Juta 1 - Wayampi

¹ Ije Juta, Tiaku mõmirĩ. Jesu Kiristu remĩgwai tè ije. Aã kareta akusiwa peupewarà mõ ajupa. Janejare'e pepyteporo mãe kõ rõmõ peiko. Penauvay Janejare'e penereko ipi. Jesu Kiristu oja'a katu pene ipi.

² Janejare'e ikõ tapeporijauesa ipi nẽ. Tapepy'amopiryvypy katu ikõ ipi nẽ. Tapejiauvay ikõ ojipyri peiko remẽ nẽ. Age'e remẽ ywesõ ta'evo peiko ky'y.

“Tapejimoripeoka e'ã Janejare'e ayvu rè poromo'e rã'ãga mãe kõ pè”, e'i mã'ẽ

³ Ejimorypa katu kõ. Apota katuay kareta akusiwa peupe mijã. Janejare'e janerereko katu okoty rewarà kõ rõmõ mã'ẽ rè akusiwatà pejẽ mijã. Ãmõ tè akusiwatà ky'y ajamã'ẽ. Age'e kee a'e pejẽ. Tapejimomãatã jẽ ikõ Jesu rè peiko poromoripe mãe kõ rovake nẽ, a'e pejẽ. Iwaria kõ pè tapejimoripeoka e'ã, a'e pejẽ.

⁴ Akuwapa Janejare'e nomomojyi mãe kõ mõ oikopa sikaepo pepytery pè iko. Ajimonyi aepo aenu remẽ ajimopirai. A'e kõ, “Pevoarà kõ tè ore”, e'i epe peupe kupa ipi. Janevoarà kõ rõwã apijarerà ajamã'ẽ. Janejare'e ayvu rupi katu rõwã ekoi kupa ipi. Ijayvu omotee kupa ipi. Kee e'i tite kupa: “Janejare'e poroereko katu okatuaya rupi ipi. Ajawyi nivoi jaiko remẽ, nimanyvoi. Janerau jẽ ipi. Ajawyi a'evo jaiko ipe remẽ, nijanemomorijau'ãi”, e'i ywe'e tite kupa ipi. Ajawyi ojimoane'e jẽ waiwererà rupi iko kupa ipi. “Erõvijã” ne'i teve Jesu Kiristu pè kupa, ãwisõ a'e rõmõ'ĩte Janerõvijã ywete rõmõ ekoi remẽ. Ajawyi Janejare'e omomorijautà apijarerà.

⁵ Pekuwapa Janejare'e omomorijau nivoi mãe kõ ipi. Poromoja'aoka jẽtà a'evoa rè [eremikusiwarerà rupi] ajamã'ẽ, karamoe remẽwarà rè tapeja'a ipi. Janerõvijã ywete itõkõ wereko katu ipe Isaeu kõ karamoe remẽ mijã, Ejitu yvy pè ojimomorijau kupa remẽ. Tõvijã ai kõ po pe wyi itõkõ wekyioka kõ ipe erojivy. Ajamã'ẽ a'evo paire ijatyry kõ noenui ijayvu ky'y. “Aje” ne'i ijayvu pè kupa. Ajawyi itõkõ Janejare'e omomorijau noerovija tari mãe kõ imoma kõ ky'y. [Aekwerà rè tapeja'a jẽ, a'e pejẽ.]

⁶ Ãwĩvo ve karamoe remẽ itõkõ Janejare'e remĩgwai yvapewarà kõ mõ ojimoãpã ywe'e tite Janejare'e rè. A'e kõ werovija katu oõvijã mijã. Ajaire noerovijai ywe'e tite kupa ky'y. “Jane, janeayvukasi teãmã”, e'i ywe'e tite ojiupe kupa. Wena oity ywe'e tite ãmẽ kupa ky'y. Ajawyi Janejare'e omonooka kõ pãtõnusu pupe toiko kupa. A'e tena vaiwerà pupe omopã'ãoka kõ. A'e pè oiko puku jẽ iko kupa. Kãramõ Janejare'e poromoe'yi remẽ, wemavo kõtà ity oo ky'y. [Aekwerà rè tapeja'a ja'a jẽ pejimotekokuwaa mõ, a'e pejẽ.]

