Romã 1 - Wayampi

Janejare'e ayvu e'eay rewarà

¹ Ije, Pauru. Kiristu Jesu remĩgwai tè ije. Ãwĩ kareta akusiwa imono pejẽ, tapemogeta ikuwa. Janejare'e tè epyteporo emowaite emono wayvu e'eay tamojenu erokwa, janerereko katua rewarà.

² Karamoe remeve Jesu nonurive ike yvy pè remẽ, Janejare'e omojikuwaokapa amãtejẽ wayvu e'eay rã Wa'yry rewarà rã rè Juteu kõ pè. Wayvu mojenuarà kõ pè omojikuwaoka amãtejẽ, tokusiwa imojikuwa kupa. [A'e emikusiwarerà pè Janejare'e kareta eu.]

³ Wayvu Wa'yry rewarà rã omojikuwaoka ijupe kõ. A'e itõkõ ojimojane osaky rõmõ. Jõvijã wasu Tavi jeapyrerà rõmõ itõkõ isaky.

⁴ Ajamã'ẽ Janejare'e tè omojikuwaoka Wa'yry rõmõ ereko. Ta'yry omãnõ maire opoera mijẽ. Tuu Janejare'e tè omomoeraoka imopõ'ãoka, o'Ãg kasia rupi. A'evoa rupi ywesõ jakuwa Janejare'e Ra'yry tè Janerõvijã Jesu Kiristu mã'ẽ.

⁵ A'e remĩgwai rõmõ tè aiko ky'y. Okatuaya rupi epyteporo emono wayvu mojenuarà rõmõ taiko. “‘Pejo ekotyre’, e'ipa Janejare'e janeupewarà mõ ipi”, a'e imojenu. Iteetejẽ yvy yvy wãnà kõ pè aepo amojenu erokwa ipi, ãwisõ “aje” te'i enu kupa. Ijayvu rupi ekoi ãmẽ kupa ky'y.

⁶ Pejẽ ve Janejare'e pemuu okotyre. “Era'yry Jesu Kiristu koty rewarà rõmõ tapeiko ky'y”, e'ipa pejẽ, Romã taa wãnà kõ rõmõ.

⁷ Ajare a'e ikusiwa pejẽ ajupa, ejimorypa kõ. Janejare'e remiauvay kõ rõmõ pejẽ peiko, pejãvijõ jẽ. Pepyteporopa oupewarà kõ rõmõ, weruparà mõ tapeiko ky'y. Janeruwasu ikõ tapenereko katuay okatuaya rupi penereko nẽ. Tapepy'a mopiryvypy katu ikõ penereko nẽ. Janerõvijã Jesu Kiristu ikõ a'evo tapenereko teve penereko nẽ.

“‘Amã'ẽ kuwasi ee kõ’, a'e tite peupewarà mõ”, e'i mã'ẽ

⁸ Jesu Kiristu koty rewarà kõ rõmõ peiko mã'ẽ ojenupa ãmõ yvy yvy wãnà kõ pè okwa. Ajawyi Janejare'e amoe'e ywete penewarà mõ aiko ipi, Jesu Kiristu mãnõa rupi a'evo penereko rewarà mõ.

⁹ Janejare'e remĩgwai rõmõ tè ije aiko ky'y. Apota ywete emĩgwai rõmõ aiko ipi. Ijayvu e'eay Ta'yry Jesu rewarà amojenu jenu erokwa ipi. A'e tè okuwa aja'arĩ pene aiko mã'ẽ ipi. Nerearai 'eteay pewyi aiko ipi.

¹⁰ Aporegeta ijupe peupewarà mõ aiko ipi. Ãmõ, aporanu teve ijupe aiko ipi. Kee a'e: “Mano remẽ kuwa põ aa Romã taa wãnà kõ resa, Papa?” a'e ijupe ipi. “Mape remẽ nepota aa remẽ, emonooka ãmẽ rejupa”, a'e Janejare'e pè ipi.

¹¹ Apota ajimory pene. Apota pemotekokuwa jẽ penereko Janejare'e remime'ẽ rewarà rè. I'Ãg pemokasità “aje ywete” tapejẽ ijupe penereko katua rè peiko ãmẽ ky'y.

¹² Pepytery pè sõ aiko remẽ, ojevo jẽ kuwa jajimokasi Kiristu rupi tekoua rè, jajimoaty Janerõvijã rè japoregeta remẽ.

¹³ Kee a'e pejẽ, eretãrãgwerà kõ. “Ãmõ 'ary pè aatà esa kõ”, a'e tite itõkõ peupewarà mõ mijã. Aepo a'e tite ajupa ipi. Ajamã'ẽ manyvo remẽ naa'ãive. Ajaate age'e nakuwaive eoa rã. Apota pemotekokuwa jẽ Janerõvijã ayvu rè penereko. Ãwitõ ãmõ Juteu rõwã mãe kõ “aje” e'i ijayvu wenu kupa remẽ ipi, tãwĩvo ve peiko. “Pe'ĩrõwã kuwa ‘aje’ e'i enu mãe kõ mijã”, a'e peupewarà mõ ipi.

