1 Korɛnt 14 - Kálar Nzyɛ̌m : Ejwán é Sáá

Baayogoyogo

¹ Sáŋáá gá nzɨ̌ ekpɛla. Gwɨ́mɨ́ɨ́ gá mindwéá Sísǐm mé Nzyɛ̌m dí entɨh mí, kʉ́ buú sahle ɨ́ ndwéá égwîh mílɔ̌b mé Nzyɛ̌m.

² Mʉr dí elwib báayogoyogo nyá, nyé alwib e bʉr o bé e boo nɔ́ɔ́ dí bá. Nyě lwǐb ó e Nzyɛ̌m, ebě, mʉr, nyé ajóʼǒ sá nyé dí elɛ́ɛ yɨ́. Nyě lɛ́ɛ́ ó, lwǐb ódîm, e nkul Sísǐm mé Nzyɛ̌m.

³ Tó kœb ó, ngwíha milɔ̌b mé Nzyɛ̌m nyɨɛ, nye ó dí elwib e bʉr o bé e boo nɔ́ɔ́ dí bá. Nye lɨ́ egbâ bé pîm ɨ́ búʼó, le etɨ́e bé, le epóblo bê.

⁴ Mʉr dí elwib báayogoyogo nyá, nye lɨ́ enʉa pîm ɨ́ búʼó yé nye mʉr tɨ̂. Tó kœb ó, mʉr dí egwîh mílɔ̌b mé Nzyɛ̌m nyá, nye lɨ́ egbâ pîm ɨ́ búʼó bʉ̂r ó Mbɛ̌r-Nzyɛ̌m.

⁵ Mě kpɛl ó, bɨ̌n lwíbɨɨ baayogoyogo. Nó ó, me ɨ́ buú kpɛl ó, bɨ̌n gwíhɨɨ milɔ̌b mé Nzyɛ̌m. Mʉr dí egwîh mílɔ̌b mé Nzyɛ̌m nyá, nyě e nyɔm, laa waá dí elwib báayogoyogo nyá. Alaa ó, mʉr díʼee e nkul epâʼlǎ sá nyé dí elɛ́ɛ ɨ́ lwǐb ayogoyogo yaá yɨ́. Nó ó bʉ̂r ó Mbɛ̌r-Nzyɛ̌m bɨ́bɛ̂h, bé ónʉa pîm ɨ́ búʼó yɨ́.

⁶ Bɨ́ɔɔ́ bâm! Okɛ́l bâm! Símsáá gá sɨ̂: jɔʼ mé ngá báʼǎ nze gʉ̂ʼ kwá nyɨ́n yɨ́, mé ójaá lwilwib e bɨ̌n njɨ baayogoyogo nó, wáǎ nyɔm bɨ́n ódira e me wɨ́ ɛ́? Me ábá be bɨ́n e nyɔm, alaa ó, mě gwíh bɨ́n ó, milɔ̌b mi dí eduho kwá mé Nzyɛ̌m mí. Myé ó mî: edwán é lɛ́ʼlá, nkʉ̂ ngwɨ́á ótyeetye, nkʉ̂ milɔ̌b mé Nzyɛ̌m, nkʉ̂ gúú lɛ́ʼlá swîh.

⁷ Mɨná nʉ́aa gá mveʼle e bibomabomaa mpʉ̌ ndie nkʉ̂ mpêr. Byé bé agwá pyêl bílwǐb byɔ́ɔ́ nó, bʉr, bé ójóʼo twíí lwǐb yɔ́ɔ́ nyá?

⁸ Mʉ̂r lʉ́ó sébé, nye l'agwá pyêl twíí sébé kʉ́ nó, onzé ókʉmsa dɔ̂m?

⁹ Jwɨʼ gwár e gwár yaá, bʉr, bé e nkul ejóʼǒ lwǐb yɨ́n nyá? Sá yɨ́yɛ̂h bɨ́n ólwib ɨ́ jɔʼ bɨ́n dí elwib báayogoyogo yɨ́, yé bé yé abe ɨ́ kpâhla nó, lɛ́ɛ́, bé ákóʼó jóʼo bá sɔ̂ʼ. Bɨ̌n bé ójaá tʉtoʼwa ó toʼwáa.

¹⁰ Bilwǐb, byê ɨ́ sí yɨ̂ʼ ó, mimbi mimbi. Abe e yʉ́ʉ́ dí tɨ̂, dí abe lɨ́ elɛ́ɛ̌ titii sɔ̂ʼ.

