1 Korɛnt 10 - Kálar Nzyɛ̌m : Ejwán é Sáá

Syɛ́hláá gá bikpɛʼkpɛ̂ʼ bí ónzyɛ̌m

¹ Bɨ́ɔɔ́ bâm! Okɛ́l bâm! Mě kpɛl ó, bɨ̌n gʉ́ŋaa sá yé á syɛ́ɛ kwá bimpám bíh yɨ́ ɨ́ pébébé. Byé á titye e Moyɨ̂z ó, sí dwiné. Bɨ́bɛ̂h, bé á si ntaa mâŋ e mekʉ̌.

² Bɨ́bɛ̂h, bé á si pûhla e Moyɨ̂z ɨ́ jɔʼ bé á tye sí dwiné, le ɨ́ jɔʼ bé á ntaa mâŋ yɨ́. Tɨ̂ʼ ó bé á nze duŋɔɔ ɨ́ Moyɨ̂z.

³ Mede mempwár Sísǐm mé Nzyɛ̌m wé á ntɨh bé má, bɨ́bɛ̂h, bé á bě sí de mê.

⁴ Bɨ́bɛ̂h bɛble médíbé mémpwár Sísǐm mé Nzyɛ̌m wé á ntɨh bé má. Bé á bɨbɛble medíbé ó, maá mé á gʉgʉ̂ lɨ́ ekóʼ Nzyɛ̌m á ntɨh bé lɨ́ má. Ekóʼ laá, lé á titye ó e bê. Nó ó, ekóʼ laá, lé á be ó Krîst.

⁵ Damá jóʼǒ mpʉ bé á duŋɔɔ ɨ́ Moyɨ̂z nó yɨ́, bʉr ɨ́ buo buo ó sɔ́má yɔ́ɔ́, bé á bé abě mbɨ̂mbɨá ɨ́ míh mé Nzyɛ̌m. Sâ yaá ó bɨ́haá, bé á síe lɨ́ edwe ɨ́ lʉá yɨ́. Mesoo mɔ́ɔ́ mɨ́ɛ lɨ́ epúŋɔɔ ɨ́ lʉá e lʉá wɛ̂h.

⁶ Bisyɛ́ɛla byaá, byê mɨná gá ó, sá dí ecɨ̂l mɨ́ná gá yɨ́, ó mɨná ayɨ́ be gá e bibébebébe bígwɨ́má mpʉ bé á be e byé yɨ́.

⁷ Yé ajala ó, bɨ̌n báʼa dwe bíkpɛʼkpɛ̂ʼ bí ónzyɛ̌m kûm mpʉ bʉ́ʉ́ bʉ̂r ó sɔ́má yɔ́ɔ́, bé á sɨsâ yɨ́. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Bʉr, bé á be ɨ́ di sí, nzě deŋɔɔ méde le menyoʼ; mɔwɔɔ sí, bwalɔɔ ménzɔɔ lɨ́ edwe bíkpɛʼkpɛ̂ʼ bí ónzyɛ̌m byɔ́ɔ́ kûm.

⁸ Mɨná bé ayɨ́ sâ gá bimolá mpʉ bʉ́ʉ́ bʉ̂r ó sɔ́má yɔ́ɔ́, bé á sâ yɨ́. Bʉr otɔ́ɔ́sin mekám mébá le olɛ̂l, bé ntɔ̂ʼ dwe ɨ́ móhó ngwár, lɨ́ ebúra e syɛ́ɛla yaá.

⁹ Mɨná bé ajala le ebóblo gá Krîst mpʉ bʉ́ʉ́ bʉ̂r ó sɔ́má yɔ́ɔ́, bé á sâ yɨ́. Onyʉ́a nzě lʉ̂ bê, bé ntɔ̂ʼ sîl édwe.

¹⁰ Ayɨ́ lwib gá ɨ́ bébe bébe, dumo e Nzyɛ̌m mpʉ bʉ́ʉ́ bʉ̂r ó sɔ́má yɔ́ɔ́, bé á lwilwib yɨ́. Éngeles eswie ntɔ̂ʼ jʉ̂ bê.

¹¹ Bé á bɔma e bisyɛ́ɛla byaá ó, lɨ́ ecɨ̂l bʉ̂r. Bʉ́ʉ́ bʉ̂r nzě cɛma byé ɨ́ Mekaná mé Nzyɛ̌m ó, mɨná líʼɨɨ gá le epahle byê. Yé ó lɨ́ esú ó, mɨná gʉ́ŋaa gá sá mɨ́ná jálá le esyɛ̂hle gá yɨ́, mɨná gá bɨɛ, bʉr o dí ebeě mpʉ sí yɨ̂ʼ mû lɨ́ ekumo lɨ́ eswéhlɨ́ yɨ́ bá.