¹⁴ Ijayvu mojenuarà rõmõ aiko teãmã aiko ije. Iteetejẽ jane kõ pè amome'u ijayvukwerà kõ erokwa ipi. Ajawyi ojimo'e iko mãe kõ rè eãpẽ aiko. Ãmõ, ãmõ mirà kõ rè eãpẽ teve aiko ipi, nojimo'e ywe'ei mãe kõ rè. Kee e'ipa Jesu ije: “Ekwa ikõ imotekokuwa kõ nẽ”, e'ipa ije. Ajawyi a'evo aiko ãmẽ ky'y.

¹⁵ Aja rewarà mõ ajimokatupa amãtejẽ taẽ aa penena kyty, Romã taa kyty. Mokope ve Janejare'e ayvu e'eay rè toporomotekokuwa aiko, Wa'yry rewarà rè.

Janejare'e ayvu e'eay kasia rewarà

^16-17 Ikatuay Janejare'e ayvu e'eay. Aepo jaa rupi jakuwa Janejare'e okasia rupi ivo mã'ẽ rõmõ janerereko, “aje” ja'e ijupe remẽ. Juteu kõ pè ypy aepo jaa omojikuwaoka karamoe remẽ. Ajaire ãmõ kõ pè teve omojikuwaoka. Ikasiay aepo jaa ãmẽ. Ajawyi najinõsĩ'ãi ije, aepo momewa rõmõ aiko ipi. “Aje” ja'e karuaru ijupe ipi. Kee e'ipa amãtejẽ itõkõ ikusiwa Janejare'e janeupe maekwerà rupi katu tijaiko ipi: “Janejare'e, ‘Ivo mã'ẽ tè ãwĩ’, e'i ijupe mãe kõ ‘aje’ e'i teãmã ijupe iko kupa ipi”, e'i maekwerà rupi katu jaiko.

Jane kõ aiwererà rewarà

^18-20 Janejare'e ojikuwaokapa ipe mirà kõ pè ipi. Weewarà pirujẽ omojikuwaoka joupe iko ipi. Okasia nopa'ãi mã'ẽ omojikuwaokapa teve. Okatuaya omojikuwaokapa teve. Weminõgwerà kõ rupi tè omojikuwaoka joupe ipi. A'evo janerãmõi ypykwerà kõ pè omojikuwaoka, ajaate age'e remẽ. Omojikuwaoka jẽ janeupe iko. Ajawyi ãmẽ kee nija'e'ãi kuwa: “Nakuwai Janejare'e reko”, nija'e'ãi kuwa ipi. Manyvo ne'i'ãi ojipija aepo'i maekwerà. Ajamã'ẽ mirà kõ aje ywete mã'ẽ noenu tari kupa ipi. Nivoi mã'ẽ ywesõ opota kupa ipi. Aje ywete mã'ẽ rè noja'ari kupa ipi. Kee ekoi tite kupa. Janejare'e nomojõvijã'ãi wee kupa ipi. Nomomojyi ywe'e tite imoe'e e'ã kupa ipi. Ãmõ, nivoi ywe'e tite poroereko kupa ipi. Ajawyi omãnõ 'atà tè waiwererà kõ repykarà mõ kupa. Janejare'e kee e'ipa ijupewarà kõ mõ: “Nivoi mãe kõ tojimomorijau waiwererà kõ rewarà mõ”, e'ipa. A'evoa omojikuwaokapa wena yva pe wyi imuu jane.

²¹ Emã'ẽ. Janejare'e rewarà okuwa ipe kupa mijã. A'evo ipe remẽ, nomomojy'ãi ajamã'ẽ oõvijã rõmõ iko kupa ipi. Kee ne'i ijupe kupa: “Orerõvijã ywete ene”, ne'i. “Nekatuay wete”, ne'i'ãi ijupe imoe'e kupa ipi. Ojipy'amogeta teitete tè iko kupa ipi. Manyvoa rã rõmõ rõwã a'evo ekoi kupa ipi. Notekokuwai 'eteay iko kupa ipi.

²² Ajamã'ẽ, “Orotekokuwavay”, e'i tite oupe kupa ipi, ãwisõ notekokuwai 'ete iko kupa remẽ. Eawyrypa mã'ẽ vo 'ejẽ ipe ekoi kupa remẽ.

²³ Kee ekoi teve kupa ipi. Janejare'e nomoe'ei iko kupa ipi, ãwisõ a'e rõmõ'ĩte oiko karuaru iko mã'ẽ tè ipe mijã. Ãwisõ a'e rõmõ'ĩte ikatuay ekoi mã'ẽ teve. Ojarà rã'ãga kõ pè wekovijanõ kupa, ke'ĩatu mã'ẽ kõ pè. Aã rè itõkõ wã'ã wemimoe'e kõ rõmõ inõ kupa ipi: Mira vo mã'ẽ. Ãmõ, wyra kõ vo mã'ẽ. Ãmõ, ipy atyray vo mã'ẽ. Ãmõ, osyryry oo mãe kõ vo mã'ẽ. Wãi wãisõ ojarà rã'ãga rõmõ oinõ kupa ipi.