⁷ A'evo ve itõkõ Sotoma taa wãnà kõ nivoi ekoi karamoe remẽ. Komora taa wãnà kõ teve nivoi ekoi. Ãmõ taa miti kõ wãnà kõ ve, Sotoma taa pyri'ĩje'ẽ sa'u wãnà kõ ve. A'e a'e wãnà kõ pirujẽ nivoi 'ete ekoi kupa. Nojimoavai mãe kõ tè kupa ipi. Ojimomy'a my'a ojee kupa ipi. Poromosĩoka jẽ tesõ kupa, jamã'ẽ ee kõ remẽ. Ajamã'ẽ a'e kõ nojimosĩoka'ãi kupa, a'evo ekoi kupa remẽ. Ajawyi tesõ itõkõ Janejare'e tata wasu noe'ãi mã'ẽ oinõoka ena kõ revejẽ tokaipa kupa. Ajawyi aekwerà rè tijaja'a jẽ jajimotekokuwa ipi, eruparà kõ rõmõ tijaiko e'ã.

⁸ A'evo 'evo maekwerà rè pepytery pewarà kõ noja'ai ipi, nivoi mãe kõ rõmõ. Ojimoane'e jẽ tesõ waiwererà rè iko kupa. Nojimoavai tesõ kupa. Kee e'i kupa: “Epouvaiawerà rupi akuwa nimanyvoi a'evo aiko remẽ”, e'i ywe'e tite oupe kupa. Ojimokasi ywe'e tite teve Janejare'e rovake kupa ipi. Janejare'e remĩgwai yvapewarà kõ tẽ tesõ werõarõ kupa ipi. Wãisõ ekoi kupa.

⁹ Janejare'e remĩgwai yvapewarà kõ rõvijã Mikeu eu ijupe mã'ẽ ipe nomojaiwei ãjãgai rõvijã. Kõitokõ karamoe remẽ tãmõ Moisesi okãjã remẽ, ãjãgai rõvijã opota ipe tãmõ Moisesi reãgwerà reraa oupe mijã. A'evoa rè ojiayvuvaja vaja kupa. “Neupewarà rõwã ãwĩ!” e'i kõrijõ Mikeu ijupe. “Erõvijã ywete tè ikõ taneaka nemomorijau nẽ”, e'i kõrijõ ijupe. Nojimokasi ãjãgai rõvijã mojaiwe ajamã'ẽ.

¹⁰ Aã kwaima'e kõ ãmẽ ojimokasi ywe'e tite kupa, pepytery pè ekoi mãe kõ. Wemikuwa e'ã rè oporegeta ai ywe'e tite kupa ipi. Oojai ywe'e tite kupa ipi. “Ije ywesõ akuwa!” e'i tite kupa ipi. Tekokuwaa rupi rõwã ekoi ywe'e tite kupa ajamã'ẽ. Wemimotarà rupi teãmã kõrijõ ekoi ywe'e tite kupa ipi. Ãwitõ mijarà wemimotarà rupi tepe'yte oo oo ipi, a'evo 'ejẽ ekoi kupa ipi. [Ajawyi ywesõ Janejare'e omomorijau kõtà.]

¹¹ Mokoi ekoi kupa! Aje ywete Janejare'e omomorijau kõ ywetetà kãramõ. Karamoe remẽwarà kõ reruparà mõ ekoi kupa. Ma'e. Kãi reruparà mõ ekoi kupa. Ãmõ, Paraã reruparà mõ teve ekoi kupa. Karakuri pyya rè ywesõ oja'a mã'ẽ tè Paraã. Ajawyi nivoi ekoi ipyyarà rõmõ ky'y. Ãmõ, Kore reruparà mõ teve ekoi kupa. Oõvijã rè ojimoãpã mã'ẽ tè itõkõ Kore. A'e a'e kõ reruparà mõ age'e remẽwarà kõ ekoi.