¹² Nó, mʉr dí ebúʼla ó, nye ó tîtyěl ɨ́ lyahwó nyá, nye díʼee le ocwóó, lɨ́ ekpɛ́ɛ ó, nye ámû jaá twe!

¹³ Mebʉ́blá bɨ́n á ntaa má, mé lɨ́ epyâl bɨ́n e bʉr bɨ́bɛ̂h. Tó kœb ó, Nzyɛ̌m, nye ó mʉr jálá le ebúʼlɔɔ nyá. Nye ábîr ó, bɨ̌n bóblɔɔ, tó pyâl ɨ́ jɔʼ bɨ́n ósâ syóm yɨ́. Jɔʼ mébʉ́blá, mé ópipyâl bɨ́n yɨ́, nye ókar bɨ́n nzɨ̌ swîh. Bɨ̌n bé odyɛ̂l tɨ̂, le esyɛ̂hle mísyóm bɨ́n á gwa sâ mí.

¹⁴ Sá tɨ̂ʼ ó bɨ́n jálá le esyɛ̂hle bíkpɛʼkpɛ̂ʼ bí ónzyɛ̌m yɨ́, bʉr ó kpɛ̌l bâm! Adwe gá byé dúu.

¹⁵ Mě lwǐb e bɨ̌n ó mpʉ mʉ̂r jálá le elwib e mipɨpɨ́ʼ mi bʉ̂r yɨ́. Bɨ̌n bʉr o tɨ̂, pahlaa gá sá mé dí elɛ́ɛ yɨ́!

¹⁶ Bélé ményoʼ gá yɨ́ná, yê nyá? Yê mɨná gá ó nzɨ̌ Nzyɛ̌m dí esʉ mɨ́ná gá metyɛʼ me mpóm mé e tɨ̂ʼ nyɨ́. Mɨná bé lɨ́ edwe gá nye nzyǒo ɨ́ lɔ̌b béle yaá. Ɨ́ jɔʼ mɨ́ná dí ede gá menyoʼ me tɨ̂ʼ yɨ́, mɨná bé lɨ́ esyɛŋa gá lɨ́ enʉa nkɔ̂b ɨ́ metié mé Krîst. Blêr mɨ́ná dí epɛ̂ʼla gá ɨ́ jɔʼ mɨ́ná dí ede gá yɨ́, tɨ̂ʼ ó mɨ́ná dí esyɛŋa gá lɨ́ enʉa nkɔ̂b ɨ́ nyʉ̂l mé Krîst yɨ́.

¹⁷ Blêr, yé ó njɨ gwár. Mɨná damá buo gâ, mɨná gá bé yɨ́ɛ ó nyʉ̂l mpwár, ebě, mɨná gá bé ó e nkɔb ɨ́ blêr gwár.

¹⁸ Bʉr o b'Ɨ́zraɛ̂l, baá o dí ebyɛ̂l nó ɨ́ nkǒ páʼ bípúno bá, beyɨɨ gá mpʉ bé dí esâ yɨ́: bʉr o dí ede ótír mû sí tíʼɔɔ, dweŋɔɔ̌ Nzyɛ̌m bá, bé sisyɛŋǎ e Nzyɛ̌m ó, lɨ́ edɨ́ɨ́ laá.

¹⁹ Me lɛ́yɨɨ yé? Nzê tír á pa baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá, nye ó nó tyeetye ɛ̌? Nzê bikpɛʼkpɛ̂ʼ bí ónzyɛ̌m, byé ó tɨ̂ʼ tyeetye ɛ̌?

²⁰ Heʼé, mě kʉ́ lɛ́ɛ ó, sá bʉ̂r dí edwe kûm, cɨɨ e mindwéá myaá yɨ́, yé ó njɨ meleme; ntʉ̌ Nzyɛ̌m bé dí edwe kûm. Mé akpɛl ó, bɨ̌n e meleme syɛ́ŋaa lɨ́ epûhla mébô gúmo gwár.

²¹ Bɨ̌n bé abe e nkul edě bélé ményoʼ mé Tî Yésʉs, le ede ntémé yaá méleme. Bɨ̌n bé abe e nkul ede méde mé Tî Yésʉs ndu e maá méleme.

