1 Korɛnt 12 - Kálar Nzyɛ̌m : Ejwán é Sáá

Mindwéá mí Sísǐm mé Nzyɛ̌m

¹ Bɨ́ɔɔ́ bâm! Okɛ́l bâm! Ɨ́ nkǒ páʼ míndwéá Sísǐm mé Nzyɛ̌m dí entɨh mɨ́ná gá mí, mě kpɛ̌l ó, bɨ̌n gʉ́ŋaa lɔ̌b waá ɨ́ pébébé.

² Bɨ̌n bé lɨ́ egʉ́a ó, ɨ́ jɔʼ bɨ́n á be ohááden yɨ́, bɨ̌n bé á be ó lɨ́ edû bíkpɛʼkpɛ̂ʼ bí ónzyɛ̌m bi dí baányâ-emúmó bí. Byé á tíne bɨ̌n ɨ́ jɔʼ yaá ó, bɨ̌n sâʼ syɛ́ɛla yɨ́yɛ̂h byé á kpɛl yɨ́.

³ Nó ó, me múo nzě cɨ̂l bɨ́n ɨ́ pâʼ waá: abe e mʉr dí elwib e nzɨ̌ Sísǐm mé Nzyɛ̌m, dí e nkul elɛ́ɛ ó: «Yésʉs, nyé e meswomlʉ!» Le ntémé ó, Sísǐm mé Nzyɛ̌m bé abe tʉ́ŋlʉ̌ mʉr nó, mʉr waá, nyé abe e nkul elɛ́ɛ ó: «Yésʉs ó dí Njwɨ́ɨ!»

⁴ Yé ɨ́ buo mímbi míndwéá Sísǐm mé Nzyɛ̌m dí edwe bɨ́n mí. Sâ gwár, Sísǐm wɨ́ɛ njɨ ngwár.

⁵ Yé ɨ́ buo mímbi bísyɛ́ɛ́ mɨ́ná dí eséa gá bí. Sâ gwár, mɨná séá gá bisyɛ́ɛ́ byaá ó, lɨ́ esú é Njwɨ́ɨ ngwár.

⁶ Yé ɨ́ buo mímbi bísyɛ́ɛlǎ Nzyɛ̌m dí e nkul esâ ɨ́ bʉr bí. Tó kœb ó, Nzyɛ̌m ngwár e ngwár waá ó dí esâ bíbyɛ̂h ɨ́ bʉr bé bɨ́bɛ̂h.

⁷ Mʉr nyɨnyɛ̂h, nyě e ndwéá Sísǐm mé Nzyɛ̌m wé á ntɨh nye ó, nye tôʼ kɛm bʉ̂r e tɨ̂ʼ wɨ́.

⁸ Sísǐm ntɨh nyâʼ mʉ̂r ndwéá ó, nye díʼee le ocwóó ɨ́ melab mé. Sísǐm ngwár waá, wé lɨ́ edwe nyʉ́ʉ́ mʉ̂r ngwɨ́á ɨ́ bisá nyé dí elwib bí.

⁹ Sísǐm ngwár waá ntémé, wé lɨ́ edwe nyâʼ mʉ̂r búʼó; dwe nyʉ́ʉ́ mʉ̂r nkul etiʼ mímbêl.

¹⁰ Sísǐm mé Nzyɛ̌m, nye lɨ́ edwe nyâʼ mʉ̂r nkul esâ mésimá; dwe nyʉ́ʉ́ mʉ̂r nkul egwîh mílɔ̌b mé Nzyɛ̌m. Nye lɨ́ edwe nyʉ́ʉ́ mʉ̂r nkul egbâ mímbɔ́ʼ páʼ wɨ̂ʼ mbǐ sísǐm, bé e gúú mbǐ sísǐm. Nye lɨ́ edwe nyʉ́ʉ́ mʉ̂r nkul elwib báayogoyogo. Nyě dwé nyʉ́ʉ́ mʉ̂r pɨʼ ó, nye pâʼlaa sá mʉ̂r waá lɛ́ɛ́ ɨ́ lwǐb ayogoyogo yaá yɨ́.

¹¹ Sísǐm ngwár e ngwár waá ó dí esâ bísyɛ́ɛla byaá bíbyɛ̂h. Sísǐm waá ntɨ́h mʉ̂r nyɨnyɛ̂h ndwéá wé ó mpʉ nyé kpɛ̂l yɨ́.

Nyʉ̂l mpwár, bitîl ɨ́ buo buo

¹² Nyʉ̂l, nye ó njɨ mpwár, damá jóʼo nyé dí e bitîl ɨ́ buo buo. Bítíl bí nyʉ̂l, byé damá buo, byé yɨ́ɛ ó lɨ́ esâ nyʉ̂l mpwár. Krîst, nye ó jwɨʼ gwár yaá.

¹³ Mɨná gá óbɛ̂h, oYúden, nkʉ̂ bʉr o bíkûl biswîh; bitúʼǎ, nkʉ̂ onzyɛh o bʉ̂r, mɨná bé á si duŋɔɔ, ntɔ̂ʼ kǎ di nyʉ̂l mpwár e nzɨ̌ Sísǐm ngwár. Sísǐm ngwár ó b'á nze di ɨ́ milémé gá míná.