¹² Kee ekoi kupa pepytery pè. Pejimoaty pejimory pejimiwa remẽ, ojimoaty rã'ãga peneve ojimiwa kupa. Pemoãkwa'ã tè kupa. Oka'u kõrijõ tè kupa ipi. Nosĩ kupa ipi, wekoa rè. Ajawyi ipojy ai tè sikaepo pepytery pè iko kupa. Ãwitõ takuru ypy pewarà ipojy sikaepo janeupe yarà jaraa remẽ, ãwĩvo ekoi kupa. Ãmõ, ãwitõ weima kõ rè noja'ai ipi mãe kõ kupa. Wee kõrijõ tè oja'a katu kupa. Ãwĩvo ve Janejare'e ayvu rè poromo'e rã'ãga mãe kõ ekoi. Ãmõ, kee ekoi kupa. Ãwitõ yvytu aje ipe sõ yva rãtasĩ weru remẽ, “Ãmãnà okytà eremitã kõ mory!” ja'e tite remẽ. Ajaire, soõ, nokyi sikaepo ãmãnà! Okwapa 'a tè yva rãtasĩ. Ãwĩvo poromo'e rã'ãga mãe kõ. Teako'i tite ee kõ. Nijanemotekokuwa'ãi kupa. Ãmõ, kee ekoi kupa. Yvyra ni'a'ãi mãe kõ vo 'ejẽ kupa. Ãwitõ manyvo rã rõmõ rõwã ni'ai mã'ẽ, ãwĩvo ve ekoi kupa. Ãwitõ temitã japypo'o jimo'yjẽ remẽ, soõ, omãnõ jimo'yjẽ. A'evo ekoi kupa.

¹³ Ãmõ, ãwitõ pãranã opipo pipoay remẽ, yy ryjuikwerà wenõe ity yy reme pè ipi. Isuky katu upa yy reme pè. Ãwĩvo ve poromo'e rã'ãga mãe kõ waiwererà omojisaoka janeupe ipi. Ãmõ, ãwitõ jaytata wata mãe kõ oo ojisyry syry okãjã pãtõmimi pè remẽ, ãwĩvo ve ekoi kupa. Ajawyi Janejare'e omokãjã kõtà imono, pãtõmimi e'ete vo mã'ẽ pupe. A'e pè Janejare'e oinõma ena rã kõ, awyje toiko kupa.

¹⁴ A'evotà mãe rã kõ rewarà tãmõ Atão jeapyrerà mõ omojenu amãtejẽ karamoe remẽ, Janejare'e kasia rupi. A'e tãmõ Enoki eu ijupe mã'ẽ. A'e omojenu amãtejẽ. Atão 7 rõmõ ojeapy apy remẽ pe'ĩ, Enoki ekoi. A'e tè omojenu amãtejẽ nivoi mãe rã kõ momorijaua rã. Kee e'i imojenu: “Ejapyaka rã'ĩ si! Janerõvijã ywete uutà okasia revejẽ! Emĩgwai yvapewarà kõ uutà upi. Aty wasu rõmõ tesõ emĩgwai kõ ekoi. Nijamoirõ irõma kuwa'ãi upi uutà mãe kõ.

¹⁵ Janerõvijã ywete uutà poromosã'ãga. A'e nivoi mãe kõ pirujẽ wemavotà ity oo eko aiwererà kõ rewarà mõ. Janejare'e rè omovyvyrai ywe'e tite kupa rewarà mõ a'evo wereko kõtà”, e'i imojenu amãtejẽ maekwerà.

¹⁶ A'evo ywete mijẽ poromo'e rã'ãga mãe kõ, pepytery pè ekoi mãe kõ. A'e kõ ojimõarõ teãmã iko kupa. Janejare'e rè omovyvyrai ywe'e tite kupa ipi. Wemimota ai rupi ekoi ywe'e tite kupa ipi. Ojimoe'eoka rã'ãga jane kõ pè kupa ipi. “Aje ipõ” e'i tite jane kõ ãmẽ. Omoripe kõ tè kupa. A'evo Janejare'e ayvu rè poromo'e rã'ãga mãe kõ ekoi ipi. [Ajawyi tapejimoripeoka ywe'e tite e'ã apijarerà kõ pè, a'e pejẽ.]

Poromotekokuwaa

¹⁷ Ajawyi kee a'e pejẽ, ejimorypa kõ. [Poromo'e rã'ãga mãe kõ rekoa rupi ikõ tapeiko ywe'e tite e'ã nẽ, a'e pejẽ.] Janerõvijã Jesu Kiristu remimonokwerà kõ e'i maekwerà rè tapeja'a jẽ.

¹⁸ Kee e'i pejẽ maekwerà rè tapeja'a jẽ: “Yvy opatà pyri'ĩ remẽ, ke'ĩ Jesu Kiristu ovãe mijẽ remẽ, uvetà mirà kõ, Jesu Kiristu koty rewarà kõ oojaità mãe kõ. Noerovijai mãe kõ tè a'e kõ. Wemimota ai rupi ekoità kupa”, e'i amãtejẽ pemotekokuwaa rõmõ maekwerà. Aepo jaa rè tapeja'a jẽ peiko ipi.

