1 Korɛnt 2 - Kálar Nzyɛ̌m : Ejwán é Sáá

Lɔ́ɔ́ dí edumo e Yésʉs á dwe ɨ́ kolôs nyá

¹ Bɨ́ɔɔ́ bâm! Okɛ́l bâm! Ɨ́ jɔʼ mé á nze kwá nyɨ́n lɨ́ enzě pâʼla bɨ́n lwǐb ódîm mé Nzyɛ̌m yɨ́, me á bé alwib e mekǎn mé á be ɨ́ buú kɔbla má, nkʉ̂ e lwǐb ócwóó.

² Ebě, me á tíʼe ɨ́ lémé wâm ó, me ójaá lɛ́ɛ bɨ́n ó, njɨ sá dí edumo e Yésʉs-Krîst yɨ́, Yésʉs waá á dwe ɨ́ kolôs nyá.

³ Nó yaá ó mé á pyâl kwá nyɨ́n mpʉ̌ tyɛʼbol, lwɨ́ŋlá e bʉ́á le mesâʼ yɨ́.

⁴ Lɛ́ʼlá wâm ndu e lwibá mílɔ̌b mé Nzyɛ̌m wâm, byé á bé abe bílwǐb bi dí ɨ́ tɨ́ŋ le ocwóó ó sí yɨ̂ʼ bí. Sá yé á tíne bɨ̌n ó, bɨ̌n bûʼlaa lɛ́ʼlá waá yɨ́, yé á be ó, bisyɛ́ɛlǎ Sísǐm mé Nzyɛ̌m wé á sâ e nkul nyé bí.

⁵ Nó ó bɨ́n bé á nʉa pîm búʼó ɨ́ nkul dí eduho kwá mé Nzyɛ̌m nyɨ́, abe nyaá dí eduho lɨ́ ocwóó ó bʉ̂r nyɨ́ yɨ́.

Ocwóó mé Nzyɛ̌m

⁶ Ɨ́ jɔʼ bɨ́h dí elɛ̂ʼle bʉ̂r o mû sí tɔ́ma bá yɨ́, bɨ̌h bé lɨ́ edwe bé lɛ́ʼlá ócwóó. Mě damá lɛ́ɛ nó, lɛ́ʼlá waá, wé abe yɨ́ɛ waá dí lwɨ́ŋlá le ocwóó ó sí yɨ̂ʼ wɨ́. Wé abě lɛ́ʼlá bínkáatir bí sí yɨ̂ʼ dí edwe bʉ̂r wɨ́. Tó kœb ó, binkáatir byaá, byé mû ó kúno egbahɔɔ.

⁷ Bɨ̌h lɛ́ʼlé ó, ocwóó mé Nzyɛ̌m dí solá wɨ́. Wé ó sá Nzyɛ̌m á sol bʉr yɨ́. Nye dína apǎ kuho kʉ́ e sí, nye á boo tíʼe ɨ́ lémé wé ó, nyě dwé mɨ́ná gá ó ocwóó waá, ti e kûm tɨ̂.

⁸ Abe e yʉ́ʉ́ nkáatǐr sí yɨ̂ʼ, yé á gʉ́a ocwóó waá. Yé bé binkáatir byaá, byé á bě sí gʉ́a wé nó, lɛ́ɛ́, byé á bé abomlo Tî Yésʉs e binzâŋ, le ebɨ̂n nyé ɨ́ kolôs kʉ́. Nyɨɛ ó dí Tî dí e kûm nyá.

⁹ Tó kœb ó, yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Sá mʉ̂r ngwár dína apǎ jóʼo, nkʉ̂ bee yɨ́, sá mʉ̂r dí apǎ jwɨʼ ɨ́ lémé wé lʉ́ʉ́ dʉ́o yɨ́, Nzyɛ̌m á komlo yé ó, lɨ́ esú é bʉ̂r o dí ekpɛl nyé bá.

¹⁰ Mɨná gá ó dí baá Nzyɛ̌m á gwîh sá yɨ́yɛ̂h e nzɨ̌ Sísǐm wé bá. Sísǐm wé, wé ó dí egʉ́ǎ sá yɨ́yɛ̂h, damá jóʼo bíjwɨʼ mé Nzyɛ̌m bi dí nye ɨ́ lémé wé tʉ́ŋlʉ̌ bí.

¹¹ Ɨ́ nkǒ páʼ mʉ̂r, sá dí egʉ́a mípahlá mi mʉ̂r yɨ́, yé ó njɨ sísǐm wé dí ɨ́ nyʉ̂l nyé wɨ́. Nó ntémé, yé ó njɨ Sísǐm mé Nzyɛ̌m wé omér ó dí egʉ́a mípahlá mé Nzyɛ̌m.

¹² Mɨná gá bɨɛ, bé á bé abéɔɔ gá eleme e dí ejwɨ́ɨ̌ sí yɨ̂ʼ lɨ́. Mɨná bé á bi gá ó, Sísǐm dí eduho kwá mé Nzyɛ̌m wɨ́. Sá tɨ̂ʼ ó mɨ́ná ógʉ́a gá metʉ́m mɨ́mɛ̂h Nzyɛ̌m á lómlo mɨná gá má.

¹³ Bɨ̌h dwé bɨ́n ó, milɛ́ʼlá myaá. Bɨ̌h bé alwib e mekǎn mé ócwóó ó sí yɨ̂, njɨ e mekǎn Sísǐm mé Nzyɛ̌m dí edwe bɨ́h má. Nó yaá ó bɨ́h dí ekala bɨ́n milɛ́ʼlá Sísǐm mé Nzyɛ̌m dí enyɛɛ́ dwe bɨ́h mí yɨ́. Sísǐm waá ntémé ó dí edwe bɨ́h mekǎn bɨ́h jálá le elwib má.

¹⁴ Mʉr dí tʉ̂toʼó, abe e Sísǐm mé Nzyɛ̌m nyá, nyé abe e nkul ebi ótyeetye dí eduho e Sísǐm waá wɨ́. Wê nye ó ogʉ̌. Nyé abe e nkul egʉ́a wê, ebě, mʉ̌r jaá gʉ́a wé ó, njɨ ɨ́ lɔ̌b nkûl Sísǐm mé Nzyɛ̌m dí e nye nyɨ́.

¹⁵ Mʉr dí e Sísǐm mé Nzyɛ̌m nyá, óbɛ̌m tíʼě lɔ̌b sá yɨ́yɛ̂h. Sâ gwár, mʉr swîh abe e nkul etíʼě lɔ̌b wé.

¹⁶ Ebě, yê cɛmá ó: Nzé dí egʉ́a mípahlá mé Dâ? Nzé dí e nkul edwe nyé metwɨ́ɨ́? Tó kœb ó, mɨná gá bɨɛ ó dí e mipahlá mé Krîst ɨ́ miléme!