Epesu 1 - Wayampi

Pauru ojikuwa ijupe kõ

¹ Ije Pauru, aã kareta akusiwa ajupa. Kiristu Jesu tè itõkõ emonooka wayvukwerà mojenuarà rõmõ taiko. Janejare'e remimota rupi a'evo aiko ipi. Aã kareta akusiwa pejẽ ajupa, Epesu taa wãnà kõ pè, Janejare'e rè pejirovija katu mãe kõ pè, Kiristu Jesu revejẽ peiko mãe kõ pè.

² Janeruwasu ikõ tapenereko katuay okatuaya rupi nẽ. Tapepy'amopiryvypy katu teve ikõ ipi nẽ. Ãmõ, Janerõvijã Jesu Kiristu teve ikõ ta'evo penereko nẽ.

“Janejare'e simoe'e”, e'i mã'ẽ

³ Janejare'e janemojimo'yokapa Wa'yry Kiristu rè, eevejẽ tijaiko. A'e itõkõ oẽma oo yva pupe. Aja rewarà mõ eevejẽ yva pupe jaiko maevo sõ tite Janejare'e pè. Ãmõ, moma'e e'ekweray Janejare'e o'Ãg pupe omojikuwaoka janeupe. Iteetejẽ werekooka janeupe, owaray tijaiko ãmẽ. Ajawyi Janejare'e ywesõ simoe'e ipi, Janerõvijã Jesu Kiristu Ruu.

⁴ Yvy jinõ e'ãve janepyteporo amãtejẽ oupewarà kõ rõmõ tijaiko. A'evoa rõmõ Kiristu rè janemojimo'y janerereko, eevejẽ tijaiko. Ajawyi javãe ovake remẽ, kee e'ità janere omãjã: “Aje, epy'a rupi katuwarà kõ tè pejẽ”, e'ità. “Ivo katu mã'ẽ rõmõ tè pejẽ”, e'ità janere omãjã ãmẽ. Nivoi mã'ẽ jẽ rõwã omo'ytà janere ãmẽ ky'y, Kiristu revejẽ jaiko mãe kõ rõmõ. A'evoa rõmõ janepyteporo amãtejẽ karamoeve.

⁵ Janerauvay teãmã karamoe remeve. Ajawyi kee e'ipa amãtejẽ janeupewarà mõ: “Apota eãkarãgwerà kõ rõmõ areko kõ”, e'ipa jane. “Ajawyi Jesu Kiristu amonookatà ikoty kõ tomãnõ ekovijarerà kõ rõmõ, ijaiwererà kõ repykarà mõ. A'evo areko kõtà eãkarãgwerà kõ rõmõ toiko kupa”, e'ipa Janejare'e karamoe remeve janeupe.

⁶ Wa'yry wauvay Janejare'e. Ajawyi janemoje'arĩ Wa'yry revejẽ janerauvay janerereko ipi. A'evoa rè simoe'e ywete ipi.

⁷ Omãnõ janerekovijarerà rõmõ remẽ, Kiristu janerekyi nivoi tekoua wyry kyty wyi, Uu kyty janererojivy ky'y. “Awyjepa” e'ipa Janejare'e janeaiwererà pè ãmẽ ky'y. Aje janerauvay wete Janejare'e.

⁸ Ajawyi tè age'e remẽ ikatuay janerereko ky'y. Okatuaya rupi a'evo janerereko. Wemikuwa rupi a'evo janerereko. Otekokuwavay Janejare'e.

⁹ Karamoe remẽ Janejare'e e'ipa amãtejẽ manyvotà janerereko, Kiristu revejẽ jaiko mãe kõ rõmõ tijaiko. Ikatuay wete janerereko ipi. A'evoa rã nomojikuwaokaive jane kõ pè karamoe remẽ. Age'e si omojikuwaoka janeupe ky'y, otekokuwavaya rupi.

¹⁰ Kee e'ipa amãtejẽ: “Ereminõgwerà kõ pirujẽ Era'yry wyry kyty ainõtà”, e'ipa amãtejẽ Janejare'e. “Ãwitõ yvapewarà kõ iwyry kyty ainõtà, ãwĩvo vetà yvy pewarà kõ areko”, e'ipa. Janejare'e tè e'i manyvo 'arà remẽ tè a'evoa oinõtà. Ãmẽ tè pirujẽ weminõgwerà kõ omoatyokatà Kiristu wyry kytywarà kõ rõmõ toiko ky'y.

¹¹ Karamoe remeve Janejare'e kee e'ipa janeupewarà mõ, “Ekoty rewarà kõ rõmõ toiko kupa, Era'yry revejẽ ekoi mãe kõ rõmõ”, e'ipa janeupe. Aepo e'ipa janeupewarà mõ karamoeve. A'e rã rõmõ tè janereinõ. Wemimota rupi katu tè a'evo janerereko. Ekoa tè a'evo ekoi ipi.

¹² Ore ypy Juteu kõ rõmõ orojirovija Kiristu rè. A'evoa rõmõ orepyteporo, ãwisõ ikatuaya moe'earà rõmõ toroiko ky'y.