¹⁹ A'evo mãe kõ oike sikaepo Jesu koty rewarà kõ pytery pè poromojimõarõoka tesõ, ãwisõ tojimoe'y e'yi ojiwyi kupa. Ojevo jẽ rõwã omojipy'amogetaoka kõtà kupa ky'y. A'evo ekoi mãe kõ wemimota ai kõ rè tè oja'a ipi. Upi ekoi kupa ipi. Janejare'e 'Ãg rõwã omotekokuwa kõ. Ovote ojimotekokuwa rã'ãga kupa ky'y.

²⁰ Ajawyi kee a'e pejẽ, ejimorypa kõ. Tapejimokasiay ikõ Jesu Kiristu rè pejirovija jẽ nẽ. Aje ywete ijayvu mã'ẽ tè Jesu Kiristu ipi. Temirovija tè ijayvu. Ajawyi tapejirovija jẽ ee, a'e pejẽ. I'Ãg ikõ tapemotekokuwa okasia rupi peporegeta Janejare'e pè remẽ nẽ.

²¹ Janejare'e penauvay. A'e rè tapeja'a jẽ peiko ipi. Kãramõ Janerõvijã Jesu Kiristu janereraatà okoty, opyri tijaiko karuaru ky'y. Janeporijauesa wyi tè a'evo janererekotà. A'evoa rã rè tapeja'a jẽ imoa'u peiko.

²² Jesu koty rewarà kõ mõ sõ nojirovija ywe'ei sikaepo ee remẽ, tapeporijauesa kõ jẽ ãmẽ. Tapeau kõ jẽ ipi. “Aje põkõ mijã?” e'i sõ kupa remẽ, tapeaka kõ e'ã ãmẽ.

²³ Tapemokasi kõ ipijarĩ kõ imomorijaua rã wyi. Ãwitõ tata pè o'a mã'ẽ japijarĩ kuise'ẽay tokai e'ã, ãwĩvo ve nojirovija ywe'ei ee mãe kõ tijareko katu kõ. Ãmõ kõ nivoi ekoi mãe kõ ve tijaporijauesa jẽ, “Erory wyi tè agyvo ije”, e'i tite mãe kõ. Ãwitõ kamisa iky'a remẽ, manyvo nijareko'ãi imoje'o iwyi mã'ẽ vo sõ tite eko aiwerà kõ. A'evo kamisa jamomo imono. “Temoky'a e'ã!” ja'e imomo. Ijarà nijamomoi ajamã'ẽ. Japorijauesa jẽ. Kamisa pyaukwerà jame'ẽ ijupe topypy. Ãwĩvo ve nivoi ekoi mã'ẽ japorijauesa jẽ. Ajamã'ẽ eko aiwerà jaityoka ijupe.

Kareta awyjepatà remẽwarà

²⁴ Ikasiay wete Janejare'e Janerõvijã ywete rõmõ. Nojityoka'ãi janeupe. Janereraatà okoty. Naikoi 'ete janeaiwererà janere mãe kõ rõmõ janereraatà okoty. Ãmẽ sõsi janeroryvaytà ipyri jaiko. Owa katu jaikotà ãmẽ. Nijanemãrã'ãi ipyri ky'y.

²⁵ Ajawyi a'evoa rã rè simoe'e amãtejẽ jaiko! Jesu Kiristu rè jajirovija Janerõvijã ywete rõmõ ipi. Ajawyi emĩgwai kõ rõmõ simoe'età Janejare'e ipi. Kee ja'età: Ene rõmõ'ĩte Janejare'e rõmõ neiko! Nuvei 'ete nevo mã'ẽ! Ene rõmõ'ĩte neiko! Orerereko katuarà rõmõ ene neiko! Ene ywesõ nekatuay wete orerõvijã wasu rõmõ neiko! Ene ywesõ nekasiay wete oreupe neiko! Ene ywesõ neayvukasiay Jõvijã wasu rõmõ neiko! Ãwitõ yvy jinõ e'ãve temimoe'e rõmõ neiko, ãwĩvo jẽ age'e remẽ neiko! ja'e imoe'e. Õ'õ, awyje katu ãwĩvo jamoe'e karuaru jaiko ipi. [Awyjepa eremikusiwarerà ky'y.]