¹¹ Mé bé ajóʼǒ lwǐb bé dí elwib e me yɨ́ nó, go ó, mʉr dí elwib e me ɨ́ lwǐb yaá nyá, nye me ó mpʉ mʉ̂r ayogoyogo. Mɛm ntémé nyɨɛ mpʉ mʉ̂r ayogoyogo.

¹² Nó mpʉ bɨ́n dí egbâ ményʉ́l mɨ́n, ó bɨ̌n bi ó mindwéá mé Sísǐm mé Nzyɛ̌m yɨ́, sáŋáá gá myé bé. Diʼee gá milwɨ́ŋlá. Buú sáa gá mindwéá mi dí egbâ Mbɛ̌r-Nzyɛ̌m pîm ɨ́ búʼó mí.

¹³ Sɨ́ǎ yaá ó dí ó, mʉr dí elwib báayogoyogo nyá, jala ó, jɨʼla e Nzyɛ̌m ó, nye dwêʼ nye ntémé pɨʼ epâʼla bílwǐb byaá.

¹⁴ Mé jɨ́ʼlá ɨ́ lwǐb ayogoyogo nó, lɛ́ɛ́, sísǐm wâm, wé ó ɨ́ minjɨʼla. Sâ gwár, pɨʼ nyǎm, nyé agúmo bá mpúmó, duho tɨ̂.

¹⁵ Nó ó, me ósâ nyá? Me ójɨjɨʼla e Nzyɛ̌m e sísǐm wâm lɨ́ elwib báayogoyogo. Me ntémé, me ójɨʼla e né ó e pɨʼ nyǎm, ɨ́ lwǐb yâm. Me ódyɛɛ méjéme e sísǐm wâm. Me ódyɛɛ ntémé ó e pɨʼ nyǎm.

¹⁶ Gó ódwě Nzyɛ̌m kûm ɨ́ lwǐb ayogoyogo nó, mʉr dína apǎ ntaǎ tyé mpʉ́n nyá, nye ákóʼó lɛ́ɛ «Amɛn», ebě, nzé ójóʼǒ sá gô lɛ́ɛ́ yɨ́?

¹⁷ Gǒ damá dwě Nzyɛ̌m nzyǒo ɨ́ minjɨʼla myaá, abe e mʉr ónʉa pîm ɨ́ búʼó ɨ́ lɔ̌b mínjɨʼla myô myaá.

¹⁸ Nzyǒo e Nzyɛ̌m, ebě, me lɨ́ ebuú lwib báayogoyogo, laa bɨ́n óbɛ̂h.

¹⁹ Sâ gwár, ɨ́ jɔʼ bɨ́h e bʉr ó Mbɛ̌r-Nzyɛ̌m dí ɨ́ gwɨ́hlá yɨ́, mě kpɛ̌l ó, me lwíbɨɨ mekǎn metɛ̂n me dí eduho ɨ́ pɨʼ nyǎm, maá bʉ̂r dí e nkul ejóʼo má, laa ó, me lwíbɨɨ mekǎn otɔ́ɔ́sin kám ɨ́ lwǐb ayogoyogo. Ɨ́ mbi waá ó mé ngá dwe bʉ́ʉ́ bʉ̂r milɛ́ʼlá wɨ́.

²⁰ Bɨ́ɔɔ́ bâm! Okɛ́l bâm! Ayɨ́ kǎ pahle gá mpʉ bwá ó ntwǒm. Bɨ̌n bé óbɛ̌m baŋa bwá ó ntwǒm ɨ́ mpʉ bé dí asâ ébébe é léme yɨ́. Sâ gwár, ɨ́ nkǒ páʼ mípahlá mín míɛ, diʼee gá mpʉ ótɔ́má bʉ̂r.

²¹ Ebě, metié mé Moyɨ̂z, mé lɛ́ɛ́ ó: «Dâ Nzyɛ̌m lɛ́ɛ́ ó: “Me ólwib e bʉr bâʼ ó, ɨ́ lwǐb ayogoyogo. Me ólwib e bé ó, cɨcɨɨ e bilwǐb bi bʉ̂r oswîh.” Damá jóʼo nó, bé ákpɛl éjóʼo mê.»