¹³ Aje ywete Janejare'e ayvu e'eay Jesu rewarà. A'e ojenu ypy pejẽ remẽ itõkõ, “aje ywete” pejẽ ijupe enu. Kiristu rè pejirovija ãmẽ peiko ky'y. A'evo Janejare'e penereko katu oupewarà kõ rõmõ ãmẽ penereko. Ajawyi o'Ãg oinõ pepy'a pupe wayvukwerà rupi katu. A'e pupe okoty rewarà kõ rõmõ pemosã'ãga penereko.

¹⁴ O'Ãg oinõma janepy'a pupe. Ajaa rupi kee jaa omojikuwaoka jane: “Eãkarãgwerà rõmõ tè peiko ky'y. Ajawyi e'Ãg tẽ tesõ ainõma pepy'a pupe. Aje ywete kãramõ poroekyità peneraa erena ywe'e kyty awyje tapeiko karuaru epyri”, ejaa omojikuwaoka jane. Ãmẽ ywesõ ikatuaytà jaiko ãmẽ ky'y. Ajawyi simoe'e ywetetà Janejare'e, ikatuay wete janerereko rewarà mõ.

“Janejare'e pè aporegeta peupewarà mõ ipi”, e'i mã'ẽ

¹⁵ Jypy remẽ kee jaa ojenu ije penewarà: “Ojirovija katu Janerõvijã Jesu rè kupa”, ejaa ojenu ije. Ãmõ, “Wauvay pirujẽ Jesu koty rewarà kõ kupa ipi”, ejaa ojenu teve ije.

¹⁶ Eroryvay aepo aenu remẽ. Amoe'e ywete Janejare'e penewarà mõ ãmẽ aiko ipi. Napi tesõ Janejare'e moe'e peupewarà mõ aiko ipi. Ãmõ, “Ereko katu kõ, Papa”, a'e peupewarà mõ ipi.

¹⁷ Kee a'e teve peupewarà mõ: “Emotekokuwavay kõ ikõ ne'Ãg rupi nẽ, Papa”, a'e peupewarà mõ ipi. “Ãmẽ ywesõ nekuwa katutà kupa, ne'Ãg tè nemojikuwaokatà ijupe kõ rewarà mõ”, a'e peupewarà mõ. Janerõvijã Jesu Kiristu Ruu pè aepo a'e, a'e ywesõ ikasiay mã'ẽ pè.

¹⁸ Kee a'e teve peupewarà mõ: “Epy'amotekokuwa kõ ikõ ereko nẽ, ãmẽ ywesõ nerekoa aje ywete mã'ẽ tokuwa katu kupa. Tokuwa amãtejẽ teve manyvotà tekoua kãramõ nerena pè oroiko mã'ẽ”, a'e peupewarà mõ, ãwisõ a'evoa rã rõmõ pepyteporo amãtejẽ. Ãmõ, “Ikatuaytà pirujẽ nekoty rewarà kõ nemoatypa nerena pè nepyri remẽ. A'evoa rã rè emotekokuwa kõ tokuwa amãtejẽ kupa”, a'e peupewarà mõ ipi.

¹⁹ Kee a'e teve peupewarà mõ: “Emotekokuwa kõ nekasia tokuwa kupa, kejavõigà mã'ẽ rõwã nekasia rewarà mõ”, a'e peupewarà mõ Janejare'e pè. Aje, ikasiay wete Janejare'e kasia. Okasia rupi sitõ janerereko jajirovija ee mãe kõ rõmõ.

²⁰ Okasia rupi sitõ Kiristu omomoeraoka omãnõ maire toiko mijẽ. [Ajawyi teãgwerà vo rõwã ekoi ky'y.] Ajaire o'ekatu kyty omoapyoka wena yva pè, weeve Jõvijã wasu rõmõ toiko ky'y. Okasia rupi teve a'evo wereko.

²¹ Ijayvukasiay wete Kiristu ãmẽ ky'y. A'e ywesõ ijayvukasiay wete mã'ẽ rõmõ ekoi. Pirujẽ yvapewarà rõvijã kõ 'arà kyty ekoi. Pirujẽ ija mãe kõ 'arà kyty teve ekoi. Age'e remẽ nuvei 'ete ãmõ ywesõ ijayvukasi Jesu wyi mã'ẽ. Nuvei 'ete wete mijẽsi! Ãwĩvo ve kãramõ nuve'ãi teve Jesu 'arà kyty ekoi mã'ẽ mõ.

“Kiristu ro'o tè jane ky'y”, e'i mã'ẽ

²² Janejare'e omojõvijã wasu wetepa Kiristu, pirujẽ moma'e kõ 'arà kyty toiko ky'y. Pirujẽ ojirovija ee mãe kõ Rõvijã wasu rõmõ ekoi teve ky'y. Ajawyi ikatuay jane ky'y, ikoty rewarà kõ rõmõ jaiko.

²³ Jane'y tè Kiristu. Kiristu pirà vo tè jaiko ky'y. Okasia pupe janeroupaoka ky'y. Pirujẽ weminõgwerà kõ ooupa. Mape jẽ rõwã na'evoi wereko kõ. Yva pè ekoi teve. Yvy pè ekoi teve. A'evoa rè sitõ apota tapejimotekokuwavay peiko ipi.