí Nzyɛ̌m, waá á sâ ó, mpeʼ yaá, yé páhaa nyá.

⁸ Mʉr dí ebe nyá, bé e waá dí esʉ médíbé nyá, bé ó jwɨʼ gwár. Nzyɛ̌m ódwe mʉ̂r myɛ́na ó, dû mpʉ̌ syɛ́ɛ́ nyé mʉr tɨ̂ʼ á séa yɨ́, yé á be yɨ́.

⁹ Ebě, bɨ̌h séá ó, ɨ́ mpúhlá nyɨ́h, ɨ́ syɛ́ɛ́ mé Nzyɛ̌m. Nó ó, bɨ̌n bɨɛ ó dí pemé mé Nzyɛ̌m. Bɨ̌n ntémé bé ó mpáh Nzyɛ̌m.

¹⁰ Metyɛʼ me mpóm mé Nzyɛ̌m ó b'á sâ ó, me séaa mpʉ swîm mimbɛ̌r yɨ́. Me á si tyêl nkan. Nyʉ́ʉ́ mʉ̂r nyɨɛ nzě sumo tɨ̂. Yé jala ó, mʉr nyɨnyɛ̂h sâʼ ocwóó ɨ́ mbǐ sumá nyé dí esumo wɨ́.

¹¹ Ebě, nkan mbɛ̌r mû ó sí tyɛ̂b. Nkan nyaá, nye ó dí Yésʉs-Krîst. Abe e mʉr dí e nkul ekǎ tyêl nyaá swîh.

¹² Bâʼ bʉ̂r, bé ósumo ɨ́ nkan nyaá ó e gʉ̂l, nkʉ̂ e nkóhó mɔnɨ́, nkʉ̂ e mekóʼ méntyɛnwa. Bʉ́ʉ́ bʉ̂r bɨ́ɛ, bé ósumo e bilɨ́, nkʉ̂ e mebʉ̌.

¹³ Syɛ́ɛ́ mʉ̂r nyɨnyɛ̂h dí eséa yɨ́, yé ónyɨ̂n ɨ́ ponó ɨ́ dʉ́ó lé étíʼ é mílɔ̌b, ebě, nyɔ̌m sá yɨ́yɛ̂h, wé ónyɨ̂n ɨ́ sʉ́lʉ́lʉ́ ó, ɨ́ móhó waá. Nyɔm tɨ̂, wé nyɨ́nyɨ́n ó, ɨ́ siʼe ngá lɛ̂ʼlě nyɔ̌m syɛ́ɛla mʉ̂r yɨ́. Syɛ́ɛla yé sí dûhwo yɨ́ɛ siʼe yaá nó, lɛ́ɛ́, syɛ́ɛla yaá, yé á kʉ be ó e nyɔm lɨ́ esú mé Nzyɛ̌m.

¹⁴ Yé bé mʉr á be ó sí sumo ɨ́ nkan e sá dí edûhwǒ siʼe mbɨ̂mbɨá yɨ́ nó, nye óbi myɛ́na mé tɨ̂.

¹⁵ Yé sí kǎ be ó, syɛ́ɛla mʉ̂r, yɨ́ díʼe ɨ́ siʼe yaá nó, mʉr waá ódímle myɛ́na mé ɨ́ jɔʼ yaá. Nyɨ́haá ósyɛbɔɔ ɨ́ siʼe. Sâ gwár, nye óbe ó mpʉ mʉ̂r á kpɛ́ɛ, ntaǎ siʼe nyá.

¹⁶ Nzê bɨ̌n bé agʉ́a ó, bɨ̌n kʉ́ bě tyeetye ó mpáh Nzyɛ̌m ɛ̌? Nzê bɨ̌n bé lɨ́ ejéʼe ó, Sísǐm mé Nzyɛ̌m, wɨ́ komlo ódiá wé ɨ́ bɨ̌n ɛ̌?

¹⁷ Mʉ̂r gbɛ́ɛ́ mpáh Nzyɛ̌m nyaá nó, Nzyɛ̌m dímle nyê, ebě, mpáh Nzyɛ̌m, nye ó sá dí ti yɨ́. Bɨ̌n ó dí mpáh nyé nyaá.

¹⁸ Mʉ̌r sá alêh. Mʉ̂r ɨ́ sɔ́má yɨ́n sí láa ó, nye ó twóó ɨ́ nkǒ páʼ bísá bí jɔʼ yɨ̂ʼ nó, nye nyɛ́ɛ dǐ gʉ̌. Nyé okǎ bi ócwóó ómpâ ɨ́ jɔʼ yaá.

¹⁹ Ebě, ocwóó ó sí yɨ̂, wé ó ogʉ̌ ɨ́ míh mé Nzyɛ̌m. Nó yê cɛmá ó: Nzyɛ̌m mɨ́mɛ́r ócwóó ó bʉ̂r ó, ɨ́ mpila ócwóó yɔ́ɔ́.

²⁰ Yê cɛmá ntémé ó: Dâ, nye lɨ́ egʉ́a ó, mipahlá mí ócwóó ó bʉ̂r, myé ó tʉ̂toʼó ɨ́ páʼ wé.

²¹ Nó, mʉ̌r sá amɛɛla ɨ́ páʼ bʉ̂r, ebě, sá yɨ́yɛ̂h, yé ó yaá yɨ́n:

²² Damá bě Pɔ̂l, Ápolos, Kefâs, sí, twiʼ, eswie, jɔʼ yɨ̂, bijɔʼ bi dí enze bí, tótôʼ: sá yɨ́yɛ̂h, yé ó yaá yɨ́n.

²³ Nó ó, bɨ̌n bɨɛ gúmó ó e Krîst. Krîst nyɨɛ gúmo e Nzyɛ̌m.