²² Ɨ́ tɨ̂ʼ ɨ́, lwǐb ayogoyogo, yé ó mveʼle, sá dí elɛ̂ʼle ó, Nzyɛ̌m ó mû lɨ́ elwib le ohááden yɨ́. Nyé alwib e mbûʼla e nzɨ̌ lwǐb yaá. Ɨ́ jɔʼ nyé mû lɨ́ elwib le obûʼla yɨ́, nyě lwǐb e bé ó, cɨɨ e ngwíha milɔ̌b wé. Ndwéá égwîh mílɔ̌b myé, wé ó, lɨ́ esú lé óbûʼla. Wê ɨ́ páʼ wɔ́ɔ́ ó, dweʼle: sá dí elɛ̂ʼle ó, Nzyɛ̌m ó mû lɨ́ elwǐb nɨ̌ yɨ́.

²³ Bʉ̂r ó Mbɛ̌r-Nzyɛ̌m bɨ́bɛ̂h gwɨ́hlá ɨ́ gúú mbɛ̌r, bê nzě nyɛl élwib bílwǐb báayogoyogo nó, yé ósûʼla nyá? Mʉ̂r dína lɨ́ ejéʼě búʼó gá yɨ́ná nyá, nkʉ̂ hááděn ní mbɛ̌r waá, kœb bɨ́n téme elwib bílwǐb byaá nó, mʉr waá ámû jaá pɨpahlě sɔ̂ʼ ó, njɨ bɨ̌n mû ó lɨ́ ekáa ógʉ̌.

²⁴ Tó kœb ó, bɨ́n óbɛ̂h gwíh mílɔ̌b mé Nzyɛ̌m nó, hááden nkʉ̂ njéʼe-Nzyɛ̌m, ónî nó, milɛ́á mín mímyɛ̂h myaá, myé ólɛ̂ʼle mʉ̂r waá ɨ́ kpɛŋlɛm ó, nye ó syɛ̂l misyóm. Bɨ̌n bɨ́bɛ̂h, bé ódwe nyé mebě.

²⁵ Bijwɨʼ bí lémé wé, byé ógwíhǎ kʉ̌l. Nyé okúrwo sí, píʼe mpóm ɨ́ bibwǎh ɨ́ míh mɨ́n, lɨ́ edwě Nzyɛ̌m kûm. Nye ólɛ́ɛ ó: «Nzyɛ̌m kʉ́ bě tyeetye ó ɨ́ sɔ́má yɨ́n.»

Bigwɨ́hlá bí Mbɛ̌r-Nzyɛ̌m

²⁶ Bɨ́ɔɔ́ bâm! Okɛ́l bâm! Mɨná bé ókǎ lɛ́ɛ gá nyá? Jɔʼ bɨ́n dí egwɨ̂hla yɨ́, nyâʼ mʉ̂r, nye ó e jɨ́m nyé ódyɛɛ yɨ́. Nyʉ́ʉ́, e lɛ́ʼlá nyé ódwe wɨ́. Nyʉ́ʉ́, e gúú solá sɔ̂ʼ nyé ógwîh wɨ́. Nyʉ́ʉ́, nyě e lɔ́ɔ ɨ́ lwǐb ayogoyogo. Nyʉ́ʉ́, nyě e nkul epâʼlǎ sá lwǐb ayogoyogo yaá dí elɛ́ɛ yɨ́. Yé jala ó, syɛ́ɛla yaá yɨ́yɛ̂h gbâʼ Mbɛ̌r-Nzyɛ̌m pîm ɨ́ búʼó.

²⁷ Bé lwíb báayogoyogo nó, bʉr o lwíb bílwǐb byaá bá, bé díʼee njɨ bʉr obá, nkʉ̂ bʉr olɛ̂l. Mʉr nyɨnyɛ̂h ólwǐb lwǐb ayogoyogo yé yaá ó, ɨ́ yé jɔʼ. Nyʉ́ʉ́ mʉ̂r ópâʼla bílwǐb báayogoyogo byaá.

²⁸ Pɛ̂ʼla bilwǐb óbe, abe ɨ́ gwɨ́hlá Mbɛ̌r-Nzyɛ̌m yaá nó, mʉr sɔ́má yɨ́n dí elwilwib báayogoyogo nyá, nye díʼee ɨ́ puuu. Nye lwíbɨɨ njɨ ɨ́ lémé wé tʉ́ŋlʉ̌, Nzyɛ̌m nye omér lɨ́ ejóʼo.

