Titu 1 - Wayampi

Pauru ojikuwa Titu pè

¹ Pauru tè ije. Janejare'e remĩgwai tè ije. Jesu Kiristu remimonokwerà teve ije. Eremikusiwarerà aã kareta Titu pewarà. Janejare'e emono wemipyteporokwerà kõ mokasiarà rõmõ taiko. Amotekokuwa kõ ijayvu aje ywete mã'ẽ rè, Janejare'e rekoa rupi katu toiko ãmẽ kupa ipi.

² Kee e'ipa itõkõ Janejare'e janeupe ipi: “Erekoa rupi katu peiko remẽ, epyri peiko karuarutà kãramõ”, e'ipa janeupewarà mõ. Yvy jinõ e'ãve aepo e'ipa amãtejẽ janeupewarà mõ. Aje ywete ijayvu ipi. Iwari rõwã e'i ipi. Ajawyi “aje” taoty ijayvu pè ipi. Ajawyi ipyri jaikoa rã siãrõ ywete jaiko ipi.

³ Janejare'e tè wayvu mojenua 'arà opyteporopa amãtejẽ. A'e 'arà okwa remẽ tè katu, “Age'e si eayvu katu tapemojenu ky'y”, e'i wayvu mojenuarà kõ pè ipi. Eupe ve aepo e'i emono jane kõ rovake. Ajawyi ijayvu rupi tè amojenu erokwa ipi, janerereko katuarà ayvu rupi tè.

⁴ Aã kareta akusiwa neupe, Titu. Ojevo jẽ jajirovija Jesu rè mã'ẽ tè jane. Ajawyi era'yre'e vo tè ene. Janeruwasu ikõ tanerereko katu okatuaya rupi ipi nẽ. Tanepy'amopiryvypy katu teve ikõ nerereko ipi nẽ. Kiristu Jesu janerereko katu mã'ẽ ikõ ta'evo nerereko teve ipi nẽ.

Pauru omotekokuwa Titu iposikoa rã rè

⁵ Aposiko jẽ nepyri remẽ itõkõ, nisimoawyjepaive janeposikoa mokope mijã. Ajawyi mokope Kereta ypõ'õgwerà pè oroity rã'ĩ aa remẽ itõkõ, kee a'e ene: “Tereposiko jẽ ikõ neiko nẽ”, a'e neupe. “Ikewarà kõ ikõ teremotekokuwa jẽ Janejare'e ayvu e'eay rè nẽ. Ãmõ, pirujẽ taa taa rupi Jesu koty rewarà kõ rõvijã rã kõ ikõ terepyteporo nẽ, jõvijã poromo'e mãe kõ rõmõ toiko kupa”, a'e itõkõ neupe. Ajawyi tè itõkõ oroity rã'ĩ a'e pè ajo. Kõitokõ jypy remẽ a'epa amãtejẽ neupe, aekwerà rupi katu terepyteporo jõvijã poromo'e mãe rã kõ.

⁶ Kee mãe kõ tè terepyteporo jõvijã poromo'e mãe kõ rõmõ toiko kupa. Ojikuwa teãmã ivo mã'ẽ rõmõ iko mãe kõ terepyteporo. Nimovyvy ena'ãi mãe kõ kõrijõ tè terepyteporo. Ãmõ, pe'ĩte erekwa mã'ẽ tè ikatu jõvijã rõmõ toiko. Ãmõ, ivo ijãkarã mã'ẽ tè, ijãkarã Jesu koty rewarà teve mã'ẽ tè. Ajamã'ẽ ijãkarã kõ ojavy javy tekoua e'e mãe kõ tè sõ remẽ, terepyteporo e'ã apijarerà. Uu ayvu noerovijai mãe kõ ruu nikatu'ãi nepyteporo remẽ. Uu ayvu werovija katu mãe kõ ruu tè terepyteporo tõvijã kõ rõmõ toiko.

⁷ Janejare'e remĩgwai tè jõvijã kõ. Ijayvu katu rupi tè oposiko kupa ipi. Ajawyi nimovyvy ena'ãi mã'ẽ tè terepyteporo ipi, ava nivoi mã'ẽ nomo'y'ãi ee mã'ẽ tè. Kee mã'ẽ terepyteporo e'ã. Oje'ẽgãtã joupe ipi mã'ẽ. Ãmõ, ojikõ'õ teywete iko ipi mã'ẽ. Ãmõ, omãrãkuwaa omoyvypyoka oka'ua pupe mã'ẽ. Ãmõ, opoko teywete joe iko ipi mã'ẽ. Ãmõ, karakuri moatya rè ywesõ oja'a wyi poromoripe mã'ẽ tè. A'evo mãe kõ rõwã terepyteporo jõvijã rã kõ rõmõ toiko.

⁸ Kee mãe kõ tè terepyteporo. Mõropãrà kõ rè oja'a katu mãe kõ. Ãmõ, ivo tekoua opota katu mãe kõ. Ãmõ, ojireko katu Janejare'e rekoa rupi iko ipi mãe kõ teve. [Ãmõ, otekokuwavay ipi mãe kõ tè.] Ãmõ, ivo tekoua rupi katu ekoi mãe kõ tè terepyteporo. Ãmõ, Janejare'e remimota rè ywesõ oja'a mãe kõ tè. Ãmõ, nivoi tekoua wyi ojireko katu mãe kõ tè.

