Piremõ 1 - Wayampi

Pauru ojikuwa Piremõ pè

¹ Pauru tè ije. Eayvukwerà akusiwatà neupe, Piremõ. Kiristu Jesu ayvu amojenu wyi emopã'ã kupa. Ajawyi jimopã'ãga pupe wyi akusiwa kareta ajupa. Timoteu, janeretãrã vo mã'ẽ, epyri tui akusiwa ajupa remẽ. Kee a'e ene. Akuwa Jesu remĩgwai rõmõ tè ene neiko, Piremõ. Ãwitõ ore oroiko, ãwĩvo ve ene neiko.

² Ãmõ, Jesu koty rewarà kõ pè ve akusiwa ajupa, neretã wyry pè ojimoaty Janejare'e moe'ea rè ipi mãe kõ pè. Ãmõ, janekõjã, janeretãrã e'e vo mã'ẽ pè teve akusiwa ajupa, a'e Apia eu ijupe mã'ẽ pè. Ãmõ, Akipu pè akusiwa ajupa. Nojirokyjei Jesu remĩgwai rõmõ mã'ẽ Akipu. Mokopejõ peupe akusiwa ajupa.

³ Janeruwasu ikõ tapenereko katu okatuaya rupi ipi nẽ. Tapepy'amopiryvypy katu ikõ ipi nẽ. Ãmõ, Janerõvijã Jesu Kiristu reve ikõ ta'evo penereko nẽ.

“Nejikuwa poroauvay mã'ẽ rõmõ ene”, e'i mã'ẽ

⁴ Janejare'e pè aporegeta neupewarà mõ ipi remẽ, kee a'e ijupe ipi: “Ikatuay wete nekoty rewarà rõmõ Piremõ ekoi. Ikatu neinõ neãkarã rõmõ”, a'e ijupe ipi.

⁵ Ãmõ kõ manyvo neiko mã'ẽ omojenu ije ipi. Kee e'i ije kupa: – Jõvijã wasu Jesu rè ojirovija katu mã'ẽ tè Piremõ. Poroauvay ipi. Jesu koty rewarà kõ pirujẽ wauvay ipi, e'i ije kupa ipi. [Ajawyi aepo nerewarà aenu remẽ, eroryvay enu nere.]

⁶ Ãmẽ ajipy'amogeta nere remẽ, kee a'e Janejare'e pè: “Papa, emotekokuwaoka Piremõ ereko ipi. A'evoa Kiristu rupi neremime'ẽ ikatuay wete mã'ẽ okuwa katutà Piremõ ipi ky'y”, a'e Janejare'e pè neupewarà mõ ipi.

⁷ Eroryvay nere ipi, poroauvay mã'ẽ ene rewarà mõ. A'evo neiko mã'ẽ rè aja'a remẽ, ajimokasioka ywete ipi. Pirujẽ Janejare'e koty rewarà kõ ve nemokasioka ywete nerekoa rupi ipi.

Pauru oporanu Onesimu pewarà mõ remẽwarà

^8-9 Ije eka'akuwa ky'y. Age'e aã kareta akusiwa ajupa. Ije, Kiristu Jesu remipyteporo e'e teipe sõ ije ijayvu mojenuarà rõmõ mijã. Temimopã'ãgwerà rõmõ teipe sõ teve ije ijayvu mojenua rewarà mõ mijã. Ajawyi eayvukasi kuwa neupe mijã. Ajamã'ẽ napotai eayvukasi rõmõ, oroauvay rewarà mõ. Ikatusa rupi tè a'età ene.

¹⁰ Kee a'età ene. Onesimu pewarà mõ akusiwa ajupa, neremĩgwai neremipyykwerà pewarà mõ. Era'yre'e vo Onesimu ky'y, Jesu Kiristu koty rewarà rõmõ ekoi ky'y rewarà mõ. Jimopã'ãga pupe aju remẽ, [Jesu rekoa rè amotekokuwa ipi. Ajaire “aje” e'i ky'y. “Ajawyi awyje Jesu rupi taiko ky'y”, e'i oupe ky'y. Ajawyi era'yre'e vo ky'y.]

¹¹ Kwee remẽ nepyri ekoi jẽ remẽ, nikatu ywe'ei neupe mijã. Nanererovija ywe'ei ipi mijã. Ajamã'ẽ ojimoteepa ky'y. Ererovija katu ky'y. Ãwĩvo ve nererovija katu tevetà ky'y.

¹² Ajawyi age'e amojivytà nekoty ky'y. Aekaraytà amono nekoty remẽ.