²⁴ Ajaate kee e'i Janejare'e ky'y: “'Aha! Moko'e remẽ sõsi aity kõtà ky'y. Tosĩ e'ã ajawyi iko kupa ky'y”, e'i ee kõ omãjã ãmẽ. “Wemimota ai rupi awi toiko iko kupa ky'y”, e'i. “Opirà kõ pupe tè tojimomorijauvay waiwereray rè iko ãmẽ kupa ky'y. Jimomy'a aia rè. Waiwererà rè teve. Wãisõ tojimomorijau iko kupa”, e'i ijupewarà kõ mõ ky'y.

²⁵ A'evo ekoi ãmẽ kupa ky'y. Janejare'e ayvu aje ywete mã'ẽ nopotai 'ete kupa. Ajawyi opoipa ywe'e tite iwyi kupa ipi. Owaria kõ kõrijõ opota ywe'e tite ekovijarerà rõmõ kupa. Ãmõ, Janereinõgarerà nomoe'ei ywe'e tite kupa ky'y. Weminõgwerà kõ ywe'e tite omoe'e kupa ky'y. A'e kõ omoẽoka ywe'e tite o'arà kyty kupa ipi. Janejare'e kuwasi jamoe'e karuaru kuwa mijã. Õ'õ, awyje katu ãwĩvo jamoe'e karuaru jaiko ipi.

^26-27 Ajaire mirà kõ weko kõ omoteete jẽ ereko. Ma'e, wãivĩgwerà kõ nopotari kwaima'e ky'y. Ojiupiu tè ojimojaiwe iko kupa. Ojapakyry ojee kupa. Ãmõ, ivo teve kwaima'ekwerà kõ. Ojiupiu teve ojimojaiwe ojipota iko kupa. Opoi owãivĩ'y wyi, ojee tè imopy iko kupa, ipusi ai tè iko kupa wyi. Ajawyi ãmẽ kee e'i Janejare'e: “'Aha! Wemimota aiwerà rupi tè awi toiko iko kupa ky'y nẽ”, e'i Janejare'e ee kõ omãjã ky'y. Aja jare ojimomorijau 'atà tè iko kupa ky'y. Waiwererà kõ repykarà mõ opirà kõ omoaità ity kupa ky'y.

²⁸ A'evo Janejare'e rewarà okuwa ipe kupa remẽ, werõarõ jẽ tite kupa. Ajawyi Janejare'e kee e'ipa ijupe kõ ky'y: “Hoõ, tekokuwa e'ãa rupi awi tapeiko teitete peiko ky'y”, e'ipa.

²⁹ Aja rewarà mõ aã reitõ kõ ipy'a kõ opãsarõma: Nivoi maekwerà kõ. Ãmõ, jipy'amogeta aiwerà kõ. A'evo moma'e moatya rè ywesõ oja'a mãe kõ. Ãmõ, aipa règà oja'a iko mã'ẽ. Ãmõ, ãmõ kõ moma'e rè ojitupi ay iko mã'ẽ. Ãmõ, porojukaa rè oja'a iko teve mã'ẽ. Ãmõ, poroaka py'a iko mã'ẽ. Ãmõ, jimoripea règà poromoripe iko mã'ẽ. Tekou teitetea règà oja'a iko mã'ẽ.

³⁰ Ãmõ, poromovyvyrai tè mã'ẽ. Nivoi omo'y teywete ovoarà mõ rè mã'ẽ. Ãmõ, Janejare'e rè ojikõ'õ iko mã'ẽ. Ãmõ, poroerõarõ iko mã'ẽ. Ãmõ, poromoerãkwẽnai iko mã'ẽ. Ãmõ, noenui oõvijãgwerà ayvu imomojyoka e'ã mã'ẽ.

³¹ Ãmõ, nojinõsĩ 'ete iko otekokuwa e'ãma mõ iko mã'ẽ. Ãmõ, temirovija rõmõ rõwã ekoi mã'ẽ. Ojimoja'y 'ejẽ iko mã'ẽ. Ãmõ, wetãrãgwerà kõ noaui 'ete teve mã'ẽ. Ãmõ, noporoporijauesai teve iko mã'ẽ. A'evo 'evo ywe'e tite ãmẽ ipy'a kõ pupe oike ky'y.

³² A'evo ekoi mãe kõ pewarà mõ Janejare'e kee e'ipa karamoeve: “Omãnõ 'atà tè weko aiwererà kõ repykarà mõ kupa”, e'ipa. I'ete aepo e'i maekwerà. Ajamã'ẽ a'evo ekoi mãe kõ noenu tari ijayvukwerà oupewarà mõ. Okuwapa ipe kupa mijã. Omomorijaua rã okuwapa ipe kupa mijã. Ajamã'ẽ ojimoane'e jẽ tesõ iko kupa ipi. Opota tè waiwererà rupi oo kupa ipi. “I'ete agyvo jaiko remẽ”, e'i kõrijõ ojiupe kupa ipi. Oryvay kõrijõ ãmẽ kupa ipi.