⁹ Tõvijã kõ totekokuwavay Janejare'e ayvu rè. Kõitokõ simo'e ee maekwerà rè totekokuwavay kupa. Aekwerà rupi katu tomosã'ãga ayvu kõ ipi. Ãmẽ tè ava mõ sõ nivoi poromo'e remẽ, tõvijã kõ okuwatà. “Janejare'e ayvu rupi katu rõwã aepo ere”, e'ità tõvijã kõ ãmẽ ijupe ipi. “Kee Janejare'e ayvu e'i mã'ẽ”, e'ità poromotekokuwa jẽ tõvijã poromo'e mãe kõ ipi.

¹⁰ Oiko pe'ĩrõwã oõvijãgwerà kõ nomomojyi ipi mãe kõ, ijayvukwerà kõ noenu tari mãe kõ. Oõvijã kõ rè ojimoãpã mãe kõ. Ãwĩ rapijarà kõ Jesu koty rewarà kõ pyterà rupi sikaepo ekoi ipi. A'e kõ jamotekokuwa ipe remẽ, noenu tari kupa ipi. Oporegeta teitete jẽ ojiupe kupa ipi. Poromoripe tè kupa. Kee e'i rã'ãga kupa: “Juteu kõ rekoa rupi ve tapeiko Jesu koty rewarà kõ rõmõ”, e'i rã'ãga kupa. [“Tapejiemosĩpire'ooka ikõ ipi nẽ, Moisesi remikusiwarerà rupiwarà jikuwapa rõmõ”, e'i rã'ãga kupa.]

¹¹ Wemikuwa rã'ãga tè omojenu poromoripea rõmõ kupa ipi. Ajamã'ẽ Jesu koty rewarà kõ mõ ojapyaka ywe'e tite ojimoripe rõmõ ãmẽ kupa. Kee e'i tite kupa: “Janejare'e ayvu teipõ omojenu”, e'i tite enu kupa. Ajawyi ojavy ywe'e tite Jesu rekoa ãmẽ kupa ky'y, opyriwarà kõ revejẽ. A'e poromoripearà kõ karakuri moatya rè ywesõ oja'a ipi rewarà mõ a'evo ekoi kupa. Kee e'i oupe kupa: “Eremimo'ekwerà kõ wyi apyy wetetà karakuri”, e'i kõrijõ tè oupe kupa ipi. Ajawyi a'evo ekoi mãe kõ pè taneayvukasi kee javo rõmõ neiko: “Pepi a'evoa wyi! Ni'ei ãwĩvo remẽ”, tere ijupe kõ imomi kõ ipi.

¹² A'evo mãe kõ pewarà mõ kee e'ipa Kereta yvy pewarà otekokuwa mã'ẽ mõ, karamoe remeve: “Iwari mãe kõ tè teãmã Kereta wãnà kõ ipi. Ojãrõ mã'ẽ vo sõ tite ekoi kupa ipi. Nijeweri mãe kõ tè kupa ipi. Ojimi'ua rè kõrijõ tègà ekoi kupa ipi”, e'i maekwerà.

¹³ Aekwerà rupi katu tè poromoripe mãe kõ ekoi. Ajawyi taneayvukasi ijupe kõ imotekokuwa kõ ikenẽ, a'e ene, tuku. “Tapepoi ãwĩvo peikoa wyi ky'y!” ere ijupe kõ. “I'ete rã'ĩ!” ere ijupe kõ. Maevo neayvu wenutà ãmẽ kupa ky'y. Maevo Janejare'e ayvu e'e rupi ekoità ãmẽ kupa ky'y.

¹⁴ Maevo Juteu kõ rekoa rupi noiko'ãi kupa ky'y. Maevo nojapyaka'ãi poromoripe jẽ mãe kõ ayvu rè kupa ky'y, ayvu e'e wenu kupa rewarà mõ.

¹⁵ [Kee e'i teve poromoripe mãe kõ ipi: “Ja'umã'ẽ mõ sõ nisi'ui remẽ, maevo Janejare'e simoryokatà janere”, e'i tite kupa ipi, ikuwa e'ã. Ajare kee a'e. Janepy'a niky'ai remẽ, ja'umã'ẽ nomoky'a'ãi. Janejare'e reminõgwerà tè pirujẽ ja'umã'ẽ.] Ajawyi ivo katuay jaiko remẽ, nijapoi eminõgwerà wyi ipi. Janejare'e reminõgwerà noporopy'amoai'ãi ipi. Ajamã'ẽ ava mõ ipy'a ky'a jẽ remẽ, nuvei ja'umã'ẽ mõ poropy'aky'a'o mã'ẽ, ipy'a ai jẽ rewarà mõ.

¹⁶ A'e kõ: “Erõvijã ywete Janejare'e”, e'i tite kupa ipi. Ajamã'ẽ ojikuwa Janejare'e noerovijai mãe kõ rõmõ kupa. Nivoi ekoia kõ rupi ojikuwa kupa. Ojikõ'õ ai tè kupa. Noerovijai kupa. Moma'e rõmõ rõwã ekoi ãmẽ kupa. [Ajawyi, “Nikatui ãwĩvoa”, tere ijupe kõ ky'y, a'e ene.]