¹⁴ Nyʉ̂l, nyé abě tîl gwár. Nye ó bitîl ɨ́ buo buo.

¹⁵ Kʉ̌, wé ólɛ́ɛ ó: «Mé abě mbô. Nó ntémé ó, mé abě tíl nyʉ̂l» nó, wé ádi, abě tíl nyʉ̂l ɨ́ lɔ̌b lɔ́ɔ waá.

¹⁶ Égwǎl, lé ólɛ́ɛ ó: «Mé abe dîh. Mé abě tíl nyʉ̂l» nó, lé ádi, abě tíl nyʉ̂l ɨ́ lɔ̌b lɔ́ɔ waá.

¹⁷ Yé bé nyʉ̂l nyɨnyɛ̂h, nye ó njɨ dîh e dîh nó, nye á gwa jʉjóʼo nyá? Yé bé nye á be ó njɨ egwǎl le egwǎl nó, nye á gwa jóʼo menumó nyá?

¹⁸ Lɨ́ otyeetye, Nzyɛ̌m á gbâ bitíl bíbyɛ̂h ɨ́ nyʉ̂l ó mpʉ nyé á kpɛl yɨ́.

¹⁹ Yé bé nyʉ̂l á be ó njɨ tîl gwár nó, mpa nyʉ̂l á bé abe e nkul ebe.

²⁰ Bitíl bí nyʉ̂l, byé ó, ɨ́ buo. Nyʉ̂l nyɨɛ yɨ́ɛ mpwár.

²¹ Dîh, lé abe e nkul elɛ́ɛ e mbô ó: «Mé agwɨ̂m sɔ̂ʼ e go!» Lʉ̂, wé abe e nkul elɛ́ɛ e mekʉ̌ ó: «Mé agwɨ̂m yʉ́ʉ́ sɔ̂ʼ e bɨ̌n!»

²² Tó kœb ó, bitíl bí nyʉ̂l mɨ́ná dí epyêh gá bí, byé ó dí e nyɔm ɨ́ nyʉ̂l mʉr.

²³ Bitíl bí nyʉ̂l mɨ́ná dí ebuú bee gá ó, byé ó, abe e dúu bí, byé ó mɨ́ná dí ebuú komlo gá, laa byúú. Bitíl bí nyʉ̂l bi dí esâ mɨ́ná gá sôn bí, byé ó dí ebi kûm.

²⁴ Byaá dí asâ mɨ́ná gá sôn bí bíɛ, byé agwɨ̂m sɔ̂ʼ. Nzyɛ̌m á komlo nyʉ̂l ó, dwe kûm ɨ́ bitîl bi dí esâ mɨ́ná gá sôn bí.

²⁵ Nó, mpɔ́ʼá menkɔ̌m, nyé abe ɨ́ nyʉ̂l. Bitíl bí nyʉ̂l bíbyɛ̂h, byé lɨ́ ecwɨ́ɨlǎ páʼ nyɔ́ɔ́.

²⁶ Tíl nyʉ̂l gwár bé lɨ́ ebǐ túú nó, byúú bíbyɛ̂h, byé ósia e túú waá ntémé. Yʉ́ʉ́ tîl bé lɨ́ edweŋɔɔ kûm nó, bé e byúú bítíl bíbyɛ̂h, byé ósoho.

²⁷ Bɨ̌n bɨ́bɛ̂h, bé ó nyʉ̂l mé Krîst. Mʉr nyɨnyɛ̂h dí ɨ́ sɔ́má yɨ́n nyá, nye ó tíl nyʉ̂l nyaá.

²⁸ Nó ó, Nzyɛ̌m á tyêl bʉr ɨ́ Mbɛ̌r-Nzyɛ̌m ó, mbi wɨ̂: ɨ́ tyé ésôʼ, bʉr o mílʉ́mlʉ́ mé Yésʉs; ɨ́ tyé mbá, ogwíha o mílɔ̌b; ɨ́ tyé lɛ̂l, olɛ̂ʼla. Píe tɨ̂, nye á tyêl ó: osyɛ̂l o mésimá, ojomo o bʉ̂r, osúʼa, ojwɨ́ɨ ó Mbɛ̌r-Nzyɛ̌m, le baá o dí elwib báayogoyogo bá.

²⁹ Ntʉ bɨ́bɛ̂h dí bʉr o mílʉ́mlʉ́, nkʉ̂ ogwíha o mílɔ̌b, nkʉ̂ olɛ̂ʼla, nkʉ̂ osyɛ̂l o mésimá,

³⁰ nkʉ̂ ojomo o bʉ̂r. Ntʉ bɨ́bɛ̂h dí elwib báayogoyogo, nkʉ̂ pâʼlǎ sá bé dí elɛ́ɛ ɨ́ lwǐb ayogoyogo yaá yɨ́.

³¹ Gwɨ́mɨ́ɨ́ gá mindwéá mi dí ejala le edweŋɔɔ kûm nɨ́nɨ́ɨ́ mí. Me múo nzě lɛ̂ʼle bɨ́n nzɨ̌ swîh dí elaa ménzɨ̌ ménɨ̌ mɨ́mɛ̂h nyɨ́.