2 Timoteu 1 - Wayampi

¹ Ije, Pauru, kareta akusiwa ajupa. Kiristu Jesu remimonokwerà tè ije. Janejare'e ywe'e epyteporo Kiristu remimonokwerà rõmõ taiko, ijayvukwerà kee e'i mã'ẽ tamojenu erokwa: “Kiristu Jesu rè jajirovija remẽ, ipyri jaiko karuarutà ãmẽ, e'ipa maekwerà rupi katu”, e'i mã'ẽ. Aepo jaa amojenu erokwa ãmẽ.

² Aã eremikusiwarerà amono tarà mijẽ neupe, Timoteu. Era'yre'e vo ene, eremiau tè. Janejare'e ikõ tanerereko katu okatuaya rupi nẽ, a'e ene. Taneporijauesa teve ikõ ipi nẽ. Tanepy'amokatu teve ikõ ipi nẽ. Janerõvijã Kiristu Jesu ve ikõ ta'evo nerereko nẽ, a'e ene.

“Terejipirau e'ã ikõ Jesu rekoa mojenua rè neiko nẽ”, e'i mã'ẽ

³ Janejare'e pè aporegeta remẽ upi upi, neupewarà mõ aporegeta ijupe ipi. Aryvo rupi aporegeta neupewarà mõ ipi. Pya rupi ve aporegeta neupewarà mõ ipi. Eroryvay aiko, oromovyvy Janejare'e pè remẽ ipi. A'e tè aje ywete amoe'e ipi, epy'a pupe tè amoe'e remẽ. Nepy'a ky'ai amoe'e remẽ ipi. Ãwitõ erãmõi kõ omoe'e ywete ipi, ãwĩvo ve aiko ipi.

⁴ Jypy remẽ ajivy aa newyi remẽ itõkõ, neãgyoay wete ere emono. Neja'o wete itõkõ ere emono. A'evoa rè aja'a remẽ, oroekaray ipi. Apota katuay amã'ẽ mijẽ nere. Ãmẽ sõsi janeroryvay tarà mijẽ ojee jamãjã ky'y.

⁵ Ajipy'amogeta jẽ nere aiko ipi. Karamoe remẽ itõkõ nejaryi Roiti, Jesu Kiristu rè ojirovija ypy. Ãmõ, ney Eunisi ojirovija ve ee. A'e reruparà kõ rõmõ neiko ky'y. Akuwa jẽ a'evo neiko mã'ẽ, tuku. Aje ywete nejirovija ee neiko ipi.

⁶ Ajawyi kee a'età ene, tereja'a jẽ ee. Jypy remẽ epo ainõ neapyte 'aryvo aporegeta Janejare'e pè maekwerà rè tereja'a jẽ neiko, Janejare'e ome'ẽma amãtejẽ o'Ãg neupe maekwerà rè. Aekwerà rè tereja'a jẽ neiko. Aekwerà rupi ve ikõ mirà kõ teremotekokuwa ereko nẽ, a'e neupe.

⁷ Ajamã'ẽ o'Ãg ome'ẽ jane remẽ, poromogyje mã'ẽ rõwã ome'ẽ jane ipi. Poromokasiay mã'ẽ tè ome'ẽ jane. Ãmõ, poromojiauvayoka ojee mã'ẽ tè ome'ẽ jane. Ãmõ, poromojireko katuoka mã'ẽ tè ome'ẽ jane. A'evoa rõmõ o'Ãg ome'ẽ jane ipi.

⁸ Ajawyi Janerõvijã ywete rekoa rè poromotekokuwa remẽ, terejipirau e'ã poromotekokuwa ipi, a'e neupe, Janejare'e janemokasipa o'Ãg pè rewarà mõ. Ãmõ, terejimosĩoka e'ã ikõ ewyi ipi nẽ, jimopã'ãga pè aju remẽ, a'e neupe. [Nivoi aiko rewarà mõ rõwã agyvo ike jimopã'ãga pè aju ajupa.] Jesu rekoawerà amovyvy aiko ipi rewarà mõ tè agyvo erereko kupa. Ajawyi terejimosĩoka e'ã ikõ ere nemãjã nẽ, a'e neupe. Evokwery pè nemomorijautà ajaire kupa, Jesu ayvu mojenuarà teve ene rewarà mõ. Ajamã'ẽ teremovyvy ikõ Janejare'e kasia rupi ipi nẽ.