¹³ Ike Jesu Kiristu ayvu rewarà mõ jimopã'ãga pè aju remẽ, Onesimu epãtavõ gatu ipi. Ajawyi amomyta kuwa ipe epyri mijã, nerekovijarerà rõmõ.

¹⁴ Ajamã'ẽ “tamomyta jẽ” na'ei ijupewarà mõ, neremĩgwai tè rewarà mõ. Ajamã'ẽ nemuu mijẽ sõ ekoty remẽ, eroryvaytà ee ky'y. “Hoõ” nerei remẽ, ikatu teve eupe.

¹⁵ Maevo Janejare'e tè omoisyryoka rã'ĩ newyi, [Jesu rekoa tokuwa rã'ĩ.] Age'e sõsi awyje neremĩgwai e'eay rõmõ ekoità ky'y, ojivy nekoty oo remẽ.

¹⁶ Ajamã'ẽ neremĩgwai kõrijõ tè rõwã ky'y. Neretãrã e'e vo mã'ẽ teve ky'y, Jesu koty rewarà rõmõ nevo ky'y rewarà mõ. Aje aauvay. Akuwa ovãe nepyri remẽ, neau tevetà. Ãwitõ neremĩgwai e'eay rõmõtà ky'y, ãwĩvo ve neretãrã e'eay vo rõmõ tevetà. Ajawyi akuwa neautà mã'ẽ tè ãwĩ.

¹⁷ Ajawyi, ãwitõ ije tè avãe nepyri remẽ neroryvaytà, erevewarà tè ene rewarà mõ. Tãwĩvo ve tanerory ee ojivy nekoty oo remẽ.

¹⁸ Ãmõ, nekarakuri rovaja sõ noepyme'ẽive remẽ, ere ije ãmẽ. Ije tè aepyme'ẽmatà ijupewarà mõ ene ãmẽ. Ãmõ, ni'ei sõ nerereko remẽ, ere teve ije. Ije tè apãsarõtà ãmẽ a'evoa, a'evo ekoi remẽ. Ije tè amokatutà ãmẽ.

¹⁹ Aje, ije Pauru tè oromoepytà Onesimu rekovijarà pè, a'e ene. Eremikusiwarerà ywete ãwĩ. Ajawyi, “Aje sipõ omoepytà ije”, tere e'ã eupewarà mõ. Ije tè Jesu rewarà rè oromotekokuwa, ãwisõ tekoua pyau nopa'ãi mã'ẽ rõmõ tereiko upi katu ky'y. A'e rè nerepyme'ẽive maevo sõ tite ije. “Hoõ” tere eayvu pè ãmẽ.

²⁰ Nereke'yry vo sõ mã'ẽ tè ije, Kiristu koty rewarà rõmõ. Ajawyi a'e ene. Terejimory Onesimu rè ojivy oo nekoty remẽ, a'e ene. Janerõvijã ywete rewarà mõ terejimory ee, a'e teve. A'evo nereko remẽ, eroryvaytà nere ãmẽ. Ajawyi a'evo neiko remẽ, epy'amoryokatà rejupa.

²¹ Akuwa aã kareta eremikusiwarerà rupi nereko katutà Onesimu. Eayvukwerà nerovijatà. A'evoa akuwapa. Akuwa eremiporanukwerà wyi erereko katutà.

²² Ãmõ, kee a'età ene. Maevo aatà neresa ky'y, emoẽoka kupa paire. Akuwa peja'a jẽ ere ipi. Akuwa Janejare'e pè peporegeta eupewarà mõ ipi. Ajawyi emoẽoka mã'ẽ 'arà aãrõ jẽ ajupa. Emoẽoka kupa remẽ tè katu aatà pekoty ky'y. Ajawyi emokatu amãtejẽ ekea'ypa rã, a'e ene.

Kareta moawyjepaa

²³ Ejimorypa Parasi epyri tui, jimopã'ãga pè. Kiristu Jesu rekoa rewarà mõ teve agyvo oroku orokupa. A'e opota ojimory nere eremikusiwarerà rupi.

²⁴ Ãmõ, ereve oposiko mãe kõ ve opota ojimory nere. Kejõ. Maku. Ãmõ, Aritaku. Ãmõ, Temasi. Ãmõ, Rukasi. Mokopejõ opota ojimory nere mãe kõ.

²⁵ Jõvijã wasu Jesu Kiristu ikõ tapenereko katu okatuaya rupi ky'y nẽ. [Awyjepa eremikusiwarerà ky'y.]