²⁹ Ogwíha o mílɔ̌b, bé lwíbɨɨ obá, nkʉ̂ olɛ̂l. Bʉ́ʉ́ bʉ̂r oswîh, bé okǎ pahle mílɛ́á myɔ́ɔ́ myaá, bé nkʉ̂ gʉ́ǎ nyɔm dí tɨ̂ʼ wɨ́.

³⁰ Sâ gwár, Nzyɛ̌m ólɛ̂ʼle nyʉ́ʉ́ mʉ̂r sá nyé ɨ́ jala le egwîh ɨ́ Mbɛ̌r-Nzyɛ̌m yɨ́ nó, waâ bɨbé tîtyěl lɨ́ elwib nyá, nye díʼee sí ɨ́ puuu, jôʼlǒ sá mʉ̂r waá ólɛ́ɛ yɨ́.

³¹ Sɨ́sáʼ gá nó, ebě, bɨ̌n bé e nkul egwîh mílɔ̌b mé Nzyɛ̌m mʉr ngúngwár, lɨ́ esú ó bʉr bɨ́bɛ̂h, bé jɨ́ʼɨɨ milɛ́ʼlá, bʉr bɨ́bɛ̂h lɨ́ ebi nkûl ɨ́ milémé myɔ́ɔ́ tɨ̂.

³² Ngwíha milɔ̌b nyɨnyɛ̂h, nyě e sísǐm dí esâ ó, nye gwíhɨɨ milɔ̌b mé Nzyɛ̌m wɨ́. Sísǐm waá wɨ́ɛ, wé lɨ́ esâ nyé mejóʼo.

³³ Ebě, Nzyɛ̌m á bé ajébe mʉ̂r ó, nye tíʼaa tʉ́ŋlʉ̌ oleŋéleŋé. Nye á jébe nye ó, nye tíʼaa ɨ́ mepyɛbla.

³⁴ Mbɛ̌r-Nzyɛ̌m ɨ́ gúmó yɨ́yɛ̂h, wê e mpéné ó, bʉbá sá alwib ɨ́ bigwɨ́hlá bí Mbɛ̌r-Nzyɛ̌m. Bé abe e nkul lwîb. Bé ɨ́ jala le edi ó, njɨ ɨ́ jwɨ́ɨ́ bʉ́ʉ́ bʉ̂r, dû mpʉ métié mé Nzyɛ̌m dí etɨ́e yɨ́.

³⁵ Mʉ́má sí gwɨ̂m édweŋɔɔ gúú lɛ́ʼlá nɛ́ɛ: nye díʼee njʉ̂m wé ɨ́ mbɛ̌r wɔ́ɔ́. Yé ɨ́ buú sâ sôn lɨ́ ebee mʉ́má lɨ́ elwib ɨ́ gwɨ́hlá Mbɛ̌r-Nzyɛ̌m.

³⁶ Nzê bɨ̌n ó b'á táare lɔ̌b étúno bʉ̂r lɔ́ɔ́ mé Nzyɛ̌m ɛ̌? Nzê lɔ́ɔ waá, wé á jaa túnɔɔ ó, njɨ bɨ̌n e bɨ̌n ɛ̌?

³⁷ Mʉ̂r sí bee ó, nye ó ngwíha milɔ̌b mé Nzyɛ̌m nó, nkʉ̂ ntɔ̂ʼ ó, nyé óbe, nye mû lɨ́ ebee ó, nyě e ndwéá dí eduho e Sísǐm mé Nzyɛ̌m wɨ́ nó, nye e gʉ́á ntémé ɨ́ pébébé ó, sá mê cɛmá bɨ́n wâʼ kʉ́ yɨ́, yé ó etié Tî gá wɨ́ná Yésʉs mʉr tɨ̂ʼ á tyêl mɨná gá lɨ́.

³⁸ Mʉ̂r óbe, akǎm lɛ́á wâm waá nó, agbâ gá nye ɨ́ nkɔb.

³⁹ Bɨ́ɔɔ́ bâm! Okɛ́l bâm! Gwɨ́má yɨ́n, yé díʼee njɨ ó, bɨ̌n gwíhɨɨ milɔ̌b mé Nzyɛ̌m. Sá akamle gá bʉr lɨ́ elwib bílwǐb báayogoyogo.

⁴⁰ Sá yɨ́yɛ̂h, yé syɛ́yɨɨ mpʉ dí ejala yɨ́, ɨ́ medile tʉ́ŋlʉ̌.