⁹ Aje Janejare'e janerereko katu janeaiwererà wyi. Janepyteporopa okoty rewarà kõ rõmõ tijaiko ky'y. Janerauvay rewarà mõ a'evo janepyteporo. Janevote janekatuay rewarà mõ rõwã a'evo janerereko. Wemimota rupi tè a'evo ekoi. Karamoe remẽ, yvy jinõ e'ãve, oja'a amãtejẽ a'evo janerereko katua rã rè. Kee e'ipa amãtejẽ karamoe remeve: – Era'yry Kiristu Jesu mãnõa rupi areko katu kõtà, e'i amãtejẽ. Aekwerà rupi katu tè a'evo ekoi.

¹⁰ Age'e tè katu a'evoa omojisaoka jane ky'y. Kiristu Jesu vãea rupi tè jamã'ẽ gatu ee, Janerereko katuarà vãea rupi. A'evoa rupi teve mãnõa kasia omoma. Wayvu e'eay rupi jaiko karuarua rã omojikuwaoka jane ky'y.

¹¹ Karamoe remeve Janejare'e epyteporopa amãtejẽ emono Jesu ayvu mojenuarà rõmõ taiko. Jesu rekoa rè toporomotekokuwa mã'ẽ rõmõ taiko ky'y.

¹² Ãwĩvo aiko ky'y rewarà mõ, ajimomorijau Jesu ayvu noerovija tari mãe kõ po pè ajupa. A'evo ipe erereko kupa remẽ, najimosĩoka'ãi aiko ãmẽ. Akuwa temirovija rã teãmã mã'ẽ rè ajirovija. Akuwa ikasi mã'ẽ tè. Ãmõ, akuwa aje ywete e'i mã'ẽ tè. Wayvukwerà omokatuoka jẽtà eupe. Nomokãjãoka'ãi wayvukwerà okoty rewarà kõ wyi ipi. Wayvu e'eay ome'ẽma ije jypy remẽ. Awyje ijayvu ekoi jẽtà. Ãmõ, wekoa rè mosikoa, a'evoa nomokãjãoka'ãi teve. Wa'yry vãea pe'ĩ tesõ a'evotà ekoi.

¹³ Ajawyi kee a'e ene, tuku. Ãwitõ Janejare'e ayvu e'e rè kõrijõ tè oromotekokuwa ipi, ãwĩvo ve ijayvu e'e rè kõrijõ tè teremotekokuwa jane kõ ipi. Kiristu Jesu ojirovijaoka jane rewarà mõ, ãwĩvo tereiko ipi. Ãmõ, poroauvayoka Janejare'e ipi rewarà mõ, a'evo tereiko ipi.

¹⁴ Janejare'e o'Ãg tẽ tesõ oinõ Jesu koty rewarà kõ py'a kõ pupe ipi. I'ãg nemotekokuwatà wayvu e'e rè nerereko. Nepy'amokasità teve nerereko ipi. Ajawyi ijayvukwerà omotee tite mãe kõ wyi terejimokatu jẽ neiko ãmẽ, i'Ãg kasia rupi.

¹⁵ Nekuwa pirujẽ Asia yvy wãnà kõ ereitypa oo ky'y, Jesu koty rewarà kõ. Ãmõ, kejõ ve ereity oo. Pijeru. Ãmõ, Emojeni. Mokopejõ ereity oo kupa mãe kõ.

¹⁶ Ajamã'ẽ Onesipuru nereityi ipi. Ipyriwarà kõ ve nereityi ipi. Epãtavõ teve emokasi kupa ipi. Nosĩ'ãi ewyi kupa jimopã'ãga pupe aju remẽ. Uu uu jimopã'ãga pè eresa epãtavõ kupa ipi. Ajawyi Janerõvijã Jesu pè kee a'e: “Eporijauesa ikõ Onesipuru kõ ereko katu ipi nẽ”, a'e ijupe ipi.

^17-18 Nekuwa katu manyvo Onesipuru epãtavõ ywete, Epesu taa pè aiko remẽ. Aekwery vo jẽ ekoi, Romã taa pè. Ike Romã taa pè ovãe remeve, ereka tite. Ajaire ajaate eresa ky'y. Ajawyi Janerõvijã ywete topy'a mokasi, kee te'i: “Aje ywete Erõvijã ywete eporijauesatà, ojivy uu mijẽ remẽ”, te'i.