²² Nzê ó, mɨná bé lɨ́ edǐ sâ gá ó, Nzyɛ̌m táaraa ebaʼ gá mɨná ɛ̌? Nzê bɨ̌n bûʼlá ó, mɨná ó dí elaa gá nye ɨ́ nkul ɛ̌?

Mʉ̌r jálá le eséa ó, njɨ lɨ́ esú lé ébeʼ kûm mé Nzyɛ̌m

²³ Bʉ́ʉ́ bʉ̂r, bé lɛ́ɛ́ ó: «Mɨná bé e nkul esâ gá sá yɨ́yɛ̂h.» Yé ó nó. Sâ gwár, ntʉ̌ sá yɨ́yɛ̂h dí e nyɔm. «Mɨná bé e nkul esâ gá sá yɨ́yɛ̂h.» Yé ó nó. Sâ gwár, ntʉ̌ sá yɨ́yɛ̂h dí e nkul etyen bʉ̂r lɨ́ esóʼ é nzɨ́ mbɨ̂mbɨá.

²⁴ Mʉ̌r sá asáǎ nyɔm wé. Mʉr sáŋaa sá dí e nyɔm lɨ́ esú é bʉ́ʉ́ bʉ̂r yɨ́.

²⁵ Déʼ gá sá yɨ́yɛ̂h bé dí ebɛ́ma ɨ́ pátele yɨ́, abe e tíá ɨ́ milémé mín!

²⁶ Ebě, yê cɛmá ó: Sí ndu e sá yɨ́yɛ̂h dí tɨ̂ʼ yɨ́, yé gúmó ó e Dâ.

²⁷ Hááden sí jébe gó ó, go tôʼ, tó dě dína ɨ́ mbɛ̌r wé nó, gó ókam étô nó, go e dé sá yɨ́yɛ̂h nyé ódwe gó yɨ́, anʉa nkɔ̂b ɨ́ mipahlá mí lémé gô.

²⁸ Nyʉ́ʉ́ mʉ̂r ká gwîh gó ó: «Tír nyâʼ baŋɔɔ ó, ɨ́ nzaá bikpɛʼkpɛ̂ʼ bí ónzyɛ̌m» nó, akǎ báʼǎ de nyê. Go ɨ́ jala le ebîr tír waá, akǎ de nyé ó, lɨ́ esú lé écwɨ́a e mʉr á boʼlo lɔ̌b waá nyá. Go ɨ́ jala le edû mípahlá mí léme.

²⁹ Mé alɛ́ɛ ó, go dúʼoo mipahlá mí lémé gô. Mě lɛ́ɛ́ ó, go dúʼoo myaá mí lémé wé, nye mʉr tɨ̂. Lɨ́ otyeetye, mé abě túʼǎ. Nzê yé ó sá dí tîtyěl yɨ́ ɨ́ jɔʼ mʉ̂r swîh dwé mé mebě me twíí céme ɨ́ bisyɛ́ɛla mé dí etwâr ó, mě sá ó byê, byaá nyé dí epahle, bee ó, byé ajala le esáŋɔɔ bí ɛ́? Heʼé!

³⁰ Mé dwé Nzyɛ̌m nzyǒo ɨ́ sá mé dí ede yɨ́ nó, bʉr, bé abe e nkam lɨ́ eswêʼ díé lâm ɨ́ ndéá méde waá. Mɛm yɨ́ɛ sí kʉ́ dwě Nzyɛ̌m nzyǒo ɨ́ mê.

³¹ Nó ó, bɨ̌n damá de méde nkʉ̂ de ményoʼ, nkʉ̂ bɨ̌n damá sâ yʉ́ʉ́ sɔ̂ʼ: sáʼ gá syɛ́ɛla yaá yɨ́yɛ̂h lɨ́ esú lé édwě Nzyɛ̌m kûm tɨ̂!

³² Tiʼaa gá, mbi dí ó, bɨ̌n bé ákǎ sâ syɛ́ɛla ngá be ébɔ̌ʼ lé óbɨma óYúden le bʉr o bíkûl biswîh, nkʉ̂ ntɔ̂ʼ bʉr ó Mbɛ̌r-Nzyɛ̌m lɨ́!

³³ Sáʼ gá mpʉ mê. Mě gbá nkûl ó, bʉr bɨ́bɛ̂h, bé kpɛ́lɨɨ me ɨ́ sá yɨ́yɛ̂h mé dí esâ yɨ́. Mé asáǎ nyɔm wâm, njɨ waá bʉ̂r ɨ́ buo buo, ó bé bíʼee twǐʼ njʉ̌m dǐ.